Jeremaia 33:6 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁶ “Eghtɨ kɨ gɨn nguibar ekiar kamɨn akuragham, eghtɨ nguibam ko an gumazamiziba ua deragh otivigham. Eghtɨ kɨ dughiar bar aghuim me danightɨ, me deragh dapiaghtɨ, apaniba me mɨsoghan kogham.

Jeremaia 33:6 ပူးပေါင်းရင်းမြစ်များ

Jon Osirizir Akar Aghuim 10:10

“Okɨmakɨar gumazim, a sipsipba okɨmɨva me mɨsoghtɨma me arɨmɨghiram, egh me gasɨghasɨghasa izi. A bizir igharazitam damuasa izir puvatɨ. Ezɨ ko, kɨ ia angamɨra itir ikɨrɨmɨrim iniasa, kɨ ize, eghtɨ ikɨrɨmɨrir aghuarim guizbangɨra ia gizɨvagham.

Aisaia 30:26

Eghtɨ dughiar kamɨn, iakɨnimɨn angazangarim aruemɨn angazangarimɨn mɨn siragham. Eghtɨ aruem isiragh gavgavightɨ an angazangarim bar ekevegh, a fomɨra garir angazangarim gafiragham. Mati nɨ 7plan aruebar aruer angazangariba inigha aruer vamɨra gisafura. Ikiavɨra Itir God uamategh uan gumazamiziba deravɨra me damu men mɨzaziba ko osɨmtɨziba adeghtɨ me ghuamagheghamin dughiamɨn, bizir kaba otivam.

Onger Akaba 67:2

Eghtɨ nguazimɨn gumazamiziba ganigh nɨn arazibagh fogham. Me kamaghɨn fogham, nɨ gavgavir bar ekiam ikia men akurvasi.

Aisaia 58:8

“Eghtɨ ia arazir kɨ ifongezir kabar amutɨ, kɨ zuamɨra ian osɨmtɨziba agɨvagham, mati aruemɨn angazangarim isiragha mɨtatem agɨfa. Egh kɨ ian mɨkarzibar amutɨ, ia zuamɨra ua deragham. Kɨ arazir aghuim gamir Ikiavɨra Itir God, kɨ ian faragh mangam. Egh kɨ angazangarim ko gavgavim sara ian gɨn izɨva, egh deravɨram ian ganam.

Hosea 6:1

Ezɨ gumazamiziba kamaghɨn mɨgei: “Aria, e uamategh Ikiavɨra Itir God bagh mangam. An e abɨagharigha gɨfa, egh a ti e damutɨ, e ua deravɨram otogham. An e mɨsoghezɨ duaba e batifi, egh a duar kaba ua da ikegham.

Aisaia 66:12

Egha Ikiavɨra Itir God kamaghɨn mɨgɨa ghaze, “Ia oragh! Kɨ Jerusalemɨn nguibar ekiam damightɨ, a zurara bar deravɨra ikiam. A kantrin igharazibar bizir aghuir avɨriba iniam. Mati faner zurara emɨra ivemara gevir puvatɨzɨ moghɨn, bizitamɨn oteveghan kogham. Ia bizir kaba iniva bar akuegham, mati borim amebamɨn otem apava bar akongezɨ, amebam a ifiragha aruima a bar akonge. Egha amebam a isa uan apozim gatɨgha a gikararaima, a bar akonge.

1 Pita 1:3

E Godɨn ziam fe, a en Ekiam Krais Iesusɨn Afeziam! Ezɨ an apangkuvir ekiam en ikia Krais Iesus gamizɨma a ua dɨkafi, ezɨ tuavir kamra, God ikɨrɨmɨrir igiam e ganɨngi. Ezɨ ikɨrɨmɨrir igiar kam gavgavim e ganɨngizɨ, bizir aghuir e fogha iniamiba, e da baghavɨra mɨzuai. God e bagha inabazir biziba, e da bagha mɨzuavɨra iti, egha nɨghnɨzir gavgavim dar ikiavɨra iti.

Aisaia 54:13

Kɨ Ikiavɨra Itir God, kɨ uabɨ nɨn boriba bar men sure damuam, eghtɨ me dabirabir bar aghuim ikiam.

