Jeremaia 3:10 - Godɨn Eghaghanim: Akar Gavgavir Dɨkɨrɨzir Ghurim ko Igiam10 Israelɨn buaramizim Juda, nɨghnɨzir gavgavir nan itir arazim ategha, arazir kurabagh ami, egha guizbangɨra uan navim gɨrazir puvatɨgha ua na bagha ize. Bar puvatɨ. A ifara navim gɨra. Kɨ Ikiavɨra Itir God, kɨ mɨkemegha gɨfa.” အခန်းကိုကြည့်ပါ။ |
Nan gumazamizir kaba na ategha uamategha nguazir kamɨn bizibagh amua, na gamizɨ kɨ bar men anɨngaghe. Kamaghɨn amizɨ, kɨ Asiriaba amadaghtɨ, me mangɨ gumazamizir kɨ anɨngaghavɨra itir kabagh asɨghasɨgh, egh me dɨkɨtɨ me mati gumazim tuavir beghneazim dɨti moghɨn me magɨram. Egh me uan ifongiabar gɨn mangɨ men bizir aghuiba me dama da mɨkegh, da inigh uan kantrin mangam.
Israelian danganiba bar asebar marvir guaba dar ikiavɨra iti, ezɨ bizir kaba Ikiavɨra Itir Godɨn damazimɨn bizir bar kurar a bar aghuaziba. Ezɨ Josaia marvir guar kaba bar adagh asɨghasɨki, egha Israelia Ikiavɨra Itir God, uan Godɨn gɨntɨghasa, bar gavgafi. Ezɨ an atrivimɨn itir dughiamɨn, gumazamiziba Ikiavɨra Itir God, men ovavibar Godɨn gɨntɨghasa bar gavgafi, egha me anetaghizir puvatɨ.
“Kɨ amɨnir bar puvɨra feir mam ko, arɨmariar kurar mam amadazɨ, aning iza ian azenibagh asɨghasɨki. Ezɨ odeziba iza ian dagher azeniba ko, wainɨn azeniba ko, fighɨn temeba ko, olivɨn temeba, da apa bar ada agɨfa. Kɨ bizir kabagh ami, ezɨ ia tong uan navibagh iraghasa nɨghnɨzir pu. Bar puvatɨ. Kɨ Ikiavɨra Itir God, kɨ kamaghɨn mɨkeme.”
Ezɨ Ekiam kamaghɨn mɨgɨa ghaze: “Gumazamizir kaba uan akatoribara nan ziam fe, ezɨ men naviba ko nɨghnɨziba bar nan saghon iti. Me guizbangɨra nan ziam fer puvatɨ. Me gumaziba pura uari amizir otivizir arazibar gɨntɨsi. Me arazir kabar men sure gamizɨ, me pura uan akatoribara dar bori, ezɨ da men navir averiabar aven zuir puvatɨ.
Fomɨra Israelia ko Judaba, me Godɨn akamɨn gɨn mangasa akar mam akɨri. Ezɨ puvatɨ, me anebigha uam arazir bar kurar mam gami. Arazir kurar kam me kantrin aven nguibabar bar a gamua, egha uaghan Jerusalemɨn a gami. Men gumazir maba, asebar ziaba fer adarazir amiziba isa dar iti. Ezɨ men arazir kam, Ikiavɨra Itir Godɨn Dɨpenir a bar ifongezim gamizɨ, a bar an damazimɨn mɨze.