Jeremaia 16:17 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁷ Me amir biziba bar nan modozir puvatɨ. Da bar nan damazimɨn azenara iti. Me uan arazir kuraba mongɨva avegham.

Jeremaia 16:17 ပူးပေါင်းရင်းမြစ်များ

Aghuzir Akaba 15:3

Ikiavɨra Itir God bar bizibar garima da bar nguazimɨn otifi, egha a uaghan gumazir aghuiba ko gumazir kurabar gari.

Jeremaia 23:24

Eghtɨ gumazitam mangɨ igharagh modogham, eghtɨ kɨ Ikiavɨra Itir God, kɨ ti an ganighan kogham? Puvatɨ. Kɨ Ikiavɨra Itir God, kɨ bar overiam ko nguazimɨn iti. Kamaghɨn amizɨ, kɨ gumazir kamɨn gari.

Aghuzir Akaba 5:21

Nɨ fogh, Ikiavɨra Itir God nɨ amir biziba a bar dar gari, egha bar deraghavɨra nɨn arazibar gara dagh fo.

Onger Akaba 90:8

Nɨ en arazir kuraba bar adar gari. En arazir kurar e mogava amiba, nɨ bar ada isa azenim garigha gɨfa.

Hibru 4:13

Ezɨ bizir God ingariziba, tam Godɨn damazimɨn modoghan kogham. Bar puvatɨ. Ezɨ biziba bar kuiaghiregha Godɨn damazimɨn bar azenara ikiam. Eghtɨ Godra arazir e amiba tuisɨghtɨma e dar a geghanam.

1 Korin 4:5

Kotiamɨn Dughiam tɨghar otivam. Kamaghɨn, ia gumazamizir igharazibar araziba tuisɨghan markɨ. Ia Ekiam izamin dughiam mɨzuam. A bizir mɨtarmemɨn mueghav itiba inigh angazangarimɨn dar atɨgham. Egh a gumazamiziba bar men navir averiabar itir nɨghnɨziba, azenim darɨgham. Eghtɨ dughiar kamɨn, God bar vaghvagh e mɨkɨm suam, en ingangarim deraz, o ikufi.

Jeremaia 32:19

Nɨ bizir aghuibar amuasa nɨghnɨsi. Nɨ gavgavim ikia, egha nɨ ingangarir ekiabagh ami. Nɨ gumazamiziba amir biziba nɨ bar adar gari. Egha nɨ vaghvagha gumazamiziba amir araziba tuisɨgha, arazir me amibar ivezimra ikarvagh me ganɨdi.

2 Eghaghaniba 16:9

Gumazamizir uan navir averiabar aven Ikiavɨra Itir God baghavɨra itiba, me nguazir kamɨn danganir manamɨn iti, a zurara me buria deravɨra me bagha tintinibar gari. Egha a men akurvagha gavgavim me ganɨdi. Ezɨ nɨ uabɨn akurvaghasa Sirian atrivimɨn azarazir arazir kam, a derazir puvatɨ. Kamaghɨn amizɨ, datɨrɨghɨn nɨ Judaba ko, ia deravɨra dapiaghan kogham. Apaniba zurara ia ko mɨsogham.”

Esekiel 9:9

Ezɨ a na ikaragha ghaze, “Israelɨn ikɨzim ko Judan ikɨzim arazir kurar bar avɨrim gami, ezɨ osɨmtɨzir bar ekiam iti. Nguazir kamɨn, arazir gumaziba uariv soghava ariaghirim bar ekefe. Ezɨ nguibar ekiar kamɨn gumazamiziba uarir ikɨzɨrɨzir arazim bar izɨfa. Me ghaze, Ikiavɨra Itir God ti nguazir kam akɨrim ragha a gasara. Egha en garir puvatɨ.

Aisaia 29:15

Gumazamizir uan nɨghnɨzir kuraba ko uan arazir kuraba Ikiavɨra Itir Godɨn da mongasava amiba, mevzika! Me bar ikuvigham! Me arazir kurar kaba, mogomer danganiba ko dɨmagaribar dagh amua kamaghɨn mɨgɨa ghaze, “Tinara en ganigh e gɨfogham?”

Onger Akaba 139:3

Nɨ nan gari kɨ ingari, o kɨ akui, kɨ amir araziba, nɨ bar dagh fo.

