Jenesis 1:14 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁴ Egha gɨn God kamaghɨn mɨgei, “Angazangariba overiamɨn otifigh, aruem ko dɨmagarim abɨkigh. Eghtɨ dughiaba ko azeniba ikɨtɨ, me angazangarir kabar ganɨva dughiabagh fogham.

Jenesis 1:14 ပူးပေါင်းရင်းမြစ်များ

Godɨn Araziba 4:19

Ia ti overiamɨn itir bizir kabar gari, aruem, iakɨnim ko mɨkoveziba. Ia uari bagh ganigh, bizir kaba ian navir averiabagh ekutɨ, ia teviba apɨr dar ziaba fam. Ikiavɨra Itir God, ian God, ikɨzir igharazibar amamangatɨzɨ me bizir kabar ziaba fe. Eghtɨ ia kamaghɨn damuan kogham.

Jeremaia 31:35

Ikiavɨra Itir God angazangarim anɨngasa aruemɨn ingari, egha a iakɨnim ko mɨkoveziba dɨmagaribar angazangarim anɨngasa dar ingarigha, dar danganibar da arɨki. Egha an ongarim fezɨ, ongarir ekiaba dɨkava pamtemɨn dɨpɨraghira tɨngazi. An ziam kamakɨn, Ikiavɨra Itir Godɨn Gavgaviba Bar Itim. A kamaghɨn mɨkeme:

Onger Akaba 148:3

Aruem ko iakɨnim, gua uaghan an ziam fɨ! Mɨkovezir angazangarir gavgaviba itiba, ia uaghan an ziam fɨ.

Onger Akaba 148:6

A uabɨ mɨkemezɨ me uan danganibarama, otivigha iti. Me dar ikɨ kamaghɨra ikɨva, an akabar gɨn mangam.

Amos 5:8

God mɨkovezir kamning Guezam ko, Iavibamɨn ingarigha, egha uaghan mɨkovezir pɨn ikia angazangarim anɨdiba sara ingari. A mɨtarmer bar pɨzim gɨrazɨ, angazangarim oto. Egha angazangarim gɨrazɨ mɨtatem oto. Egha ongarimɨn deima, a izima, an a isa nguazim ginge. A gumazir gavgaviba ko men dɨpenir gavgaviba sarama asɨghasɨsi. God bar bizir kabagh ami, ezɨ an ziam, Ikiavɨra Itir God.

Joel 3:15

Eghtɨ aruem ko iakɨnim mɨtarmeghtɨ, mɨkoveziba ua isian kogham.

Jeremaia 10:2

A kamaghɨn mɨgɨa ghaze: “Ia kantrin igharaziba amir arazibar gɨn mangan markɨ. Me overiamɨn igharagha garir otivir bizibar gara bar atiatingi. Ezɨ ia dar ganɨva, atiatingan markɨ.

Onger Akaba 81:3

En isar ekiam otivamin dughiamɨn, iakɨnir igiam otoghtɨ ia sɨghabagh ivi. Egh iakɨnim izɨ pazaghar torimɨn tughtɨ, ia ua sɨghabagh ivi.

Jenesis 8:22

Eghtɨ nguazim ikɨvɨra ikɨtɨ dughiar kaba uaghan otivɨra ikiam, dughiar dagheba opariba ko dagheba iniamba, dughiar orangtɨziba ko fefeba, dughiar amoziba iziba ko arueba gariba ko dɨmagariba ko arueba. Dughiar kaba gɨvaghan kogh mangɨ nguazim gɨvamin dughiam otogham.”

Aisaia 40:26

Ia pɨn overiamɨn gan! Tinara mɨkoveziba ko overiamɨn itir bizibar ingarizɨ, da otifi? Bizir kaba, Godɨn mɨdorozir gumazibar mɨn iti. A ziaba dagh arɨgha dar pone. An adar dɨbobonim gɨfogha, vaghvagha dar ziabagh fo. A gavgaviba bar iti, kamaghɨn amizɨ, bizir pɨn itir katam ovengan kogham.

Matyu 24:29

Egha Iesus ua kamaghɨn mɨgei, “Osɨmtɨzir ekiar kaba otivigh gɨvaghtɨ: “ ‘Aruem mɨtategham, eghtɨ iakɨnim isiraghan kogham, eghtɨ mɨkoveziba overiamɨn asighiram, overiamɨn itir bizir gavgaviba bar uarira uari sɨvaghsɨvagh, uan danganiba ataghɨragham.’

Amos 8:9

Dughiar kam otoghtɨ, kɨ aruem damightɨma, ana aruer arɨzimɨn mɨtategham, Amɨnir bɨrim aruer arɨzimɨn, nguazir kamɨn itir gumazamiziba batogham. Kɨ Ikiavɨra Itir Godɨn Ekiam, kɨ kamaghɨn mɨkeme.

Joel 2:10

Me zuima nguazim mati mɨkɨmkɨzim a gɨnobazɨ a ivazvasi, ezɨ overiam mati God a gɨnobazɨ a nɨdi. Ezɨ aruem ko iakɨnim mɨtarmangizɨ, mɨkoveziba ua isir puvatɨ.

