Jeremaia 30:18 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁸ Ikiavɨra Itir God kamaghɨn mɨgei: “Kɨ Jekopɨn adarazir apangkuvigh, egh men akuragham. Eghtɨ me uari bagh dɨpenibar ingar, egh deraghvɨra ua uan nguazimɨn ikiam. Egh Jerusalem fomɨra ikezɨ moghɨn, me uam an ingaram. Egh atrivimɨn dɨpenim me an danganimra an ingaram.

Jeremaia 30:18 ပူးပေါင်းရင်းမြစ်များ

Onger Akaba 102:13

Eghtɨ nɨ dɨkavigh izɨ Saionɨn nguibamɨn apangkuvigham. Ezɨ datɨrɨghɨn dughiar apangkuvamim oto. Nɨ datɨrɨghɨn an uabɨn torogh, egh an akurvagham.

Jeremaia 30:3

Kɨ Ikiavɨra Itir God, nan gumazamiziba Israelia ko Judaba, me ua deraghvɨra ikiasa, kɨ me bagha dughiam amɨsevegha gɨfa. Kɨ ua men aku nguazir kɨ men ovavibagh anɨngizimɨn izam, eghtɨ a ua men nguazimra otogham.”

Jeremaia 33:7

Kɨ dughiar kamɨn Judaba ko Israelia damightɨ me ua deraghvɨra ikiam. Egh me damightɨ me uan gumazamizir fomɨra ikeziba, ikezɨ moghɨn gavgavigh ikiam.

Jeremaia 49:39

“Egh dughiar abuananamɨn, kɨ Elamian dabirabim akɨrightɨ, a ua deragh otogham. Kɨ Ikiavɨra Itir God, kɨ mɨkemegha gɨfa.”

Jeremaia 23:3

Gumazamizir kɨ amangizɨ ghua kantrin igharazibar itiba, kɨ ua men ikiavɨra itir varazira aku izɨ me isɨ men dɨvazimɨn aven me arɨgham. Eghtɨ me borir avɨriba batɨva bar avɨrasemegham.

Sekaraia 1:16

Kamaghɨn amizɨ, Ikiavɨra Itir God ghaze, Kɨ ua Jerusalemɨn uan apangkuvim men akaghasa izegha gɨfa. Ikiavɨra Itir Godɨn Gavgaviba Bar Itim ghaze, Me nan Dɨpenimɨn ingarightɨ, a ua Jerusalemɨn tugham. Mati gumazim dɨpenimɨn ingarasa benibar an ababaniba asi moghɨn, me Jerusalemɨn nguibar ekiam, an ababaniba asɨ, egh bar aneghuigham.

Jeremaia 46:27

Ikiavɨra Itir God kamaghɨn mɨkeme: “Ia Israelia, ia Jekopɨn ovavir boriba, ia nan ingangarir gumazamiziba, ia atiatingɨva dɨgavir kuram damuan markɨ. Bar guizbangɨra, ia kantrin saghon itir kamɨn kalabusɨn iti. Eghtɨ kɨ ua ia inightɨ, ia ua uan nguazimra izegh, deraghvɨra dapiagham. Eghtɨ tarazi ua ia damutɨ ia atiatingan kogham.

Jeremaia 49:6

“Eghtɨ gɨn izamin dughiam, kɨ ua ian dabirabim damutɨ, a ua deragham. Kɨ Ikiavɨra Itir God, kɨ mɨkemegha gɨfa.”

Aisaia 44:26

Nan ingangarir gumazim nan akam akunɨva, bizir gɨn otivamiba, kɨ a mɨkɨmtɨ, a mangɨ gumazamizibav kɨm, eghtɨ kɨ a mɨgeir akar kabar amutɨ, da guizbangɨram otivam. Kɨ kamaghɨn mɨgɨa ghaze, gumazamiziba ua Jerusalemɨn ikiam. Egh Judan nguibar ekiaba me uamategh dar ingaram. Nguibar apaniba asɨghasɨghiziba, kɨ uamategh da feghtɨ, da dɨkavigh tuivigham.

