Jeremaia 3:25 - Godɨn Eghaghanim: Akar Gavgavir Dɨkɨrɨzir Ghurim ko Igiam

²⁵ O Ikiavɨra Itir God, en God, e uan inazir afeziaba ko, uan mugabara ikia arazir aghumsɨzir kurabar nɨ gamua iza datɨrɨkɨn tu. E nɨn akabar gɨn zuir puvatɨ. Kamaghɨn amizɨ, e bar aghumsigh guaba avigh nguazim mɨtuagham. Egh teghtɨ, en aghumsɨzir kam inimɨn mɨn e avaraghtɨ, e a sara ikiam.”

Jeremaia 3:25 ပူးပေါင်းရင်းမြစ်များ

Jeremaia 22:21

Nɨ deragha itir dughiabar nɨ bizir avɨriba itima, kɨ akam nɨ ganɨngi. Ezɨ nɨ kamaghɨn mɨgei, ‘Kɨ nɨn akam baraghan aghua.’ Nɨ zurara nan akam batosi. Nɨ kamaghɨn amir arazir kam, nɨ uan igiamra itir dughiamɨn a gamua iza datɨrɨghɨn tu.

Jeremaia 2:26

Ikiavɨra Itir God, ua kamaghɨn mɨgei: “Me okɨmakɨar gumazimɨn suirazɨ an aghumsɨghizɨ moghɨn, kamaghɨra ia Israelia bar aghumsigham. Ian atriviba, ko gumazir dapaniba, Godɨn ofa gamir gumaziba, akam inigha izir gumazamiziba, ko Israelian gumazamiziba bar, ia uaghan aghumsɨzim iniam.

Akɨnafarir Pol Romɨn Nguibar Ekiamɨn Itir Sios Bagha Osirizim 6:21

Ia faragha amir arazibagh da akurvazir manabar ia gami? Arazir kaba, ia datɨrɨghɨn dagh nɨghnɨgha aghumsɨsi. Arazir kabara gumazamizibagh amima me ariaghiri.

Daniel 12:2

Eghtɨ God gumazamizir avɨrir ovengeziba ua me fɨtɨ me ua dɨkavam. Men marazi zurara itir ikɨrɨmɨrir aghuim iniam. Eghtɨ men tarazi bar aghumsɨghɨva kamaghɨra ikɨvɨra ikiam.

Esekiel 36:32

“O Israelɨn ikɨzim, ia kamaghɨn fogh, kɨ ian akurvaghasa arazir kabagh amir pu. Puvatɨ, kɨ uan ziar ekiam gɨnɨghnɨgha dagh ami. Kɨ kamaghsua, kɨ arazir kabar amutɨ, ia uan arazir kurabagh nɨghnɨgh bar osemegh aghumsɨgham. Kɨ Ikiavɨra Itir Godɨn Ekiam, kɨ kamaghɨn mɨkeme.”

Esekiel 7:18

Eghtɨ me azirakar korotiabar aghuigh, puvɨrama atiating akongɨva, bar aghumsigh, uan dapanir arɨziba bar dagh isegh dapanir tuziba ikiam.

Jeremaia 6:26

Ezɨ Ikiavɨra Itir God, kamaghɨn mɨgei: “O, nan gumazamizir kɨ bar ifongeziba, ia azir korotiabar aghuigh averenim gɨpoghpogh. Ia fo, apanir izɨ ia gasɨghasɨghamim pura kaghɨram otoghtɨ, ia atam mangeghtɨ me ia gasɨghasigham. Kamaghɨn, ia puvɨrama aziva, azir onger akaba bangɨ. Mati poroghamimning borir bar vamɨrara iti, an aremezɨ, aning a bagh azia an kuarkufi.”

Jeremaia 2:19

Ian arazir kuramra puv ia damigham. Ia akɨrim ragha na gasara, ezɨ ian arazir kam bangɨn ia bar ikuvigham. Kɨ Ikiavɨra Itir God, ian God, ia na ataki, egha ua nan apengan itir puvatɨ. Kamaghɨn amizɨ, ia deraghvɨra nɨghnigh, egh kamaghɨn fogham, ian arazir kaba bar kufi, egha mɨzaziba ia ganɨdi. Kɨ Ikiavɨra Itir Godɨn Gavgaviba Bar Itim, kɨ mɨkemegha gɨfa.”

Jeremaia 2:17

Israelia, kɨ Ikiavɨra Itir God, ian God, kɨ ia inigh tuavir aghuimɨn izasa, ezɨ ia aghuagha akɨrim ragha na gasara. Ia uari kamaghɨn amizɨ, osɨmtɨzir kam ia bato.