Esekiel 8:12

Ezɨ Ikiavɨra Itir God, kamaghɨn na mɨgei, “Nguazir kamɨn gumazim, Nɨ gan! Israelian gumazir dapaniba mɨtarmemɨn mueghav ikia arazir kurar kabagh ami. Me vaghvagha uan marvir guaba bagha ofa gamir dakoziba iti. Me ghaze, Ikiavɨra Itir God ti men garir puvatɨ. Ikiavɨra Itir God ti akɨrim ragha nguazir kam gasara.”

Onger Akaba 51:9

Nɨ nan arazir kuraba ua dar ganan markɨ. Nɨ da batuegh ua adagh nɨghnɨghan markɨ.

Onger Akaba 109:15

Ikiavɨra Itir God me amizir arazir kurar kam gɨnɨghnɨghvɨra ikɨ, eghtɨ gumazamiziba gumazir kamɨn adarazi nɨghnɨzitam ua men ikian bar markɨ.

Jeremaia 2:22

Ian mɨkarziba arazir mɨzɨrɨziba dar puegha gavgafi, Ia ti ghaze, ia osɨmtɨzir kaba rusɨ sopɨn gavgavibagh ivezegh, da rutɨ da gɨvagham. Bar puvatɨ. Ian arazir mɨzɨrɨzir ian mɨkarzibar pogheziba, nan damazimɨn ikiavɨra iti. Kɨ Ikiavɨra Itir God, ian Ekiam.

Jeremaia 29:23

Aning Israelian tongɨn bar arazir kuram gami, egha aning namakabar amuiba koma akuava, nan ziam gifara akam akuri. Kɨ akar kam me ganɨngizir puvatɨ. Kɨrara, kɨ aning gara aning gɨfogha gɨvagha aningɨn gun mɨgei. Kamaghɨn amizɨ, kɨ aning gasɨghasigham. Kɨ Ikiavɨra Itir God, kɨ kamaghɨn mɨkemegha gɨfa.”

Sefanaia 1:12

Dughiar kamɨn, kɨ lamba inigh Jerusalemɨn averiam buriam. Gumazir nan arazibagh ifongezir puvatɨziba, me ghaze me uari biziba bar dar amuam. Me ghaze God pura iti. A gumazir aghuibar akurvazir puvatɨgha, gumazir kurabar araziba ikarvazir puvatɨ. Eghtɨ kɨ gumazir kabagh asɨghasigham.

Sekaraia 4:10

Me ingangarimɨn garima a zuamɨra dɨkavigha zuir puvatɨ, ezɨ men naviba bar oseme. Egh me Serubabelɨn gantɨma, an ain itir ikarɨzimɨn suiragh nan dɨpenimɨn ingaram. Me fo, ikarɨzir kam, dɨpenir ingangariba voroghɨra zuir ababanim. Eghtɨ me ganigh fogh suam, dɨpenir ingangarim deraghvɨra zui, eghtɨ me bar akongegham.” Ensel ua kamaghɨn na mɨgei, “Lamɨn 7plan kaba da Ikiavɨra Itir Godɨn damazibar ababanimɨn mɨn iti. A zurara nguazir kamɨn oteviba bar dar gari.”

Jopɨn Akɨnafarim 10:14

Nɨ bar deravɨra nan garavɨra iti, eghtɨ kɨ arazir kuratam damightɨ, nɨ nan arazir kuram gɨn amadaghan kogham.

Jopɨn Akɨnafarim 31:4

God bar nan arazibagh fogha, nan daroribar gari.

Onger Akaba 33:15

A uabɨ nɨghnɨziba ko navir averiabar ingarigha da isa gumazamizibagh arɨki, egha bizir me amiba a bar dagh fo.

Aisaia 66:18

Ikiavɨra Itir God ghaze, “Kɨ gumazamizibar nɨghnɨziba ko arazibar ganigha fo, kar dughiar kɨ gumazamiziba bar me akuvamim. Kantriba bar dar itir gumazamiziba ko akar igharazibav mɨgeir gumazamiziba, me bar moghɨra izam. Me izɨ uari akuvaghamin dughiamɨn, me nan angazangarir ekiam ko gavgavimɨn ganam.

Jeremaia 7:11

Ia Dɨpenir kamɨn nan ziam fasa kɨ a ginaba. Ezɨ ia ghaze, kar okɨmakɨar gumaziba modir danganim, a? Kɨ Ikiavɨra Itir God uabɨ guizbangɨra mɨgei, arazir ia amiba, kɨ bar adar ganigha gɨfa.