Jeremaia 3:12 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹² Kamaghɨn amizɨ, Jeremaia, nɨ dɨkavigh notɨn amadaghan mangɨ dɨmɨva nan akamɨn gun kamaghɨn me mɨkɨm, Kɨ Ikiavɨra Itir God, kɨ ghaze, Israelia, ia nɨghnɨzir gavgavir nan itir arazim ataki, mati amizim uan pam ategha par igharazimɨn iti. Nan apangkuvir arazim a bar ekefe. Kamaghɨn ia uamategh na bagh izɨ. Kɨ ua navir kuram ian ikɨ zurara ian anɨngaghan kogham.

Jeremaia 3:12 ပူးပေါင်းရင်းမြစ်များ

Esekiel 33:11

Nɨ me mɨkɨm suam, kɨ Ikiavɨra Itir Godɨn Ekiam, kɨ zurara angamɨra ikia mamaghɨra ikia, egha kɨ uan ziamɨn bar guizbangɨra ia mɨgei: Arazir kurabagh amir gumazamiziba ariaghɨrima, nan navim derazir puvatɨ. Kɨ kamaghsua, me arazir kuraba ategh angamɨra ikiasa kɨ ifonge. O Israelɨn ikɨzim, ia oragh! Arazir kurar ia amiba, ia da atakigh, egh ua na bagh izɨ. Ia tizim bagha ovengasa?

Onger Akaba 86:15

O Ekiam, apangkuvir arazim ko, akurvazir arazim bar nɨ gizɨvazɨ nɨ zuamɨrama atarir puvatɨ. Nɨ bar en apangkuvigha, deravɨra uan akamɨn gɨn ghua egha nɨghnɨzim giraghɨrazir puvatɨ.

Jeremaia 33:26

ezɨ bar guizbangɨra, kɨ Jekopɨn ovavir boriba ko nan ingangarir gumazim Devitɨn ikɨzim, akɨrim ragh me gasaraghan kogham. Puvatɨ. Kɨ Abraham ko, Aisak ko, Jekopɨn ovavir boriba gativsɨ, Devitɨn ovavir boribar tongɨn atrivibar amutɨ me otivam. Guizbangɨra, kɨ kuarkuvim men ikɨ me damutɨ, me ua deraghvɨra ikiam.”

Jeremaia 31:20

Kɨ Ikiavɨra Itir God, kɨ mɨkeme: Kɨ bar Efraim gifonge, a nan otarim. Kɨ zurara an ziamɨn dia, egha puv a gɨnɨghnɨsi. Dughiar mabar kɨ an atari. Ezɨ guizbangɨra kɨ a gɨnɨghnɨgh an apangkuvigham.

Jeremaia 3:22

Ikiavɨra Itir God kamaghɨn mɨgei: “Ia akɨrim gɨgha Ikiavɨra Itir God gasa zuir boriba, ia uamategh a bagh izɨ. Eghtɨ a ian arazir kuraba batueghtɨ, ia ua ghuamaghegham.” Ezɨ gumazamiziba kamaghɨn an akam ikaragha ghaze, “Nɨ en Ikiavɨra Itir God, en God, kamaghɨn e uamategha nɨ bagha ize.

Jeremaia 3:18

Eghtɨ dughiar kamɨn Judaba ko Israelia, uari inigh notɨn amadaghan itir nguazir me itim ategh izɨ uari akuvagham. Egh me izɨ nguazir kɨ ian inazir afeziabagh anɨngizimɨn ikɨtɨ, nguazir kam men adarazir nguazimɨn mɨn ikɨ, kamaghɨra ikiam.”

Jeremaia 30:11

Kɨ Ikiavɨra Itir God, kɨ ia ko ikɨ ian akurvagham. Kɨ ia batoghezɨ, ia ghua kantrin igharazibar tongɨn itiba, kɨ bar me agɨvagham. Egh kɨ ia agɨvaghan kogham. Guizbangɨra, kɨ puv ia damigham, kɨ arazir voroghɨra itim gɨnɨghnɨgha ia akɨri.”

