Hosea 9:6 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁶ Ia oragh! Gɨn osɨmtɨzir ekiam otoghtɨ, ia tintinibar arɨ mangegham. Eghtɨ Isipia izɨ ia batogh ia inigh mangɨtɨ, ia Isipɨn kantrin otivigh kalabuziabar mɨn ikiam. Egh ia ikɨ mangɨ arɨghireghtɨ, me uan nguibar ekiam Memfisɨn ian kuabar afegham. Ia uamategh uan nguibamɨn izeghan kogham. Puvatɨgham. Eghtɨ ian silvan dagɨaba ko dɨpeniba ko ian bizir aghuiba pura ikɨtɨ, ruarim aghung bar da avaragham.

Hosea 9:6 ပူးပေါင်းရင်းမြစ်များ

Hosea 10:8

Asebar ziaba fer danganiba, da mɨghsɨabar pɨn iti, ezɨ Israelia kagh men ziaba fa arazir kurabagh ami. Eghtɨ God danganir kabagh asɨghasigham, eghtɨ ogheba ko benir dɨkoniba aghung ofa gamir danganir kaba avegham. Eghtɨ gumazamiziba apanibar mongsɨ, kamaghɨn mɨghsɨabav kɨmam, “Ia e gisɨn irɨva e mongegh.”

Aisaia 5:6

Kɨ nguazim damightɨ ruarim a batoghtɨ dɨkoniba itir ikarɨziba azenir kamɨn avegham. Kɨ wainɨn azenimɨn ogher kuraba asian kogh, egh ikarɨzibar aghariba aghoran kogham. Kɨ uaghan ghuariabav kemeghtɨ, da amozimɨn tɨvaghtɨ a wainɨn azenir kam gizan kogham.”

Hosea 9:3

Egh ia Efraimia, ia uam Ikiavɨra Itir Godɨn nguazimɨn ikian kogham. Eghtɨ ian tarazi uamategh mangɨ Isipɨn kalabuziabar mɨn ikiam. Eghtɨ ian tarazi uaghan Asirian kantrin mangɨ kalabuziabar mɨn ikiam. Ia kantrin kamningɨn ikɨ dagher God anogoroghezibar amam.

Hosea 8:13

Me ofan avɨribagh amua ofa gamir asɨzibar tuziba api. Ezɨ kɨ Ikiavɨra Itir God, kɨ ofan kabagh ifongezir puvatɨ. Kamaghɨn amizɨ, kɨ datɨrɨghɨn men arazir kurabagh inɨrɨgh, ivezir kuram isɨ me danɨngam. Kɨ me amadaghtɨ, me mangɨ ua Isipɨn kantrin otogh kalabuziabar mɨn ikiam.

Hosea 7:16

Osɨmtɨzibar dughiabar, me uarir akurvaghasa na bagh izir pu. Puvatɨ, me aser gavgaviba puvatɨziba baghavɨra zui. Me paza zuir tuavir kam, a mati barir pir kuram. Men gumazir dapaniba uari fa ghaze, me gavgavim ikia uari uan apaniba mɨdorozimɨn me abɨnigham. Ezɨ puvatɨ. Me mɨdorozimɨn aven arɨmɨghiregham, eghtɨ Isipia puvɨra men ingaravakam.”

Aisaia 7:23

“Dughiar kamɨn ian azeniba bar moghɨra ikuvigham. Datɨrɨghɨn wainɨn azeniba da wainɨn ikarɨzir 1,000pla iti, ezɨ azeniba vaghvagha dar ivezim 1,000 kina. Eghtɨ gɨn temer ataghatariba itiba ko benir kuraba otivigh azenir kaba avegham. Eghtɨ gumaziba danganir kabar asɨziba burisɨ, me uan barir piba sara mangam.

Hosea 11:11

Me puvɨram atiating nɨghɨva akong zuamɨra Isip ko Asiria ategh izam, mati kuaraziba mɨgha zui. Eghtɨ kɨ men aku uamategh men nguibar me itimɨn izam. Kɨ Ikiavɨra Itir God, kɨ mɨkemegha gɨfa.”

Hosea 7:13

“Mevzika! Me bar ikuvigham. Me na ategha gɨfa, egha nan akam batosi. Kamaghɨn amizɨ, kɨ me gasɨghasigham. Kɨ faragha men akurvaghasava amima, me nan moga na gifari.

Aisaia 34:13

Beniba ko oghevsevir dɨkoniba itiba atrivimɨn dɨpenim ko dɨpenir igharazibar avɨ da avegham. Eghtɨ afiar atiaba izɨ ikɨ arangtɨ, poneba izɨ dɨpenir kabar dakuam.

