Jeremaia 11:19 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁹ Kɨ faragha fozir puvatɨ, me paza na damuasa na bagha akam mɨsosi. Kɨ mati sipsipɨn nguzim gumaziba a mɨsueghtɨ an aremeghasa an akua zui. Ezɨ gumazir kaba akam mɨsuegha ghaze, ‘Aria, e datɨrɨghɨram a mɨsueghtɨ an aremegham, mati gumazim temem bema, me an dughiamrama an oti mokɨn. E bar a kuavaremeghtɨ, gumazamiziba uam an gɨnɨghnɨghan kogham.’

Jeremaia 11:19 ပူးပေါင်းရင်းမြစ်များ

Jeremaia 20:10

Kɨ orazi, gumazamiziba bar nɨmɨra uarira uariv gɨa ghaze, Jeremaia, a ghaze, bizir kurar kam bar danganibar iti, an e damutɨ e atiatingam. Kamaghɨn e a isɨ kotiam datɨka. E datɨrɨghɨrama a isɨ gumazir ekiabar damazimɨn kotiam darɨgham. Nan namakaba kamaghsua ifonge, bizir kurar na bativir kaba na dɨkabɨragham. Me ghaze, “E ti a gifaragh a dɨkabɨraghɨva, an arazir kuram ikarvagham.”

Jeremaia 18:18

Gumazamiziba kamaghɨn mɨgɨa ghaze, “Jeremaia guizbangɨra akatamɨn mɨgeir puvatɨ. Kamaghɨn, e Jeremaia mɨsoghsɨ tuaviba buriam. E ghaze, Ofa gamir gumaziba suren akam akurir ingangarim ataghɨraghan kogham. Eghtɨ gumazir nɨghnɨzir aghuim ko fofozir aghuiba itiba, me uan nɨghnɨzim ko fofozir aghuim ateghan kogham. Eghtɨ akam inigha izir gumaziba Godɨn akam e mɨkɨmvɨra ikiam. Kamaghɨn amizɨ, e Jeremaia baraghan kogham. E a isɨ kotiam darɨgham.”

Onger Akaba 83:4

Me ghaze, “Ia izɨ e Israelɨn kantri bar a gasɨghasightɨ, a ziaba puvatɨghtɨ, me uam a gɨnɨghnɨghan kogham.”

Onger Akaba 31:13

Kɨ orazi, apanir avɨriba uari akuva gɨrakɨrangɨn moghɨn aghumra uariv gei. Me atiatim na danɨngasa uari akuva na gasɨghasɨghasa akam mɨsosi. Egh na mɨsueghtɨ kɨ aremeghasa uariv gei.

Jopɨn Akɨnafarim 28:13

Guizbangɨra fofozir aghuarim ko nɨghnɨzir aghuarim bizir bar ekiam, egha dagɨar ekiaba ko bizir igharaziba bar dagh afira. Ezɨ gumazamiziba bizir kam deravɨram a gɨfozir puvatɨ. Ezɨ fofozim ko nɨghnɨzir aghuarim nguazir kamɨn gumazamizibar tongɨn itir puvatɨ.

Onger Akaba 27:13

Nɨghnɨzir gavgavir kam nan ikiavɨra itima, kɨ kamaghɨn fo, kɨ nguazir kamɨn angamɨra ikɨ gantɨ, God deraghvɨra uan gumazamizibar amuam.

Dɨboboniba 1:14

Egh Gatɨn anabamɨn adarazir gumazim Duel, an otarim Eliasap, gua a inigh.

Aisaia 38:11

Kɨ ghaze, kɨ gumazamizir angamɨra itibar tongɨn ikɨ ua Ikiavɨra Itir Godɨn ganighan kogham. Kɨ Gumazamizir Oveaghuezibar Nguibamɨn mangɨ, egh ua nguazir kamɨn itir gumazamizir angamɨra itibar ganighan kogham.

Aisaia 32:7

Ezɨ ifavarir gumazamiziba, nɨghnɨzir kurar bar avɨriba men dapanibagh izɨfa. Me gumazamizir biziba puvatɨziba, dɨkabɨnasa men kotiaba adafi. Me, onganarazibagh amir gumazir arazir kurabagh amir puvatɨziba, me kotɨn aven ifavarir arazir igharazibar mɨgɨrɨgɨabar me gami.

