Jeremaia 13:17 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁷ Ia Ikiavɨra Itir Godɨn gumazamiziba, ia mati an sipsipɨn bɨzim, a deravɨra ia geghufi. Ia nan akam baraghan aghuaghavɨra ikɨtɨ, apaniba izɨ, ia inigh mangɨ, kantrin igharazimɨn pura ingangarir gumazir kɨnibar mɨn ia arigham. Eghtɨ, kɨ uabɨra modogh ikɨva ian ifaghatir arazim gɨnɨghnɨgh, ia bagh pamtem azitɨ, temeriba nan damazimning gizɨvagh izighiram.

Jeremaia 13:17 ပူးပေါင်းရင်းမြစ်များ

Malakai 2:2

Ia na bagh ingangaribar amusɨ, ia guizbangɨra nan ziar ekiam famin ingangaribar amu. Ia nan akaba batogh da baraghan koghtɨ, kɨ Ikiavɨra Itir Godɨn Gavgaviba Bar Itim, kɨ kamaghɨn mɨgei, ia bar ikuvigham. Egh bizir aghuir ia uarir akurvaghasa isiba, kɨ dagh asɨghasigham. Ia ghaze, kɨ ti pura mɨgei, egha nan akaba batosi. Kamaghɨn, kɨ ia gasɨghasigha gɨfa.

Jeremaia 14:17

“Jeremaia, nɨ gumazamizibar apangkuvamin akamɨn me mɨkɨm. Nɨ kamaghɨn mɨkɨm, ‘Kɨ Jeremaia, kɨ arueba ko dɨmagaribar azivɨra ikɨtɨ, nan damazimning temeriba dagh izɨvagh mamaghɨra ikiam. Nan gumazamiziba, guivir kɨ bar ifongezimɨn mɨn, kɨ bar deravɨra men gari. Ezɨ apaniba nan gumazamiziba puvɨra me mɨsoagharɨghizɨ, me bar moghɨra ikufi, mati me duar dafar kuraba iti.

Jeremaia 9:1

Kɨ ghaze, Kamaghɨn deragham, nan dapanim dɨpamɨn mɨn ikɨtɨ, nan damazimning mozir dɨpar zurara anaga ivemarimɨn mɨn ikɨ. Eghtɨ kɨ arueba ko dɨmagaribar nan gumazamizir kɨ bar ifongeziba, apaniba mɨsoghezɨ ariaghireziba, me bagh aziva arangvɨra ikiam.

Onger Akaba 80:1

O Israelia geghuvir gumazim, nɨ deravɨra e barakigh. Nɨ sipsipbar mɨn Josepɨn ovavir boribagh eghuva, deragha men gari. Nɨ uan atrivir dabirabim gaperaghav ikia, enselɨn bar gavgavibar pɨn iti. Nɨ uan angazangarim e gisiragh.

Esekiel 34:31

“Ia nan gumazamiziba, ia nan sipsipbar mɨn ikia, nan nguazimra iti. Ezɨ kɨ daghebar ian akuaghapa, ia geghuva, egha ian Godɨn iti. Kɨ Ikiavɨra Itir Godɨn Ekiam, kɨ mɨkemegha gɨfa.”

Onger Akaba 119:136

Gumazamiziba nɨn Arazibar gɨn zuir puvatɨ. Kamaghɨn kɨ puvɨram azima nan temeriba dɨpamɨn mɨn ivemari.

1 Samuel 15:35

Egha Samuel ua tong Solɨn ganizir puvatɨgha ikiavti Sol areme. An arazir kurar Sol Ikiavɨra Itir God gamizibagh nɨghnɨghavɨra ikia, an navim bar oseme. Ezɨ Ikiavɨra Itir God, a Sol gamizɨ a Israelian atrivimɨn otozir bizim gɨnɨghnɨgha, bar oseme.

