Jeremaia 26:15 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁵ Ezɨ kɨ kamaghsua, ia deraghavɨra kamaghɨn fogh. Bar guizbangɨra, Ikiavɨra Itir God uabɨ na amadazɨ, kɨ iza akar kɨ ia mɨkemezir kabav gei. Eghtɨ ia na mɨsueghtɨ kɨ aremegham, ia kamaghɨn fogh, ia gumazir arazir kuratam gamizir puvatɨzim puram a mɨsueghtɨ an aremeghtɨ, ia an osɨmtɨzim iniam. Eghtɨ osɨmtɨzir kam a nguibar ekiar kamɨn ikɨva, uaghan bar moghɨra nguibar kamɨn gumazamiziba sara ikiam.”

Jeremaia 26:15 ပူးပေါင်းရင်းမြစ်များ

Aghuzir Akaba 6:17

Gumazir uabɨ uabɨ fem, gumazir igharazibar gara ghaze, me pura biziba. Gumazir akar ifavaribav geim. Gumazir pura gumazir igharazibav sozi me ariaghirim.

Dɨboboniba 35:33

Ia an amamangatɨghtɨ a mongamin nguibar ekiam ategh mangɨgham, ian arazir kamɨn, ia nguazir kam damightɨ a nan damazimɨn mɨzegham. Gumazibav sozi me ariaghirir arazir kam, nguazim gamima, a nan damazimɨn mɨze. Nguazim damightɨ a zueghamin arazim, tuavir vamɨra iti, a kamakɨn, ia gumazir a mɨsoghezɨ an aremezimɨn arazir kuram ikaragh a mɨsueghtɨ an aremegh. Tuavir igharazitam, ua itir puvatɨ.

Akar Mogomem 16:6

Gumazir kaba nɨn akam inigha izir gumazamiziba ko nɨn gumazamizibav soghezɨ men ghuziba irezɨ me ariaghire. Ezɨ nɨ ghuzim gumazir kurar kabagh anɨngizɨ, me aneremam. Ghuzir me apir kam, men arazir kurar me amiziba ikarvagham.”

Aposel 7:60

Egha a uan tevimning apɨrigha irɨgha pamtem dei, “Ekiam, nɨ men arazir kurar kam gɨnɨghnɨghan markɨ, a gɨn amadagh.” A kamaghɨn mɨkemegha areme.

Matyu 26:25

Ezɨ gumazir Iesus isɨva apanibar agharim darɨghamim, a Judas, a kamaghɨn an azai, “Ekiam, nɨ ti na mɨgɨa ma?” Ezɨ Iesus ghaze, “Nɨrara, nɨ mɨgei moghɨra!”

Jeremaia 22:3

Ikiavɨra Itir God kamaghɨn mɨgei, ia arazir aghuibara damu. Eghtɨ gumazitam gumazir igharazimɨn bizim okemegha osɨmtɨzim a ganɨngi, ia gumazir osɨmtɨzim itir kamɨn akuragh an osɨmtɨzim agɨfagh. Ia borir afeziaba ariaghireziba, ko amizir paba ovengeziba, ko Kantrin Igharazibar Gumazamizir ia ko itiba, ia pazɨ me damuan markɨ. Egh ia uaghan uan nguazir kamɨn aven, gumazamizir osɨmtɨziba itir puvatɨziba, pura me mɨsoghtɨ me arɨghiram markɨ.

Jeremaia 7:6

Ia Kantrin Igharazibar Gumazamizir ia ko itiba, pas me damuan markɨ. Egh borir ameboghfeziaba ariaghireziba, ko amizir paba ariaghireziba ia paza me damuan markɨ. Egh ia uan nguazir kamɨn aven, gumazamizir osɨmtɨziba itir puvatɨziba pura me mɨsoghtɨ me arɨghiram markɨ. Egh ia asebar ziaba fan markɨ. Ian arazir kam ia gasɨghasɨgham.

Matyu 26:4

Egha me arazir mogometamɨn Iesusɨn suiragh a mɨsueghtɨ an aremeghasa tuaviba buria, akabav sosi.

