Jeremaia 13:27 - Godɨn Eghaghanim: Akar Gavgavir Dɨkɨrɨzir Ghurim ko Igiam

²⁷ Kɨ uabɨ gari, nɨ arazir bar kurar kɨ ifongezir puvatɨzibagh ami. Nɨ asebar gɨn mangasa pamtemɨn ingara, mɨghsɨaba ko danganir tuziba itibar dar ziaba fe. Nɨ mati gumazim uan roroamɨn amuim ko dakuasa an gɨriabagh suagha arui, egha mati hoziar apurim pamten hoziar amebamɨn gɨn ghuava aroi. O Jerusalem, nɨn araziba bar mɨze, egh nɨ kamaghɨra ikɨ mangɨ manadɨzoghɨn ua zuegham? Bar puvatɨgham. Noka! Nɨ bar ikuvigham.”

Jeremaia 13:27 ပူးပေါင်းရင်းမြစ်များ

Hosea 8:5

O Samariaba, kɨ ian golɨn bulmakaun marvir guar kam bar an aghua. Kamaghɨn, kɨ bar ian anɨngaghe. Kɨ kamaghɨn ifonge, me uan arazir kurar kam zuamɨram anetakigh. Ezɨ ti puvatɨgham.

Esekiel 24:13

O Jerusalem, mɨner kamɨn itir mɨneziba, da nɨn arazir mɨzɨrɨzibar ababanim gami. Kɨ zueghasa nɨ gamima, nɨ mɨzeghvɨra iti. Nɨ zueghan kogh ikɨ mangɨ dughiar nan anɨngagharim gɨvaghamimɨn tugham.

Esekiel 6:13

Eghtɨ apaniba, Israelian gumazamizibar marvir guabar ofa gamir dakoziba, ko mɨghsɨabar pɨn itir danganir asebar ziaba feba, ko temer ekiabar apebaba, ko me aseba bagha ofan mɨgharir mughuriar aghuim gamir danganibar Israelian tabav soghɨrarightɨ, men kuaba pura tintinibar ireghɨv ikiam. Eghtɨ dughiar kamɨn, Israelia arazir kamɨn gan fogh suam, kɨrara kɨ Ikiavɨra Itir God.

Aisaia 65:7

Kɨ Ikiavɨra Itir God, kɨ kamaghɨn mɨgei, kɨ ia damutɨ, ia uan arazir kurabar osɨmtɨziba ko uan inazir afeziabar osɨmtɨziba saram ateram. Ian inazir afeziaba mɨghsɨabar ghuavanega, asebar ziaba fer danganibar, ofan mɨgharir mughuriar aghuiba zuibagh ami. Egha me mɨghsɨabar pɨn ikia arazir kurar avɨriba nan damazimɨn dagh amua, egha arazir kamɨn na dɨpova aghumsɨzim na ganɨdi. Kamaghɨn amizɨ, kɨ men arazir kurar me amizibar ivezimra me danɨngam.”

Hosea 4:2

Me akar kurabar gumazamizibav gei. Me uarigh ifarava, gumazamizibav sozi me ariaghiri, egha igharazibar biziba okɨava, egha poroghamiba uari bakeir arazim gami. Me arazir kurar avɨrim saram ami, egha gumazamizibav suagharɨgha ghuavɨra iti. Ezɨ arazir kam bar ekevegha ghuavɨra iti.

Esekiel 36:37

“Kɨ Ikiavɨra Itir Godɨn Ekiam, kɨ kamaghɨn mɨgei: Kɨ Israelɨn ikɨzim ua men amamangatɨghtɨ, me uarir akurvaghsɨ ua nan azangsɨgham. Eghtɨ kɨ me damightɨ, men gumazamiziba sipsipɨn okoruar mamɨn mɨn, bar avɨrasemegham.

