Jeremaia 15:6 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁶ Kɨ Ikiavɨra Itir God, kɨ guizbangɨra mɨgei, ia akɨrim na gasaragha bar nan saghon iti. Ezɨ kɨ uabɨ uan agharimɨn ian mɨsogh, ia gasɨghasɨghasava ami. Kɨ dughiar avɨribar ian apangkuva ghua, datɨrɨghɨn kɨ aghua.

Jeremaia 15:6 ပူးပေါင်းရင်းမြစ်များ

Jeremaia 7:24

Ezɨ ian inazir afeziaba nan akam baraghan aghua. Men naviba arazir kurabar amuasavɨra nɨghnɨgha, uan ifongiabar gɨn ghua akɨrim ragha na gasaragha, uamategha bar saghon ghuavɨra iti.

Sefanaia 1:4

“Judan gumazamiziba ko Jerusalemɨn gumazamiziba bar moghɨra, kɨ mɨzazim me gasegham. Asem Balɨn ziam fer arazimɨn bizir ikiavɨra itir vaghvaziba, ko an ofa gamir gumaziba, kɨ bar me gasɨghasigham, eghtɨ gumazamiziba ua me gɨnɨghnɨghan kogham.

Sekaraia 7:11

“Ezɨ gumazamiziba akaba baraghan aghuagha uan kuaribav konegha, uan nɨghnɨzibar kumi.

Hosea 11:7

Me zurara akɨrim na gasi, kamaghɨn ivezir kurar kɨ me danɨngamim, me a gitaghan kogham. Me uarir akurvaghsɨ asebar dɨmam. Eghtɨ aser kɨnir kaba men akuraghan kogham.

Aisaia 1:4

Iavzika! Ia gumazamizir bar kuraba, ian araziba uaghan ikufi. Ia zurara arazir kurabagh amuavɨra itima, ian arazir kuram ia gekua ghuaghiri. Ia Israelia, ia uan Ikiavɨra Itir God ategha gɨfa. Guizbangɨra, ia akɨrim ragha Israelian Godɨn Bar Zuezim gasara.

Hosea 13:14

Kɨ ti Gumazamizir Oveaghuezibar Nguibamɨn gavgavim da ua me inigham, a? Puvatɨgham. O ovevem, nɨ gumazamiziba dɨkabɨrir gavgavim managh iti? O ovevem, nɨ gumazamiziba mɨzazim me ganɨdir gavgavim managh iti? Apangkuvir arazim ti nan damazimɨn modogham.

Esekiel 25:7

Kamaghɨn amizɨ, ia oragh! Kɨ uan gavgavim itir agharim amadagh, ia isɨ Kantrin Igharazibar Gumazamizibar agharim datɨghtɨ, me bar ia gasɨghasɨgh ia kuavaremeghtɨ, ia ua kantrin tamɨn mɨn ikian kogham. Eghtɨ ia kamaghɨn na gɨfogh suam, kɨ Ikiavɨra Itir God.”

Jeremaia 6:19

O nguazim, nɨ oragh! Nan gumazamiziba na gɨnamadagha, Arazir Kɨ Me Ganɨngizibar gɨn zuir puvatɨ. Kamaghɨn, kɨ men arazir kurar kaba ikarvagh, uan gumazamizir kabagh asɨghasɨgham.

Jeremaia 6:11

Ezɨ Ikiavɨra Itir God, nɨn anɨngagharir nɨ men itir kam uaghan na gizɨfa. Ezɨ kɨ an suiraghtɨ a dughiar ruarimɨn nan ikian kɨ aghua. Kɨ bar amɨra.” Ezɨ Ikiavɨra Itir God, kamaghɨn na ikaragha ghaze: “Nɨ nan anɨngagharir kam isɨ, borir pura tintinibar tuavibar ikarara itiba ko, gumazamizir igiar uari akuva itiba me gingegh. Egh uaghan poroghamiba ko gumazamizir bar ghuriba, uaghan me gingegh.

Jeremaia 2:17

Israelia, kɨ Ikiavɨra Itir God, ian God, kɨ ia inigh tuavir aghuimɨn izasa, ezɨ ia aghuagha akɨrim ragha na gasara. Ia uari kamaghɨn amizɨ, osɨmtɨzir kam ia bato.

Jeremaia 1:16

Nan gumazamiziba akɨrim ragha na gasaragha, uari bagha marvir guabar ingarigha, dar damazimɨn dapaniba avia da bagha ofan mughuriar aghuiba zuibagh amua dar ziaba fe. Me kamaghɨn amua, bar arazir kuram gami. Kamaghɨn, kɨ me isɨ kot datɨgham.

Hosea 4:16

Israelian dapaniba bar gavgafi, mati bulmakaun amebar igiar akaba batoziba. Me ghaze, Ikiavɨra Itir God me geghuvam, mati sipsipbagh eghuvir gumazim uan sipsipɨn nguzibagh eghufi. Kɨ garima, me puv akaba batosi, eghtɨ kɨ manmaghɨn me geghuvam? Ti puvatɨgham!

Esekiel 14:9

“Eghtɨ gumazir kamagh garitam izɨ nan akam inigha izir gumazitam apezeper a damutɨ, an akatam a danigham, bizir kamɨn mɨngarim mati, kɨ Ikiavɨra Itir God, kɨ uabɨ nan akam inigha izir gumazim gifarazɨ an akar kam a ganɨngi. Kamaghɨn amizɨ, kɨ ivezir kuram a danɨngɨva Israelian gumazamizibar tongɨn a batuegham.

