Jeremaia 49:31 - Godɨn Eghaghanim: Akar Gavgavir Dɨkɨrɨzir Ghurim ko Igiam

³¹ Ikiavɨra Itir God kamaghɨn Babilonia mɨgei: “Ia dɨkavigh mangɨ, gumazamizir deraghavɨra ikia bizitam bagha nɨghnɨzir puvatɨzibav sogh. Men nguibam dɨvaziba puvatɨ. Kantrin gavgavir tam men boroghɨn itir puvatɨ. Me uarira iti.

Jeremaia 49:31 ပူးပေါင်းရင်းမြစ်များ

Esekiel 38:11

Nɨ suam: Kantrin kamɨn gumazamiziba navir amɨrizimɨn ikiava deravɨra iti. Men nguibar ekiaba bar, dɨvazir gavgavir da avɨniziba ko tiar akar gavgaviba puvatɨ. Kamaghɨn amizɨ, kɨ pura aven mangɨ me korogham.

Maika 7:14

O Ikiavɨra Itir God, nɨ gumazamizir ua bagha mɨseveziba, nɨ me eghuvir gumazimɨn mɨn ikɨ, mati sipsipbagh eghuvir gumazim deravɨra uan sipsipbagh eghufi. Me ruarir arɨzibar mɨghsɨabar ikia, nguazir aghuiba puvatɨ. Ezɨ azenibar ingaramin nguazir aghuiba vɨn iti. Me faragha amizɨ moghɨn, nɨ men amamangatɨghtɨ, me mangɨ Basan Distrik ko Gileatɨn Distrighɨn nguazir aghuibar azenibar ingaram, mati sipsipba grazir aghuiba itir nguazim garua grazir avɨriba api.

Aisaia 47:8

“Nɨ dughiar aghuim baghavɨra nɨghnɨzir amizim, nɨ akar kam baragh! Nɨ ti ghaze, nɨ deravɨra ikɨtɨ, bizir kuratam nɨ batoghan kogham. Egha nɨ kamaghɨn uabɨ mɨgɨa ghaze, ‘Kɨ uabɨra kɨ gavgaviba bar iti, ezɨ tav nan mɨn itir puvatɨ. Kɨ amizir pam ko boriba ariaghirezimɨn mɨn otoghan kogham.’

Godɨn Araziba 33:28

Eghtɨ Jekopɨn ovavir boriba nguazir kam dapiagh deraghvɨra ikɨtɨ, apaniba ua izɨ me ko mɨsoghan kogham. Nguazir me itir kam, dɨmagarimɨn ghuariar dɨpaba izighirɨ a ruam, eghtɨ wit ko wainɨn avɨriba an otivtɨ me da iniam.

Dɨboboniba 23:9

Bar guizbangɨra, kɨ mɨghsɨabar orazibar itir dagɨar bar pɨn itibar ikia men gara fo, me gumazamizir igharaghavɨra itiba. Me fo, God deraghavɨra me gamizɨ, me ikɨzir igharazibar mɨn itir puvatɨ.

Sefanaia 2:15

Niniven adarazi nɨghnɨgha ghaze, me gavgavir ekiam iti, me ikuvighan kogham, kamaghɨn amizɨ, me bar akonge. Egha me ghaze, men nguibar ekiam a uabɨra kantrin igharazibar nguibar ekiaba, bar dagh afira. Ezɨ bar puvatɨ. Bizir kurar kaba Ninive bato. Ezɨ nguibam ikuvigha kamaghɨra ikia, asɨzir atiabar danganim gava. Gumazir an boroghɨn zuiba me atiatiava dapaniba roava bar an aghua.

Nahum 1:12

Ezɨ Ikiavɨra Itir God uan gumazamiziba Israelia, a kamaghɨn me mɨgei, “Asiriaba me bar avɨrasemegha gumazir gavgaviba iti, ezɨ kɨ me gasɨghasightɨ, me bar gɨvagham. Nan gumazamiziba, kɨ osɨmtɨzir ekiam ia gatɨ, egh kɨ ua kamaghɨn damuan kogham. Bar puvatɨgham.

Esekiel 39:6

“Kɨ Magokɨn nguazim ko ongarir dadaribar deravɨra apiaghav itir gumazamiziba avim me datɨgham. Eghtɨ me bar moghɨra fogh suam, kɨ Ikiavɨra Itir God.

Esekiel 30:9

“Dughiar kamɨn, Itiopiaba deravɨram apiagha ghaze, bizir kuratam me bativan kogham. Eghtɨ Isip ikuvightɨma, kɨ gumazitaba amadaghtɨ me kuriba inigh mangɨ Itiopiabav kɨm suam, Isip bar ikuvigha gɨfa. Eghtɨ Itiopiaba bar atiatigh dɨgavir kuram damigham. Ia ikiangsɨzir akam baragh! Dughiar kurar kam, bar roghɨra izi!

Jeremaia 48:11

Ikiavɨra Itir God kamaghɨn mɨgei: “Moapɨn kantri fomɨra igiamra ikegha iza datɨrɨghɨn dughiar kamɨn tu, apanitam iza a gasɨghasɨghizir puvatɨ, egha gumazamiziba inigha ghua kantrin igharazimɨn me isa kalabus gatɨzir puvatɨ. Moap mati wainɨn aghuim, gumaziba an ingarigha, anetaghizɨ a iti. Me dɨpar mɨsevir tabar a ruizir puvatɨ. Ezɨ an isɨngtɨzim kamaghɨra ikia, egha an mughuriam dera.

Aisaia 32:11

Datɨrɨghɨn ian dabirabim derazɨ ia ghaze, ia deravɨra ikiam. Egh ia atiating nɨghɨva akong uan korotiar aghuiba suva, azirakar korotiabar aghuam.

Aisaia 32:9

Ia Jerusalemian amiziba, ian dabirabim derazɨ ia ghaze, ia deravɨra ikiam. Egh ia deravɨra kuariba arigh nan akam baragh.

Onger Akaba 123:4

Dughiar bar ruarimɨn dagɨaba itir gumazamiziba dɨbovir akabar e mɨgɨa, uari fa pazava e gami. Ezɨ e bar amɨra.

Onger Akaba 73:12

Gumazir kurar kabar arazim kamakɨn, men dabirabim derazɨ, me bizir avɨriba ikia, egha ua inivɨra ikiasa.

Aisaia 42:11

Ia dakɨghtɨzir danganimɨn itir nguibabar gumazamiziba ko, Kedarian adarasi, ia tiariba akar an ziam fɨ. Ia Selan nguibamɨn gumazamiziba, ia mɨghsɨabar mavanegh dɨm mɨkɨm bar akongegh.