Jeremaia 17:8 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁸ Me mati temem me dɨpar mɨriamɨn anekara. Ezɨ temer kamɨn biba nguazim giraghuegha dɨpam isi. Ezɨ aruem garir dughiam, an atiatir puvatɨ. An dafariba angamɨra ikiavɨra iti. Egha amoziba izir puvatɨzir dughiabar, a nɨghnɨzir avɨribagh amir puvatɨ. A bar ikia mamaghɨra ti.”

Jeremaia 17:8 ပူးပေါင်းရင်းမြစ်များ

Onger Akaba 1:3

Me mati temem, me dɨpar mɨriamɨn anekara. A uan dughiamra bava, dafariba mɨdir puvatɨ. Kamaghɨra, bizir me amiba bar, da deraghavɨrama otifi.

Aisaia 58:11

“Ezɨ kɨ Ikiavɨra Itir God, kɨ zurara deravɨra ian gara ia mangamin tuavim ian akakagh, bizir ian ifongiaba agɨvamba ia danɨngam. Ia datɨrɨghɨn mati nguazir dɨpaba puvatɨzim, a bar ikuvighav iti, eghtɨ kɨ ia damightɨ ia bar deragh gumazamizir bar gavgavibar otivigham. Egh ia bar deravɨra ikiam, mati azenir dɨpar avɨrim itim, egha mati mozir dɨpam datir puvatɨ.

Esekiel 47:12

Ezɨ Godɨn Dɨpenimɨn otozir faner kamɨn mɨriamningɨn, temer igharagha garir aghuiba otiv bɨvɨra ikiam. Temer kabar dafariba da mɨsɨngan kogham. Temer kaba, dɨpar iza Godɨn Dɨpenimɨn otozimɨn boroghɨn iti, kamaghɨn amizɨ, da iakɨnibar zurara bɨvɨra ikiam. Eghtɨ gumazamiziba temer kabar ovɨzibar amɨva, dar dafariba iniva uan duaba ko arɨmariaba akɨram.”

Jopɨn Akɨnafarim 8:16

Gumazamizir kaba fomɨra mati grazir gavgavibar mɨn azenimɨn ike. Me deravɨram aghuima men biba azenimɨn danganiba bar dar ghue.

Jopɨn Akɨnafarim 29:19

Kɨ ghaze, kɨ ti gavgavigh, temer dɨpar mɨriamɨn dɨkarazimɨn mɨn, an biba dɨpar avɨrim isima, an dafariba dɨmagarimɨn ghuariam dagh irima, da bar derazɨ moghɨn ikiam.

Aghuzir Akaba 11:28

Gumazim suam, nan dagɨabara nan akurvaghtɨ kɨ deraghvɨra ikiam, puvatɨ, a mati temer dafarir mɨdiarim irɨ. Eghtɨ gumazir aghuiba me bar deraghvɨra ikiam, mati temem dafarir igiaba an iti.

Aisaia 61:3

Gumazamizir Saionɨn nguibamɨn aven ikiava aziba, kɨ bar akongezir arazim ko navir amɨrizim me danɨngtɨ, me gavgavigham. Egh kɨ averenir me uan dapanibagh atɨziba adegh, kurkazir aghuiba men kurkegham. Kɨ borem me daghuightɨ, me bar akuegh, men osɨmtɨzir ararem gɨvagham. Egh me ua uan gavgavim inigh, gumazim korotiar aghuim aruzɨ moghɨn, Ikiavɨra Itir God bagh bar akongegh onger akar aghuibar amuam. Egh me temer Okɨn, Ikiavɨra Itir God, uabɨ oparizibar mɨn, tuivigh ikɨ deraghvɨra Ikiavɨra Itir Godɨn gɨn mangɨ an ziar ekiam fam.

Jeremaia 39:18

Kɨ deraghvɨra nɨn akurvagh nɨn ganam, eghtɨ me nɨ mɨsueghtɨ nɨ aremeghan kogham. Nɨ nɨghnɨzir gavgavim nan iti, kamaghɨn nɨ aremeghan kogham. Kɨ Ikiavɨra Itir God, kɨ mɨkemegha gɨfa.”

Esekiel 31:3

Ia Asirian kantri gɨnɨghnɨgh, a fomɨra tugha bar gavgavigha iti, mati Lebanonɨn kantrin itir temer sida ruaragha tughav ikia, aguar diriba ikia dughuazir aghuim isa ruarim ganɨdi. Egha bar ruaragha ghuanaga overiamɨn ghuariabar suiragha iti.