Jenesis 32:11 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹¹ Kɨ kamaghsua nɨn azangsɨsi, nɨ deragh nan akuragh nan gantɨ, nan avebam Iso izɨ na ko mɨsoghan kogham. Kɨ kamaghɨn atiatigha ghaze, Iso ti izɨ e ko en amuiroghboriba sara mɨsogh bar e kuavaremegham.

Jenesis 32:11 ပူးပေါင်းရင်းမြစ်များ

Aghuzir Akaba 18:19

Nɨ uan aveghbuam damutɨ an navim nɨn ikuvigham, eghtɨ a uan nɨghnɨzim suiragh nɨ gifueghan kogham. A mati gumazamiziba nguibamɨn dɨvazimɨn tiam asarazɨ, gumaziba aven mangan ibura. Ezɨ gumazir pumuning akabar uaning mɨsogha dafarimningɨn suirazir puvatɨ, bizir kam aningɨn tuavim apɨrightɨ aning navir vamɨran ikian kogham, mati tiar akar gavgavim gumazimɨn tuavim apɨrizɨ, a dɨpenimɨn aven mangan ibura.

Matyu 6:13

Egh e ateghtɨ, e osɨmtɨzibar aven ikɨtɨ bizitam en navim bɨraghtɨ, e arazir kuratam damuan kogham. Nɨ arazir kurabar gavgavim da e inigh.’

Hosea 10:14

Kamaghɨn amizɨ, ian apaniba izɨ ia mɨsogham, egh ian nguibar ekiar dɨvazir gavgaviba itibagh asɨghasɨgham. Osɨmtɨzir kam, mati Atrivim Salman fomɨram amizir arazim, a Betarbelɨn nguibar ekiam ko mɨsogha bar a gasɨghasɨki. An adarazi men boriba ko amiziba isa nguazimɨn me apɨzima, me tintinibar ariaghiri.

Daniel 3:17

E guizɨn Godɨn ziam fe. Nɨ mɨkemezɨ moghɨn e damigh, eghtɨ en Godɨn gavgavim itim, an en akuraghtɨ, nɨn gavgavim ko danganir ekiar avir bar pamten isim, e a gitagham. God en akuragham.

Onger Akaba 142:6

Gumaziba arazir kurabar na gamua egha bar gavgafi, ezɨ kɨ me abɨnasava amuava avenge. Nan navim bar oseme. Kamaghɨn, kɨ uabɨn akurvaghasa nɨn dei, nɨ na barakigh.

Onger Akaba 119:134

Nɨ uam na inightɨ, gumazir akaba na gasiba na gasɨghasɨghan kogham. Eghtɨ kɨ nɨn akabar gɨn mangam.

Onger Akaba 43:1

O God, gumazamizir akɨrim ragha nɨ gasiba na abɨnasa. Nɨ nan akuragh gavgavim isɨ nan akabar anɨng, egh na bagh mɨkɨmtɨ me kamaghɨn fogham, kɨ arazir kuratam gamizir puvatɨ. Nɨ gumazir ifara arazir kurabagh amibar dafaribar nan akuragh ua na inigh.

Onger Akaba 31:2

Nɨ nan dɨmdiam baregh zuamɨra nan akuragh! Nɨ dagɨar ekiamɨn mɨn na modogh. Nɨ dɨvazir gavgavimɨn mɨn ikɨ na ekɨarughtɨ, nan apaniba na abɨnan kogham.

Onger Akaba 25:20

Nɨ nan akuragh deragh nan gantɨ, me na abɨntɨ kɨ aghumsɨghan kogham. Nɨrara nan akurvasi, ezɨ kɨ nɨ bagha iza nɨn aven modi.

Onger Akaba 16:1

O God, nɨ deragh na geghuv egh nan gan. Kɨ deraghvɨra ikiasa nɨ bagha iza nɨn aven modi.

1 Samuel 24:15

Kamaghɨn, Ikiavɨra Itir God uabɨ ga tuisɨgh mɨkɨm suam, gan tinara osɨmtɨzim gami. A uan kotɨn aven nan akuragh na bagh akam akɨrightɨ, nɨ na gasɨghasɨghan kogham.”

1 Samuel 12:10

Kamaghɨn amizɨ, ian ovaviba pamtemɨn dia, kamaghɨn Ikiavɨra Itir God mɨgei, ‘O Ikiavɨra Itir God, e akɨrim nɨ gasaragha aser Balba ko aser amizim Astarten ziam fe. Kamaghɨn amizɨ, e arazir kuram gamigha gɨfa. Nɨ datɨrɨghɨn en apanibar agharimɨn e iniasa, e ua nɨn azangsɨsi, eghtɨ e nɨ baghvɨra ikɨ nɨn ziamra fam.’

Jenesis 27:41

Iso fo, Jekop ifarazɨ, Aisak deragha a gami. Ezɨ bizir kamɨn Iso osemegha Jekopɨn apanimɨn iti. Egha nɨmɨra ghaze, “Nan afeziam ovengamin dughiam roghɨra izi. An oveghtɨ e anefaghɨva, an ikegh gɨvaghɨva, kɨ Jekop mɨsueghtɨ an aremegham.”

Godɨn Araziba 22:6

“Eghtɨ ia kuarazir mɨkonitamɨn gantɨ a tememɨn ikiam, o nguazimɨn ikiam, eghtɨ kuarazir amebam aroriabagh isɨn ikiam, o nguziba ko ikɨtɨ, ia kuarazir amebar kam inian markɨ.

Jenesis 27:42

Ezɨ Rebeka Ison mɨgɨrɨgɨar kam baregha, Jekop bagha akam amadagha ghaze, “Nɨ orakigh, nɨn avebam Iso bar nɨn osemegha ikarvagham tuavim buria, nɨ mɨsueghtɨ nɨ aremeghasa nɨghnɨsi.

Jenesis 32:3

Egha Jekop gumazir maba amadazɨ, me Iso mɨkɨmasa zui. Iso faragha Seirɨn nguazimɨn ghua apera, an ziar mam Idom.

Jenesis 32:7

Ezɨ Jekop mɨgɨrɨgɨar kam baregha puvɨram atiatigha nɨghnɨzir avɨribagh ami. Egha uan gumazamiziba, sipsipba, memeba, bulmakauba, ko kamelba isa okoruar pumuningɨn me abɨki, egha danganir pumuningɨn me arɨki.

Jenesis 33:4

Ezɨ Iso dɨkavigha ivegha iza uan dozimɨn suiragha a muiaghɨrɨgha an tori. Egha aning uagharama azi.

Jenesis 24:27

Egha kamaghɨn mɨgei, “Kɨ uan gumazir ekiam Abraham, an Godɨn ziam fasa, a Ikiavɨra Itir God. A nan gumazir ekiamɨn apangkuvigha egha a mɨkemezɨ moghɨra deraghavɨrama a gami. Guizbangɨra, Ikiavɨra Itir God na inigha iza nan gumazir ekiamran adarazir dɨpenim gatɨ.”

2 Samuel 7:18

Atrivim Devit, Ikiavɨra Itir Godɨn akam baregha gɨvagha, an Purirpenimɨn aven ghugha an damazimɨn kamaghɨn a ko mɨgei, “O Ikiavɨra Itir God, nan Ekiam, kɨ tina, nɨ arazir aghuir avɨribar na gami. Ezɨ kɨ uan adarazi ko, e ziar ekiaba puvatɨ. Ezɨ nɨ fomɨra deraghavɨra na gamua iza datɨrɨghɨn tu.