Jeremaia 4:1 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹ Ikiavɨra Itir God kamaghɨn mɨgei: “Ia Israelia, ia na bagh izɨsɨ, egh na baghvɨra izɨ. Ia pura tintinibar tuavir igharazibar mangan markɨ. Bar markɨ, ia nɨghnɨzir gavgavim narara ikɨ. Egh marvir guar kɨ bar aghuaziba nan damazimɨn da batokegh.

Jeremaia 4:1 ပူးပေါင်းရင်းမြစ်များ

Joel 2:12

Egha Ikiavɨra Itir God kamaghɨn mɨgei, “Guizbangɨra, bizir kurar kaba bar otivam, eghtɨ ia datɨrɨghɨra uan navibagh iragh ua na bagh izɨ. Egh dagheba ategh uan navir averiaba sara azi ua na bagh izɨ.

Jeremaia 3:22

Ikiavɨra Itir God kamaghɨn mɨgei: “Ia akɨrim gɨgha Ikiavɨra Itir God gasa zuir boriba, ia uamategh a bagh izɨ. Eghtɨ a ian arazir kuraba batueghtɨ, ia ua ghuamaghegham.” Ezɨ gumazamiziba kamaghɨn an akam ikaragha ghaze, “Nɨ en Ikiavɨra Itir God, en God, kamaghɨn e uamategha nɨ bagha ize.

Esekiel 43:9

Me datɨrɨghɨn ua asebar ziaba fan markɨ, mati tuavir amizimɨn arazir an amiba. Egh me uan atrivibar kuaba nan saghon da arɨkigh. Me kamaghɨn damightɨ, kɨ zurara men tongɨn ikɨ mamaghɨra ikiam.”

Jeremaia 25:5

Godɨn akam inigha izir gumazir kaba ghaze, “Ia bar vaghvagh navibagh iragh, tuavir kurar ia gɨn zuim atakigh, egh arazir kurar ia amiba atakigh. Egh arazir kaba ateghtɨ, Ikiavɨra Itir God ia ateghtɨ, ia nguazir a ia ko ian ovavibagh anɨngizir nguazimɨn deraghvɨra ikɨ mamaghɨra ikiam.

Jeremaia 3:12

Kamaghɨn amizɨ, Jeremaia, nɨ dɨkavigh notɨn amadaghan mangɨ dɨmɨva nan akamɨn gun kamaghɨn me mɨkɨm, Kɨ Ikiavɨra Itir God, kɨ ghaze, Israelia, ia nɨghnɨzir gavgavir nan itir arazim ataki, mati amizim uan pam ategha par igharazimɨn iti. Nan apangkuvir arazim a bar ekefe. Kamaghɨn ia uamategh na bagh izɨ. Kɨ ua navir kuram ian ikɨ zurara ian anɨngaghan kogham.

Jeremaia 3:1

Ikiavɨra Itir God ua Israelia mɨgɨa ghaze: “Gumazim uan amuim batueghtɨ a mangɨ gumazir igharazimɨn ikegh, egh uamategh uan par faragha ikezim bagh izeghtɨ, an par faragha ikezim uam a inian kogham. A kamaghɨn damightɨ, kantrin kamɨn nguazim nan damazimɨn bar mɨzegham. Israelia, ia tintinibar gumazir avɨriba isa me koma akuigha gɨfa. Egha datɨrɨkɨn ia uamategh na bagh izasa, a?

Jenesis 35:2

Ezɨ Jekop uan amuiroghboriba ko gumazamizir a ko itibav gɨa ghaze, “Ia uan asebar marvir guaba bar da batokegh. Egh arazir Godɨn damazimɨn zuezibar amu, egh korotiar zuruzibara aghu.

Hosea 14:1

O Israelia, ian arazir kuraba ia gamizɨ, ia asaghpora ire. Kamaghɨn amizɨ, ia uamategh Ikiavɨra Itir God, ian God bagh izɨ.

Hosea 2:2

Ezɨ God akar isɨn zuim uan gumazamizibagh amua ghaze: “O nan boriba, ian amebam ua nan amuimɨn mɨn itir puvatɨ, ezɨ kɨ uam an pamɨn mɨn itir puvatɨ. Ia pamten, a mɨkɨm a gakaghontɨ, a uan arazir tintinimɨn gumaziba ko akuim atakigh. A ua tuavimɨn amizimɨn arazim damuan markɨ.