Esekiel 36:38

Me Jerusalemɨn ofa damuasa inigha izir sipsipbar mɨn, me bar avɨrasemegham. Eghtɨ Israelia ua ingaramin nguibar ekiar kabagh izɨvagham. Eghtɨ me kamaghɨn fogh suam, kɨ Ikiavɨra Itir God.”

Jeremaia 23:1

Ikiavɨra Itir God kamaghɨn mɨgɨa ghaze, “Ia gumazir dapaniba, Iavzika! Ia bar ikuvigham. Ia nan gumazamiziba paza me gami. Ia sipsipbar gari gumazir kuraba, ia men agɨntɨgha me gasɨghasɨzima me tintinibar zui.

Jeremaia 22:5

Egh ia nan akamɨn gɨn mangan koghtɨ, kɨ Ikiavɨra Itir God, kɨ bar guizbangɨra uabɨ uan ziam dɨbora ghaze, dɨpenir kam kɨ a gasɨghasigham.

Jeremaia 17:16

Ikiavɨra Itir God, nɨ uan gumazamizibagh eghuvir ingangarir kam na ganɨngi, mati gumazir sipsipbagh eghuvim. Ezɨ kɨ ingangarir kam ataghizir puvatɨ. Ezɨ nɨ fo, kɨ dughiar kuram gumazamizir kaba bativasa me bagha nɨ mɨkemezir puvatɨ. Bar puvatɨ. Kɨ nɨn damazimɨn mɨkemezir akaba, nɨ bar deraghvɨra dagh fo.

Aisaia 63:11

Egha me gɨn God fomɨram amizir bizibagh nɨghnɨsi. Men nɨghnɨzim uamategha Moses ko an gumazamizibar ghua kamaghɨn mɨgei: “Ikiavɨra Itir God managh iti? A fomɨra uan gumazamiziba ko, men gumazir dapaniba inigha izima, me iza ongarim abigha vongɨn oto. Ikiavɨra Itir God managh iti? A fomɨram uan Duam amadazɨ, a men tongɨn iti.

1 Samuel 15:11

“Nɨ oragh, Sol nan akaba batuegha akɨrim na gasara. Ezɨ nan navim kamaghɨn mong oseme, kɨ Sol atrivimɨn ikiasa a ginaba. Bizir kam bangɨn nan navim derazir puvatɨ.” Ezɨ Samuel akar kam baregha navim osemegha atari, egha dɨmagarir kamɨn Samuel Ikiavɨra Itir God ko mɨgɨa an diavɨra itima amɨnim tira.

Jeremaia 15:17

Kɨ gumazir dughiar aghuiba baghavɨra itiba ko apiavkia bizibav gɨa atir puvatɨ. Bar puvatɨ. Gumazamizir arazir kurar me amiba bangɨn, anɨngazim na gizɨfa. Kamaghɨn, kɨ uabɨ abɨragha bar nɨn apengan ikia uabɨra iti.

Jeremaia 23:2

Kamaghɨn, kɨ Ikiavɨra Itir God, Israelian God, kɨ bighavɨra gumazir dapanir nan gumazamizibagh ativiba me mɨgɨa ghaze, Ia nan sipsipba batogha men agɨntɨzi me tintinibar ara ghue. Ia deragha men gara me geghuvir puvatɨ. Kamaghɨn kɨ Ikiavɨra Itir God, kɨ ghaze, ia amizir arazir kurar kam, kɨ deraghvɨra an gan egh a ikarvagham.

Esekiel 9:4

egha kamaghɨn a mɨgei, “Nɨ dɨkavigh Jerusalemɨn nguibar ekiam bar an averiam daruva gumazamizir men namakaba amir arazir kurar God aghuazibar osemegha itiba, nɨ me bativ, men guaba osizirir ababanim me darɨgh.”

Esekiel 24:16

“O nguazir kamɨn gumazim, kɨ fo nɨ uan amuim bar faraghvɨrama anerɨgha bar a gifonge. Kɨ zuamɨra nɨ dam amizir kam inightɨ nɨ pura ikiam. Eghtɨ nɨ a bagh azian kogh temeriba iran markɨ.