Aghuzir Akaba 10:7

Gumazir aghuitam aremegham, gumazamiziba a gɨnɨghnɨgh egh bar akuegham. Ezɨ gumazir kuraba ariaghiri, gumazamiziba zuamɨram me bakɨnɨghnɨsi.

Aghuzir Akaba 7:22

Ezɨ gumazir kam amizir kamɨn akam baregha zuamɨra amizir kamɨn gɨn dɨpenimɨn ghu, mati bulmakau me a mɨsueghtɨ an aremeghasa a inigha zui. Egha mati asɨzir mam azuazimɨn aven ghu.

Onger Akaba 116:9

Kɨ angamɨra itir dughiamɨn, kɨ zurara Ikiavɨra Itir God ko daruam.

Onger Akaba 109:13

Kɨ kamaghsua, an ovavir boriba uaghan bar arɨmɨghiregham, eghtɨ gɨn otivamin adarazi ua gumazir kamɨn ziam gɨnɨghnɨgh a dɨponan kogham.

Daniel 9:26

Egh 434plan azeniba gɨvaghtɨ, me gumazir God en akurvaghasa mɨsevezim mɨsueghtɨ an aremegham. Eghtɨ an bizitam ikian kogham. Eghtɨ atrivir gavgavir mamɨn mɨdorozir gumazir bɨzir ekiam izɨva Jerusalem ko Godɨn Dɨpenim gasɨghasɨgham. Eghtɨ dughiar abuananamɨn, mati aperiam faner ekiamɨn otogha, biziba atera zui. Eghtɨ mɨdorozir ekiam ikɨ mangɨtɨ, God mɨkemezɨ moghɨn, dughiar abuananam otogham.

Onger Akaba 142:5

O Ikiavɨra Itir God, nɨ nan akurvaghasa kɨ nɨn dei. Nɨrara nɨ nan eghuvir gumazim. Kɨ kamaghɨn ifonge, kɨ angamɨra ikiavɨra itir dughiam, nɨrara na ko ikiam.

Onger Akaba 112:6

Gumazir aghuim irɨghan kogh egh tugh gavgavigh mamaghɨra ikiam. Eghtɨ gumazamiziba a gɨnɨghnɨghvɨra ikiam.

Onger Akaba 52:5

Nɨ orakigh, God bar nɨ gasɨghasightɨ nɨ ikuvigh kamaghɨra ikiam. A nɨn dɨpenimɨn nɨn suiragh nɨ batuegh bar nɨ agɨvaghtɨ, nɨ ua nguazir kamɨn ikian kogham. (Ighiam gamua an suiam atugha avughsegha ua ighiam gami.)

Onger Akaba 35:15

Kɨ osɨmtɨzimɨn irɨzir dughiamɨn, me uari akuva na dɨpova na mɨgɨa bar akonge. Gumazamizir kɨ fozir puvatɨziba, me puram akaba na gasa na mɨgɨa ghuavɨra iti.

Esekiel 32:24

“Kantri Elam, ko an mɨdorozir gumaziba bar moghɨra mɨdorozimɨn ariaghire. Ezɨ an mɨdorozir gumazibar moziba bar an mozim okarizɨ, a tongɨra iti. Elamia God gɨfozir puvatɨgha, me angamɨra ikiavɨra ikia gumazamizir avɨrim gamizɨ, me aguava atiati. Me datɨrɨghɨn uaghira Oveaghuezibar Nguibamɨn ikia, gumazir aremezibar tongɨn ireghav ikia bar aghumsɨki.

Aghuzir Akaba 24:15

Nɨ gumazir kuramɨn mɨn modogh, gumazir aghuimɨn dɨpenimɨn ganɨva, an dɨpenim akarigh an biziba okɨman markɨ.

Jeremaia 1:19

Kɨ Ikiavɨra Itir God, kɨ mɨkemegha gɨfa, Kɨ uabɨ nɨ ko ikɨ nɨn akurvagham. Eghtɨ gumazir kaba nɨn apanimɨn ikɨva, nɨ dɨkabɨragh nɨ abɨnsɨ damuva avegham.”

Hosea 9:8

God uabɨ Akar Gavgavim uan gumazamizibar anɨngasa, akam inigha izir gumazimɨn mɨn na amada. Ezɨ danganir kɨ aruiba bar, ia nan suighasava ami, mati gumazim kuaraziba guasa ivem adui. Egha Godɨn Dɨpenimɨn uaghan nan apanim gami.