Aisaia 32:13

Benir ataghatariba ko oghevsevir kuraba nguazir kam avaragham, kamaghɨn ia nan gumazamiziba nguazim bagh azirakabar amu. Guizbangɨra, ia dɨpenir bar dirir ia bar ifongeziba, ia fomɨra dagh nɨghnɨgha da bagha bar akonge, egh datɨrɨghɨn ia da bagh azirakabar amu. Ia fomɨra uan nguibar ekiamɨn ikia bar akonge, egh gɨn, ia a bagh osemegham.

Aisaia 27:12

Egh Ikiavɨra Itir God bizir kabar amuamin dughiamɨn, a uan gumazamizir tintinibar kantribar itiba iniam, Yufretisɨn Fanemɨn ikegh mangɨ Isipɨn kantrin tugham. A vaghvagh me iniam, mati gumazim witɨn ovɨziba rɨghɨrɨgha dar mɨseviba ategha, witɨn ovɨzir aghuibara isa itarim garɨsi.

Aisaia 19:13

Soanɨn nguibam ko, Memfisɨn nguibar ekiam, aningɨn gumazir ekiaba, me gumazir onganiba. Ezɨ Isipian gumazamizibar gumazir dapanir ekiaba, me uaghan deragha kantrin garir puvatɨ.

Aisaia 11:11

Egh gɨn ua izamin dughiamɨn, Ekiam uamategh uan agharim ghufegh uan gavgavim akagh, uan gumazamiziba inigh uamategh izɨ, men nguibabar me arɨgham. Kar gumazamizir ikiavɨra itir varazira, me kantri Asiria ko, Isip ko, Itiopia ko, Elam ko, Babilonian kantri ko, Hamat ko, Mediterenianɨn Ongarir Ekiamɨn arighatɨzibar ikiavɨra itiba.

Aghuzir Akaba 24:31

Ezɨ ogher kuram ko dɨkonir beniba dagher azenir kamɨn ave. Ezɨ dagɨar dɨvazir azenir kam avɨnizim, a dɨpɨriaghirɨgha irɨ.

Onger Akaba 107:34

Egha nguazir dagheba deragha aghuim gamizɨ, a ragha otogha amangsɨzir nguazimɨn otozɨ bizitam bar an otogha aghuir puvatɨ. Nguazir kamɨn itir gumazamiziba arazir kurabagh ami, kamaghɨn, Ikiavɨra Itir God osɨmtɨzir kaba me ganɨngi.

2 Atriviba 13:7

Ezɨ Sirian mɨdorozir gumaziba Israelian mɨdorozir gumazir avɨribav soghezɨ me ariaghire. Sirian mɨdorozir gumaziba bar puvɨra me gamua, me dɨkabɨra me gamima me nguazir mɨnemniamɨn mɨn otifi. Kamaghɨn amizɨ, dughiar kamɨn, Joahas mɨdorozir gumazir avɨriba puvatɨ. Israelia datɨrɨghɨn 50plan mɨdorozir gumazir hoziabagh apia mɨsozibara iti. Egha me mɨsoghamin 10plan karisba ikia, egha 10,000plan mɨdorozir gumazir igharaziba iti.

1 Samuel 13:6

Filistiaba ko Israelia uariv sosi. Ezɨ Filistiaba bar pamtemɨn mɨsozima, Israelia uarir gari me mɨdorozim gafiraghan kogham. Kamaghɨn amizɨma, Israelian marazi ghua nguazir toribar aven ghue, ezɨ marazi benir epariabar aven monge, ezɨ marazi mɨghsɨamɨn dagɨar toribar aven monge, ezɨ marazi dagɨar ekiabar tizibar monge, ezɨ marazi mozir dɨpabar aven, dar akɨribar monge.

Jeremaia 2:16

Ia Israelian gumazamiziba, Isipɨn nguibar ekiar kamning, Memfis ko Tapanesɨn mɨdorozir gumaziba, me izɨ ian dapanir tuaribagh isegham.

Jeremaia 42:22

Kamaghɨn, ia deraghvɨra fogh, danganir ia mangɨ ikiasa amir kam, apaniba ian taraziv sueghtɨ me arɨmɨghiregham, eghtɨ tarazi dagheba puvatɨgh arɨmɨghiregham, eghtɨ tarazi arɨmariar kuram iniva arɨmɨghiregham.”

