Jeremaia 23:2 - Godɨn Eghaghanim: Akar Gavgavir Dɨkɨrɨzir Ghurim ko Igiam

² Kamaghɨn, kɨ Ikiavɨra Itir God, Israelian God, kɨ bighavɨra gumazir dapanir nan gumazamizibagh ativiba me mɨgɨa ghaze, Ia nan sipsipba batogha men agɨntɨzi me tintinibar ara ghue. Ia deragha men gara me geghuvir puvatɨ. Kamaghɨn kɨ Ikiavɨra Itir God, kɨ ghaze, ia amizir arazir kurar kam, kɨ deraghvɨra an gan egh a ikarvagham.

Jeremaia 23:2 ပူးပေါင်းရင်းမြစ်များ

Maika 7:4

Ezɨ gumazir igharaziba ghaze me deragha arazir aghuibagh ami, ezɨ God men gari, me ikuvigha mati grazir ataghatariba ko, benir dɨkoniba itiba. Dughiam otogha gɨfa, ezɨ God uan gumazamizibagh asɨghasɨghasa, mati an akam inigha izir gumazim mɨkemezɨ mokɨn. God kamaghɨn damutɨ, an gumazamiziba okam nɨghnɨgh onganigh tintinibar nɨghnɨgham.

Ua Me Ini 32:34

Aria, nɨ mangɨ, gumazamiziba inigh danganir kɨ nɨ mɨkemezir kamɨn mangɨ. Nɨ oragh. Nan ensel ia inigh ian faragh tuavimɨn mangam. Eghtɨ gɨn kɨ izɨ ivezir kuram gumazamizir arazir kuram gamiziba, kɨ me ikaragham.”

Jeremaia 23:34

Eghtɨ akam inigha izir gumazitam o, ofa gamir gumazitam o, gumazir kɨnitam, ti kamaghɨn mɨkɨmam, ‘Ikiavɨra Itir Godɨn akam, bar oseme.’ Eghtɨ kɨ gumazir kam ikarvagh osɨmtɨzim a danɨngɨva, an adarazi sara osɨmtɨzim me danɨngam.

Jems 1:27

Guizbangɨn nɨghnɨzir gavgavir God Afeziamɨn damazimɨn deragha osɨmtɨziba puvatɨzim, a kamakɨn: E borir ameboghfeziaba ovengezibar akurvaghɨva, amizir odiarir men paba ovengeziba sarama akurvagh, men osɨmtɨziba ateram. Ezɨ uaghan bizir mam, e uari uan daroriba deravɨra dar ganam, eghtɨ nguazir kamɨn araziba e damutɨ e Godɨn damazimɨn mɨzeghan kogham.

Matyu 25:43

Egha kɨ nguibar igharazimɨn gumazimɨn mɨn itima, ia na inigha uan dɨpenibar ghuzir puvatɨ, ezɨ kɨ bibiamra itima, ia korotiatam na ganɨngizir puvatɨ, ezɨ kɨ areima, ia nan akurazir puvatɨ, ezɨ kɨ kalabusɨn itima, ia ghua nan ganizir puvatɨ. Kamaghɨn amizɨ, ia na gitagh!’

Hosea 2:13

A dughiar ruarimɨn na gɨnamada, egha ghua mɨgharir mughuriar aghuim zuir ofaba isa asem Bal bagha ofabagh ami. Egha kurkazir aghuaribagh amua gumazir a ifongezibar gɨn arui. Kamaghɨn amizɨ, kɨ ivezir kuram a danigham. Kɨ Ikiavɨra Itir God, kɨ kamaghɨn mɨgei.”

Jeremaia 13:21

Eghtɨ gumazir nɨ namakabagh amigha akurvaghiziba, me izɨ nɨ dɨkabɨragh nɨ gativam. Eghtɨ nɨ manmaghɨn me mɨkɨmam? Nɨ amizim otasa mɨzazim isi moghɨn, nɨ ti mɨzazir bar kuram baragham.

Jeremaia 11:22

“Kɨ Ikiavɨra Itir Godɨn Gavgaviba Bar Itim, kɨ guizbangɨra mɨgei: Kɨ Anatotɨn gumazamiziba pazɨvɨra me damighɨva, ivezir kuram me danɨngam. Kɨ me mɨsoghsɨ apaniba amadaghtɨ me izɨ men gumazir igiabav sueghtɨ me arɨmɨghiregham. Eghtɨ dughiar kamɨn, Anatotɨn gumazamiziba dagheba puvatɨghtɨ, men otariba ko guiviba arɨmighiram.

Jeremaia 8:12

“Me ti arazir kurar me amizibar aghumsɨghama? Bar puvatɨ. Me tong aghumsɨzir puvatɨ. Kamaghɨn, kɨ men igharaz darazigh asɨghasɨghizɨ moghɨn, kɨ gumazamizir kaba mɨzazim me danɨng, me gasɨghasɨgham. Kɨ Ikiavɨra Itir God, kɨ mɨkemegha gɨfa.

