Jeremaia 22:18 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁸ Ezɨ bizir kam bangɨn, Ikiavɨra Itir God Jehoiakim gɨnɨghnɨsi, a Josaian otarim, Judabar atrivim. Ezɨ Ikiavɨra Itir God kamaghɨn mɨgei: “Jehoiakim aremeghamin dughiamɨn, gumazamiziba an apangkuv, egh a bagh azian koghɨva kamaghɨn mɨkɨmam. ‘O noki, nan aveghbuam,’ ‘O noki, nan amizim.’ Egh me kamaghɨn mɨkɨman kogham, ‘O noki, en gumazir aruam,’ ezɨ ‘Noki, en atrivim.’ Puvatɨ, me bar kamaghɨn mɨkemeghan kogham.

Jeremaia 22:18 ပူးပေါင်းရင်းမြစ်များ

Jeremaia 16:6

Kɨ ghaze, nguazir kamɨn gumazamizir ziaba itiba, ko ziaba puvatɨziba sarama arɨghiregham. Eghtɨ gumazir men kuaba mozibar afamiba puvatɨgham. Eghtɨ gumazir me bagh aziva uan apangkuvim akakagh mɨkarzim aghorɨva, dapanir arɨzim gisamiba puvatɨgham.

1 Atriviba 13:30

Egha akam inigha izir gumazir ghurim an kuam isa uan dagɨar torimram anefa. Egha uan otariba ko azia kamaghɨn mɨgɨa ghaze, “O, en aveghbuam! O, en aveghbuam, noki!”

Jeremaia 22:10

Ia Judaba, ian Atrivim Josaia aremegha gɨfa, ezɨ ian apangkuv a bagh azian markɨ. Ezɨ Atrivim Josaian otarim Joahas e ategha gɨfa. A uamategh uan nguibamɨn izeghan kogham. Kamaghɨn amizɨ, ia Joahas bagh puv azi.

Jeremaia 16:4

Me bar arɨghiregham. Tarazi arɨmariar kuraba iniva arɨmighiram. Eghtɨ apaniba izɨ taraziv soghtɨ me arɨghiram. Eghtɨ men tarazi dagheba puvatɨghɨva, arɨmɨghiram. Eghtɨ gumazir men kuabar apangkuv aziva, me isɨ mozibar afamiba puvatɨgham. Eghtɨ men kuaba pura tintinibar afiar buaribar mɨn nguazim girɨv ikiam. Eghtɨ kuarazir pɨn mɨghagha aruiba ko asɨzir atiaba men kuabar amam.

Jeremaia 34:5

Puvatɨ. Nɨ deraghvɨra ikɨ mangɨ, egh aremegham. Eghtɨ nɨ aremeghamin dughiamɨn, me pauran mughuriar aghuim itim tuegh, ziar ekiam nɨ danɨngam, mati me nɨn Judan atrivibar itir ovaviba bagha amizɨ mokɨn. Egh me azi mɨkɨm suam, ‘O noki, en gumazir aruam.’ Kɨ Ikiavɨra Itir God, kɨ akam akɨrigha egha mɨkemezɨ moghɨn bizir kam otivam.”

2 Eghaghaniba 35:25

Ezɨ akam inigha izir gumazim Jeremaia, Atrivim Josaia bagha azirakar ighiar mam osiri. Ezɨ dughiar kamɨn iza datɨrɨghɨn, gumaziba ko amizir azir akabagh amiba, me Atrivim Josaia gɨnɨghnɨgha azirakar ighiar kam gamuavɨra iti. Ezɨ osɨmtɨzibar dughiabar, Israelia zurara arazir kamɨn gɨn ghua azirakar kam gami. Azirakar ighiar kam, Azir Akabar Akɨnafarimɨn iti.

2 Samuel 1:26

O Jonatan, nan roroam! Kɨ bar nɨn apangkuvigha oseme. Kɨ bar nɨ gifonge, ezɨ nɨ uaghan bar na gifonge. Nɨ na gifongezir arazim, a bar gavgavigha, bar ekefe, egha amiziba bar na gifongezir arazim, a bar men ifongiam gafira.

2 Atriviba 23:6

Egha a Ikiavɨra Itir Godɨn Dɨpenimɨn aven itir aser amizim Aseran marvir guam batuegha, a inigha Jerusalemɨn azenan ghua Kidronɨn Fanemɨn danganir konimɨn uaghira a tuazɨ a isi. Egha gɨn an averenim inigha a mɨsozi a pauran mɨraram oto. Ezɨ me ghua pura tintinibar Jerusalemɨn gumazamizir kɨnir oveaghuezibar mozibar danganibar a inge.

2 Atriviba 23:36

Jehoiakim 25plan azeniba ikia, Judabar atrivimɨn oto. Egha a Jerusalemɨn ikia 11plan azenibar atrivimɨn ike. An amebamɨn ziam, Sebida, a Ruman nguibar ekiamɨn gumazim Pedaian guivim.

2 Atriviba 24:6

Atrivim Jehoiakim uan inazir afeziabar mɨn aremezɨ, an otarim, Jehoiakin an danganim inigha atrivimɨn oto.

2 Eghaghaniba 36:5

Jehoiakim 25plan azeniba ikia, Judabar atrivimɨn oto. Egha 11plan azenibar Jerusalemɨn atrivimɨn ike. Jehoiakim Ikiavɨra Itir Godɨn damazimɨn arazir kurabagh ami.

Jeremaia 22:12

Apaniba a inigha nguibar igharazimɨn ghu. Ezɨ a uan nguazir kamɨn ganighan kogham. Puvatɨ. A kantrin igharazimɨn aremegham.”

1 Eghaghaniba 3:15

Ezɨ Josaia otarir 4pla iti. An otarir ivariam, Johanan, ezɨ an gɨrara irim Jehoiakim, ezɨ namba 3ɨn otarim Sedekaia, ezɨ namba 4ɨn otarim Salum, an ziar igharazim Joahas.

Jeremaia 21:11

Ikiavɨra Itir God, ua ia mɨkɨmasa kamaghɨn na mɨgɨa ghaze: “Ia Judan Atrivim Devitɨn anabamɨn ikɨzim, ia nan akam baragh! Kɨ Ikiavɨra Itir God, kɨ kamaghɨn ia mɨgei, Ia zurara mɨzarazibar kotɨn gumazamiziba tuisɨzir arazim a deraghvɨra mangɨ. Egh gumazim gumazir igharazitamɨn bizim okemegh osɨmtɨzim a danightɨ, ia gumazir osɨmtɨzim itir kamɨn akuragh an osɨmtɨzim akɨrigh. Ia kamaghɨn damighan koghtɨ, kɨ ian arazir kurar kam bagh, nan anɨngagharim avimɨn mɨn bar ekeveghtɨ, kɨ pazavɨra ia damigham. Eghtɨ gumazitam anemungɨva avegham.

Jeremaia 36:30

Kamaghɨn amizɨ, kɨ Ikiavɨra Itir God, kɨ Atrivim Jehoiakim gɨnɨghnɨgha kamaghɨn mɨgei, an adarazir gumazitam atrivimɨn otogh, Devitɨn atrivir dabirabim daperaghan kogham. Eghtɨ Jehoiakim aremeghamin dughiam, me an kuam isɨ nguazimɨn anekunightɨ, aruem a dapongtɨ, dɨmagarimɨn ghuariam a giram.