Jeremaia 2:11 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹¹ Ezɨ kantrin igharazibar aseba, da guizbangɨra godba puvatɨ. Ezɨ gumazamizir kaba uan aseba ataghɨragha godɨn igiabar gɨn ghua dar ziaba fer puvatɨ. Kɨ God, kɨ gavgavim ikia, ziar ekiam ti. Ezɨ ia nan gumazamiziba, ia na ategha godɨn kurar ian akurvazir puvatɨzibar gɨn ghua dar ziaba fe.

Jeremaia 2:11 ပူးပေါင်းရင်းမြစ်များ

Akɨnafarir Pol Romɨn Nguibar Ekiamɨn Itir Sios Bagha Osirizim 1:23

Me Godɨn zurara itim akɨrim a gasara, egha an ziam fer pu. Puvatɨ. Me aremeghamin gumazamizibar mɨn gara, marvir guaba ko, kuaraziba ko, asɨziba ko, kuruziba ko, ipebar marvir guabar ingara, egha da isa dar ziaba fe.

Aisaia 37:19

Egha atrivir kaba, kantrin kabar marvir guaba sarama asɨghasigha da isa avimɨn da tue. Men marvir guar kaba, da guizɨn godba puvatɨ, me temeba ko dagɨaba isa uan dafaribar dar kɨri. Kamaghɨn amizɨ, Asiriaba bar moghɨra dagh asɨghasigha, dagh apongezɨ da isi.

Jeremaia 16:20

Gumaziba uari baghvɨra godɨn tabar ingaram ti? Puvatɨ. Marvir guar gumaziba ingariba, da guizbangɨra godba puvatɨ.

Onger Akaba 106:20

Me Godɨn ziar ekiam akɨrim ragha agasaragha, dadaba apir bulmakaun nedazimɨn ingarigha Godɨn danganimɨn anetɨ, egha an ziam pɨrafi.

Maika 4:5

Kantrin Igharazibar Gumazamiziba uan asebar ziaba fɨ, men akabar gɨn mangam. Eghtɨ e Israelia, Ikiavɨra Itir God, en God, e zuraram an ziam fɨ mamaghɨra ikiam.

1 Korin 8:4

Ezɨ, asɨzir me marvir guabar ofa gamua apir arazim, kɨ a mɨkɨmasa. E fo, marvir guam, a guizɨn bizim puvatɨ, a nedazir kɨnim. Godɨn avɨriba puvatɨ. Godɨn bar vamɨra iti.

Jeremaia 2:8

Ezɨ nan ofa gamir gumaziba uaghan na gɨnɨghnɨzir puvatɨ. Ezɨ Moses Osirizir Arazibagh fozir gumaziba, me uaghan na gɨfozir puvatɨ. Ezɨ ian atriviba, me akɨrim ragha na gasara. Ezɨ ian akam inigha izir gumazamiziba me asem, Bal, an ziamɨn gun mɨgei. Me bar moghɨra bizir kɨnir men akurvaghan koghamibar ziaba fe.”

Jeremaia 2:5

Ikiavɨra Itir God kamaghɨn mɨgɨa ghaze: “Ian inazir afeziaba arazir kurar manamɨn gari, kɨ a gamizɨ, me na ategha bar nan saghon ghue? Egha marvir guar kɨnibar ziaba fema, da tong men akurvazir puvatɨ.

Onger Akaba 115:4

Kantrin Igharazibar Gumazamiziba, silva ko gol isa uan marvir guabar ingari. Me uari uan dafaribar dar ingari.

Onger Akaba 3:3

Ezɨ men akar me mɨgeir kam a guizbangɨra puvatɨ. Ikiavɨra Itir God, nɨrara nan mɨdorozir oramɨn mɨn iti, ezɨ kɨ nɨn uabɨ modi. Nɨrara nan akurvazima kɨ uan apaniba abɨri. Nɨ nan osɨmtɨziba agevima, kɨ tugha gavgavighavɨra iti.

Godɨn Araziba 33:29

O Israelian gumazamiziba, ia bar akongegh! Ikiavɨra Itir God ian akurvazi moghɨn, a ikɨzir igharazitaba kamaghɨn men akurvaghizir puvatɨ. Ikiavɨra Itir God mati oramɨn mɨn ian pɨgha ian akurvasi. Egh a mati mɨdorozir sabamɨn mɨn, ian apanibav soghɨrarightɨ me arɨmɨghiram. Eghtɨ ian apaniba izɨ uarir apangkuvsɨ ian azangsɨgham. Eghtɨ ia me dɨkɨ me abɨnam.”

1 Pita 1:18

Ezɨ ia fo, ia uan ovavibar arazir kuraba isa dagh amuava dar gɨn zui. Arazir kaba, da dagheba puvatɨ. Ezɨ God ia givezegha ian arazir kuraba gɨn amada. God ia givezezir dughiamɨn, a nguazir kamɨn bizir ikuvitam anɨngizir puvatɨ, mati silva ko gol. Puvatɨ.

Galesia 4:8

Fomɨra ia God gɨfozir puvatɨgha, bizir guizbangɨra God puvatɨzibagh amuava, dar ingangarir gumazamizir kɨnibar mɨn iti.