Aghuzir Akaba 1:22

“Ia gumazamizir nɨghnɨziba puvatɨziba, ia zurara kamaghɨra ikiasa, a? Ia gumazamizir onganiba! Ia fofozir aghuim inian aghuagha egha dɨbovibar a mɨgei. Ia manadɨzoghɨn arazir kam ataghɨragham?

Akar Mogomem 8:13

Ezɨ kɨ garima, kuarazir bagar mam overiamɨn pɨn mɨghagha arui. Ezɨ kɨ a barazi, a kamaghɨn pamten dɨa mɨgei, “Iavzika! Nguazimɨn itir gumazamiziba, Iavzika! Enselɨn igharazir 3pla ua uan sɨghabagh iviam, eghtɨ osɨmtɨzir bar ekiaba gumazamiziba me bativam. Iavzika!”

Jems 4:4

Ia God ataki, mati amizim uan pam ategha ghua gumazir igharaziba isava akui. Ia orakigh! Ian tav nguazimɨn arazibagh ifonge, a Godɨn apanim. Ezɨ ia ti bizir kam gɨfozir puvatɨ, o? Gumazim o amizim nguazimɨn arazibar namakam gami, a Godɨn apanimɨn oto.

2 Korin 12:21

Kɨ kamaghɨn atiati, kɨ magh mangɨtɨ faragha otozir bizir kam, ikɨvɨra ikiam. Eghtɨ God na damightɨ, kɨ ian damazibar aghumsɨzir bar dafam inigham. Kɨ kamaghɨn atiatingi, arazir kurar gumazamiziba fomɨram amiziba, me datɨrɨghɨn dagh amuavɨra iti, eghtɨ kɨ mangɨ men ganigh ua me bagh aziam. Me afiar araziba ko, pura tintinibar uari koma akuir araziba ko, aghumsɨzir puvatɨzir araziba, me da tegha navibagh irazir puvatɨ.

2 Korin 7:1

Nan namakar aghuiba, Godɨn e bagha inabazɨ itir bizir kaba e da inigha gɨfa. Kamaghɨn, e inivafɨzim ko duam gami aning mɨzezir biziba, bar da batuegh, Godɨn damazimɨn bar zuegham. Egh e Godɨn atiating an apengan ikiam. Egh uari isɨ bar God danigh, egh Godɨn arazir zuezim zuraram an gɨn mangam.

Matyu 11:21

“Ia Korasinɨn nguibamɨn itir gumazamiziba, Iavzika! Ia kuram iniam. Ia Betsaidan nguibamɨn itir adarasi, Iavzika! Ia bar ikuvigham. Gumazitam Tairɨn nguibam ko Saidonɨn nguibamɨn ghua, mirakelɨn kɨ amiziba men tongɨn dagh amighai, Tair ko Saidonɨn itir darazi ti fomɨra navibagh iragha, egha azir adiariba aghuigha, averenim gapiava a guruava, egha uan arazir kamɨn uari akakagha ghaze, me uan arazir kuraba ataki.

Sefanaia 3:1

O Jerusalem, nɨ ikuvigham. Nɨn gumazamizibar araziba, Ikiavɨra Itir Godɨn damazimɨn bar mɨzegha, kurigha bar ikufi. Me an akaba batogha uan adarazira, paza me gami.

Hosea 1:2

Ikiavɨra Itir God Israelia mɨkɨmasa, Hosean dughiar bar faragha zuimɨn, akam isa a ganɨga kamaghɨn a mɨgei, “Nan gumazamiziba ua na gifongezir puvatɨ, egha asebar ziaba fe, mati tuavimɨn amizir tintinimɨn gumaziba koma akuim. Nɨ kamaghɨn men akakagham, nɨ mangɨ tuavir amizitam inigh an ikɨtɨ, a poroghamiba tintinibar uari bakeir arazim damuvɨra ikiam. Eghtɨ an boriba, tuavimɨn amizim oteghamin boribar mɨn ikiam.”