2 Eghaghaniba 33:8

Ia nan gumazamiziba, kɨ mɨkemezɨ moghɨn, ia nan Arazir nan ingangarir gumazim, Moses, ia ganɨngiziba ko, arazir kɨ ifongeziba ko, bizir kɨ damuasa ia mɨkemeziba, ia bar dar gɨn mangɨtɨ, nguazir kɨ fomɨra ian inazir afeziabagh anɨngizɨ, ia datɨrɨghɨn apiaghav itim, kɨ an ia batueghan kogham.”

2 Eghaghaniba 15:8

Atrivim Asa, Odetɨn otarim Asarian akaba baraghizɨ, akar kaba, gavgavim an nɨghnɨzim ganɨngi. Ezɨ a Judan anabam ko Benjaminɨn anabamɨn nguazibar itir marvir guar God bar aghuaziba bar da batoke. Egha a uaghan Efraimɨn anabamɨn nguazimɨn itir mɨghsɨabar itir danganibar ghua, nguibar ekiar a mɨdorozimɨn inizibar marvir guaba saram otoke. Egha Asa ingangarir gumazibav kemezɨ, me Ikiavɨra Itir Godɨn Dɨpenimɨn azuarimɨn guamɨn boroghɨn itir ofa gamir dakozir kam bar deraghavɨra anekɨri.

2 Atriviba 23:24

Atrivim Josaia uaghan gumazir ariaghirezir gumazibar duaba ko mɨgeiba ko, nedazir muziarir gumaziba uan dɨpenibagh arɨziba ko, asebar marvir guar gumaziba ingarizir igharaziba sara batoke. Kar Jerusalem ko Judan nguibaba bar men asebar ziaba fer bizir kurar God bar aghuaziba, a bar da batoke. A kamaghsua, gumazamiziba Ikiavɨra Itir Godɨn Arazir Akɨnafarir kamɨn aven itiba bar dar gɨn mangasa a ifonge. Akɨnafarir kam, ofa gamir gumazibar dapanim Hilkia Ikiavɨra Itir Godɨn Dɨpenimɨn an api.

2 Atriviba 23:13

Josaia, Atrivim Solomon fomɨra ofa gamir dakozir Jerusalemɨn amadaghan aruem anadi naghɨn, Olivɨn Mɨghsɨamɨn sautɨn amadaghan itibagh asɨghasɨki. Aser kaba, aser amizir kuram Astarte, ko Moapian aser kuram Kemos, ko Amonian aser kuram Molek, Solomon dar ziaba fasa ofa gamir dakozir kabar ingari. Aser kaba, kar Ikiavɨra Itir Godɨn damazimɨn bizir bar kurar a bar aghuaziba.

1 Samuel 7:3

Ezɨ Samuel gɨn kamaghɨn Israelia mɨgei, “Ia guizbangɨra navibagh iragh ua Ikiavɨra Itir God bagh ua izɨsɨ, ia ikɨzir igharazibar aseba ko aser amizim Astarten nedazim batokegh. Egh ia Ikiavɨra Itir God bar an apengan ikɨva, a baghɨva teviba apɨr. Eghtɨ a ian akuragh Filistiaba batueghtɨ me ua ia gativaghan kogham.”

Gumazir Dapaniba 10:16

Egha Israelia uan marvir guaba makunigha, aseba ategha, ua Ikiavɨra Itir God baghavɨra iti. Ezɨ Ikiavɨra Itir God Israelia aterir osɨmtɨzir kabar gara ghua bar me giporpore.

Hosea 7:16

Osɨmtɨzibar dughiabar, me uarir akurvaghasa na bagh izir pu. Puvatɨ, me aser gavgaviba puvatɨziba baghavɨra zui. Me paza zuir tuavir kam, a mati barir pir kuram. Men gumazir dapaniba uari fa ghaze, me gavgavim ikia uari uan apaniba mɨdorozimɨn me abɨnigham. Ezɨ puvatɨ. Me mɨdorozimɨn aven arɨmɨghiregham, eghtɨ Isipia puvɨra men ingaravakam.”