Jeremaia 4:1

Ikiavɨra Itir God kamaghɨn mɨgei: “Ia Israelia, ia na bagh izɨsɨ, egh na baghvɨra izɨ. Ia pura tintinibar tuavir igharazibar mangan markɨ. Bar markɨ, ia nɨghnɨzir gavgavim narara ikɨ. Egh marvir guar kɨ bar aghuaziba nan damazimɨn da batokegh.

Jeremaia 3:5

Ia kamaghɨn na mɨgɨa ghaze, nɨ ti zurara en anɨngaghɨ egh zurara en ataran kogham.’ Ia kamaghɨn mɨgɨa, egha uan ifongiamɨn gɨn ghua arazir kurar avɨribagh amua ghuavɨra iti.”

Onger Akaba 86:5

O Ekiam, nɨ bar dera, egha gumazibar arazir kuraba gɨn amadi. Egha nɨ ko mɨgeir gumazamiziba, nɨ apangkuvir ekiam men ikia, men azangsɨziba barasi.

2 Atriviba 18:1

Elan otarim Hosia, an namba 3ɨn azenimɨn, a Israelian atrivimɨn itima, Ahasɨn otarim Hesekia, Judan atrivimɨn oto.

2 Atriviba 17:23

Ezɨ gɨn Ikiavɨra Itir God bar men aghua, egha me batoghezɨ me uan kantrin saghon ghue. Ikiavɨra Itir Godɨn arazir kamɨn mɨngarim kamakɨn, God dughiar avɨriba ikiangsɨzir akaba isa Israelia bagha uan akam inigha izir gumazibagh anɨngi. Kar an ingangarir gumaziba, ezɨ me arua Israelia mɨgɨavɨra iti, ezɨ me me baraghan aghua. Kamaghɨn amizɨ, Asiriaba iza Israelia mɨsogha me abɨragha, me inigha uan kantrin ghue, ezɨ me kantrin kamɨn ikiavɨra iti.

Godɨn Araziba 30:2

Egh ia ko ian ovavir boriba navibagh iragh Ikiavɨra Itir God, ia uan God bagh izɨ an akaba guizbangɨra uan navir averiaba ko uan duaba sara bar dar gɨn mangɨ, mati kɨ datɨrɨghɨn ia mɨgei moghɨn,

Hosea 6:1

Ezɨ gumazamiziba kamaghɨn mɨgei: “Aria, e uamategh Ikiavɨra Itir God bagh mangam. An e abɨagharigha gɨfa, egh a ti e damutɨ, e ua deravɨram otogham. An e mɨsoghezɨ duaba e batifi, egh a duar kaba ua da ikegham.

Esekiel 39:25

“Kɨ Ikiavɨra Itir Godɨn Ekiam, kɨ kamaghɨn mɨgei: Jekopɨn ovavir borir kantrin igharazibar kalabuziabar mɨn itiba, kɨ datɨrɨghɨn men apangkuvigh ua me inigh, men ikɨzim damightɨ me ua deragham. Egh kɨ uan ziar zuruzim deragh an gantɨ, gumazitam anebɨraghan kogham.

Jeremaia 31:8

Bar guizbangɨra, kɨ notɨn amadaghan itir nguibar kam ko nguazir oteviba bar uan gumazamiziba inigh, ua men aku izam. Damazir kuraba itir gumaziba, ko suer kuraba itir gumaziba ko, amizir navir adaseba ko, amizir boriba batasava amiba, me uaghan izam. Eghtɨ gumazamizir avɨrim uamategh nguibar kamɨn izam.

Jeremaia 3:14

“Kɨ Ikiavɨra Itir God, kɨ kamaghɨn mɨgɨa ghaze, Ia gumazamizir akɨrim ragha na gasaraziba, kɨrara ian Ekiam, ezɨ ia nan boribara. Kɨ vaghvagh ian nguibaba ko ikɨzibar aven, ian tarazi inigh ua uan mɨghsɨam Saionɨn izam. Kamaghɨn amizɨ, ia uamategh na bagh izɨ.

