Jeremaia 22:21 - Godɨn Eghaghanim: Akar Gavgavir Dɨkɨrɨzir Ghurim ko Igiam

²¹ Nɨ deragha itir dughiabar nɨ bizir avɨriba itima, kɨ akam nɨ ganɨngi. Ezɨ nɨ kamaghɨn mɨgei, ‘Kɨ nɨn akam baraghan aghua.’ Nɨ zurara nan akam batosi. Nɨ kamaghɨn amir arazir kam, nɨ uan igiamra itir dughiamɨn a gamua iza datɨrɨghɨn tu.

Jeremaia 22:21 ပူးပေါင်းရင်းမြစ်များ

Jeremaia 32:30

“Israelia ko Judaba, me igiamra ikia iza datɨrɨkɨn, me nan damazimɨn arazir kurabaram ami. Kɨ Ikiavɨra Itir God, kɨ guizbangɨra mɨgei, Me arazir kurar kamɨn na gamima, kɨ anɨngaghe.

Jeremaia 3:25

O Ikiavɨra Itir God, en God, e uan inazir afeziaba ko, uan mugabara ikia arazir aghumsɨzir kurabar nɨ gamua iza datɨrɨkɨn tu. E nɨn akabar gɨn zuir puvatɨ. Kamaghɨn amizɨ, e bar aghumsigh guaba avigh nguazim mɨtuagham. Egh teghtɨ, en aghumsɨzir kam inimɨn mɨn e avaraghtɨ, e a sara ikiam.”

Aisaia 48:8

Kɨ kamaghɨn fo, kɨ ian ingara ia gamizɨ, ia gumazamizir ikɨzir vamɨran otozir dughiamɨn ikegha, iza datɨrɨghɨn, ia akaba munasa da barazir puvatɨzir adarasi. Egha kɨ fo, ia ifavarir gumazamiziba. Kamaghɨn amizɨ, kɨ bizir kabar gun ia mɨkemezir puvatɨzɨ, ia dagh fozir puvatɨ.

Aghuzir Akaba 30:9

Guizbangɨra, kɨ dagher avɨriba ikɨva, akɨrim ragh nɨ gasaragh egh mɨkɨm suam, “Ikiavɨra Itir God, a tinara?” Egh kɨ onganarazibagh amir gumazimɨn mɨn otoghɨva, ti okɨmɨva uan Godɨn ziam dɨkabɨragham.

Esekiel 20:8

Ezɨ me akaba batogha, oraghan aghua. Men tav uan marvir guar mɨzɨrɨzir me bar ifongezitam a makunizir puvatɨ. Egha me Isipian aseba ataghɨrazir puvatɨ. Me Isipɨn itima, kɨ ghaze, kɨ ti uan anɨngagharim me gingegh mɨzazir kuram me danɨngam.

Jeremaia 35:15

Nan akam inigha izir gumaziba, kɨ dughiar avɨribar me amadima, me ia bagha izi, me nan ingangarir gumaziba. Me kamaghɨn mɨgɨa ghaze: Ia vaghvagh uan nɨghnɨzibagh ira uan arazir kuraba ategh, uan araziba akɨrigh. Egh ia asebar gɨn mangɨva, dar ziaba fan markɨ. Ia nan akar kamɨn gɨn mangɨva, nguazir kɨ ian ovaviba ko ia ganɨngizir kam, deraghvɨram an ikiam. Nan akam inigha izir gumaziba akar kamɨn gun ia mɨkeme, ezɨ ia nan akam barazir puvatɨgha, an gɨn zuir puvatɨ.

Jeremaia 6:16

Ikiavɨra Itir God uan gumazamizibav gɨa ghaze: “Ia tuavir akamɨn mɨtɨgh nɨghnigh, ia tuavir manam mangɨsɨ ifuegh, an mangɨ. Ia tuavir aghuir ian inazir afeziaba faragha ghuezim bagh gan an apigh an mangɨ. Ia tuavir kamɨn mangɨtɨ, bizitam osɨmtɨzim ia danɨngan koghtɨ, ian naviba purama amɨraghɨrɨgh nɨmɨra ikiam.” Ezɨ Israelia a ikaragha ghaze, “Ti puvatɨgham, E tuavir mamɨn gɨn mangan aghua.”

