Jeremaia 47:7 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁷ Ezɨ kɨ Ikiavɨra Itir God, kɨ ingangarir kam isa uan mɨdorozir sabam ganɨngi. Kɨ Askelonia ko ongarir dadarimɨn itir gumazamizir igharaziba sara mɨsoghasa mɨdorozir sabar kam amada. Kamaghɨn, a nɨmɨra ikɨ avughsan kogham.”

Jeremaia 47:7 ပူးပေါင်းရင်းမြစ်များ

Maika 6:9

Ia fofozir aghuim gifueghɨva, Ikiavɨra Itir Godɨn atiating an apengan ikiam. Ia oragh! Ikiavɨra Itir God Jerusalemɨn nguibar ekiamɨn diagha ghaze, “O nguazir kamɨn itir gumazamizir iza nguibar kamɨn uari akuviba, ia oragh!

Esekiel 14:17

“Egh kɨ maghsuegh, mɨdorozir sababar suighizɨ apaniba kantrin kam bagh me amadaghtɨ, me izɨ gumazamiziba ko asɨziba uaghan bar me kuavaremegham.

Aisaia 10:6

Nan gumazamizir kaba na ategha uamategha nguazir kamɨn bizibagh amua, na gamizɨ kɨ bar men anɨngaghe. Kamaghɨn amizɨ, kɨ Asiriaba amadaghtɨ, me mangɨ gumazamizir kɨ anɨngaghavɨra itir kabagh asɨghasɨgh, egh me dɨkɨtɨ me mati gumazim tuavir beghneazim dɨti moghɨn me magɨram. Egh me uan ifongiabar gɨn mangɨ men bizir aghuiba me dama da mɨkegh, da inigh uan kantrin mangam.

Amos 3:6

Eghtɨ mɨdorozim nguibatamɨn aven otivsɨ, gumazamiziba fofoghsɨ me sɨgham giviam. Ezɨ ia manmaghɨn nɨghnɨsi, gumazamiziba atiatingam, o? Ezɨ kamaghɨra, nguibar ekiatam asɨghasɨzim a batogham. Ezɨ ia manmaghɨn nɨghnɨsi, Ikiavɨra Itir God ti asɨghasɨzir kam amadaz, o?

Esekiel 25:16

Kamaghɨn amizɨ, kɨ Ikiavɨra Itir Godɨn Ekiam, kɨ kamaghɨn mɨgei: Ia oragh! Kɨ uan agharir gavgavim amadagh Filistiaba bar me abɨragham. Men ziar mam Keretia, kar ongarir dadarimɨn ikiavɨra itir darasi, kɨ bar me gasɨghasigham.

Aisaia 37:26

“ ‘Senakerip, nɨ kamaghɨn fozir puvatɨ, kɨ fomɨra bizir kabar amuasa nɨ amɨsefe. Kɨ, nguibar gavgavir dɨvazir gavgaviba itiba, kɨ dagh asɨghasɨghasa, gavgavim nɨ ganɨngi. Ezɨ nɨ nan nɨghnɨzimra gɨn ghua nguibar kaba akaragharɨghizɨ da iregha, mati me dagɨaba pozibav kɨnizɨ, da iti.

Aisaia 13:3

Kɨ Babilon bagha nan navim bar nan ikufi, egha kɨ uabɨ uan mɨdorozir gumazir aghuir bar gavgaviba amɨsevegha, men diazɨ, me ize. Egha kɨ Akar Gavgavim me mɨkeme, eghtɨ me mangɨ Babilonia ivezir kuram me danɨngam. Mɨdorozir gumazir kaba, ziar ekiaba iti, egha Babilon mɨsoghasa bar akonge.”

1 Samuel 15:3

Kamagh amizɨ, nɨ uan mɨdorozir gumaziba inigh mangɨ Amalekia ko mɨsogh men biziba bar dagh asɨghasɨkigh. Egh gumazamiziba ko boriba, bulmakauba, sipsipba, kamelba ko donkiba bar dav sueghtɨ, da bar arɨghiregh. Ia tav ateghtɨ a ikian bar markɨ.’ ”

Jeremaia 48:10

Gumazamiziba Ikiavɨra Itir God me ganɨngizir ingangarim damuan aghuaghtɨ, a me gasɨghasigham. Egh a gumazir igharaziba mɨdorozir sabamɨn me mɨsueghtɨ me arɨmɨghirɨsɨ gumazitam mɨkemeghtɨ, gumazim a damighan koghtɨ, Ikiavɨra Itir God a gasɨghasigham.

Esekiel 21:30

“Ia mɨdorozir sabar kam isɨ uam an mɨsevim darugh! Ian amebam ia batezir nguazim, a ian nguibamra, kɨ ian arazir kuraba isɨ azenim datɨgh ia tuisɨgham.

Esekiel 21:9

“O nguazir kamɨn gumazim, nɨ gɨn izamin bizimɨn gun gumazamizibav kɨm suam: “Ekiam kamaghɨn mɨgei: Mɨdorozir sabar mam iti, mɨdorozir sabar kam me anemɨnezɨ a bar ghumigha iti. Me uaghan borem a gaghuizɨ a bar zuegha taghtasi.

Esekiel 21:14

“Nguazir kamɨn gumazim, nɨ datɨrɨghɨn, gɨn izamin bizim mɨkɨm uan dafaribav sogh. Eghtɨ mɨdorozir sabam okɨvɨra ikɨ mangɨ gumazamizir avɨriba okɨtɨ me arɨmɨghiregham. Kar mɨdorozir sabar kuar avɨriba kurim.