Hosea 7:1

“Kɨ Israelia damutɨ me ua deraghasa ifonge. Ezɨ puvatɨ. Kɨ Efraimian arazir kurabar garima, da azenara otifi. Kɨ Samarian nguibar ekiamɨn gumazamizibar bizir kurar me amibar gari. Me uari uarigh ifara dɨpeniba akara biziba okei. Ezɨ men okoruar kurar maba nguibar ekiamɨn tuavibar gumazamizibar biziba pura da isi.

Jeremaia 17:14

O Ikiavɨra Itir God, nɨ nan arɨmariam akɨrightɨ, kɨ bar guizbangɨra ghuamagheka. Nɨ nan akuraghtɨ, kɨ guizbangɨra deraghvɨra ikiam. Kɨ ziar ekiam nɨraram anɨdi.

Maika 4:3

Eghtɨ Ikiavɨra Itir God, jasɨn mɨn ikɨ kantriba bar dar gumazamizibar araziba tuisɨgh, men osɨmtɨziba deragh da akɨrtɨ, me uari inigh deragh ikiam. Egh me uan mɨdorozir sababa inigh dav soghtɨ, da baravigh nguazibagh tuir ainbar mɨn otivigham. Egh me uan afuzibav soghtɨ, da ikɨzɨrigh sabar azenibar ingaribagh ami moghɨn, otivigham. Egh danganiba bar dar itir gumazamiziba, uam uariv soghan kogh ikɨva, ua mɨdorozir arazibar sure damuan kogham.

Aisaia 55:7

Eghtɨ gumazamizir arazir kurabagh amiba uan arazir kuraba ategh, uam adar amusɨ nɨghnɨghan kogham. Egh me uamategh Ikiavɨra Itir God, en God, a bagh izɨtɨ, a men apangkuvigh men arazir kuraba gɨn amangam.”

Aisaia 2:4

A jasɨn mɨn ikɨ kantriba bar dar gumazamizibar araziba tuisɨgh, men osɨmtɨziba deragh da akɨrtɨ, me uari inigh deragh ikiam. Egh me uan mɨdorozir sababa inigh, dav soghtɨ, da baravigh nguazibagh tuir ainbar mɨn otivigham. Egh me uan afuzibav soghtɨ, da ikɨzɨrigh sabar azenibar ingaribagh ami moghɨn, otivigham. Egh danganiba bar dar itir gumazamiziba, uam uariv soghan kogh ikɨva, ua mɨdorozir arazibar sure damuan kogham.

Onger Akaba 37:11

Gumazamizir uari abɨra aghumra itiba, me deragh uan nguazim dapiagh bizir avɨriba inigh bar akuegh ikiam.

Godɨn Araziba 32:39

Ia oragh. Ia kamaghɨn fogh, kɨ uabɨra, kɨ guizbangɨra God. Ezɨ godɨn tam ua itir puvatɨ. Kɨ uabɨ, kɨ ikɨrɨmɨrir angamɨra itim gumazamizibagh anɨga, egha men duaba isi me ovei. Kɨ gumazim gasɨghasigh ua anekɨrightɨ a deragham. Egh kɨ bizitam damutɨ gumazitam nan anogoreghan kogham.

Efesus 6:23

Kɨ ia bagha God ko mɨgɨa ghaze, God en Afeziam ko en Ekiam Krais Iesus, aning navir amɨrizim ko igharaz darazigh ifongezir arazim, ko nɨghnɨzir gavgavim sara, Kraisɨn adarazi me danɨng.

Onger Akaba 72:7

A ikɨvɨra ikiamin dughiar kam, gumazamiziba arazir aghuimra gɨn mangam. Iakɨnim isiraghavɨra itir dughiamɨn, dabirabir aghuim otiv mangɨvɨra ikiam.

Ua Me Ini 34:6

Egha a Mosesɨn boroghɨn ghua an guam gitavɨragha kamaghɨn diagha ghaze, “Kɨ Ikiavɨra Itir God, kɨ Ikiavɨra Itir God. Kɨrara, kuarkuvir arazim ko apangkuvir arazimɨn mɨngarim. Egha zuamɨra anɨngazir puvatɨ. Egha zurara gumazamizibar apangkuva, zurara uan mɨgɨrɨgɨabar gɨn ghua guizɨn arazibagh ami.