1 Samuel 4:21

An aremeghasa amua ghaze, “E Israelia, Ikiavɨra Itir Godɨn angazangarim ko gavgavim e ataki.” Kamaghɨn amizɨ, a ziam, Ikabot borim gatɨ. Dughiar kamɨn, a uan pam ko uan ivozir afeziamɨn ovevem, ko Godɨn Boksiar apaniba inigha ghuzim gɨnɨghnɨsi.

2 Eghaghaniba 13:9

Ia uaghan Ikiavɨra Itir Godɨn ofa gamir gumaziba batoke, kar Aronɨn ovavir boriba. Egha Livain anabamɨn adarasi, ia uaghan me batoke. Ia Kantrin Igharazibar Gumazamiziba ami moghɨn, ia uari uari bagha ofa gamir gumazir igharaziba amɨsefi. Gumazir kɨnitam ia bagh bulmakaun apurir igiatam ko 7pla sipsipɨn apuriba inigh izɨtɨ, ia puram anemɨseveghtɨ, a ian ifavarir asebar ofa gamir gumazimɨn otogham.

Jeremaia 5:7

Ikiavɨra Itir God akar kam Jerusalemɨn nguibamɨn itir gumazamizibav gɨa ghaze, “Bizir me ifongeziba, kɨ bar ada isa me ganɨngi, ezɨ me ua na ategha aser kabar gɨn zui, mati gumazim uan amuim ategha, tuavimɨn amizibar gɨn ghu. Kamaghɨn, kɨ manmaghsuvɨra ian arazir kuraba gɨn amangam? Bar puvatɨgham.

Jeremaia 18:13

Ikiavɨra Itir God ua kamaghɨn mɨgɨa ghaze: “Nɨ mangɨ Kantrin Igharazibar Gumazamizibar azaragh fogh, me tong kamaghɨn oraghiz, o? Israelia amizir arazir kurar kaba, kantrin igharazir taba uaghan, Israelian mɨn arazir kurabagh amiz, o? Puvatɨ. Israel, mati nan guivir igiar kɨ bar ifongezimɨn mɨn iti. Ezɨ an arazir bar kurar kɨ bar ifongezir puvatɨzim gami.

Esekiel 5:7

Bizir kam bangɨn, kɨ Ikiavɨra Itir Godɨn Ekiam, kɨ kamaghɨn mɨgei: Jerusalemia, ia oragh! Ia arazir kɨ ifongeziba batuegha bizir kɨ damuasa ia mɨkemezibar gɨn zuir puvatɨgha, kantrin ian boroghɨn itiba men arazibagha ami. Ezɨ arazir kurar ia amiba, kantrin igharaziba amir bizir kɨ damuasa mɨkemezibar arazir kuraba bar dagh afira.

Esekiel 14:5

Aser kaba Israelɨn ikɨzim gamizɨ, me akɨrim ragha na gasara. Ezɨ nan ifongiam kamakɨn, kɨ ua men navir averiaba iniasa nɨghnɨsi, eghtɨ me na baghvɨra ikiam.

Godɨn Araziba 32:16

Me ikɨzir igharazibar asebar ziaba fema, men arazir kam, Ikiavɨra Itir God bar men aghuagha navim bar men ikufi. Egha men arazir kam bangɨn a bar men anɨngaghegha men atari.

Godɨn Araziba 32:21

Me asebar gɨn ghua dar ziaba fava na gamizɨ, nan navim bar ikuvigha men anɨngaghegha men atari. Aser me ziaba fer kaba, da pura godɨn ifavariba, da guizɨn godba puvatɨ. Kamaghɨn, kɨ ikɨzir pura bizibar mɨn ikia bar onganizim, kɨ me isɨ Israelia bagh me ameghtɨ, Israelian naviba bar ikuvigham. Kɨ gumazamizir fofoziba puvatɨziba inightɨma, bizir kam me damightɨ me ataram.

1 Atriviba 11:33

Israelia akɨrim ragha na gasaragha Saidonɨn aser amizim Astarten ko, Moapian asem Kemos, ko, Amonian asem Molek, me men ziaba fe. Me tuavir aghuir kɨ men akaziba dar gɨn zuir puvatɨgha, nan arazir kɨ ifongeziba ko, bizir kɨ damuasa ia mɨkemezibar gɨn zuir puvatɨ. Egha kɨ ifongezir puvatɨzir biziba me dagh ami. Me Solomonɨn afeziam Devitɨn arazir aghuiba bar ada ataki. Ezɨ bizir kam bangɨn kɨ arazir kam men akagham.

2 Atriviba 1:3

Ezɨ Ikiavɨra Itir Godɨn ensel, kamaghɨn Tisben nguibar ekiamɨn itir Godɨn akam inigha izir gumazim Elaija mɨgei, “Nɨ dɨkavigh mangɨ gumazir Samarian atrivim Ekronɨn nguibar ekiamɨn amadaziba batogh. Egh nɨ kamaghɨn me mɨkemegh, ‘Ia manmaghsua Ekronɨn asem Balsebupɨn azangasa? Godɨn tam ti Israelɨn kantrin aven itir puvatɨ, ezɨ ia mangasa?