Jeremaia 20:18 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁸ Manmaghsua kɨ amebamɨn navimɨn ikegha otogha osɨmtɨzir kamagh garibar ikia, egha zurara bar puvɨram aghumsɨsi? Kɨ bar uabɨn apangkufi.

Jeremaia 20:18 ပူးပေါင်းရင်းမြစ်များ

Jopɨn Akɨnafarim 3:20

“Kɨ kamaghɨn azai, God gari, gumazamiziba osɨmtɨziba ko dughiar kurabar itima, a tizim bagha me ataghɨrazima me angamɨra iti?

Azir Akam 3:1

Jopɨn Akɨnafarim 14:1

“E gumazamiziba dughiar otevimra nguazir kamɨn iti, egha amebam e batezir dughiamra, osɨmtɨziba e bativavɨra ikia, iza e aremezir dughiamɨn tu.

Onger Akaba 69:19

Gumazamizir akar kurabar na mɨgeiba, nɨ dagh fogha gɨfa. Egha nɨ fogha gɨfa, me na dɨpovava aghumsɨzim na ganɨngi.

Hibru 13:13

Kamaghɨn amizɨ, e uaghan a bagh nguibamɨn azenan mangɨva, egh a inizir aghumsɨzim e uaghan a iniam.

Hibru 12:2

E Iesusra ganam, an en nɨghnɨzir gavgavimɨn mɨngarim, egh an en nɨghnɨzir gavgavim damightɨ, a gɨn deraghvɨram otogham. Iesus fo, a bar deravɨra Godɨn akamɨn gɨn mangɨ egh a gɨn bar deravɨra ikɨva bar akuegh mamaghɨra ikiam. Egha a bizir kam gɨnɨghnɨgha gavgavigha ikia osɨmtɨziba atera ter ighuvimɨn ovenge. Gumazamiziba kamaghɨn nɨghnɨgha ghaze, gumazir ter ighuvimɨn ovengezim, a bar gumazir arazir kurabagh amim, egha aghumsɨzir ekiam isi. Ezɨ Iesus aghumsɨzim gɨnɨghnɨzir puvatɨgha, egha areme. Egha datɨrɨghɨn a Godɨn agharir guvimɨn atrivir dabirabimɨn aperaghav iti.

Hibru 11:36

Ezɨ apaniba marazi osɨmtɨziba me garɨgha dɨbovir akabar me mɨgɨa, me fozorogha senbar me ikia, me isa kalabusɨn me arɨki.

Hibru 10:36

Ia Godɨn ifongiamɨn gɨn mangɨva, egh bizir aghuir a fomɨra ia danɨngasa akam akɨriziba, ia da inisɨ, tuivigh gavgavigh ikɨ.

2 Timoti 1:12

Kamaghɨn amizɨma kɨ osɨmtɨzir kaba atera egha aghumsɨzir puvatɨ. Kɨ, gumazir nɨghnɨzir gavgavim an itim, kɨ a gɨfogha gɨfa. Ezɨ kɨ fo, ingangarir a nan dafarim gatɨzir kam a deraghvɨram an ganam, egh mamaghɨra ikɨ mangɨva dughiar Krais otoghamimɨn tugham. Bizir kam bagha kɨ aghumsɨzir puvatɨ.

Aposel 5:41

Egha me ghaze, God e bagha bar akongegha en amamangatɨzɨ, e Iesusɨn ziamɨn osɨmtɨziba ini. Egha kamaghɨn me Judan kotɨn aven itir gumaziba ataghɨragha bar akonge.

Jon Osirizir Akar Aghuim 16:20

Kɨ bar guizbangɨra ia mɨgei, ia puvɨram aziva arangam. Eghtɨ nguazimɨn gumazamiziba bar akuegham. Ian naviba osemegham. Eghtɨ ian navir osɨmtɨzir kam raghɨrɨghtɨ, navir agorogem otogham.

Jeremaia 8:18

Kɨ Jeremaia, kɨ kamaghɨn mɨgei: “Nan apangkuvir ekiam ko navim bar oseme, ezɨ nan nɨghnɨziba bar ikufi. Nan osɨmtɨzim agɨvamin tuaviba puvatɨ.

Aisaia 51:7

“Ia arazir aghuim deragha a gɨfogha uan navir averiabar aven nan akamɨn suiragha gavgavizir darasi, ia gumazir ian atarava akar kurabar ia gamua, ia gasɨghasɨzibar atiatingan markɨ.

