Jeremaia 17:1 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹ Ikiavɨra Itir God kamaghɨn mɨgɨa ghaze, “Judaba, arazir kurar ia amiba kar ian arazir ia zurarama amiba da zurara ian ikɨvɨra ikiam. Mati gumazim tuizimɨn akar oteviba aghorezɨ moghɨn, ia dar uan navir averiar gavgavibar da osirigha, da isa ofa gamir dakozibar 4plan mɨkebabar, bulmakaun komba aghoregha da osiri.

Jeremaia 17:1 ပူးပေါင်းရင်းမြစ်များ

Aghuzir Akaba 3:3

Egh nɨ gumazir igharazibagh ifongezir arazim ko, igharaziba ko poroghav itir arazim ataghɨraghan markɨ. Egh nɨ arazir kamɨn gɨn mangɨtɨ, a mati kurukazir aghuimɨn mɨn nɨn fɨrimɨn ikiam. Egh nɨ deraghvɨra arazir kam isɨ uan navim datɨgh.

2 Korin 3:3

Ia bar azenara iti, mati akɨnafarir mam Krais an osirizɨ e a inigha ize. A fɨnfɨnir dɨpamɨn an osirizir puvatɨ. A zurara ikiamin Godɨn Duamɨn an osiri. Egha a dagɨar ekiatam gisɨn an osirizir puvatɨ. A gumazamizibar navir averiabar an osiri.

Aghuzir Akaba 7:3

Nɨ nan akam inigh uan navim datɨghtɨ a ikɨ mamaghɨra ikiam, mati ring zurara nɨn dafarimɨn iti.

Ofa Gami 4:25

Eghtɨ ofa gamir gumazim, arazir kuraba gɨn amadir ofan kam bagh, uan dafarir puzir tam isɨ memen ghuzim darugh, egh ghuzir muziaritam isɨ asɨziba da bar isia mɨghɨrir ofa gamir dakozimɨn, ofa gamir dakozimɨn mɨkebabar itir bulmakaun kombar mɨn garir biziba bar dar aghuigh. Egh ghuzir naba isɨ asɨziba bar isia mɨghɨrir ofa gamir dakozimɨn mɨngarim gingegh.

Hosea 12:11

Ezɨ me orazir puvatɨ. Me Gilgalɨn nguibar ekiamɨn arazir kurar avɨribagh ami. Kamaghɨn amizɨ, me guizbangɨra bizir kɨnibar mɨn otogham. Me Gilgalɨn nguibar ekiamɨn ikia bulmakaun apuriba isa uan ofa gamir dakozir kurabar ofabagh ami. Eghtɨ kɨ ofa gamir dakozir kaba apɨrightɨ, da dagɨar pozir kɨnibar mɨn azenara ikiam.”

Aisaia 49:16

“Kɨ nɨ gɨn amadaghan kogham. Nɨ gan! Kɨ nɨn nedazimɨn ingarigha nɨn ziam uan dafarimningɨn an osira, aneghorezɨ a iti. Egha kɨ zuraram an gara nɨ gɨnɨghnɨsi.

Jeremaia 2:22

Ian mɨkarziba arazir mɨzɨrɨziba dar puegha gavgafi, Ia ti ghaze, ia osɨmtɨzir kaba rusɨ sopɨn gavgavibagh ivezegh, da rutɨ da gɨvagham. Bar puvatɨ. Ian arazir mɨzɨrɨzir ian mɨkarzibar pogheziba, nan damazimɨn ikiavɨra iti. Kɨ Ikiavɨra Itir God, ian Ekiam.

Jeremaia 4:14

O Jerusalemia, ia manadɨzoghɨn uan navir averiamɨn aven itir nɨghnɨzir kuraba batuegham? Ia bar uan arazir kuraba batuegh zueghtɨ, Ikiavɨra Itir God, ian akuragham.

Hosea 7:2

Kɨ men arazir kuraba gɨn amadaghan kogham. Puvatɨgham. Ezɨ me bizir kam gɨnɨghnɨzir puvatɨ. Men arazir kuram me avara, ezɨ kɨ zurara men arazir kurar kamra gari.”

Sekaraia 7:12

Guizbangɨra, me uan dapanibagh amizɨ da dagɨabar mɨn gavgafi. Me nan akam baraghan aghua, kɨ Ikiavɨra Itir Godɨn Gavgaviba Bar Itim. Nan Duam akar kam me bagha a isa nan akam inigha izir gumazibagh anɨngi. Ezɨ me akar kamɨn gɨn zuir puvatɨ, ezɨ kɨ puvɨra men atari.

Jeremaia 11:13

“Judaba, ian aser ia ziaba febar dɨbobonim, ian nguibar ekiabar dɨbobonim ko magh ghu. Egha ia aghumsɨzim itir asem Bal bagha, ofan mɨgharir mughuriar aghuim zuim damuasa dakozir avɨribar ingari. Ezɨ dakozir kabar dɨbobonim da Jerusalemɨn nguibar ekiamɨn tuavir aguabar dɨbobonim ko magh ghu.

Jeremaia 31:33

Kɨ Ikiavɨra Itir God, kɨ kamaghɨn ia mɨgei, Gɨn izamin dughiam otoghtɨ, kɨ Israel ko Akar Dɨkɨrɨzir Gavgavim damightɨ, a kamaghɨn mangam: Kɨ uan araziba men nɨghnɨzibar arɨgh, egh da isɨva men navir averiabar da osiram. Egh kɨ men Godɨn ikɨtɨma me nan gumazamizibar ikiam.

Hosea 8:11

“Efraimia arazir kuraba gɨn amadir ofa damuasa, ofa gamir dakozir avɨribar ingari. Ezɨ ofan kaba derazir puvatɨ. Kamaghɨn amizɨ, me arazir kurar avɨrim gamuavɨra iti.