Aisaia 39:8

Ezɨ Hesekia akar kam baregha, kamaghɨn Aisaia mɨgei, “Ikiavɨra Itir Godɨn akar nɨ na mɨgeim, a dera.” Guizbangɨra, Hesekia kamaghɨn nɨghnɨgha ghaze, “Kɨ datɨrɨghɨn atrivimɨn itir dughiar kamɨn, bizir kurar kaba otivan kogham. E pura navir amɨrizimɨn ikɨtɨ mɨdoroziba puvatɨgham.”

Jeremaia 3:22

Ikiavɨra Itir God kamaghɨn mɨgei: “Ia akɨrim gɨgha Ikiavɨra Itir God gasa zuir boriba, ia uamategh a bagh izɨ. Eghtɨ a ian arazir kuraba batueghtɨ, ia ua ghuamaghegham.” Ezɨ gumazamiziba kamaghɨn an akam ikaragha ghaze, “Nɨ en Ikiavɨra Itir God, en God, kamaghɨn e uamategha nɨ bagha ize.

Malakai 4:2

Eghtɨ dughiar kamɨn, ia gumazamizir nan ziam fa nan atiatia nan apengan itiba, ia bagh amɨnim tiraghtɨ, aruem anang ia gisiragh, ian arazir aghuiba akakagham. Mati aruem ia gisiragha gara fefem ian mɨkarzibagh anɨdi moghɨn, a ia damutɨ ian arɨmariaba gɨvaghtɨ ia ghuamaghegham. Egh ia mati bulmakaun nguziba bar akuegha uari akura dɨvazim ategha ivemara azenan zui moghɨn, ia bar akuegh mangɨ.

Onger Akaba 147:3

An osɨmtɨziba aterir gumazamizibagh ami me ua dera. Egha men duaba nogha dagh ami da uam agui.

Fofozir Gumazim 3:3

Egha e gumazibav soghtɨ me arɨmɨghiramin dughiaba iti, egh e me damutɨ me ghuamaghamin dughiaba iti. Egha e biziba angararɨghamin dughiaba iti, egh e bizibar ingaramin dughiaba iti.

Aisaia 57:18

“Me amir arazir kuraba, kɨ dar ganigha gɨfa, egh kɨ me gasɨghasɨghan kogham. Puvatɨ. Kɨ men arazir kuraba adeghtɨ, me ua ghuamaghegham. Egh gumazamizir osɨmtɨziba ikiava araiba, kɨ men aku tuavim men akagh me damutɨ, me osɨmtɨzir arazim ataghɨragh, na mɨnabɨ bar akueghamin ighiabar amuam. Kɨ Ikiavɨra Itir God, kɨ kamaghɨn mɨgei, Bar guizbangɨra, nan navir amɨrizim ko dabirabir aghuim, gumazamizir roghɨra itiba ko nguibar saghon itiba baghavɨra iti. Kɨ me damightɨ me ua deraghtɨ, kɨ dughiar aghuim me danɨngam.

Jeremaia 29:11

Kɨ Ikiavɨra Itir God, kɨ bizir ian akurvaghsɨ damuamiba, kɨ adagh nɨghnigha dagh fogha gɨfa. Kɨ deraghvɨra ia damutɨ ia navir amɨrizim ko, dabirabir aghuim ikiasa kɨ ifonge. Kɨ pazɨ ia damuan aghua. Ia bizir kɨ damuamin kabagh nɨghnɨgh, dughiar kam mɨzuam ikɨtɨ, an otogham.

Maika 7:20

Egh nɨ uan akaba bar dar gɨn mangɨva, zurara Israelia en apangkufigh. E Abraham ko Jekopɨn ovavir boriba, e nɨn gumazamizibara. Nɨ fomɨra en inazir afeziaba koma akar dɨkɨrɨzim gamua ghaze, nɨ en apangkuvigham, egh nɨ uan akar dɨkɨrɨzir kam damutɨ, a guizbangɨram otogham.