Jeremaia 5:10 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁰ “Ia Israelian apaniba, ia mangɨ men wainɨn azenibar aruva dagh asɨghasɨgh. Egh bar dagh asɨghasɨghan markɨ. Purama adar aghariba aghoregh. Wainɨn ikarɨzir agharir kaba, da nan biziba puvatɨ. Kamaghɨn amizɨ, ia dar aghariba aghoregh.

Jeremaia 5:10 ပူးပေါင်းရင်းမြစ်များ

Jeremaia 4:27

Egha Ikiavɨra Itir God, kamaghɨn mɨgɨa ghaze, “Kɨ bizir kabar amightɨ da otivasa uan nɨghnɨzim gamigha gɨfa. Egh kɨ ua uan nɨghnɨzim giraghan kogham. Nguazir kam, kɨ a damightɨ a mangɨ bar danganir kɨnimɨn otogham. Egh kɨ bar a gasɨghasighan kogham. Eghtɨ bizir mɨngarir kam bagh, nguazim azirakar onger akabar amutɨ, overiam pɨn pɨghatomegham.”

Matyu 22:7

“Kamaghɨn amizɨ, atrivim puv atari, egha uan mɨdorozir gumaziba amada. Ezɨ me ghua an ingangarir gumazibav soghezir gumaziba, me mɨsogha bar me agɨvaghava, men nguibar ekiam gaborozɨ a isi.

Hosea 1:9

Ezɨ Ikiavɨra Itir God Hosea mɨgɨa ghaze, “Nɨ ziar kam a datɨgh, ‘Loami.’ Ziar kamɨn mɨngarimra kara, Ia Israelia, ia nan gumazamiziba puvatɨ. Eghtɨ kɨ ian Godɨn ikian kogham.”

Jeremaia 39:8

Ezɨ Kaldiabar mɨdorozir gumaziba Jerusalemɨn ikia atrivimɨn dɨpenim ko gumazamizibar dɨpenibagh apongezɨ da isi. Egha Jerusalem avɨnizir dɨvaziba bar da akaragharɨki.

Amos 9:8

Kɨ Ikiavɨra Itir Godɨn Ekiam, kɨ gara fo, arazir kuram bar ia gizɨfa. Egha kɨ uan damazimɨn bar deravɨra Israelia, ian arazibar gari. Kamaghɨn amizɨ, kɨ bar ia gasɨghasɨgh ia agɨvagham. Eghtɨ Jekopɨn ovavir boribar tongɨn ikiavɨra itir varazira, kɨ me gasɨghasighan kogham, me ikɨvɨra ikiam. Kɨ Ikiavɨra Itir God, kɨ kamaghɨn mɨkeme.

Esekiel 14:17

“Egh kɨ maghsuegh, mɨdorozir sababar suighizɨ apaniba kantrin kam bagh me amadaghtɨ, me izɨ gumazamiziba ko asɨziba uaghan bar me kuavaremegham.

Esekiel 12:16

Kɨ men varazira ateghtɨ me ikɨ, mɨdorozim ko, dagheba otevir dughiam ko, arɨmariar kurabar arɨmɨghireghan kogham. Egh kantrin igharazibar tongɨn ikɨ, me amizir arazir kurar kɨ bar aghuaziba me uari dar gun mɨkɨmam. Eghtɨ me fogh suam, kɨrara kɨ Ikiavɨra Itir God.”

Jeremaia 46:28

Kɨ Ikiavɨra Itir God, kɨ kamaghɨn mɨgei: Kɨ ia ko ikɨ ian akurvagham. Kamaghɨn amizɨ, Ia Israelia, ia nan adarasi, ia nan ingangarir gumazamiziba, ia atiatingan markɨ. Kɨ ia batoghezɨ, ia ghua kantrin igharazibar tongɨn iti. Eghtɨ kɨ kantrin kaba bar me agevegham. Egh kɨ ia agɨvaghan kogham. Guizbangɨra, kɨ puv ia damigham, kɨ arazir voroghɨra itim gɨnɨghnɨgha ia akɨri.”

Jeremaia 30:11

Kɨ Ikiavɨra Itir God, kɨ ia ko ikɨ ian akurvagham. Kɨ ia batoghezɨ, ia ghua kantrin igharazibar tongɨn itiba, kɨ bar me agɨvagham. Egh kɨ ia agɨvaghan kogham. Guizbangɨra, kɨ puv ia damigham, kɨ arazir voroghɨra itim gɨnɨghnɨgha ia akɨri.”

Jeremaia 25:9

Kamaghɨn amizɨ, ia oragh! Kɨ Ikiavɨra Itir God, kɨ notɨn amadaghan itir ikɨzibar diaghɨva, egh uaghan Babilonɨn Atrivim Nebukatnesar, an diagham, a nan ingangarir gumazimɨn mɨn ami. Egh kɨ me inigh izɨtɨ, me nguazir kam ko an boroghɨn itir kantriba dagh asɨghasɨgham. Eghtɨ me ikuvigh mamaghɨra ikiam. Eghtɨ gumazamizir igharaziba men ganigh, akɨrim ragh me gasɨ dɨbovir akabar me mɨkɨmɨva, egh dɨgavir kuram damuva, egh puvɨram atiatingam. Eghtɨ nguazir kamɨn gumazamiziba aghumsɨzim ikɨ mamaghɨra ikiam.

Jeremaia 5:18

Egha Ikiavɨra Itir God, dughiar kamɨn ua kamaghɨn na mɨgei, “Apaniba dughiar kamɨn izɨ, egh Israelia bar me gasɨghasighan kogham.

2 Eghaghaniba 36:17

Kamaghɨn amizɨ, Ikiavɨra Itir God Babilonɨn atrivim amadazɨ, a uan mɨdorozir gumaziba ko iza mɨdorozir sababar Judabagh asɨghasɨki. Egha me Ikiavɨra Itir Godɨn Dɨpenimɨn ghua gumazir igiabav soghezɨ me ariaghire. Atrivim gumazir igiaba ko, amizir igiaba ko, gumazamizir ghuriba ko, amughamughiziba sara, bar tong men apangkuvizir puvatɨ. Ikiavɨra Itir God bar Judaba isa Babilonɨn atrivimɨn dafarim gatɨ.

Jeremaia 5:9

Kɨ Ikiavɨra Itir God, kɨ ghaze, Gumazamizir kaba nan ziar ekiam gasɨghasɨsi. Kamaghɨn, kɨ guizbangɨra gumazamizir kabar arazir kuraba ikarvaghɨva, bar me gasɨghasigham.

Jeremaia 5:11

Guizbangɨra, Israelia ko Judabar gumazamiziba, me akɨrim ragha bar na gasaragha gɨfa. Kɨ Ikiavɨra Itir God, kɨ mɨkemegha gɨfa.”

2 Eghaghaniba 12:4

Mɨdorozir gumaziba mɨsogha, kantri Judan nguibar ekiar dɨvazir bar gavgaviba avɨniziba inigha, iza Jerusalemɨn boroghɨn otifi.

Jeremaia 2:21

Kɨ nguazir kamɨn ia atɨ, mati gumazim uan azenimɨn wainɨn ikarɨzir aghuir mam ginabagha anekara, eghtɨ a gɨn bɨva ovɨzir bar aghuiba ikiam. Ezɨ manmaghɨn amizɨ ia datɨrɨghɨn iragha ruarimɨn wainɨn ikarɨzir atiamɨn mɨn oto?