Jeremaia 3:7

Kɨ kamaghɨn nɨghnɨgha iti, me uan arazir kurar kabar amigh gɨvagh, gɨn ua na bagh izam. Ezɨ puvatɨ, me ua izezir pu. An buaramizim Juda, amizir par ikɨzibagh asɨghasɨzir kam, a Israelian arazimɨn gani.

Jeremaia 3:1

Ikiavɨra Itir God ua Israelia mɨgɨa ghaze: “Gumazim uan amuim batueghtɨ a mangɨ gumazir igharazimɨn ikegh, egh uamategh uan par faragha ikezim bagh izeghtɨ, an par faragha ikezim uam a inian kogham. A kamaghɨn damightɨ, kantrin kamɨn nguazim nan damazimɨn bar mɨzegham. Israelia, ia tintinibar gumazir avɨriba isa me koma akuigha gɨfa. Egha datɨrɨkɨn ia uamategh na bagh izasa, a?

Aisaia 44:22

Ian arazir kuraba, kɨ da adegha da isa pɨn da akunizɨ, amɨnim da inigha ghu. Nɨn arazir kuraba gɨvagham, mati ghuariaba aruem mɨzaraghara anadi, da a sara ghuegha gɨfa. Kɨ ian akurvagha deravɨra ian gari, kamaghɨn amizɨ, ia uamategh na bagh izɨ.”

Aghuzir Akaba 28:13

Gumazim uan arazir kuram modogh, an amir ingangaritam deragh otoghan kogham. Ezɨ gumazim uan arazir kuraba bar da ghurigh, akɨrim ragh arazir kurar kabagh asaraghtɨ, God an apangkuvigham.

Onger Akaba 103:17

Ezɨ gumazamizir Ikiavɨra Itir Godɨn apengan ikia an atiatiba, a zurazurara men apangkufi. Egh men ovavir borir gɨn otivamiba, a uaghan deragh me damuvɨra ikiam.

Onger Akaba 103:8

Ikiavɨra Itir God en kuarkuva an apangkuvim en iti. A bar en apangkuvigha zuamɨram en atarir puvatɨ.

Onger Akaba 79:5

O Ikiavɨra Itir God, nɨ en ataravɨra iti o? Nɨ dughiar ruarimɨn en atar ikɨ kamaghɨra ikiam o? Nɨ navim en ikuvigh, nɨn anɨngagharim avimɨn mɨn isi kamaghɨra ikiam o?

2 Eghaghaniba 30:9

Ia fo, ian apaniba ian aveghbuaba ko, boriba inigha uan nguibabar ghuegha, me isa kalabuziabar mɨn me arɨki. Ia uamategh Ikiavɨra Itir God bagh izɨtɨ, a ian apanibar amutɨ, me ian adarazir apangkuvigh, ua me amadaghtɨ me uamategh ian nguazimɨn izam. Bar guizbangɨra, Ikiavɨra Itir God ian God, a Godɨn apangkuvim itim. Kamaghɨn amizɨ, ia navibagh iragh, a bagh uamategh izɨtɨ, a ragh ua ian ganɨva, ua ia iniam.”

2 Atriviba 17:6

Ezɨ namba 9ɨn azenimɨn Hosia Israelian atrivimɨn itima, Asirian atrivim Samariaba dɨkabɨragha, men nguibar ekiam ini. Egha a Israelia inigha Asirian kantrin ghu. Egha marazi isa Halan nguibar ekiam gatɨ, egha marazi isa Gosanɨn Distrighɨn aven itir, Haborɨn Fanemɨn boroghɨra me arɨki. Ezɨ marazi Midian kantrin nguibabar iti.

