Jeremaia 2:8 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁸ Ezɨ nan ofa gamir gumaziba uaghan na gɨnɨghnɨzir puvatɨ. Ezɨ Moses Osirizir Arazibagh fozir gumaziba, me uaghan na gɨfozir puvatɨ. Ezɨ ian atriviba, me akɨrim ragha na gasara. Ezɨ ian akam inigha izir gumazamiziba me asem, Bal, an ziamɨn gun mɨgei. Me bar moghɨra bizir kɨnir men akurvaghan koghamibar ziaba fe.”

Jeremaia 2:8 ပူးပေါင်းရင်းမြစ်များ

Habakuk 2:18

“Iavzika! Ia gumazir kamaghɨn ter oteviba ko, dagɨabav mɨgeiba, ‘Ia daguim ategh dɨkafigh,’ ia bar ikuvigham. Ia ti ghaze, bizir kam dɨkavigh bizitam ian akagham. Bar puvatɨgham. Marvir guar kaba manmaghɨn ian akuragham? Me ian akuraghan kogham. Marvir guar kaba, kar bizir gumaziba uari gol ko, temer otevibar ingariziba. Kamaghɨn amizɨ, bizir kaba guizɨn akatam akarigh ia mɨkemeghan kogham. Da pura ia gifari, ezɨ ia bar ikuvigham. Gumazim uabɨ marvir guar kam akɨrigha ghaze, bizir kam a nan akuragham. Bar puvatɨgham. Marvir guar kam, bar akam akarigh bizitam mɨkemeghan kogham. Eghtɨ ia silva ko, golɨn bar deraghvɨram an kurkegham, arazir kam a pura bizim. Guizbangɨra, an angamɨra itir puvatɨ, egh a bar bizitam ia bagh a damighan kogham.

Jeremaia 10:21

Ezɨ kantrin gumazir dapaniba onganigha fofoziba puvatɨ, egha nɨghnɨzir aghuim bagha Ikiavɨra Itir Godɨn azangsɨzir puvatɨgha ire. Kamaghɨn me deragha ingangarir aghuim gamizir puvatɨ, ezɨ apaniba iza gumazamiziba batoghezɨ me tintinibar ghuegha kantrin igharazibar iti, mati sipsipbar garir gumazim deragha dar garir puvatɨzɨ, afiar atiaba sipsipba batoke.

Jeremaia 5:31

Kɨ garima, akam inigha izir gumaziba, uari uan akaba akuri, egha gumazamizibagh ifari. Ezɨ ofa gamir gumaziba, gumazamizibagh ativagha akam inigha izir gumazibar akar ifavarir kabar gɨn zui. Ezɨ nan gumazamiziba arazir kam bar a gifonge. Kɨ mɨzazir kuram ia gaseghtɨ ian arazir kurar kam gɨvagham. Eghtɨ dughiar kamɨn men tinara ian akuragham?”

2 Korin 4:2

E aghumsɨzir arazir gumazamiziba mogava amiba, e akɨrim ragha dagh asara. E ifavarir arazibagh amir puvatɨ. Egha e Godɨn akam gɨrazɨ, a igharagha otozir puvatɨ. E Godɨn guizɨn akam azenarama anekuri, eghtɨ gumazamiziba bar uan navir averiabar aven en araziba tuisɨgham. Egh me kamaghɨn fogham, e ingangarir bar aghuim Godɨn damazimɨn a gami.

Jon Osirizir Akar Aghuim 16:3

Me Afeziam gɨfozir puvatɨgha, uaghan na gɨfozir puvatɨ. Kamaghɨn me arazir kabar amuam.

Hosea 4:6

Nan gumazamiziba nan akamɨn gɨn zuir puvatɨ. Kamaghɨn amizɨ, me ikuvigham. Ia ofa gamir gumaziba uaghan, nan gɨn zuir puvatɨ, egha nan fofozim batuegha gɨfa. Kamaghɨn amizɨ, kɨ ia batuegham. Egh ian otariba ateghtɨ, me nan ofa gamir gumazibar ikian kogham.

Jon Osirizir Akar Aghuim 8:55

Ia a gɨfozir puvatɨ. Ezɨ kɨ a gɨfo. Egh kɨ suam, ‘Kɨ a gɨfozir puvatɨ,’ kamaghɨn, kɨ ian mɨn ifavarir gumazimɨn otogham. Kɨ a gɨfogha gɨvagha, egha deravɨra an akamɨn gɨn zui.