Aisaia 1:6

Duaba an dapanim bar anegɨrigha uaghira an suemningɨn tu, ezɨ an mɨkarzitam pura itir puvatɨ. Duar igharagha garir avɨriba an mɨkarzimɨn iti, ezɨ an mɨkarzim pura fɨfɨki. Me an duaba ruezir puvatɨgha da nomkezir puvatɨ. Egha me tong marasin tam dagh aghuizir puvatɨ.

Jopɨn Akɨnafarim 14:13

“Gumazamizir oveaghueziba, me ti ua ikɨrɨmɨrir igiam iniam? O God, kamaghɨn deragham, nɨ Gumazamizir Oveaghuezibar Nguibamɨn na modogh mangɨ, nɨn anɨngagharim bar amɨraghamin dughiamɨn tugh. Egh nɨ ua dughiatam, na gɨnɨghnɨghsɨ a ginabagh. Eghtɨ kɨ pura nɨ mɨzuam ikɨ mangɨtɨ, dughiar nɨ na ataghɨraghasa mɨsevezim otogham.

Jopɨn Akɨnafarim 5:7

E gumazamiziba, e uari osɨmtɨzir e bativibar mɨngariba. E uari osɨmtɨzibagh amima, da otifi, mati itam isia afuaghira, avir muziaribagh asavamadi.”

Onger Akaba 102:3

Guizbangɨra, nan ikɨrɨmɨrim mɨgharimɨn mɨn dughiar otevimɨn ikegha ua ghugha gɨfa. Ezɨ nan mɨkarzim mati avir ekiam nan isi moghɨn puvɨra nan fei.

Jeremaia 3:25

O Ikiavɨra Itir God, en God, e uan inazir afeziaba ko, uan mugabara ikia arazir aghumsɨzir kurabar nɨ gamua iza datɨrɨkɨn tu. E nɨn akabar gɨn zuir puvatɨ. Kamaghɨn amizɨ, e bar aghumsigh guaba avigh nguazim mɨtuagham. Egh teghtɨ, en aghumsɨzir kam inimɨn mɨn e avaraghtɨ, e a sara ikiam.”

Jeremaia 15:10

Kɨ kamaghɨn mɨgei: “Kɨ bar uabɨn apangkuvigha osemegha kamaghɨn uabɨra uabɨn mɨgei, O nan amebam, nɨ ti tizim baghavɨra na batezɨ kɨ nguazir kamɨn ize? Gumazamizir nguazir kamɨn itiba nan akaba ikarvazima, kɨ akamadariba me koma adagh ami. Kɨ gumazitamɨn amamangatɨzɨ, a pura nan bizitam inizir puvatɨ. Kɨ gumazitam pura na da bizitam inizir puvatɨ. Ezɨ gumaziba bar moghɨra nan atara ghaze, kɨ ikuvigham.”

Habakuk 1:3

Kɨ osɨmtɨzir bar avɨribar gari da gumazamiziba batifi. Nɨ manmaghsua osɨmtɨzir kaba ataghizɨ, da otifi? Manmaghɨn amizɨ nɨ bizir kurar kabar garima, da gumazamiziba bativima, nɨ bizitam gamir puvatɨ? Kɨ danganiba bar a dar gari, gumazir kuraba, gumazamiziba ko, men biziba saram asɨghasɨsi. Ezɨ gumazamiziba atara pura tintinibar mɨsosi.

1 Atriviba 19:4

Egha Elaija uabɨra gumazamiziba puvatɨzir danganimɨn aruer vamɨran an zui. A ghua temer muziarir mam batogha, an povimɨn aperagha aremeghasa God ko mɨgei. Egha ghaze, “O Ikiavɨra Itir God, osɨmtɨzir na bativir kaba da kamaghɨra tugh, nɨ na inightɨ kɨ ovegh mangam. Kɨ gumazir aghuim puvatɨ, nan ovaviba ovengezɨ moghɨn, kɨ ovengam. Kamaghɨn nɨ datɨrɨghɨn na ateghtɨ kɨ aremeka.”

Jeremaia 15:18

Manmagh amizɨ mɨzazir kam nan ikiavɨra iti? Egha manmagh amizɨ, me osɨmtɨzim na ganɨgavɨra iti, mati duaba nan mɨkarzimɨn ikiavɨra ikia mɨdir puvatɨ? Kɨ garima, nɨ nan akurazir puvatɨ, mati gumazim mozir pam bagha ghua garima, a dakezɨ a tam amezir puvatɨ.”