Jeremaia 5:29

“Kɨ Ikiavɨra Itir God, guizbangɨra mɨgei, Kɨ gumazir kabar arazir kuraba bagh pazɨvɨra me damigham. Bar guizbangɨra, kɨ gumazamizir kabanang ikarvagh ivezir kuram me danɨngam.

Jeremaia 5:9

Kɨ Ikiavɨra Itir God, kɨ ghaze, Gumazamizir kaba nan ziar ekiam gasɨghasɨsi. Kamaghɨn, kɨ guizbangɨra gumazamizir kabar arazir kuraba ikarvaghɨva, bar me gasɨghasigham.

Matyu 25:36

ezɨ kɨ bibiamra itima, ia korotiaba na ganɨngi, ezɨ kɨ areima, ia nan akurvasi, ezɨ kɨ kalabusɨn itima ia iza nan gari. Kamaghɨn amizɨ, ia aven izɨ.’

Jeremaia 10:21

Ezɨ kantrin gumazir dapaniba onganigha fofoziba puvatɨ, egha nɨghnɨzir aghuim bagha Ikiavɨra Itir Godɨn azangsɨzir puvatɨgha ire. Kamaghɨn me deragha ingangarir aghuim gamizir puvatɨ, ezɨ apaniba iza gumazamiziba batoghezɨ me tintinibar ghuegha kantrin igharazibar iti, mati sipsipbar garir gumazim deragha dar garir puvatɨzɨ, afiar atiaba sipsipba batoke.

Jeremaia 13:17

Ia Ikiavɨra Itir Godɨn gumazamiziba, ia mati an sipsipɨn bɨzim, a deravɨra ia geghufi. Ia nan akam baraghan aghuaghavɨra ikɨtɨ, apaniba izɨ, ia inigh mangɨ, kantrin igharazimɨn pura ingangarir gumazir kɨnibar mɨn ia arigham. Eghtɨ, kɨ uabɨra modogh ikɨva ian ifaghatir arazim gɨnɨghnɨgh, ia bagh pamtem azitɨ, temeriba nan damazimning gizɨvagh izighiram.

Jeremaia 13:20

“O Jerusalemɨn nguibar ekiam, nɨ kogh notɨn amadaghan izir mɨdorozir gumazibar gantɨ, me nɨ bagh izam. Gumazamizir nɨ bar ifuegha deragha me geghuva men gariba, me mati sipsipɨn dirir nɨ me bagha bar akongeziba, me managh iti?

Jeremaia 44:22

Ia arazir bar kuribagh ami, ezɨ gɨn Ikiavɨra Itir God ian arazir kurar kam bar a giporpore. Bizir kam bangɨn, a ian nguazim gamizɨ, a ikuvigha nguazir kɨnimɨn oto. Ezɨ gumazitam an itir puvatɨgha iza datɨrɨghɨn tu. Kamaghɨn amizɨ, Kantrin Igharazibar Gumazamiziba akar kurabar uan apanibav kɨmasa kamaghɨn mɨgei, ‘Ia Juda ikuvizɨ moghɨn, ia ikuvigham.’

Esekiel 34:5

Nan sipsipbagh eghuvir gumaziba puvatɨ, kamaghɨn amizɨ, da pura tintinibar zui, ezɨ asɨzir atiaba dav sogha da api.

Sekaraia 11:16

Guizbangɨra, kɨ uan gumazamizibar ganasa gumazir mam atɨ, me mati sipsipɨn okoruar mam. Ezɨ gumazir kam sipsipbar tongɨn dar ikuvizibar akurvazir puvatɨ, egha a uaghan sipsipɨn ovengeziba tong da buria dar deir puvatɨ. A uaghan dar duaba nozir puvatɨ, egha deravɨra itiba, a dagheba dagh anɨdir puvatɨ. Bar puvatɨ. A mɨkarziba sara itiba, a uabɨ dar tuziba apava dar duiaba ko, puziba sara bar da asigha da ame.

Jeremaia 17:10

Kɨ Ikiavɨra Itir God, kɨrara, kɨ gumazamizibar navir averiaba ko men nɨghnɨziba aven men gari. Egha vaghvagha gumazamizibar araziba tuisɨgha, me amir arazaraziba bar da ikarvagha ivezim me ganɨdi.”

Sekaraia 10:3

Ezɨ Ikiavɨra Itir God kamaghɨn mɨgei, “Kantrin Igharazibar Gumazamizibar gumazir dapanir nan gumazamiziba gativaziba, nan navim men atara me bagha nan isi. Kɨ ivezir kuram me danɨngam. Judan gumazamiziba, me nan gumazamizibara. Kɨ Ikiavɨra Itir Godɨn Gavgaviba Bar Itim, kɨ deraghvɨra men ganam, mati sipsipbagh eghuvir gumazim uan sipsipbar gari. Egh kɨ Judan anababa bar dar amutɨ, me mɨdorozir hoziar bar gavgavimɨn mɨn ikiam.