Jeremaia 30:16 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁶ Guizbangɨra, ia gasɨghasɨzir adarasi, me uari ikuvigham. Ian apaniba mangɨ saghon itir nguibabar kalabusɨn ikiam. Gumazir paza ia gamigha ian biziba okemeziba, apaniba pazɨ me damuva, men biziba okɨmam.

Jeremaia 30:16 ပူးပေါင်းရင်းမြစ်များ

Jeremaia 10:25

Egh Kantrin Igharazibar Gumazamizir nɨn ziam dɨbora a fer puvatɨziba, nɨ men anɨngaghɨ me gasɨghasɨgh. Gumazamizir kaba, e Jekopɨn adarasi, me en maraziv soghezɨ me ariaghire. Me bar e agɨvagha en nguaziba ko dɨpeniba sara bar dagh asɨghasɨki. Kamaghɨn amizɨ, nɨ me gasɨghasɨgh.

Aisaia 33:1

Ia kantrin igharazibagh asɨghasɨzi darasi, iavzika! Ia bar ikuvigham. Bar guizbangɨra, ia datɨrɨghɨn ikuvizir puvatɨ. Ezɨ ia kantrin igharazibagh asɨghasɨghamin dughiam, a gɨfa, eghtɨ ia uari ikuvigham. Ia igharaz darazigh ifarava, uan akar dɨkɨrɨziba abigha me isa apanibar agharim garɨsi. Bar guizbangɨra, tarazi datɨrɨghɨn ia gifarazir puvatɨ. Eghtɨ ia igharaz darazigh ifaramin dughiam, a gɨvagham. Eghtɨ igharaz darazi ia gifar, ia isɨ apanibar dafarim darɨgham.

Ua Me Ini 23:22

Ia an akamɨn gɨn mangɨgh, egh bizir kɨ mɨkemezibar amightɨ, kɨ ian apanibar apanimɨn mɨn otogh me mɨsogham. Eghtɨ gumazir ia adogha ia batoziba, kɨ me adogh me batuegham.

Sekaraia 2:8

Ikiavɨra Itir Godɨn Gavgaviba Bar Itim, uan ziar ekiam bangɨn gavgavim na ganɨga, kantrin pazavɨra an gumazamizibagh amiba, a me mɨkɨmasa na amadagha ghaze, “Tina paza me gami, a paza nan bizir bar pɨn kozim gami.

Akar Mogomem 13:10

Eghtɨ gumazitam kalabusɨn mangɨsɨ, God amamangatɨghtɨ, a kalabusɨn mangɨ. Eghtɨ gumazitam mɨdorozir sabamɨn ovengsɨ, God an amamangatɨghtɨ, a mɨdorozir sabamɨn ovengam. Bizir kaba otivtɨma, Godɨn gumazamiziba nɨghnɨzir gavgavim ikɨ tugh gavgavigh mamaghɨra ikɨ.”

Sekaraia 12:2

“Kɨ Jerusalem damightɨ a wain itir kavɨn mɨn otogham. Eghtɨ kantrin igharazir an boroghɨn ikia, a gasɨghasɨghasava amiba, me mati gumazir wainɨn kavɨn kam amegha onganiziba. Me mɨdorozim bagh Jerusalemɨn nguibar ekiamɨn mangɨva, me Judan nguibar dozir igharaziba bar da sara ekɨarugham.

Joel 3:8

Kɨ Judabar amamangatɨghtɨ, me ian otariba ko guivibagh ivezam. Egh me inigh Sabean kantrin ikɨzir saghon itimɨn me amadagham. Kɨ Ikiavɨra Itir God, kɨ mɨkemegha gɨfa.”

Aisaia 14:2

Guizbangɨra, Kantrin Igharazibar Gumazamiziba, Israelia inigh men aku uamategh Israelian nguazimɨn izam, kar Ikiavɨra Itir Godɨn nguazim. Eghtɨ Israelia, gumazamizir kabar amutɨ, me pura Israelian ingangarir gumazamizir kɨnibar otivigham. Fomɨra Israelia kalabus gatɨzir darasi, me datɨrɨghɨn, Israelian kalabuziabar aven ikiam. Me fomɨra Israelia dɨkabɨragha paza me gami, me datɨrɨghɨn Israelian apengan ikɨtɨ, me me gativagham.