Esekiel 20:28

Nguazir kɨ me bagha inabazir kam, kɨ me inigha nguazir kamɨn ize. Ezɨ gɨn me temer ekiaba ko mɨghsɨabar gara kamaghɨn nɨghnɨsi, kar danganir aghuir asebar ziaba famiba. Egha me zurara danganir kabar ofabar amuasa iza, asɨziba inigha ghua dar ofa gamua dar mughuriar aghuim isa aseba bagha pɨn da amadi. Egha me wainba inigha iza dagh ingegha aseba bagha ofa gami. Me kamaghɨn amuava na gamima, kɨ bar men anɨngaghe.

Esekiel 20:21

“Ezɨ dughiar kamɨn otivizir borir kaba, gumazamiziba puvatɨzir danganimɨn ikia na barazir puvatɨ. Me arazir kɨ ifongeziba abɨgha arazir kɨ damuasa me mɨkemeziba me dar aghuagha akɨribagh ighegha na gasara. Kar Akar Gavgavir men tina dar gɨntɨgh, egh deragh ikiamiba. Me bar moghɨra Sabatɨn arazimɨn gɨn zuir puvatɨgha anebɨragha ghaze, a pura dughiar kɨnim. Me gumazamiziba puvatɨzir danganimɨn itima, kɨ ghaze, kɨ ti uan anɨngagharim me gingegh mɨzazir kuram me danɨngam.

Esekiel 20:13

Egha Israelɨn ikɨzim gumazamiziba puvatɨzir danganimɨn ikia na barazir puvatɨ. Me arazir kɨ ifongeziba abɨgha bizir kɨ damuasa me mɨkemeziba, me dar aghuagha akɨribagh ighegha na gasara. Kar Akar Gavgaviba, men tina dar gɨntɨgh, egh deraghvɨra ikiam. Me bar moghɨra Sabatɨn arazimɨn gɨn zuir puvatɨgha anebɨragha ghaze, a pura dughiar kɨnim. Me gumazamiziba puvatɨzir danganimɨn itima, kɨ ghaze, kɨ ti uan anɨngagharim me gingegh mɨzazir kuram me danɨngam.

Jeremaia 2:31

Ia Israelian datɨrɨghɨn iti darasi, kɨ Ikiavɨra Itir God, kɨ ia mɨkɨmasa. Ia deraghvɨra kuariba arigh, nan akam baragh. Ia ti ghaze, kɨ bizir kuram, egha mati danganir dakɨghtɨzim? Kɨ mati danganir bar mɨtatem, a? Bar puvatɨ. Egha manmaghsua ia nan gumazamiziba ghaze, Datɨrɨghɨn e uari uan ifongiabar gɨn mangɨ tintinibar daruam. E ua nɨ bagh izan kogham.

2 Eghaghaniba 33:10

Manase uan gumazamiziba ko, me amir arazir kuraba, Ikiavɨra Itir God da ataghɨraghasa me mɨgeima, me an akam baragha an gɨn zuir puvatɨ.

Godɨn Araziba 31:27

Kɨ fo, me gumazamizir akaba batoziba. Datɨrɨghɨn, kɨ angamɨra ikiavɨra itima, me Ikiavɨra Itir Godɨn akaba batosi. Eghtɨ kɨ aremeghtɨ, nan gɨn, men arazir kurar kam ti mangɨ bar ekevegham.

Godɨn Araziba 9:24

Kɨ fomɨra ia ko ingara ia inigha izezir dughiamɨn ikegha iza datɨrɨghɨn, kɨ bar ia gɨfo, ia gumazamizir Godɨn akaba batoziba.

Godɨn Araziba 9:7

“Ia bizir kam ginɨrɨgh, egh deraghvɨram a gɨnɨghnɨgh: Ia gumazamiziba puvatɨzir danganimɨn ikia Ikiavɨra Itir God gamizɨ, a ian anɨngaghe. Ia fomɨra Isip ategha iza datɨrɨghɨn, ia dughiar ruarir kamɨn Ikiavɨra Itir Godɨn akam batoghavɨra iti.

Onger Akaba 129:1

Israel, nɨ uan igiamɨn ikegha iza, datɨrɨghɨn nɨn apaniba nɨ gamizir arazir kuraba, nɨ dagh eghan.

