Jeremaia 48:15 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁵ “Atrivir kam, an ziam, Ikiavɨra Itir Godɨn Gavgaviba Bar itim, a kamaghɨn mɨgei: Apaniba izɨ Moap gasɨghasɨgh, an nguibaba iniam. Me Moapian gumazir igiar diribav soghɨrarɨgham.

Jeremaia 48:15 ပူးပေါင်းရင်းမြစ်များ

Jeremaia 50:27

Mati gumaziba bulmakaubav sozi moghɨn, ia Babilonɨn mɨdorozir gumazir gavgaviba bar me mɨsoghɨrarɨkigh. Ikiavɨra Itir God me gasɨghasɨghamin dughiam an otivasa, kamaghɨn amizɨ, me bar moghɨra ikuvigham.

Jeremaia 46:18

Ezɨ atrivimɨn ziar bar guizbangɨram atrivimɨn itim, a Ikiavɨra Itir Godɨn Gavgaviba Bar Itim. A kamaghɨn mɨkeme, “Kɨ zurara angamɨra iti, kɨ guizbangɨra mɨgei: Gumazitam izam. Eghtɨ an gavgavim bar gumazir igharazibar gavgavim gafiragham, mati Taborɨn Mɨghsɨam bar ruaragha, mɨghsɨar mabagh afira. Egha mati Karmelɨn Mɨghsɨam ongarir dadarimɨn ikia, bar pɨn mar iti.

Jeremaia 51:57

Atrivir kam, an ziam, Ikiavɨra Itir Godɨn Gavgaviba Bar Itim, kamaghɨn mɨkeme: “Kɨ Babilonɨn gumazir dapanibar amightɨ, me wainɨn dɨpabar ameghɨva onganigham. Kar fofozir gumaziba ko, gumazir ekiaba ko, gavmanba ko, mɨdorozir gumaziba. Me daku onganigh, ua dɨkavighan kogham.

Malakai 1:14

Ian tina, na ko ofa damuasa akam akɨrigha inabazir asɨzir mɨkarziba sara itir aghuiba ategha, asɨzir kurar mɨzɨrɨziba inigha Ikiavɨra Itir God, bagha izi. Ia ifavarir arazir kam bangɨn ia ivezir kuram iniam. Kɨ Ikiavɨra Itir Godɨn Gavgaviba Bar Itim. Kɨ atrivibar Ekiam, ezɨ kantribar gumazamiziba bar nan atiatia nan ziamra fe. Kamaghɨn amizɨ, kɨ bizir kam bagh ia gasɨghasigham.”

Akar Mogomem 19:16

Ezɨ an korotiar ruarim ko an buarakɨrimɨn, me ziar kam osiri: “Atrivibar Atrivir Ekiam ko, Ekiabar Gumazir Ekiam.”

Jems 5:4

Ia deravɨra oragh, ingangarir gumazamiziba ian azenibar dagheba isi, ezɨ ia me gifaragha men ivezir mabar anogoroke. Ezɨ ingangarir gumazamizir kaba me uan ivezibagh nɨghnɨgha, Godɨn dɨa ghaze, a ian arazir kuraba ikarvagham. Ezɨ ingangarir gumazamizibar dɨmdiam, Ekiar Gavgaviba Bar Itim, a baraki.

Sekaraia 14:9

Eghtɨ Ikiavɨra Itir God nguazir kamɨn kantriba bar dagh ativagh dar Atrivimɨn ikiam. Eghtɨ a bar uabɨra, gumazamiziba bar moghɨra ziar vamɨra a darɨgh, an ziam fam.

Daniel 4:37

Egha datɨrɨghɨn kɨ Nebukatnesar, kɨ Atrivir Uan Nguibamɨn Itim bagha bar akonge, egha an ziam fa ziar ekiam a ganɨdi. Kɨ fo, bizir ana amiba bar voroghɨra ikia bar dera. Egha a gumazir uan ziaba feba da dɨkabɨri.

Jeremaia 51:40

Mati gumaziba sipsipɨn nguziba ko, sipsipɨn apuriba ko, memen apuribagh ami moghɨn, kɨ men aku danganir me mɨsoghtɨ me arɨmɨghiramimɨn mangam.”

Jeremaia 48:4

Moap ikuvigham, eghtɨ men boribar ararem bar ekevegham.

Onger Akaba 47:2

Ikiavɨra Itir God, a Godɨn Bar Pɨn Itim, an atrivir ekiamɨn ikia nguazir kam gativagha an gari. Kamaghɨn amizɨ, e bar an atiatiava an apengan iti.

Amos 4:10

“Kɨ faragha Isipia bagha arɨmariar mam amadazɨ moghɨn, kɨ datɨrɨghɨn ian marazigh asɨghasɨghasa arɨmariar mam ia bagh anemada. Mɨdorozir dughiamɨn, kɨ apanibar amamangatɨzɨ, me ian gumazir igiabav soghezɨ me ariaghire. Kɨ ian apanibar amamangatɨzɨ, me ian hoziaba okeme. Gumazir ariaghirezibar kuaba, kɨ dagh amizɨ, dar mughuriar kuraba ian fetoribar aven zui. Kɨ bizir kabagh amizɨ, ia tong uan navibagh iraghasa nɨghnɨzir pu. Bar puvatɨ. Kɨ Ikiavɨra Itir God, kɨ kamaghɨn mɨkeme.”

Jeremaia 50:34

Ezɨ men Akurvazir Gumazim, a gavgavir ekiam iti, ezɨ an ziam kara, Ikiavɨra Itir Godɨn Gavgaviba Bar Itim. A men akuragh men apaniba abɨragham. Egh a dabirabir aghuim isɨ nguazir kamɨn gumazamiziba bar me danɨngam. Eghtɨ Babilonia puvatɨgham. A me damightɨ me pazɨvɨra ikiam.