Jeremaia 31:4

Ia Israelia, ia mati nan guivir igiar kɨ bar ifongezim, kɨ ia damightɨ ia ua kantrin gavgavimɨn ikiam. Egh ia akuegh, mati amizir igiaba buabav sogha, egha ighiam gizir marazi ko akueghɨva ighavamang ikɨ.

Jeremaia 33:11

Egh me navir aghuimɨn ikɨva, bar akuegh poroghamiba uarir ikiamin isabar amuam. Egh gumazamiziba na mɨnabir ofaba inigh Ikiavɨra Itir Godɨn Dɨpenimɨn izam. Egh me ofaba inigh izɨ, kamaghɨn ighiaba bangam: “Ikiavɨra Itir Godɨn Gavgaviba Bar Itim bar deravɨra e gami. A zurara bar en apangkufi. Kamaghɨn, e a mɨnamam. “Dughiar kamɨn, kɨ Ikiavɨra Itir God, kɨ nguazir kam damightɨ a fomɨra ikezɨ moghɨn ua deravɨram otogham.

1 Eghaghaniba 29:19

Nɨ nan otarim Solomonɨn nɨghnɨzim feghtɨ, a nɨghnɨzir bar vamɨra ikɨ nɨn Akar Gavgaviba, ko nɨ mɨkemezir akaba, ko arazir nɨ ifongezibar gɨn mangɨ, egh nɨn Dɨpenimɨn ingar. Dɨpenir kam, kɨ an ingarasa bizibar kɨri.”

Jeremaia 29:14

Kɨ Ikiavɨra Itir God, kɨ guizbangɨra mɨgei, kɨ ia ateghtɨ ia nan boroghɨra izam. Eghtɨ kɨ ua ia damutɨ ia deraghvɨra ikiam. Eghtɨ kɨ kantriba ko danganir kɨ ia batoghezɨ ia ghueziba, kɨ me da bar moghɨra ia akuvagh ia iniam. Egh kɨ ua ian aku danganir ia fomɨra ikezimɨn mangam.

Aisaia 44:28

Kɨ ghaze, kɨrara atrivimɨn ikiasa Sairus amɨsefe. Eghtɨ a nan gumazamiziba deraghvɨra men ganam, mati sipsipbagh eghuvir gumazim uan sipsipba deravɨra me geghufi. Eghtɨ a ingangarir kɨ ifongezibar amuam. A mɨkɨmtɨ, me Jerusalem uam an ingarɨva, nan Dɨpenim uam anesam.”

Jeremaia 31:38

Ikiavɨra Itir God ua kamaghɨn mɨgei, “Kɨ dughiar mam amɨsefe, eghtɨ me ua Jerusalemɨn ingaram, nan nguibar ekiar kam. Jerusalemɨn dɨvazir notɨn amadaghan ghuzimɨn ababanim, an Hananelɨn Tauan ikegh mangɨ dɨvazimɨn Mɨkebamɨn Tiar Akamɨn tugham.

Jeremaia 31:23

Ikiavɨra Itir Godɨn Gavgaviba Bar Itim, Israelian God, a kamaghɨn mɨkeme: “Kɨ gɨn Judan nguazim damightɨ, a deraghvɨra ikiam. Eghtɨ Judaba uan nguazim ko nguibar ekiabar ikiam. Egh me fomɨra mɨkemezɨ moghɨn ua mɨkɨm suam, ‘Nɨ Ikiavɨra Itir Godɨn mɨghsɨam, Ikiavɨra Itir God nɨn ikia, bar arazir aghuibagh ami! Ikiavɨra Itir God bar deraghvɨra nɨ damu!’

Sekaraia 12:6

“Dughiar kamɨn kɨ Judan gumazir dapanibar amightɨ, me mati tuzim dafogha isi moghɨn, o mati witɨn azenir bar mɨsɨngizim dafogha isia mɨzariaba zui. Eghtɨ kantrin men boroghɨn itiba da bar gɨvagham. Eghtɨ Jerusalemɨn nguibar ekiamra, a itir danganimra ikɨvɨra ikiam.