Esekiel 36:25

Egh dɨpar dɨkɨriam inigh, ian dapanibagh isɨn a kavamang ian arazir kuraba batueghtɨ, ia nan damazimɨn bar zuegham. Egh ian arazir kurar ia marvir guaba fem bagh, ia rueghtɨ ia zuegham.

Esekiel 24:6

“Kɨ Ikiavɨra Itir Godɨn Ekiam, kɨ kamaghɨn mɨgei, Gumaka! Jerusalemɨn nguibar ekiar kam, a bar ikuvigham. A gumazamizir avɨribav suagharɨki. A mati mɨner mam, an averiam bizir mɨzɨrɨziba an iti, me tong a rueghan kogham. Nɨ asɨzir tuzir kaba ko aghariba vaghvagh da inigh azenim darɨgh, eghtɨ tam ua mɨnemɨn aven ikian markɨ. Guizbangɨra, Jerusalemia bar ikuvigham.

Esekiel 20:28

Nguazir kɨ me bagha inabazir kam, kɨ me inigha nguazir kamɨn ize. Ezɨ gɨn me temer ekiaba ko mɨghsɨabar gara kamaghɨn nɨghnɨsi, kar danganir aghuir asebar ziaba famiba. Egha me zurara danganir kabar ofabar amuasa iza, asɨziba inigha ghua dar ofa gamua dar mughuriar aghuim isa aseba bagha pɨn da amadi. Egha me wainba inigha iza dagh ingegha aseba bagha ofa gami. Me kamaghɨn amuava na gamima, kɨ bar men anɨngaghe.

Esekiel 2:10

Ezɨ God akɨnafarir rɨghizir kam nan damazimɨn an onezɨ, kɨ garima, tuater arareba ko, azirakar ighiaba ko, gumazamiziba osɨmtɨziba itir akaba, me da osirizɨ, da vong ko vong sara iti.

Aisaia 57:7

Ia mɨghsɨabar ghuavanaga aseba fer danganibar ofa gamua, poroghamiba uari isava akuir arazim gami.

Onger Akaba 94:4

Gumazamizir kuraba akaba batogha, uan arazir kuraba bagha bar akonge. Me amir arazir kaba bagha uarira uari fe.

Jeremaia 3:6

Dughiar kamɨn Josaia atrivimɨn itima, Ikiavɨra Itir God, kamaghɨn na mɨgei, “Jeremaia, Israelia me nɨghnɨzir gavgavir nan itir arazim, me anetegha gɨfa. Me tuavimɨn amizim ami moghɨn, me mɨghsɨabar ghua dar ghuanaga dar itir temer ekiabar apebabar asebar ziaba fe. Nɨ bizir kamɨn ganiz, o?

Onger Akaba 94:8

Ia gumazamizir nɨghnɨzir aghuiba puvatɨziba, ia oregh deragh fogh. Ia bar gumazir onganiba, ia manadɨzoghɨn fofozitam ikiam?

Jeremaia 11:15

Ikiavɨra Itir God kamaghɨn Judabav gɨa ghaze: “Ia gumazamizir kɨ bar ifongeziba, ia arazir bar kurar avɨribagh ami, kamaghɨn, ia nan ofa gamir Dɨpenimɨn aven mangan kogham. Kɨ ian amamangatɨghtɨ, ia aven mangam. Ia uaghan uari bagha ofa damuasa asɨziba na bagha da inigha iza ghaze, ofan kaba ian akurvaghtɨ ia ikuvighan kogham. Bar puvatɨgham. Kɨ ia gasɨghasɨghamin dughiamɨn, ia bar biziba puvatɨgh bar akongeghan kogham.

Esekiel 16:23

Ikiavɨra Itir Godɨn Ekiam ua kamaghɨn mɨgɨa ghaze, “Iavzika! Ia bar moghɨra ikuvigham. Iavzika!

Esekiel 24:12

Ezɨ kɨ fo, avim mɨner kamɨn mɨnezibar isi da agɨvaghan kogham. Nan ingangarim pura ghu, ezɨ kɨ bar amɨra.