Jems 1:11 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹¹ E fo, aruem anaga pamtem gara temem gisirazɨma a mɨdɨi. Ezɨ tememɨn akɨmarir aghuiba suaghira, egha dar ganganim bar ikufi. Ezɨ kamaghɨra gumazamizir bizir avɨriba itiba, me uan ingangarim damuvɨra ikɨva an tongɨn aremegham.

Godɨn Akar Aghuim; Akar Dɨkɨrɨzir Gavgavir Igiam

¹¹ E fo, aruem anaga pamtem gara temem gisirazɨma a mɨdɨi. Ezɨ tememɨn akɨmarir aghuiba suaghira, egha dar ganganim bar ikufi. Ezɨ kamaghɨra gumazir bizir avɨriba itim, a uan ingangarim damuvɨra ikɨva an tongɨn aremegham.

Jems 1:11 ပူးပေါင်းရင်းမြစ်များ

Mak Osirizir Akar Aghuim 4:6

Ezɨ dar biba bar nguazimɨn aven iraghuezir puvatɨzɨ, aruem anaga dagh isirazɨ, da isia mɨsɨngi.

Matyu 13:6

Ezɨ dar biba bar nguazimɨn aven iraghuezir puvatɨ, ezɨ aruem anaga dagh isirazɨ, da isia mɨsɨngi.

1 Pita 5:4

Eghtɨ dughiar sipsipbar garir gumazir Ekiam azenim girɨghtɨ, ia ivezir bar aghuim iniam, ivezir bar deravɨra itim, a ikuvighan kogham.

1 Pita 1:4

Ezɨ God, ikɨrɨmɨrir aghuir kam uan Nguibamɨn e danɨngasa e amɨsefe. Ezɨ ikɨrɨmɨrir kam a ikuvighan kogham. A bar deraghavɨra ikɨ, egh uaghan mɨgoveghan kogham. God uan Nguibamɨn ikɨrɨmɨrir aghuir kam ia bagha anetɨ.

1 Korin 7:31

Ezɨ nguazimɨn biziba bagha ingarir gumazamiziba, me bizir kaba bagh pamtem nɨghnɨghan markɨ. E fo, dughiar ruarim puvatɨ, eghtɨ nguazir kam ko an itir biziba bar gɨvagham.

Onger Akaba 102:4

Ezɨ nan navir averiam mati, me dadar mɨdiaribar mɨn, na dɨkaragha na abɨrazɨ, kɨ iraghu. Ezɨ kɨ bar osemegha daghebar aghuagha damasa nɨghnɨzir puvatɨ.

Aisaia 49:10

Gumazir men apangkuvim bar deravɨra men ganam, mati gumazir sipsipbar garim, sipsipba inigha ogher avɨriba itir danganim ko dɨpar aghuiba itir danganim bagha me inigha zui. Kamaghɨn me dɨpam ko daghebar oteveghan kogham, eghtɨ amɨnir fefem ko aruer dafam men mɨkarzibar apongan kogham.

Aisaia 28:4

A mɨghsɨar bar muziarim gisɨn iti, a nguazir bar aghuir dagheba oparamimɨn tongɨn iti, mati ian gumazir aruaba uan dapanibagh arɨzir akɨmaribar mɨn bar dera. Egh ian nguibar ekiar kam dughiar ruarimɨn ikeghan kogham, mati akɨmarim mɨsigha ikuvizɨ moghɨn, ikuvigham. Egh a zuamɨra gɨvagham, mati temer fighɨn mamɨn ovɨzim, mabagh afiragha faragha anizɨ, gumazir mam zuamɨra a inigha aneme.

Aisaia 28:1

O Efraimɨn anabamɨn adarasi, iavzika! Ian nguibar ekiar bar aghuim Samaria bar ikuvigham. Ian gumazir aruaba wain apava onganigha, Samarian ziam bar puvɨram a fa kamaghɨn mɨgɨa ghaze, a nguibar ekiar bar gavgavim. A mɨghsɨar bar muziarim gisɨn iti, a nguazir bar aghuir dagheba oparamimɨn tongɨn iti, egha a bar deragha gari, mati ian gumazir aruaba uan dapanibagh arɨzir akɨmaribar mɨn, bar dera. Egh ian nguibar ekiam dughiar ruarimɨn ikeghan kogh, mati akɨmarim mɨsigha ikuvizɨ moghɨn, ikuvigham.

Fofozir Gumazim 5:15

E fo, en amebam e batezir dughiamɨn, a bizitam saram e batezir puvatɨ, e puram bibiabara iti. Kamaghɨra, e ovengamin dughiamɨn, e pura bibiabara mangam. E guizbangɨra bizir avɨriba iniasa ingangarir mɨtɨabagh ami, egh e aremeghamin dughiamɨn, e bizir katam sara Gumazamizir Oveaghuezibar Nguibamɨn mangan kogham.

Onger Akaba 102:11

Nan ikɨrɨmɨrimɨn dughiam mati nedazim zuamɨra ghua guaratɨzimɨn gɨfa. Ezɨ kɨ angamɨra itir ikɨrɨmɨrimɨn dughiam bar otefe. Kɨ mati dadam aghua ghua mɨsigha gɨfa.

Onger Akaba 37:2

Guizbangɨra, me graziba mɨdɨi moghɨn zuamɨra mɨsigham. Egh ter afarir gariba imua mɨdɨi moghɨn, zuamɨra mɨsigh puvarigham.

Onger Akaba 39:6

Gumazamiziba bar, men ikɨrɨmɨrim mati aruem temem gisirazɨ an nedazim otogha iti. Egha me bizir avɨriba iniasa puvɨra ingari, ezɨ men ingangarir kaba pura zui. Gumazamiziba angamɨra ikia bizir avɨriba uari bagha da akuva, egha fozir puvatɨ, men ovevemɨn gɨn tinara da iniam.

Onger Akaba 103:15

E gumazamiziba, en angamɨra itir ikɨrɨmɨrim grazibar mɨn, dughiar ruarimɨn itir puvatɨ. E dughiar bar otevimra ruarimɨn akɨmarimɨn mɨn ikegha ariaghiri.

Matyu 6:30

E fo, graziba pura biziba, da iti, gurumɨn gumazitam dar akoreghɨva da isɨva avitam mɨkɨnigham. Grazir kɨnir kabanagh God adiariba me gazui. Ia bizir kam gɨfogh, God uaghan adiariba ia danɨngam. Ia gumazamizir nɨghnɨzir gavgavir muziarim itiba!

Matyu 20:12

‘Gumazir kaba bar gɨn izegha auan vamɨran ingari, ezɨ e mɨzaraghara izegha ingangarir ekiam gamima, aruem e gaponge. Ezɨ nɨ ivezir vamɨra bar e ganɨngi.’

2 Samuel 22:46

Men gavgaviba bar gɨvazɨ, me nɨrɨzim ko agorogem sara na bagha izi.