Onger Akaba 78:69

A Saionɨn Mɨghsɨar kamɨn uan Dɨpenimɨn ingarizɨ, a gavgavigha overiamɨn mɨn pɨn iti. A mati nguazir a ingarizir kamɨn mɨn anetɨzɨ, a gavgavigha ikia mamaghɨra iti.

Nehemia 7:4

Jerusalemɨn nguibam, a nguibar bar ekiam. Ezɨ gumazamizir avɨriba an itir puvatɨ. Egha me uaghan an aven dɨpenir avɨriba tɨghar dar ingaram.

Onger Akaba 85:1

O Ikiavɨra Itir God, nɨ deragha uan nguazim gamigha, Jekopɨn ovavir boriba ua men inizɨ me deragha, faragha ikezɨ moghɨn iti.

Sekaraia 14:10

Eghtɨ nguazir Jerusalemɨn boroghɨn itim, a voroghɨra itir danganir zarimɨn otogham, a notɨn amadaghan Geban nguibar ekiamɨn ikegh, mangɨ sautɨn amadaghan Rimonɨn nguibar ekiamɨn otogham. Jerusalemɨn nguibar ekiamra mɨghsɨatam gisɨn ikiam. Eghtɨ Jerusalem avɨnamin dɨvazir bar mɨtiar gavgavim, a fomɨra ikezɨ moghɨra, a kamaghɨra ikiam. Jerusalemɨn dɨvazim, a Benjaminɨn Tiar Akamɨn ikegh mangɨ, Mɨkebamɨn Tiar Akamɨn otogham, danganir kam tiar akar mam fomɨra iti. Egh ababanir mɨtaghniar Hananelɨn Tauan ikegh mangamim, a mangɨ me atrivim bagha wainɨn ingarir danganimɨn otogham.

Jeremaia 31:40

Egh nguibamɨn mɨtaghniamɨn mangɨ sautɨn amadaghan mangɨ Kidronɨn danganir zarimɨn mɨriam gighuigham. Nguibamɨn mɨtaghniamɨn aven nguazir kam, matmatiam ko danganir avereniba akurim iti. Eghtɨ aruem anadi naghɨn nguazir zarimɨn ruaghatevibar itir danganir kaba, bar moghɨra uaghan nguibar kamɨn mɨtaghniamɨn aven ikiam. Eghtɨ mɨtaghniam aruem anadi naghɨn mangɨ Hoziaba Zuir Tiar Akamɨn tugham. Eghtɨ nguazir nguibar ekiar kamɨn aven itiba, kar bar nan nguibabara, kɨ Ikiavɨra Itir God. Eghtɨ apaniba izɨ nguibar kam gasɨghasɨgh, uam an biziba akararighan kogham. Puvatɨgham. Nguibar kam a deraghvɨra ikɨ mamaghɨra ikiam.”

1 Eghaghaniba 29:1

Ezɨ Atrivim Devit kamaghɨn gumazamiziba bar me mɨgei, “God uabɨ, nan otarim Solomon, uan Dɨpenimɨn ingarasa a ginaba. Ezɨ e bar fo, a bar igiamra ikia ingangaribar amuan fofozir ekiaba puvatɨ. Ikiavɨra Itir Godɨn Gavgavimɨn Dɨpenimɨn ingaramin ingangarir kam, a ingangarir dozim puvatɨ, mati me nguazir kamɨn gumazamizibar dɨpenimɨn ingarasa. Puvatɨ. A ingangarir bar ekiam.

Onger Akaba 48:3

God nguibar kamɨn ikia, mɨdorozibar dughiabar uan gumazamizibagh eghuva men akurvazima, me deravɨra iti.

Onger Akaba 48:13

Ia Saionɨn nguibam avɨnizir dɨvazim deragh an ganigh nɨghnɨzim inighɨva, deragh an itir dɨpenir gavgavibar ganigh. Egh ia gɨn, deraghvɨra gɨn otivamin ovavibagh eghanam.