Onger Akaba 129:5

Kɨ ghaze, Saionɨn Nguibamɨn apanimɨn itir darasi, e men agɨntɨghtɨ me uam arɨ uan nguibabar mangegh bar aghumsika.

Sefanaia 2:8

Ikiavɨra Itir Godɨn Gavgaviba Bar Itim kamaghɨn mɨgei, “Kɨ Moapɨn kantri ko, Amonɨn kantri barazima, aning nan gumazamiziba dɨpova akar kurabar me mɨgɨa uari fe. Me pamten mɨgɨa ghaze, me Israelia abɨnigh men nguazim inigham.

Habakuk 2:16

Kamaghɨra Ikiavɨra Itir God ian ziar ekiam abɨraghtɨma, ia bar aghumsigham. A ivezir kuram ia danɨngam, mati a uabɨ ia gamima, ia uari wainɨn dɨpar avɨriba apa bar ongani. Egh gumaziba ian gantɨ ia bibiabara ikɨtɨ, ian ziar ekiam degeghirɨghtɨ, ia bar aghumsigham.

Nahum 1:8

An aperiar ekiamɨn mɨn, Niniven nguibar ekiam bar a gasɨghasigham. Egha gumazir an akam batoziba, a me mɨsozi me ariaghiri.

Maika 7:10

Apaniba faragha kamaghɨn e mɨgɨa ghaze, “Ikiavɨra Itir God, ian God managh iti?” Egh me gɨn gantɨ Ikiavɨra Itir God en akuraghtɨ, me bar aghumsigham. E gantɨ Ikiavɨra Itir God me dɨkɨtɨ, mati gumazamiziba tuavimɨn beghneazim dɨti moghɨn, a me dɨkabɨnigham.

Maika 4:11

Ezɨ kantrin avɨriba ia gasɨghasɨghasa uari akufa. Egha me ghaze, “Aria, e Jerusalemɨn nguibar ekiam bar a gasɨghasigh, an gantɨ a bar ikuvigh ikiam.”

Esekiel 35:5

“Ia Idomia fomɨra Israelian apanim gami, egha kɨ ivezir kuram me ganɨdir dughiamɨn, apaniba iza me mɨsozima, ia apanibar akuragha Israelia mɨsoghezɨ me ariaghire.

Esekiel 29:6

Eghtɨ Isipɨn gumazamiziba bar fogh suam, kɨ Ikiavɨra Itir God. Nɨ fo, Israelia akurvazim bagha Isipia ian gari. Israelia ghaze, nɨ mati, men asadivir aghorir gavgavim. Ezɨ puvatɨ.

Jeremaia 2:3

Egha dughiar kamɨn ia Israelia, ia nan gumazamizibara ikia, mati nan azenimɨn itir dagher faragha aniziba. Ezɨ nan dagher kabar maba isir gumazamiziba, osɨmtɨzim me batozɨ kɨ me gasɨghasɨki. Kɨ Ikiavɨra Itir God kɨ mɨkemegha gɨfa.”

Aisaia 54:17

Eghtɨ mɨsoghamin bizir katam nɨ gasɨghasighan kogham. Eghtɨ nɨ mɨtɨgh gavgavigh gumazir pura mɨgɨrɨgɨaba nɨ gasibar mɨgɨrɨgɨaba ikarvagham, eghtɨ men mɨgɨrɨgɨaba gavgaviba bar puvatɨgham. Ezɨ arazir kamra kɨ deravɨra uan ingangarir gumazamizibar garava, me gamizɨ, me uan apaniba dɨkabɨri. Nan arazir kam, a ivezir aghuimɨn mɨn, kɨ a isa uan ingangarir gumazamizibagh anɨdi. Kɨ Ikiavɨra Itir God, kɨ mɨkemegha gɨfa.”

Aisaia 54:15

Eghtɨ gumazitaba nɨ ko mɨsoghsɨ izɨtɨ, nɨ kamaghɨn fogh suam, kɨ me amadazir puvatɨ. Me uan ifongiamɨn izi. Kamaghɨn amizɨ, tina nɨ mɨsoghasa izi, a uabɨ kuram iniam.

Sekaraia 14:2

Eghtɨ Ikiavɨra Itir God uabɨ kantrin igharazibar mɨdorozir gumaziba bar da inightɨ, me izɨ Jerusalem mɨsogham. Me Jerusalemia abɨnigh bizir dɨpenimɨn itiba bar ada inigham. Egh arazir otuaribar amizibar amuam. Egh gumazamizir kabar nar mam inigh mangɨtɨ, me kantrin igharazibar kalabusɨn ikiam. Eghtɨ men akuar mam Jerusalem ateghan kogham, me an ikɨvɨra ikiam.