Jeremaia 44:1

Ikiavɨra Itir God akam isa Judan Isipɨn itir daraziv kɨnasa Jeremaia ganɨngi. Me Mikdolɨn nguibam ko Tapanesɨn nguibam ko, Memfisɨn nguibam ko, Isipɨn sautɨn amadaghan itiba. Ezɨ Jeremaia kamaghɨn me mɨgei,

Jeremaia 46:14

“Ia Mikdol ko Memfis, ko Tapanes ko, Isipɨn itir nguibar maba sara akam akun. Egh kamaghɨn me mɨkɨm, ‘Apaniba otivigh puv ia mɨsoghɨrarigh, egh ian kantrin aven bizir avɨribagh asɨghasigham. Kamaghɨn amizɨ, ia Isipia, uan mɨdorozir biziba akɨrigh tuivigh mɨsoghsɨ ikɨ.

Jeremaia 46:19

Ia Isipia, ia mangɨ kantrin igharazibar kalabusɨn ikiam, kamaghɨn amizɨ, ia uan bizibar kɨr. Apaniba Memfis gasɨghasɨgham, eghtɨ nguibar kam pura ikiam, eghtɨ gumazamiziba ua an ikian kogham.”

Esekiel 30:13

“Kɨ Ikiavɨra Itir Godɨn Ekiam, kɨ kamaghɨn mɨgei: Kɨ Isipɨn kantrin nguibar ekiam Memfis, an marvir guaba ko aseba bar adagh asɨghasigham. Eghtɨ tam ua Isipɨn atrivimɨn ikian kogham. Egh kɨ gumazamiziba bar me damightɨ me bar atiatigham.

Esekiel 30:16

Kɨ Isip avim a datɨgham. Eghtɨ nguibar ekiam Pelusium, maburan osɨmtɨziba ko mɨzaziba iniam. Eghtɨ apaniba Tebesɨn nguibar ekiamɨn dɨvaziba akararigham. Eghtɨ Memfisɨn nguibar ekiam, apaniba dughiabar zuraram an izɨvɨra ikɨtɨ, an nguibar ekiam aperiam a batogham.

Hosea 2:6

“Kamaghɨn amizɨ, kɨ temer dɨkoniba itiba inigh an tuavim apɨrigham. Kɨ dɨvazimɨn mɨn an tuavim avɨnigham, eghtɨ a gumazir kaba bagh mangan kogham.

Hosea 7:11

Efraimia, mati kuarazir onganir mam, egha tintinimɨn uari akuri. Faragha me akurvazim bagha Isipɨn azara, egha gɨn me akurvazim bagha uaghan ivemara Asiriaba bagha ghue.

Sefanaia 1:11

Ia gantɨ, ian gumazir dagɨar ingangaribagh amiba, me bar arɨmɨghiregham. Kamaghɨn amizɨ, ia nguibar ekiamɨn danganir zarimɨn ikɨ, bizir kaba baragh aziam.

Ofa Gami 26:33

Kɨ apaniba amadaghtɨ, me ia mɨsogh ia batueghtɨ ia tintinibar kantrin igharazibar mangegham. Eghtɨ ian nguazim uaghan gumazamiziba puvatɨgh pura ikiam, eghtɨ nguibar ekiaba ikuvigh ikiam.

Jeremaia 44:12

Ia Judan ikiavɨra itir varazira, ia izɨ Isipɨn ikiasa gavgafi. Iarara, kɨ bar ia gevegham. Egh ia Isipɨn ikiamin dughiamɨn, ia arɨghiram. Apaniba izɨ ian taraziv soghtɨ ia arɨghiram, ian tarazi dagheba puvatɨghɨva arɨghiram, gumazir aruaba ko gumazir kɨniba sara. Eghtɨ Kantrin Igharazibar Gumazamiziba bizir kɨ ia gamizir kaba baregh, me atiating, dɨgavir bar kuram damigham. Egh me ia dɨpov, ia gasɨghasɨgh akar kurar asuibar ia mɨkɨmam. Egh me uari akar kurabar uan apanibav mɨkɨmsɨ, me kamaghɨn mɨkɨmam, ‘Ia Judaba ikuvizɨ moghɨn ia ikuvigham.’

Jeremaia 44:13

Ia Isipɨn itir darasi, kɨ Jerusalemɨn amizir arazir kamra, kɨ ia damigham. Apaniba taraziv sueghtɨ me arɨghiregham, eghtɨ tarazi dagheba puvatɨgh arɨghiram, eghtɨ tarazi arɨmariar kuram iniva arɨghiram.