Onger Akaba 122:7

Gumazamizir Jerusalemɨn dɨvazimɨn aven itiba deragh ikɨva, ua mɨdorozim damuan kogham.

Jeremaia 29:11

Kɨ Ikiavɨra Itir God, kɨ bizir ian akurvaghsɨ damuamiba, kɨ adagh nɨghnigha dagh fogha gɨfa. Kɨ deraghvɨra ia damutɨ ia navir amɨrizim ko, dabirabir aghuim ikiasa kɨ ifonge. Kɨ pazɨ ia damuan aghua. Ia bizir kɨ damuamin kabagh nɨghnɨgh, dughiar kam mɨzuam ikɨtɨ, an otogham.

Jeremaia 32:15

Guizbangɨra, arazir kamɨn mɨngarim kamakɨn: Ikiavɨra Itir Godɨn Gavgaviba Bar itim, Israelian God, a ghaze, Gɨn gumazamiziba ua dɨpeniba ko, nguaziba ko, wainɨn azeniba nguibar kamɨn a dagh ivezam.

Esekiel 36:11

Kɨ ian itir gumazamiziba ko asɨziba bar dar amightɨ, dar dɨbobonim mavanangam. Ian dɨbobonim bar ghuavanaboghtɨ, gumazamiziba bar avɨrasemegham. Kɨ ia damightɨ, gumazamiziba ian danganir mɨkebaba bar dar ikiam, mati ia fomɨra ikezɨ moghɨn ikiam. Eghtɨ ian dabirabim bar deragham, egh ia fomɨra ikezɨ dabirabim bar a gafiragham. Eghtɨ ia kamaghɨn fogh suam, kɨ Ikiavɨra Itir God.

Amos 9:14

Kɨ uan gumazamiziba Israelia inigh, uamategh men nguibamɨn mangam. Eghtɨ me uan nguibar ekiar ikuviziba akɨrigh, ua dar apiam. Eghtɨ me ua wainɨn ikarɨziba opar wainɨn dɨpabar amɨva dar amam. Egh me uam azenibar ingar dar dagheba iniva dar amam.

Sekaraia 1:12

Ezɨ Ikiavɨra Itir Godɨn enselɨn faraghavɨra zuim kamaghɨn mɨgei, “O Ikiavɨra Itir Godɨn Gavgaviba Bar Itim, nɨ 70plan azenibar Jerusalem ko, Judan nguibar ekiaba bagha atara navim bar nɨn ikufi. Nɨ bar dughiar manamra ua men apangkuvigham?”

Sekaraia 12:7

“Kɨ Ikiavɨra Itir God, kɨ Judan mɨdorozir gumazibar amightɨ, me faraghɨvɨra apaniba abɨnigh ziar ekiam iniam. Eghtɨ Devit uan ovavir boriba ko, Jerusalemɨn gumazamiziba, men ziar ekiam, Judan gumazamizibar ziar ekiam gafighan kogham.

Onger Akaba 102:14

Saionɨn nguibam ikufi. Ezɨ nɨn ingangarir gumazamiziba bar a gifonge. A datɨrɨghɨn ikuvigha mati nguazir mɨnemniamɨn otozɨ, me bar an apangkufi.

Jeremaia 32:44

“Gumazamiziba nguazim givesɨ akar dɨkɨrɨzibar akɨnafariba da osiram. Egh men damazibar gumazamizir maba me akar dɨkɨrɨzim damuva, uan ababanibar arighɨva akɨnafarir kabar kumam. Da nguazir otevir kaba: Benjaminɨn anabamɨn nguaziba ko, Jerusalemɨn boroghɨn itir danganiba ko, Judan nguibar ekiar igharaziba ko, mɨghsɨar dozir aruem uaghiri naghɨn itiba ko, mɨghsɨaba itir danganir igharaziba ko, sautɨn amadaghan Negevɨn danganim sara. Eghtɨ dughiar kamɨn, kɨ Judan kantri damightɨ, a ua deraghvɨra ikiam. Kɨ Ikiavɨra Itir God, kɨ mɨkemegha gɨfa.”