Luk Osirizir Akar Aghuim 11:52

“Ia Judan Arazibagh fozir gumaziba, ia Godɨn fofozimɨn tiar akamɨn kiba inigha ghue. Ia uari aven ghuezir puvatɨgha, aven mangamin gumazamizibar tiar akam apɨri.”

Matyu 16:26

Gumazitam o amizitam nguazimɨn itir biziba bar da inigh, a gɨn oveghtɨ, bizir kaba manmaghɨn an akuragham? Bar puvatɨ. A ivezir manam uan duam bagh anerenɨngam? Bar puvatɨ.

Jeremaia 16:19

O Ikiavɨra Itir God, nɨ gavgavim na ganɨga, nan danganir mogomemɨn mɨn ikia, egha osɨmtɨzibar dughiabar nɨ nan akurvasi. Nguazir kamɨn oteviba bar dar gumazamiziba bar, nɨ bagh izɨ kamaghɨn mɨkɨmam: En inazir afeziabar aseba, da pura bizir kɨniba, da e gifara, en akuraghan kogham.

Jeremaia 12:10

“Kantrin Igharazibar Gumazamizibar gumazir dapanir avɨriba iza, nan wainɨn azenir dirim gasɨghasɨki. Me azenir dirir kam dɨkezɨ, a danganir mɨdiarimɨn mɨn iti. Ezɨ gumazamiziba uam an itir puvatɨ.

Jeremaia 7:8

“Ia uarir gan. Ia akar ifavarir kaba nɨghnɨzir gavgavimɨn dar iti. Ada tong ian akuraghan kogham.

Jeremaia 4:22

Ezɨ Ikiavɨra Itir God, kamaghɨn na ikaragha ghaze, “Nan gumazamiziba fofozir aghuiba puvatɨ, egha na gɨfozir puvatɨ. Me boribar mɨn fofoziba puvatɨgha bar ongani. Egha arazir kuram gamir arazim me bar a gɨfogha, arazir aghuibar amuamin arazim me bar a gɨfozir puvatɨ.”

Jeremaia 2:11

Ezɨ kantrin igharazibar aseba, da guizbangɨra godba puvatɨ. Ezɨ gumazamizir kaba uan aseba ataghɨragha godɨn igiabar gɨn ghua dar ziaba fer puvatɨ. Kɨ God, kɨ gavgavim ikia, ziar ekiam ti. Ezɨ ia nan gumazamiziba, ia na ategha godɨn kurar ian akurvazir puvatɨzibar gɨn ghua dar ziaba fe.

Jeremaia 2:6

Me na gɨnɨghnɨzir puvatɨ. Egha me bizir kɨ men akurvaghasava amiziba dagh nɨghnɨzir puvatɨ. Kɨrara Isipɨn kantrin me inigha men akua ize. Ezɨ me pura danganir dɨpaba puvatɨzir ekiam abɨki. Danganir kam, pura gigir kɨnim an iti, egha mozir konir kuraba tintinibar an iti. A gumazamiziba puvatɨzir danganim ko amoziba izir puvatɨzim. Danganir kam, mɨtater kuram anevara. Gumazamiziba uaghan danganir kam garuir puvatɨgha, uaghan an itir puvatɨ.

Aisaia 30:5

Eghtɨ Isipia men akurvaghsɨ bizitam damighan kogham. Bar puvatɨgham. Kamaghɨn amizɨ, Judaba aghumsigh bar uarir apangkuvigham. Me aghumsɨzir bar ekiamra Judabar anɨngam.”

Aisaia 29:10

Ikiavɨra Itir God ian damazibagh amizɨ pariam puv ian azi. Ia mati gumazim akuav aremezɨ moghɨn akui. Ezɨ God uaghan uan akam inigha izir gumazibar damaziba okafi, ezɨ me ganamin bizibar garir puvatɨ. Egha God uaghan an akam inigha izir gumazibar damaziba avara, ezɨ me God amir bizibar garir puvatɨ.

Aisaia 28:7

Godɨn ofa gamir gumaziba ko, Godɨn akam inigha izir gumaziba, uaghan wainɨn dɨpaba ko dɨpar onganiba puv da apava onganigha, asaghporaghira nuighnuigha men daroriba derazir puvatɨ. Godɨn akam inigha izir gumaziba, me irebamɨn mɨn garir bizibar ganasa, God men akakazir biziba, me deragha dar garir puvatɨ. Ezɨ Godɨn ofa gamir gumaziba, men nɨghnɨziba derazir puvatɨgha, gumazamizibar osɨmtɨziba deragha da tuisɨzir puvatɨ.