Jeremaia 22:17

Ezɨ nɨ uabɨra uabɨ gɨnɨghnɨgha, egha zurara bizir igharagha gariba iniasa puv a dagh ifuegha, ifavarir arazim gamuava bizir kaba isi. Egha nɨ pura gumazir arazir kurabagh amir puvatɨzibav sozi me ariaghiri. Egha nɨ gumazamiziba dɨkabɨra paza me gami.”

Jeremaia 2:34

Gumazir onganaraziba ian dɨpeniba akarigha okɨmasa dar aven ghuzir puvatɨ. Bar puvatɨ. Ezɨ ia pura me mɨsoghezɨ me ariaghire. Men ghuziba ian korotiabar puegha ikiavɨra iti. Ian arazir kurar kabanang bagh, kɨ osɨmtɨzim ia danɨngam.

Jeremaia 2:30

Ian marazi kɨ ivezir kuram me ganɨga, me mɨsoghezɨ me ariaghire, ezɨ ian avɨriba kɨ ia gamizir bizir kamɨn ganigha, me uan arazir kuraba ataghizir pu. Bar puvatɨ. Ia mati laionba asɨziba zuamɨra dar suigha dav sozi da ariaghiri moghɨn, ia nan akam inigha izir gumaziba, mɨdorozir sabamɨn me mɨsoghezɨ me ariaghire.

2 Atriviba 24:4

Atrivim Manase uaghan, fomɨra Jerusalemɨn nguibar ekiamɨn aven itir gumazamizir aghuir arazir kuratam gamizir puvatɨzir avɨribav soghezɨ me ariaghire. Ezɨ Ikiavɨra Itir God bizir kam gɨnɨghnɨghavɨra ikia, egha Atrivim Manasen arazir kuraba gɨn amangan aghua.

Godɨn Araziba 19:10

Egh ia nguazir Ikiavɨra Itir God, ia ganɨdir kamɨn ikɨ, egh gumazir osɨmtɨziba puvatɨzir tam mɨsueghtɨ an aremeghan markɨ, egh ia osɨmtɨziba puvatɨgham.

Jenesis 42:22

Ezɨ Ruben kamaghɨn mɨgei, “Kɨ ia mɨkemegha gɨfa, ia arazir kuratamɨn otarir kam pazɨva a damuan markɨ, ezɨ ia nan akam baraghizir puvatɨ. Ezɨ osɨmtɨzir datɨrɨghɨn e batozir kam, kar an ovevemɨn ikarvazim.”

Jenesis 4:10

Ezɨ Ikiavɨra Itir God kamaghɨn Kein mɨgei, “Manmaghɨn amizɨ nɨ arazir kurar kam gami? Nɨn dozimɨn ghuzim nguazim giregha gɨfa, ezɨ kɨ ghuzir kamɨn ararem barazi, a uan osɨmtɨzim ikarvaghasava nan arai.

Aghuzir Akaba 6:16

Ikiavɨra Itir God 7plan arazir kurar kabar amuan anogoregha bar dar aghua:

Jeremaia 26:12

Ezɨ gumazir dapaniba ko, gumazamiziba bar moghɨra, Jeremaia kamaghɨn men akaba ikara, “Ikiavɨra Itir God uabɨ na amadazɨ, kɨ akam inigha izir gumazimɨn akar ia oraghizir kam, an gun mɨkeme. A uabɨ ghaze, Dɨpenir kam ko nguibar ekiar kam ikuvigham.

2 Eghaghaniba 24:22

Atrivim Joas, a Sekaraian afeziam Jehoiada amizir arazir aghuibagh nɨghnɨzir puvatɨ. A pura Sekaraia mɨsoghezɨ an areme. Sekaraia duam suer dughiamɨn, a kamaghɨn mɨgei, “Ikiavɨra Itir God ia amir bizir kamɨn ganigh ia ikarvagh ivezir kuram ia danɨngam.”

Jeremaia 30:1

Ikiavɨra Itir God kamaghɨn akam Jeremaia ganɨga ghaze,