Esekiel 18:13

Egh an namakam an dagɨaba inigh, ua da ikarvaghsɨ, an dagɨar an anɨngizim gisɨn, a ua dagɨar igharaziba isi. Gumazir kam ti angamɨra ikiam ti? Puvatɨgham. A ikian kogham. An arazir kurar kɨ aghuazir kabagh ami, kamaghɨn amizɨ, an ovengam. A uabɨ uan osɨmtɨzim bangɨn ovengam.

Esekiel 11:18

Egh me uamategh Israelɨn nguazimɨn izeghɨva asebar marvir guar kɨ bar aghuaziba, bar da batokegh.

Jeremaia 36:3

Eghtɨ Judaba bizir kurar kɨ me damuamibar akar kaba baregh, uan nɨghnɨzibagh ira uan arazir kuraba ateghtɨ, kɨ men arazir kuraba ko osɨmtɨziba gɨn amadagham.”

Jeremaia 35:15

Nan akam inigha izir gumaziba, kɨ dughiar avɨribar me amadima, me ia bagha izi, me nan ingangarir gumaziba. Me kamaghɨn mɨgɨa ghaze: Ia vaghvagh uan nɨghnɨzibagh ira uan arazir kuraba ategh, uan araziba akɨrigh. Egh ia asebar gɨn mangɨva, dar ziaba fan markɨ. Ia nan akar kamɨn gɨn mangɨva, nguazir kɨ ian ovaviba ko ia ganɨngizir kam, deraghvɨram an ikiam. Nan akam inigha izir gumaziba akar kamɨn gun ia mɨkeme, ezɨ ia nan akam barazir puvatɨgha, an gɨn zuir puvatɨ.

Jeremaia 24:9

Eghtɨ Kantrin Igharazibar Gumazamiziba, kɨ Judan amizir biziba baregh, dɨgavir kuram damigh, egh bar atiatigham. Guizbangɨra, kɨ apaniba ameghtɨ me izɨ Judan gumazamizir ikiavɨra itibav sueghtɨ me arɨghiregham, eghtɨ tarazi dagheba puvatɨgh arɨghiram, eghtɨ arɨmariar kuram tarazigh asɨghasightɨ me arɨmɨghiram. Kɨ me batueghtɨ me tintinibar mangegham. Eghtɨ arazir kamɨn, kɨ nguazir ia ko ian ovavibagh anɨngizir kamɨn aven, kɨ bar ia agɨvagham. Eghtɨ kantrin igharazir kabar gumazamiziba, kɨ Judaba batoghezɨ me dar ghueziba, me pazɨvɨra me damuva me dɨpovam. Egh gumazamizir kaba uan apanibar atar akar kurabar me mɨkɨm suam, ‘Ia Judaba ikuvizɨ moghɨn, ia ikuvigham.’ ”

Jeremaia 15:4

Eghtɨ Kantrin Igharazibar Gumazamiziba, bizir kɨ Judabagh amizir kam baregh atiatigh dɨgavir kuram damigham. Kɨ garima, Hesekian otarim Manase, a Judan atrivimɨn ikia, Jerusalemɨn aven arazir bar kurabagh ami. Ezɨ bizir kɨ amir kam, a Manasen arazir kuram ikarvasi.”

Jeremaia 4:4

Ia Judaba ko Jerusalemia, ia na bagha uan mɨkarzir mogomebar inibar ghoregha na ko akam akɨrizɨ moghɨn, kamaghɨra ia na baghvɨra ikɨ uari isɨ na danɨng. Ia kamaghɨn damighan koghtɨ, nan anɨngagharim avir ekiamɨn mɨn otogh, ia amizir arazir kuram bagh ian isitɨ, gumazitam anemungueghan kogham.”

Jeremaia 3:14

“Kɨ Ikiavɨra Itir God, kɨ kamaghɨn mɨgɨa ghaze, Ia gumazamizir akɨrim ragha na gasaraziba, kɨrara ian Ekiam, ezɨ ia nan boribara. Kɨ vaghvagh ian nguibaba ko ikɨzibar aven, ian tarazi inigh ua uan mɨghsɨam Saionɨn izam. Kamaghɨn amizɨ, ia uamategh na bagh izɨ.

Aisaia 31:6

Ia Israelia, ia Ikiavɨra Itir God, deragha a barazir puvatɨgha an akaba batosi. Egh ia uan navibagh iragh uamategh a bagh izɨ.