1 Atriviba 18:40

Ezɨ gɨn Elaija kamaghɨn me mɨgei, “Ia dɨkavigh Balɨn akam inigha izir gumaziba bar moghɨra men suikigh. Ia men tav ateghtɨ an arɨmangan markɨ!” Ezɨ me akam inigha izir gumazir ifavarir kabar suighizɨ, Elaija me inigha Kisonɨn Daghurimɨn mɨriamɨn uaghirɨgha me mɨsoghezɨ, me ariaghire.

1 Atriviba 18:29

Me mati gumazir onganibar mɨn dia ghuavɨra itima, guaratɨzimɨn ofa damuamin dughiam oto. Ezɨ men dɨmdɨar ararebar ikarvaziba puvatɨ, ezɨ bizitam bar otozir puvatɨ. Bar puvatɨ.

1 Atriviba 18:22

Ezɨ Elaija me mɨgɨa ghaze, “Ikiavɨra Itir Godɨn akam inigha izir gumazitam ua itir puvatɨ. Kɨ uabɨra iti. Ezɨ asem Balɨn akam inigha izir gumazir 450pla iti.

1 Samuel 12:21

Egh ia gavgaviba puvatɨzir asebar gɨn mangan markɨ. Da guizbangɨra pura bizir kɨniba, eghtɨ osɨmtɨzibar dughiabar me ian akuragh ua ia inighan kogham. Bar puvatɨgham.

1 Samuel 2:12

Elin otarimning, Hopni ko Finias, aning gumazir bar kuramning. Aning ofa gamir gumazimning, egha aning ghaze, Ikiavɨra Itir God a pura bizim, egha aning arazir kurar guar avɨrir igharagha garibagh ami.

Godɨn Araziba 33:10

Egh Livaiba nɨn Araziba ko bizir nɨ damuasa me mɨkemezibar Israelian sure damuam. Eghtɨ me pauran mughuriar aghuim zuiba isɨ nɨn damazimɨn dar arɨgh, nɨn ofa gamir dakozimɨn ofan bar isia mɨghɨribar amuam.

Jeremaia 9:14

Men navir averiaba gavgavigha uan ifongiamɨn gɨn ghua men inazir afeziaba men sure gamizɨ moghɨn, me aser Balbar ziaba fe.

Jeremaia 18:18

Gumazamiziba kamaghɨn mɨgɨa ghaze, “Jeremaia guizbangɨra akatamɨn mɨgeir puvatɨ. Kamaghɨn, e Jeremaia mɨsoghsɨ tuaviba buriam. E ghaze, Ofa gamir gumaziba suren akam akurir ingangarim ataghɨraghan kogham. Eghtɨ gumazir nɨghnɨzir aghuim ko fofozir aghuiba itiba, me uan nɨghnɨzim ko fofozir aghuim ateghan kogham. Eghtɨ akam inigha izir gumaziba Godɨn akam e mɨkɨmvɨra ikiam. Kamaghɨn amizɨ, e Jeremaia baraghan kogham. E a isɨ kotiam darɨgham.”

Esekiel 22:26

Men ofa gamir gumaziba, nan Akar Gavgavibar gɨn zuir puvatɨgha da abɨki. Egha ghaze, nan ziam fer biziba, da pura biziba. Egha me fozir puvatɨ, bizir tizim bar zue, ezɨ bizir manam nan damazimɨn pura bizim. Egha nan damazimɨn zuezir biziba ko bizir mɨzɨrɨzibar gun gumazamizibar sure gamir puvatɨ. Me bar moghɨra Sabatɨn arazimɨn gɨn zuir puvatɨ. Egha me uarir uan tongɨn nan ziam abɨragha ghaze, nan ziar ekiam a pura bizir kɨnim.

Esekiel 34:2

“O nguazir kamɨn gumazim, nɨ Israelian gumazir dapanibar atar ikuvighsɨ me mɨkɨm suam: Kɨ Ikiavɨra Itir Godɨn Ekiam, kɨ kamaghɨn ia mɨgei: Iavzika! Ia ivezir kuram iniam. Israelia mati sipsipɨn bɨzim, ezɨ ia mati sipsipbagh eghuvir gumaziba. Ia uarira uarir akuaghapi. Egha ia uan sipsipbar akuaghapir puvatɨ.

Jopɨn Akɨnafarim 35:10

Ezɨ gumazitam kamaghɨn deir puvatɨ, ‘Godɨn Nan Ingarizim, a managh iti? A dughiar kurabar gavgavim en navibagh anɨdima, e bar akuegha ighiabagh ami.