Jeremaia 3:24

E aser aghumsɨzim itim, Bal, e an ziam fer dughiamɨn, e uan sipsipba ko, bulmakauba ko, otariba ko, guiviba ko bizir aghuir en inazir afeziaba ingara iniziba, e bar ada gɨfa. E uan igiabara arazir kurar kam gamuavɨra ikia iza datɨrɨghɨn tu.

Jeremaia 13:10

Gumazamizir arazir kurabagh amir kaba, me uan kuaribav konegha nan akaba baraghan aghua. Men naviba gavgavizɨ, me uan nɨghnɨzibar gɨn zui. Egha asebar gɨn ghua men ziaba fe. Egh gɨn gumazamizir kaba ikuvigham, mati inir kam ikuvigha ingangariba an puvatɨ.

Jeremaia 19:15

“Ikiavɨra Itir Godɨn Gavgaviba Bar Itim, a Israelian God, a kamaghɨn mɨgei, ‘Ia deravɨram oragh! Ia akaba batogha, nan akam baraghan aghua. Ezɨ kamaghɨn bizir kurar kɨ ia damuasa mɨkemeziba, kɨ dar amightɨ, da bar ian nguibar ekiam ko an boroghɨn itir nguibar dozibar otivam.’ ”

Jeremaia 48:11

Ikiavɨra Itir God kamaghɨn mɨgei: “Moapɨn kantri fomɨra igiamra ikegha iza datɨrɨghɨn dughiar kamɨn tu, apanitam iza a gasɨghasɨghizir puvatɨ, egha gumazamiziba inigha ghua kantrin igharazimɨn me isa kalabus gatɨzir puvatɨ. Moap mati wainɨn aghuim, gumaziba an ingarigha, anetaghizɨ a iti. Me dɨpar mɨsevir tabar a ruizir puvatɨ. Ezɨ an isɨngtɨzim kamaghɨra ikia, egha an mughuriam dera.

Sekaraia 7:7

Fomɨra Ikiavɨra Itir God uan akar kam, uaghan gumazamizibav kɨnasa akam inigha izir gumazibagh anɨngi. Dughiar kamɨn, Jerusalem deravɨra itima bizir aghuir avɨriba a gizɨfa. Dughiar kamɨn, Jerusalem ko, nguibar ekiar an boroghɨn itiba ko, sautɨn amadaghan itiba ko, mɨghsɨar dozir aruem ghuaghiri naghɨn itiba, gumazamizir avɨriba bar dagh izɨfa.

Jeremaia 2:25

Israelia, ia asebar ziaba fɨsɨ ivemar dar gɨn mangan markɨ. Ia kamaghɨn damuva, ian dagarir asuaba ti dɨghoraghireghtɨ, ian kuariba bar ia mɨsigham. Ezɨ ia ghaze, En ifongiam aser kabar iti, ezɨ e dar gɨn mangɨvɨra ikiam. E nɨn akam baraghan aghua.”

Jeremaia 25:3

Emonɨn otarim Josaia, a Judabar atrivimɨn itima, an namba 13ɨn azenimɨn, kɨ Jeremaia Ikiavɨra Itir God na ganɨngizir akam akuravɨra ikia iza namba 23ɨn azenim gɨfa. Ezɨ ia a baraghan aghua.

Jeremaia 25:4

Ikiavɨra Itir God, ia bagha dughiar avɨribar uan akam inigha izir gumaziba amadi, kar an ingangarir gumaziba. Ezɨ ia uan kuariba apɨrigha men akaba baraghan aghua.

Jeremaia 25:7

Ezɨ Ikiavɨra Itir God kamaghɨn mɨgei, “Kɨ Ikiavɨra Itir God, kɨ guizbangɨra mɨgei, Nan akam inigha izir gumazim nan akar kamɨn gun mɨkemezɨ, ia nan akam baraghan aghua. Puvatɨ. Ia asebar marvir guabar ingara, na gamima, kɨ anɨngaghe. Ezɨ arazir kam bangɨn, ia paza uarira uarigh ami.

Jeremaia 25:8

“Kamaghɨn amizɨ, kɨ Ikiavɨra Itir Godɨn Gavgaviba Bar Itim, kɨ ghaze, ia nan akam baraghan aghua.

Sefanaia 3:2

Me Ikiavɨra Itir Godɨn akam barazir puvatɨ, egha Ikiavɨra Itir God men araziba akɨran me aghua. Egha nɨghnɨzir gavgavim an ikian aghua, egha uarir akurvaghasa an azangsɨzir puvatɨ.