Jeremaia 10:12 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹² Ikiavɨra Itir God uan gavgavimɨn nguazir kamɨn ingari. A uan nɨghnɨzir aghuimɨn nguazir kam isa uan danganimra anetɨzɨ, a gavgafi. A uan fofozimɨn overiamɨn ingara an onegha gɨfa.

Jeremaia 10:12 ပူးပေါင်းရင်းမြစ်များ

Jopɨn Akɨnafarim 9:8

A uabɨ overiam pɨn anetɨ. Ezɨ ongarim dɨpɨrima, an a gisɨn arui.

Jenesis 1:1

Bar faraghavɨra God overiam ko nguazimɨn ingarigha aningɨn itir biziba bar dagh amizɨma, da otifi.

Aghuzir Akaba 3:19

Ikiavɨra Itir God nɨghnɨzir aghuimɨn nguazir kamɨn ingari, egha a fofozir aghuimɨn overiamɨn ingari.

Aisaia 40:22

Godɨn overiamɨn pɨn uan atrivir dabirabim gaperaghav itim, a bizir kaba bar dar ingari. Egha an overiam, inimɨn mɨn an onegha, averpenimɨn mɨn a kuasa. Ezɨ an damazimɨn, nguazir kamɨn gumazamiziba bar suvigha, odezibar mɨn iti.

Kolosi 1:16

Ezɨ Kraisɨn agharimɨn, God uan nguibamɨn itir biziba ko nguazimɨn itir biziba bar dar ingari. Kar bizir e gariba ko garir puvatɨziba, da enselɨn gavgaviba ko duar gavgaviba ko aseba ko adariaba, ko bizir gavgaviba itiba. God Krais ko, aning bizir kaba bar dagh amizɨ, da bar Krais baghavɨra iti.

Jon Osirizir Akar Aghuim 1:3

Ezɨ Akar kamɨn, God biziba bar dar ingarizɨma, da otifi. Ezɨ bizitam tuavir igharazitamɨn otozir puvatɨ. Akam uabɨ bizibagh amizɨma, da otifi.

Onger Akaba 24:2

An ongarir konibar aven mati akɨnir guariba asegha, nguazimɨn ingarigha a isava dɨpar kabagh isɨn anefazɨ a bar gavgafi.

Sekaraia 12:1

Kar mɨgɨrɨgɨar Ikiavɨra Itir God Israelia bagha anɨngizim. Ikiavɨra Itir God overiam ko, nguazimɨn ingarigha, gumazamizibar ingarigha, ikɨrɨmɨrir angamɨra itim me ganɨngi. A kamaghɨn mɨgei,

Jeremaia 32:17

“O Ikiavɨra Itir God, nan Ekiam, nɨn gavgavir ekiamɨn, nɨ overiam ko nguazimɨn ingari. Nɨ bizitam damusɨ iburaghan kogham.

Jeremaia 10:13

A tiarim akarigha mɨgeima, overiam bar pamtemɨn tɨngazi. Ezɨ ghuariar pɨziba nguazir otevibar mɨgha iza, egha uari akufa. God onɨmaribagh amima, da taghtazima amozim izaghiri. Egha amɨnim asirafima, a a uan danganim ataghɨragha izi.

Aisaia 49:8

Egha Ikiavɨra Itir God kamaghɨn uan ingangarir gumazim mɨgei, “Kɨ uabɨ ua nɨ inigh, deragh nɨ damuasa dughiam amɨsefe. Dughiar kɨ ian akurvaghasa atɨzir kam, an otozɨ, kɨ nɨn ararem baregha nɨn akura. Egha kɨ bar deravɨra nɨ geghufi. Egh nɨ bangɨn, kɨ nguazimɨn itir gumazamiziba ko Akar Dɨkɨrɨzir Gavgavim damuam. Egh kɨ Israelɨn nguazim damightɨ, a ua deragh otogham. Eghtɨ Israelian adarazi uamateghtɨ, nɨ me bagh men nguazir datɨrɨghɨn pura itim tuiragh, ua me danɨngtɨ, me a dapiam.

Aisaia 48:13

Kɨ uan dafarimningɨn nguazim gamigha gavgavim an povim ganɨngizɨ a gavgafi, egha kɨ overiam isa an danganimɨn anetɨ. Egha kɨ overiam ko nguazimɨn diazir dughiamɨn, aning zuamɨra ivegha iza nan damazimɨn tu.

Aisaia 45:18

Ikiavɨra Itir God, anarɨra God. A nguazim ko overiamɨn ingarizɨ, aning gavgavighavɨra iti. Nguazim pura ikiasa God an ingarizir puvatɨ. Biziba ko gumazamiziba bar moghɨra nguazimɨn ikiasa, an an ingari. Egha a ghaze, “Kɨrara, kɨ Ikiavɨra Itir God, ezɨ ua godɨn tam ua itir puvatɨ.

Aisaia 45:12

Kɨrara, kɨ nguazimɨn ingarigha, nguazir kamɨn itir gumazamizibar ingarizɨ, me an iti. Kɨ uan gavgavimɨn overiamɨn ingarigha pɨn anetɨzɨ, a iti. Kɨrara, kɨ aruem ko iakɨnim ko mɨkovezibagh ativagha dar gari.