Josua 24:14

Egha Josua ghua kamaghɨn mɨgei, “Ia Ikiavɨra Itir Godɨn atiating, an akabar gɨn mangɨva, guizbangɨra an apengan ikɨ an ingangarim damuva, uan inazir afeziabar aseba batokegh, kar me fomɨra Mesopotemian kantri ko Isipɨn kantrin ikia dar ziaba fe.

Godɨn Araziba 27:15

‘Gumazitam asetamɨn marvir guam dagɨamɨn an ingari, o temetamɨn anekɨrigham, o ainɨn an ingarigh modogh an ziam fɨtɨ, Ikiavɨra Itir God gumazir kam gasɨghasigham. Bizir kaba, kar gumaziba uari ingarizir biziba, ezɨ Ikiavɨra Itir God, gumazamiziba marvir guabar ziaba fan a bar aghua.’ Eghtɨ gumazamiziba bar kamaghɨn akam ikaragh suam, ‘Bar guizbangɨra, God kamaghɨra damu.’

Godɨn Araziba 4:30

Egh ia osɨmtɨzir ekiam ikɨtɨ, bizir kurar kaba ia bativtɨ, ia navibagh iragh uamategh Ikiavɨra Itir God, ian God bagh mangɨ an akamɨn gɨn mangam.

Jeremaia 7:3

Kɨ Ikiavɨra Itir Godɨn Gavgaviba Bar Itim, Israelia ian God, kɨ ghaze, Ia uan daroriba ko arazibar kɨrigh deravɨram otoghtɨ, kɨ ia teghtɨ ia deraghvɨra uan nguazimɨn ikiam.

Jeremaia 7:5

Ian daroriba ko arazir ia datɨrɨghɨn amiba, ia da ategh tuavir aghuimɨn gɨn mangɨ. Egh arazir aghuibara uari damu ikɨ.

Jeremaia 7:7

Ia nan akar kaba bar dar gɨn mangɨtɨ, kɨ ia teghtɨ ia nguazir kɨ fomɨra ian inazir afeziabagh anɨngizir kam, ia an ikɨ deravɨra ikɨ mamaghɨra ikiam.

Jeremaia 15:19

Ezɨ Ikiavɨra Itir God kamaghɨn na ikaragha ghaze: “Nɨ akar kabanang ategh navim giragh ua na bagh izɨtɨ, kɨ ua nɨ inightɨ, nɨ ua nan ingangarim damuam. Egh nɨ akar kuraba akurir arazim ategh, akar aghuimram akunam, egh nɨ nan akatorimɨn mɨn ikɨ nan akamɨn gun mɨkɨmam. Eghtɨ gumazamiziba nɨn akaba baragh nɨn gɨn mangam. Nɨ men akaba baragh men gɨn mangan markɨ.

Jeremaia 18:11

“Jeremaia, nɨ kamaghɨn Judaba ko Jerusalemia mɨkɨm, ‘Kɨ Ikiavɨra Itir God, kɨ ghaze, ia oragh! Bizir kurar kɨ ia damuamim, kɨ anekɨrigha gɨfa. Kɨ ivezir kuram ia danɨngasava ami. Kamaghɨn amizɨ, ia vaghvagh uan arazir kuraba ategh, uan dabirabiba akɨrigh arazir aghuibara gɨn mangɨ.’

Sekaraia 1:4

Ia uan inazir afeziabar mɨn damu ikian markɨ. Fomɨra Godɨn akam inigha izir gumaziba nan akam me mɨkɨra ghaze, Ikiavɨra Itir Godɨn Gavgaviba Bar itim ghaze, ia pazavɨra itir arazir kuraba ataghɨragh. Ezɨ me na barazi puvatɨgha, nan gɨn izir puvatɨ. Kar Ikiavɨra Itir Godɨn mɨgɨrɨgɨam.

2 Eghaghaniba 34:33

Israelian danganiba bar asebar marvir guaba dar ikiavɨra iti, ezɨ bizir kaba Ikiavɨra Itir Godɨn damazimɨn bizir bar kurar a bar aghuaziba. Ezɨ Josaia marvir guar kaba bar adagh asɨghasɨki, egha Israelia Ikiavɨra Itir God, uan Godɨn gɨntɨghasa, bar gavgafi. Ezɨ an atrivimɨn itir dughiamɨn, gumazamiziba Ikiavɨra Itir God, men ovavibar Godɨn gɨntɨghasa bar gavgafi, egha me anetaghizir puvatɨ.