Sekaraia 1:14

Ezɨ enselɨn kam, Ikiavɨra Itir Godɨn Gavgaviba Bar Itimɨn akam akunasa na mɨgei: Kɨ ifongiar bar ekiam ko, apangkuvir nɨghnɨzim Jerusalem bagha iti, an ziar mam Saion, a nan nguibar ekiam.

Jeremaia 50:28

Ia bar oragh! Israelia ko Judan marasi, me Babilon ategha ara uamategha Saionɨn izi. Me kamaghɨn mɨkɨmasa izi, “Ikiavɨra Itir God, en God, a ivezir kuram isa gumazir an Dɨpenim gasɨghasɨziba ikarvasi.”

Jeremaia 25:12

“Eghtɨ 70plan azeniba gɨvaghtɨma, kɨ Babilonɨn atrivim ko an gumazamiziba, kɨ men arazir kurar me amiba ikarvagh puv me damigham. Egh Babilonɨn kantri gasɨghasigham, an ziar mam Kaldia. Eghtɨ Babilonɨn nguazim pura ikɨ mamaghɨra ikiam.

Jeremaia 12:14

Ikiavɨra Itir God kamaghɨn mɨgei, “Kɨ Israelian boroghɨra itir kantriba akam men iti. Me arazir kurabagh amua, egha nguazir kɨ uan gumazamizibagh anɨngizir kam pazav a gami. Nɨ oragh! Kɨ apanir kaba men nguazimra me batuegham. Judaba uaghan apanibar tongɨn uan nguazir kɨ me ganɨngizimra iti, eghtɨ kɨ uaghan me batuegham.

Jeremaia 8:16

Ezɨ apaniba notɨn amadaghan, Danɨn anabamɨn adarazir nguazimɨn otivigha gɨfa, ezɨ e hoziaba barazi me bar puv avɨghagha pamtemɨn arai. Ezɨ hoziar kaba araima, en nguazir oteviba ivazvazima, e bar puvɨrama atiati. E fo, apaniba Jerusalemɨn nguibam ko an tir gumazamiziba ko, bar en nguazimɨn itir biziba bar dagh gasɨghasɨghasa izi.”

Jeremaia 30:15

Ia uan duar kaba bagh azirakar avɨribar amuan markɨ. Duar kaba akumighan kogham. Ia arazir kurar avɨribagh ami, egha osɨmtɨzir ekiam iti. Kamaghɨn kɨ arazir kamɨn ia gami.

Godɨn Araziba 30:7

“Bizir kurar kɨ ia mɨkemeziba, Ikiavɨra Itir God, ian God, dar amutɨ da ian apanir ia gifongezir puvatɨgha ia gasɨghasɨziba me bativam.

1 Samuel 17:53

Ezɨ Israelia men agɨntigha gɨvagha, uamategha ghua Filistiabar averpenibar men bizir me tegha areziba ini.

Aghuzir Akaba 22:23

Guizbangɨra, Ikiavɨra Itir God me bagh ganɨva egh men akurvagham. Eghtɨ gumazitam pazɨ gumazir onganarazibagh amiba me damightɨ, Ikiavɨra Itir God pazɨ gumazir kam damigham.

Sekaraia 1:15

Kɨ fomɨra uan gumazamiziba mong men atara, egha Kantrin Igharazibar Gumazamizibav mɨkemezɨ, me iza mɨzazim me gase. Me izava amɨraghavɨra me gasɨghasɨghizir puvatɨ. Me, me gasɨghasɨghamin mɨtaghniam gafiragha bar me gasɨghasɨki. Ezɨ kantrin igharaziba datɨrɨghɨn osɨmtɨziba puvatɨgha deraghavɨra iti. Ezɨ kɨ osɨmtɨzir ekiam men iti.

Sekaraia 2:12

Eghtɨ Judaba, Ikiavɨra Itir Godɨn kantrin kamra ikɨ, egh me an damazimɨn bar faraghɨvɨra ikiam. Eghtɨ a bar Jerusalem gifueghɨva, ua bagh anemɨsevegham. A Jerusalem gifongezɨ moghɨn, nguibar ekiatam gifueghan kogham.