2 Atriviba 15:29

Peka Israelian atrivimɨn itir dughiamɨn, Asirian Atrivim, Tiklat Pileser iza, Israelia mɨsogha, Ijonɨn nguibar ekiam, ko Abel Betmakan nguibar ekiam, Janoan nguibar ekiam, Kedesɨn nguibar ekiam, Hasorɨn nguibar ekiam, Gileatɨn Distrik, Galilin Distrik, ko Naptalin anabamɨn nguaziba bar ada ini. Egha a danganir kabar gumazamiziba inigha, Asirian kantrin ghua me isa kalabuziabar mɨn ingangarir gumazamizir kɨnibar me arɨki.

Jenesis 4:7

Nɨ arazir aghuim damightɨ, kɨ nɨn ofa gifongeghtɨ, nɨ bar akuegham. Egh nɨ arazir kuram damightɨ, arazir kuram nɨ gasɨghasɨghasa, nɨ mɨzuai. Egha arazir kuram nɨ abɨnasa bar ifonge. Kamaghɨra nɨ uaghan gavgavigh anebɨn.”

Ofa Gami 26:40

“Eghtɨ gɨn ian ikɨvɨra ikiamin varazira, me uan arazir kurabagh nɨghnɨgh dar gun na mɨkɨmam. Egh me kamaghɨn mɨkɨm suam, ‘E uan inazir afeziaba ko arazir kuram gami. E nɨ barazir puvatɨgha nɨn akaba batoke.’

Onger Akaba 103:9

An atara ghuavɨra itir puvatɨ. An atara egha adarimɨn suirazɨ, a dughiar ruarimɨn itir puvatɨ.

Jeremaia 11:6

Ezɨ Ikiavɨra Itir God, na mɨgɨa ghaze, “Nɨ nan mɨgɨrɨgɨar kaba isɨ Judan nguibaba ko Jerusalemɨn tuavir aguabar mangɨ, dar gun ivɨvɨgh me mɨkɨm: Ia datɨrɨghɨn nan Akar Dɨkɨrɨzir Gavgavimɨn akaba baragh, dar gɨn mangɨ!

Jeremaia 12:15

Kɨ bar moghɨra me batuegh gɨvagh, gɨn ua men apangkuvigh, men aku men nguazibara mangam.

Esekiel 11:17

“Kamaghɨn amizɨ, kɨ Ikiavɨra Itir Godɨn Ekiam, kɨ kamaghɨn mɨgɨa ghaze: Kantrin igharazir kɨ faragha ia amangizɨ ia ghua itir kabar, kɨ ua ia inigh izɨ ia akuvagh, Israelɨn nguazim isɨ ua ia danɨngam.

2 Eghaghaniba 29:10

“Kamaghɨn amizɨ, kɨ datɨrɨghɨn Ikiavɨra Itir God, a Israelia en God ko Akar Dɨkɨrɨzir Gavgavim damuasa uan navir averiamɨn aven nɨghnɨsi, eghtɨ a uam en anɨngaghan kogham.

Aisaia 31:6

Ia Israelia, ia Ikiavɨra Itir God, deragha a barazir puvatɨgha an akaba batosi. Egh ia uan navibagh iragh uamategh a bagh izɨ.

Jeremaia 31:21

“Ia Israelia, ia uan nguibam ategha ghuzir tuavir kam, ia deragh a gɨnɨghnɨgh, egh ia ua izɨsɨ, ababanir taba uari bagh ada asegh. Ia Israelia, ia mati nan guivir igiar kɨ bar ifongezim, ia datɨrɨghɨn uamategh uan nguibabar izɨ.

Sekaraia 1:4

Ia uan inazir afeziabar mɨn damu ikian markɨ. Fomɨra Godɨn akam inigha izir gumaziba nan akam me mɨkɨra ghaze, Ikiavɨra Itir Godɨn Gavgaviba Bar itim ghaze, ia pazavɨra itir arazir kuraba ataghɨragh. Ezɨ me na barazi puvatɨgha, nan gɨn izir puvatɨ. Kar Ikiavɨra Itir Godɨn mɨgɨrɨgɨam.