Jeremaia 23:24 - Godɨn Eghaghanim: Akar Gavgavir Dɨkɨrɨzir Ghurim ko Igiam

²⁴ Eghtɨ gumazitam mangɨ igharagh modogham, eghtɨ kɨ Ikiavɨra Itir God, kɨ ti an ganighan kogham? Puvatɨ. Kɨ Ikiavɨra Itir God, kɨ bar overiam ko nguazimɨn iti. Kamaghɨn amizɨ, kɨ gumazir kamɨn gari.

Jeremaia 23:24 ပူးပေါင်းရင်းမြစ်များ

Aghuzir Akaba 15:3

Ikiavɨra Itir God bar bizibar garima da bar nguazimɨn otifi, egha a uaghan gumazir aghuiba ko gumazir kurabar gari.

Onger Akaba 139:7

Kɨ managhɨra mangɨgh, nɨn duam ategham? Kɨ managhɨra mangɨgh nɨn modogham? Bar puvatɨ.

Onger Akaba 90:8

Nɨ en arazir kuraba bar adar gari. En arazir kurar e mogava amiba, nɨ bar ada isa azenim garigha gɨfa.

Aisaia 29:15

Gumazamizir uan nɨghnɨzir kuraba ko uan arazir kuraba Ikiavɨra Itir Godɨn da mongasava amiba, mevzika! Me bar ikuvigham! Me arazir kurar kaba, mogomer danganiba ko dɨmagaribar dagh amua kamaghɨn mɨgɨa ghaze, “Tinara en ganigh e gɨfogham?”

1 Atriviba 8:27

“O God, guizbangɨra nɨ ti izɨ nguazir kamɨn ikiam o? E fo, overiar bar pɨn itim a bar ekefe, ezɨ nɨ an ikiamin danganiba ti puvatɨghama! Eghtɨ dɨpenir kɨ nɨ bagha ingarizir kam, a manmaghɨn nɨn tughatɨgham?

Aisaia 57:15

“Kɨrara, kɨ God, kɨ ziar bar pɨn itim ikia, egha zurara iti. Ezɨ nan ziam bar zue. Kɨ bar pɨn ikia uan Nguibar Zuezimra iti. Egha kɨ uaghan gumazamizir uari dɨkabɨra, uan arazir kuraba ataghɨragha navibagh iraziba, kɨ me ko iti. Egha kɨ gavgavim men navibagh anɨga, men ikɨrɨmɨrim gamima, a ua deraghavɨram oto.

Aisaia 66:1

Ikiavɨra Itir God kamaghɨn mɨgei, “Overiam, a nan atrivir dabirabim, ezɨ nguazim kɨ uan dagarimning arɨzir danganim. Eghtɨ ia managh nan Dɨpenimɨn ingaram? Eghtɨ danganir manamra nan avughsazir danganimɨn mɨn ikiam? Bar puvatɨgham.

Onger Akaba 10:11

Gumazir kuram kamagh nɨghnɨgha ghaze, “God ti arazir kurar kɨ amir kaba, mɨghɨgha dagh nɨghnɨzir puvatɨ. A uan damazimning dukuagha, nan garir puvatɨ.”

2 Eghaghaniba 6:18

“O God, guizbangɨra nɨ ti izɨ nguazir kamɨn ikiam o? E fo, overiar bar pɨn itim a bar ekefe, ezɨ nɨ an ikiamin danganiba ti puvatɨghama! Ezɨ dɨpenir kɨ nɨ bagh ingaramin kam, a manmaghɨn nɨn tughatɨgham?

Efesus 1:23

Sios mati Kraisɨn namnam. Ezɨ Krais biziba bar dar aven ikia bar dagh izɨfa. Egha Krais uan siosɨn aven ikia bar a gizɨfa.

2 Eghaghaniba 2:6

Guizbangɨra, gumazitam God bagh dɨpenir tamɨn ingaran iburagham. E fo, overiar bar pɨn itim, en damazimɨn a bar ekefe, egha a uaghan Godɨn damazimɨn, bar sufi. Kamaghɨn, tinara a bagh dɨpenitamɨn ingaramin gavgavim iti? Ti puvatɨgham. Kɨ uaghan a bagh dɨpenimɨn ingaran iburaghburaki. Egha kɨ a bagh, paura tutɨ a isi mɨgharir mughuriar bar aghuim damuamin danganimɨn mɨn, Dɨpenimɨn ingarasa ifonge.