Jeremaia 2:2

“Nɨ Jerusalemia bagh mangɨ nan akamɨn gun kamagh me mɨkɨm: Ikiavɨra Itir God ghaze, ia bar faraghavɨra nan gumazamizibar otivizir dughiamɨn, ia mati amizim igiamra pamɨn ikia uan pam gifongezɨ moghɨn, ia uari isa na ganigha na gifueghavɨra iti. Egha ia na baghavɨra ikia gumazamiziba puvatɨzir danganimɨn nan gɨn zui, kar nguazir gumazitam dagheba oparizir puvatɨzim.

Aisaia 50:11

Ia gan! Ia nɨghnɨzir gavgavim Ekiamɨn itir puvatɨ, ia mati gumazamiziba tuavir mɨtarmebar mangasa, uari uan adenir avibagh aboi, ia uan arazir kamɨn gɨn mangɨ, e ganika. Ia mangɨ ikiamin danganim, Ekiam an amɨsevegha gɨfa, a mɨzazir bar kuram iniamin danganim.

Aisaia 48:8

Kɨ kamaghɨn fo, kɨ ian ingara ia gamizɨ, ia gumazamizir ikɨzir vamɨran otozir dughiamɨn ikegha, iza datɨrɨghɨn, ia akaba munasa da barazir puvatɨzir adarasi. Egha kɨ fo, ia ifavarir gumazamiziba. Kamaghɨn amizɨ, kɨ bizir kabar gun ia mɨkemezir puvatɨzɨ, ia dagh fozir puvatɨ.

Aghuzir Akaba 5:13

Gumaziba aghuzir akabar na mɨgei, ezɨ kɨ men akaba barazir puvatɨ.

Onger Akaba 109:29

Nan apaniba aghumsɨzir dafam iniasa, kɨ ifonge, eghtɨ gumazamiziba men aghumsɨzir arazir kam bar an ganam.

Onger Akaba 106:7

Fomɨra, en ovaviba Isipɨn kantrin aven ikia, nɨ amizir bizir ekiar kaba deragha dagh nɨghnɨzir puvatɨ. Nɨ bar men apangkuvigha dughiar avɨribar men akurvasi, ezɨ me nɨn apangkuvir ekiar kam bakɨnɨghnɨsi. Egha me ghua Ongarir Aghevimɨn otivigha, Godɨn Bar Pɨn Itimɨn akam batoke.

Gumazir Dapaniba 2:2

Kamaghɨn, ia gumazamizir nguazir kamɨn itiba ko akar dɨkɨrɨzir gavgavir tam damuan markɨ, kɨ ian anogoroke. Ia men ofa gamir dakozibagh asɨghasɨkigh.’ Kɨ datɨrɨghɨn garima, ia nan Akar Gavgavim barazi puvatɨ. Ia manmaghsua, arazir bar igharazim gami.

Onger Akaba 106:6

E, en ovaviba fomɨra arazir kuram gamizɨ moghɨn, arazir kuram gamigha gɨfa. E arazir mɨzɨrɨzir guar avɨribagh ami.

Jeremaia 3:13

Kɨ Ikiavɨra Itir God, kɨ ghaze, Israelia, ia bighɨvɨra kamaghɨn mɨkɨm, ‘E osɨmtɨzim gamigha gɨvagha uan Ikiavɨra Itir God, en God, akɨrim ragha a gasaragha gɨfa. Egha uaghan, e nɨn akabar gɨn zuir puvatɨ. E temer ekiabar apebabar ghua arazir kuram gamua asebar ziaba fe.’

Jeremaia 8:14

Eghtɨ Judaba kamaghɨn mɨkɨmam: “Manmaghɨn amizɨ e puram apia? E uari akuvagh mangɨ nguibar ekiar dɨvazir gavgaviba itibar aven mongam. Egh e nguibar kabar aven arɨghiram. E arazir kuramɨn Ikiavɨra Itir God gami, a en God. Ezɨ a ghaze, e ovengam. A ivezir kuram e danɨngam, mati gumazir mam marasinɨn kurar gumazibagh asɨghasɨzim me danɨngtɨ me aneremam.

Jeremaia 14:7

Ezɨ nan gumazamiziba kamaghɨn na ko mɨgɨa dɨa ghaze, “Bar guizbangɨra, e akɨrim ragha nɨ gasaragha gɨvagha, arazir kurar avɨrim gami. Ezɨ en arazir kurar kaba e isa kotiam gatɨ. Ezɨ Ikiavɨra Itir God, nɨ uan ziar ekiam gɨnɨghnɨgh, en apangkufigh.

Jeremaia 14:20

Bar guizbangɨra, Ikiavɨra Itir God, e fo, e uan inazir afeziaba ko, arazir kurar avɨribagh amua, nɨn damazimɨn e dar osɨmtɨziba iti.