Jeremaia 33:20

“Kɨ Ikiavɨra Itir God, kɨ guizbangɨra mɨgei: Kɨ aruem ko, dɨmagarim ko, akam akɨrigha gɨfa, eghtɨ aning zurara dughiar kɨ aning bagha inabazimɨn otivam. Ezɨ gumazitam nan akar dɨkɨrɨzir gavgavir kam giraghan kogham.

Akar Mogomem 6:12

Ezɨ Sipsipɨn Nguzim akɨnafarimɨn kendelɨn grisɨn namba 6 adangi, ezɨ kɨ ua garima mɨkɨmkɨzir dafam nguazimɨn oto. Ezɨ aruem isiragha gari puvatɨzɨ, overiam ko nguazim mɨtatangi. Ezɨ iakɨnim bar aghevegha ghuzimɨn mɨn gari.

Matyu 2:2

Egha me kamaghɨn azai, “Borir Judabar Atrivimɨn ikiamim, amebam a batezɨ a managh iti? E an gun mɨgeir mɨkovezim aruem anadi naghɨn an ganigha an ziam fasa izi.”

Esekiel 46:1

“Kɨ Ikiavɨra Itir Godɨn Ekiam, kɨ kamaghɨn mɨgei: Aven itir danganir me uari akuvimɨn tiar akar aruem anadi naghɨn itim, wighba vaghvagh, dar 6plan ingangarir aruebar, tiam dukuagh ikɨ mamaghɨra ikɨ. Egh Sabatɨn dughiam ko iakɨnir igiamɨn isar ekiamɨn dughiamɨn, tiam kuighirɨgham.

Jeremaia 33:25

Ezɨ kɨ Ikiavɨra Itir God, kɨ guizbangɨra mɨgei: Kɨ aruem ko, dɨmagarim ko Akar Gavgavim akɨrigha, overiam ko nguazim bagha bizir kɨ damuasa mɨkemeziba bar da arɨki,

Jopɨn Akɨnafarim 25:5

Ia gan. Iakɨnim ko mɨkovezibar angazangarim e dar garima da bar ekefe, ezɨ Godɨn damazimɨn, da bar sufi.

Jenesis 9:13

Ezɨ arazir kam kamakɨn, kɨ ababanim ian akagha, overiamɨn pɨn ekianim atɨ. Kar nan ababanim, a ghaze, Akar Dɨkɨrɨzir Gavgavir kɨ nguazimɨn itir biziba bagha amizim, a ikɨvɨra ikiam.

Akar Mogomem 8:12

Ezɨ enselɨn namba 4 uan sɨgham givi, ezɨ me aruem ko iakɨnim ko mɨkoveziba 3plan okoruabar vaghvagha da tuira. Egha me aruemɨn okoruar mam gasɨghasɨgha, iakɨnimɨn okoruar mam gasɨghasɨgha, egha mɨkovezibar okoruar mam gasɨghasɨki. Kamaghɨn amizɨ, arueba bar, dughiar mabar aruem isir puvatɨgha mɨtatangi, ezɨ dɨmagariba bar, dɨmagarir maba iakɨnim ko mɨkoveziba isir puvatɨgha angazangariba puvatɨ.

Mak Osirizir Akar Aghuim 13:24

Egha Iesus ua kamaghɨn mɨgei, “Osɨmtɨzir ekiar kabar dughiam gɨvaghtɨ, gɨn izamin dughiamɨn bizir kaba otivam. “ ‘Aruem mɨtategham, eghtɨ iakɨnim isiraghan kogham;

Esekiel 46:6

“Egh atrivim iakɨnir igiamɨn isam bagh, a bulmakaun apurir igiatam ko 6plan sipsipɨn igiaba, ko sipsipɨn apurir ekiar vamɨra, duaba dar mɨkarzibar puvatɨziba, ana da inigh izam.

Onger Akaba 119:91

Biziba bar nɨn ingangarim gami. Kamaghɨn amizɨ, nɨ uabɨ mɨkemezɨ, biziba uan danganibara ikia, iza datɨrɨghɨn ikia kamaghɨra iti.

Jopɨn Akɨnafarim 25:3

An mɨdorozir gumaziba bar avɨraseme, ezɨ tav me mengan iburagham. Ezɨ a uan angazangarim gamizɨ, a danganiba bar dagh isira.

Jopɨn Akɨnafarim 3:9

Dɨmagarir kamɨn amɨnim pɨrigha mamaghɨra itima, amɨnim itir mɨkovezir anadiba isian koghai, ezɨ amɨnim itir angazangarir faragha otivim otoghan koghai, kamaghɨn deraghai.

Akar Mogomem 9:2

Ezɨ mɨkovezir kam, mozir torir bar konezimɨn akam kuizɨ, mɨgharim torir akamɨn azenan otiva, avir bar ekiamɨn mɨgharimɨn mɨn anadi. Egha mɨgharim torir kamɨn anaga aruem ko overiam avarazɨ, aning mɨtatangi.

Jenesis 1:13

Ezɨ amɨnim pɨrigha ua tirazɨma, kar dughiar namba 3.

Jenesis 1:15

Eghtɨ angazangarir kaba otivigh angazangarim nguazim danɨngam.” Ezɨ angazangariba otifi.

Onger Akaba 150:1

God uan Dɨpenimɨn itima, e an ziam fam. A gavgavir bar ekiam ikia uan Nguibamɨn itima, e an ziam pɨrafam.