Daniel 4:35

A gari, nguazimɨn itir gumazamiziba mati pura biziba. An Nguibamɨn itir enselba ko nguazimɨn itir gumazamiziba an apengan iti, a bar me gatifa. Egh a bizitam damusɨ an a damuam, eghtɨ gumazitam an anogoreghan kogham. Guizbangɨra, gumazitam kamaghɨn an azangsɨghan kogham, Nɨ bizir tizim gami. Bar puvatɨ.

Esekiel 9:9

Ezɨ a na ikaragha ghaze, “Israelɨn ikɨzim ko Judan ikɨzim arazir kurar bar avɨrim gami, ezɨ osɨmtɨzir bar ekiam iti. Nguazir kamɨn, arazir gumaziba uariv soghava ariaghirim bar ekefe. Ezɨ nguibar ekiar kamɨn gumazamiziba uarir ikɨzɨrɨzir arazim bar izɨfa. Me ghaze, Ikiavɨra Itir God ti nguazir kam akɨrim ragha a gasara. Egha en garir puvatɨ.

Esekiel 8:12

Ezɨ Ikiavɨra Itir God, kamaghɨn na mɨgei, “Nguazir kamɨn gumazim, Nɨ gan! Israelian gumazir dapaniba mɨtarmemɨn mueghav ikia arazir kurar kabagh ami. Me vaghvagha uan marvir guaba bagha ofa gamir dakoziba iti. Me ghaze, Ikiavɨra Itir God ti men garir puvatɨ. Ikiavɨra Itir God ti akɨrim ragha nguazir kam gasara.”

Jeremaia 49:10

Eghtɨ kɨ ua Ison ovavir boribagh asɨghasɨghamin dughiamɨn, kɨ ian biziba bar adagh asɨghasigham. Kɨ ian mogomer danganiba bar adagh asɨghasightɨ, ia ua mongan kogham. Ian boriba ko, ian namakaba ko, ian boroghɨra itir darasi, ia bar moghɨra ikuvigham. Egh Idomian adarazi bar gevegham.

Onger Akaba 148:13

Bar guizbangɨra, Ikiavɨra Itir God, an ziam bar ekevegha gumazamizibar ziaba bar dagh afira, egha an ziar ekiam bar pɨn ikia nguazim ko overiam gafira. Kamaghɨn amizɨ, biziba bar moghɨra an ziam fɨ.

Jenesis 16:13

Ezɨ gɨn Hagar kamaghɨn nɨghnɨsi, “Ame! Guizbangɨra, kar Ikiavɨra Itir God, a uan akam na ganɨngi. Ezɨ Godɨn nan garim, kɨ uabɨ an ganigha egha angamɨra ikiavɨra iti!” Kamaghɨn a ziar kam Ikiavɨra Itir God ganɨngi, “Biziba Bar Dar Garir God.”

Hibru 4:13

Ezɨ bizir God ingariziba, tam Godɨn damazimɨn modoghan kogham. Bar puvatɨ. Ezɨ biziba bar kuiaghiregha Godɨn damazimɨn bar azenara ikiam. Eghtɨ Godra arazir e amiba tuisɨghtɨma e dar a geghanam.

Jopɨn Akɨnafarim 34:21

“E managh zui, Godɨn damazim en araziba bar dar gari. Dughiaba bar, an damazim deravɨra en daroribar garavɨra iti.

Jopɨn Akɨnafarim 34:22

Dɨmagarir bar mɨtater pɨzi tam ikɨtɨ, Godɨn damazimɨn arazir kurabagh amir gumazamiziba ti an aven modogham o?

Jeremaia 16:17

Me amir biziba bar nan modozir puvatɨ. Da bar nan damazimɨn azenara iti. Me uan arazir kuraba mongɨva avegham.

Jeremaia 32:19

Nɨ bizir aghuibar amuasa nɨghnɨsi. Nɨ gavgavim ikia, egha nɨ ingangarir ekiabagh ami. Nɨ gumazamiziba amir biziba nɨ bar adar gari. Egha nɨ vaghvagha gumazamiziba amir araziba tuisɨgha, arazir me amibar ivezimra ikarvagh me ganɨdi.

Daniel 2:22

Egha God nɨ bizir aven modoghav itir me fozir puvatɨziba men akakasi. Ezɨ zurara angazangarim nɨn iti, ezɨ nɨ mɨtatemɨn itir biziba, nɨ dagh fogha gɨfa.

Onger Akaba 139:8

Kɨ nɨn Nguibamɨn mangam, nɨ uaghan iti. Kɨ Gumazamizir Oveaghuezibar Nguibamɨn ikiam, nɨ uaghan ti.