Jeremaia 20:9

Kɨ kamaghɨn uabɨra uabɨ mɨkɨmam, kɨ ti nɨ gɨn amadagh ua nɨn ziamɨn nɨn akamɨn gun me mɨkɨman kogh, egh kɨ kamaghɨn nɨn akam gɨnɨghnɨgh suam, nɨn akam mati avim nan navir averimɨn ikia, nan agharibar isia iti. Kɨ ua nɨn akam mɨkɨman koghasava amuava avenge. Bar puvatɨ.

Jeremaia 8:5

Ezɨ Jerusalemɨn gumazamizir kaba na ategha, ua izir puvatɨ. Me zurara akɨribagh igha na gasi. Me ifavarir arazimɨn gɨn mangasa bar gavgavigha, ua na bagh izan aghua.

Jeremaia 2:19

Ian arazir kuramra puv ia damigham. Ia akɨrim ragha na gasara, ezɨ ian arazir kam bangɨn ia bar ikuvigham. Kɨ Ikiavɨra Itir God, ian God, ia na ataki, egha ua nan apengan itir puvatɨ. Kamaghɨn amizɨ, ia deraghvɨra nɨghnigh, egh kamaghɨn fogham, ian arazir kaba bar kufi, egha mɨzaziba ia ganɨdi. Kɨ Ikiavɨra Itir Godɨn Gavgaviba Bar Itim, kɨ mɨkemegha gɨfa.”

Jeremaia 2:13

Nan gumazamiziba arazir kurar pumuning gami. Kɨ mati, dɨpar aghuir ikɨrɨmɨrir aghuim anɨdim me bagha fasfagha iri. Ezɨ me akɨrim ragha na gasara. Me uari bagha dɨpabar suighasa dagɨaba okora toribagh ami. Ezɨ me okorezir dagɨar mozir dɨpar kaba tintinibar bɨghireghtɨ, dɨpaba dar aven ikian kogham.’ ”

Aisaia 28:13

Kamaghɨn amizɨ, Ikiavɨra Itir God uabɨ men sure damuam, eghtɨ me aghuagh kamaghɨn mɨkɨm suam, Godɨn akam mɨngariba puvatɨ, mati borir iririviba azafi. Egh me bar onganigh dughiar kuram initɨma, men apaniba, mati azuazim asɨzimɨn suirazɨ moghɨn, me inigh mangɨ kalabus darɨgham.

Aisaia 31:3

Isipia, me aseba puvatɨ, me pura gumazir kɨniba. Men hoziaba uaghan en hoziabar mɨn gari, da aseba puvatɨ. Eghtɨ Ikiavɨra Itir God uan gavgavim akagh ivezir kuram me danɨngamin dughiam, kantrin gavgavir kam irɨghtɨ kantrin an akurazim uaghan irɨgham. Egh aning uaghara bar ikuvigham.

Jeremaia 6:12

Kɨ Ikiavɨra Itir God, kɨ kantrin kamɨn itir gumazamiziba uan gavgavir ekiamɨn bar me gasɨghasigham. Egh igharaz darazir amamangatɨghtɨ, me izɨ men dɨpeniba ko nguaziba ko men amuiba iniam.

Jeremaia 7:16

Egha Ikiavɨra Itir God, ua kamaghɨn na mɨgei, “Jeremaia, nɨ ua gumazamizir kaba bagh nan azangsɨgh nan dɨmɨva arangan markɨ. Kɨ nɨn azangsɨzitam bareghan kogham, kamaghɨn nɨ men akurvaghsɨ nan azangan markɨ.

Jeremaia 8:9

Kɨ Ikiavɨra Itir God, ian fofozir gumaziba nan akabar aghuagha akɨrim ragha dagh asara. Manmaghsua me ghaze, me datɨrɨghɨn fofoziba iti? Puvatɨ. Me datɨrɨghɨn azuazim asɨzimɨn suizi moghɨn, dughiar kuram men suiraghtɨ me bar aghumsigham. Eghtɨ men nɨghnɨziba bar ikuvigham.

Esekiel 35:3

Egh gumazamizibav kɨm suam: “Kɨ Ikiavɨra Itir Godɨn Ekiam ghaze: Nɨ oragh! Seirɨn Mɨghsɨam, kɨ nɨn apanim gami. Kɨ uan agharim nɨn nguazimɨn amadagh nɨ damightɨ nɨ ikuvightɨ, gumazamiziba ko biziba nɨn puvatɨghtɨ, nɨ pura ikiam.

Jeremaia 13:14

Kɨ gumazamizir kaba bar me gasɨghasigham, mati gumazim nguazir mɨneba isa uariv sosi da bɨaghiri moghɨn. Men ameboghfeziaba ko, boriba sara kɨ me gɨnɨghnɨgh men apangkuvighan kogham. Bizitam bar nan tuavim apɨrighan kogham. Kɨ Ikiavɨra Itir God, kɨ mɨkemegha gɨfa.’ ”

Jeremaia 44:22

Ia arazir bar kuribagh ami, ezɨ gɨn Ikiavɨra Itir God ian arazir kurar kam bar a giporpore. Bizir kam bangɨn, a ian nguazim gamizɨ, a ikuvigha nguazir kɨnimɨn oto. Ezɨ gumazitam an itir puvatɨgha iza datɨrɨghɨn tu. Kamaghɨn amizɨ, Kantrin Igharazibar Gumazamiziba akar kurabar uan apanibav kɨmasa kamaghɨn mɨgei, ‘Ia Juda ikuvizɨ moghɨn, ia ikuvigham.’