Aisaia 44:24

“Kɨ Ikiavɨra Itir God, ian Akurvazir Gumazim, ia uan amebamɨn navir averiamɨn ikezɨ a tɨghar ia batamin dughiamɨn, kɨ uabɨ, uan adarazir otivasa ian ingari. Kɨ kamaghɨn ia mɨkɨmasa: Kɨ uabɨra bizibagh amizɨ da otifi. Kɨ uabɨra overiam ko nguazimɨn ingarigha, aning isa aningɨn danganimɨn aning atɨ.

Aisaia 42:5

Ikiavɨra Itir God, an overiamɨn ingarigha a isa inimɨn mɨn an onegha anetɨ. Egha nguazir kamɨn ingarigha, an itir biziba bar dar ingarigha dagh amizɨ, da otivigha aghui. Egha angamɨra ikiamin amɨnim ko gavgavim isa nguazir kamɨn gumazamizibagh anɨngi. Godɨn kamra, uan ingangarir gumazim mɨgɨa ghaze,

Onger Akaba 104:24

O Ikiavɨra Itir God, nɨ bizir bar avɨrimɨn ingari! Nɨ bar fofozir ekiam ikia bizir avɨrir kaba bar dar ingari. Ezɨ bizir nɨ ingarizir kaba nguazim bar a gizɨfa.

Onger Akaba 33:6

Ikiavɨra Itir God fomɨra mɨkemezɨ, aruem ko iakɨnim ko mɨkoveziba, ko overiamɨn pɨn itir biziba bar otivigha iti.

Aghuzir Akaba 30:4

Tinara Godɨn Nguibamɨn ghuavanabogha an ganigha ua izaghira bizir a ganizibar gun mɨgei? Ezɨ tinara uan dafarimningɨn amɨnimɨn suira? Ezɨ tinara dɨpam isa overiamɨn itir ghuariabar anetɨ, mati gumazim bizim inigha inim gatɨgha, a nomke? Ezɨ tinara nguazibar mɨtaghniaba akɨra da arɨghizɨ da iti? Gumazir kamɨn ziam tina? Ezɨ an otarimɨn ziam tina? Nɨ na mɨkɨm! Nɨ ti foz, o? Puvatɨ.

Onger Akaba 119:90

Nɨn akam mɨkemezɨ moghɨn nɨ zuraram an gɨn zui. Nɨ nguazim an danganimram anetɨzɨma a ua mozorozir puvatɨ.

Onger Akaba 78:69

A Saionɨn Mɨghsɨar kamɨn uan Dɨpenimɨn ingarizɨ, a gavgavigha overiamɨn mɨn pɨn iti. A mati nguazir a ingarizir kamɨn mɨn anetɨzɨ, a gavgavigha ikia mamaghɨra iti.

Jopɨn Akɨnafarim 26:7

God overiamɨn ingarigha pura pɨn anetɨzɨ, a danganir bizitam faragha itir puvatɨzimɨn iti. Egha nguazim atɨzɨ a pura iti, bizitam an suirazir puvatɨ.

Onger Akaba 104:2

Angazangarim nɨ avara, mati gumazim inim avara. Nɨ overiam atɨzɨma mɨkoveziba bar iti, mati gumazim purirpenim asaragha benimɨn a ikezɨma a iti.

Jenesis 2:5

an amozim amadazɨma a izir puvatɨ. Ezɨ nguazimɨn azenimɨn ingaramin gumazamiziba puvatɨ. Kamaghɨn, graziba ko temeba tɨghar nguazimɨn otivam.

Jopɨn Akɨnafarim 37:18

God overiamɨn ingarigha, a isa an danganimɨn anetɨzɨ, a ikia gavgafi. Ezɨ overiam mati guabar garir bizimɨn mɨn iti, me brasɨn ganganir kamɨn ingari. Ezɨ nɨ ti Godɨn akuragh kamaghɨn bizitamɨn ingarigham? Bar puvatɨgham.

Jeremaia 10:16

Ezɨ Ikiavɨra Itir God, a Jekopɨn ovavir boribar God, a uabɨ biziba bar adar ingari. Egha bizir kabar mɨn garir puvatɨ. A Israelia amɨsevezɨ me an adarazira iti. An ziamra kara: Ikiavɨra Itir Godɨn Gavgaviba Bar Itim.

Jeremaia 27:5

Kɨ uabɨ uan gavgavir ekiamɨn nguazir kamɨn ingari, egha kɨ uaghan gumazamiziba ko, asɨzibar ingarizɨ da nguazir kamɨn iti. Kɨ uabɨ uan ifongiamɨn gɨn ghua, nguaziba abɨgha gumazamizibagh anɨdi.

1 Eghaghaniba 16:26

Nguazimɨn itir gumazamizibar aseba, da pura ifavarir godba. Ikiavɨra Itir God, an overiamɨn ingari.

Onger Akaba 65:7

Ongarim dɨkavima, nɨrarama a mɨgeima, an aghumra irɨghav ikia dɨpɨraghirir puvatɨ. Nɨ gumazamizibar mɨdorozibagh ami da gefi.

Jeremaia 14:22

Kantrin igharazitamɨn aser kuratam amozim damightɨ an arigham ti? Puvatɨ. O overiam uabɨ amozim e danigham ti? Bar puvatɨ. Ikiavɨra Itir God, en God, nɨrara nɨ bizir kamagh garibagh ami da otifi. Kamaghɨn amizɨ, e nɨghnɨzir gavgavim nɨn iti.”