Jeremaia 20:18

Manmaghsua kɨ amebamɨn navimɨn ikegha otogha osɨmtɨzir kamagh garibar ikia, egha zurara bar puvɨram aghumsɨsi? Kɨ bar uabɨn apangkufi.

Jeremaia 31:19

E nɨ ategha gɨvagha, datɨrɨghɨn e ua uan nɨghnɨzibagh iragha gɨfa. Egha e uan osɨmtɨzim gɨfozir dughiamɨn, e osemegha bar aghumsɨki, egha dapaniba avingi. Faragha en adarazi gumazamizir igiabar mɨn ike, egha me arazir kurar avɨribagh ami. Egha datɨrɨghɨn e uan arazir kuraba, bar dar aghumsɨki.’

Esekiel 2:3

“O nguazir kamɨn gumazim, kɨ datɨrɨghɨn Israelia bagha nɨ amadi. Me gumazamizir akaba barazir puvatɨziba, me nan akam batoke. Me uan inazir afeziabar mɨn akaba batogha, akɨribagh igha na gasi, mati men inazir afeziaba fomɨra amizɨ mokɨn.

Aghuzir Akaba 13:18

Gumazim, gumazir igharaziba anekɨran an aghua, a biziba puvatɨgh egh bar aghumsigham. Eghtɨ gumazim, gumazir igharaziba ateghtɨ me anekɨrigham, eghtɨ gumazamiziba ziar ekiam a danɨngam.

Jeremaia 7:19

Ezɨ kɨ Ikiavɨra Itir God, kɨ ghaze, Me kamaghɨn amua paza nararam amir pu. Bar puvatɨ. Me paza uarira uarigh amua aghumsɨzim uarira uarigh anɨngi.

Jeremaia 9:18

Ezɨ gumazamiziba kamaghɨn mɨgei: “Are, me zuamɨra izɨva e bagh azirakar ighiabar amu. Me pamtem azi mamaghɨra ikɨ mangɨtɨ, e azitɨ temeriba en damazibar izɨv otiv iram.

Jeremaia 11:13

“Judaba, ian aser ia ziaba febar dɨbobonim, ian nguibar ekiabar dɨbobonim ko magh ghu. Egha ia aghumsɨzim itir asem Bal bagha, ofan mɨgharir mughuriar aghuim zuim damuasa dakozir avɨribar ingari. Ezɨ dakozir kabar dɨbobonim da Jerusalemɨn nguibar ekiamɨn tuavir aguabar dɨbobonim ko magh ghu.

Jeremaia 12:13

Ia Israelia witɨn ovɨziba oparigh, da iniamim dughiamɨn, ia benir dɨkonibar gantɨ darara ikiam. Ia pura ingangarir mɨtɨabagh amua bizir muziaribara isi. Kɨ Ikiavɨra Itir God, nan anɨngagharim ian ikiavɨra iti, kamaghɨn ia witɨn ovɨzir muziariba bangɨn aghumsɨgham.”

Esekiel 44:13

Eghtɨ me nan boroghɨn izɨ ofa gamir gumazibar ikɨ nan ingangarim damuan kogham. Me nan damazimɨn ofan zueziba ko anogoroghezir bizitamɨn boroghɨn mangan kogham. Me uan arazir kurabagh nɨghnɨgh bar aghumsɨgham. Egh arazir kurar kɨ bar aghuazir me amiziba bagh, ivezir kuram iniam.

Hosea 9:10

Egha Ikiavɨra Itir God kamaghɨn mɨgei: “Kɨ faraghavɨra ian apizir dughiamɨn, ia bar dera, mati wainɨn ikarɨzim nguazir mɨdiarimɨn otogha deraghavɨra be. Ezɨ ian inazir afeziaba, mati temer fikɨn ovɨzir faraghavɨram aniba. Egha gɨn me Peorɨn Mɨghsɨamɨn otivigha, egha faraghavɨra asem Balɨn ziam fava aghumsɨzir araziba baghavɨra iti. Me bar aser kam gifonge, egha an mɨrara bar ikufi.

Sefanaia 1:17

Ikiavɨra Itir God kamaghɨn mɨgei, Gumazamiziba arazir kurabar na gami, kamaghɨn amizɨ, kɨ bizir kurar avɨrim damutɨ da me bativam, eghtɨ me damazir okavɨrɨzibar mɨn punpun, daruamin tuaviba buriam. Eghtɨ men ghuziba dɨpamɨn mɨn irɨtɨ me arɨmɨghiram. Eghtɨ men kuaba nguazim gisɨn kurighirɨ mati afiar buariba.