Hosea 7:1 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹ “Kɨ Israelia damutɨ me ua deraghasa ifonge. Ezɨ puvatɨ. Kɨ Efraimian arazir kurabar garima, da azenara otifi. Kɨ Samarian nguibar ekiamɨn gumazamizibar bizir kurar me amibar gari. Me uari uarigh ifara dɨpeniba akara biziba okei. Ezɨ men okoruar kurar maba nguibar ekiamɨn tuavibar gumazamizibar biziba pura da isi.

Hosea 7:1 ပူးပေါင်းရင်းမြစ်များ

Hosea 7:13

“Mevzika! Me bar ikuvigham. Me na ategha gɨfa, egha nan akam batosi. Kamaghɨn amizɨ, kɨ me gasɨghasigham. Kɨ faragha men akurvaghasava amima, me nan moga na gifari.

Hosea 6:4

Ezɨ Ikiavɨra Itir God men akam ikaragha ghaze: “Ia Israelia ko Judaba, kɨ manmaghɨn ia damuam? Ia na gifongezir arazim, a zuamɨra gɨfa. Mati mɨzarazimɨn ghuariam a zuamɨrama asigha ghuavanabogha puvatɨ. Egha uaghan mati ghuariar dɨpam dadabagh irezɨ, aruem anadi da zuamɨra mɨsigha gɨfa.

Luk Osirizir Akar Aghuim 19:42

Egha a kamaghɨn mɨgei, “Jerusalem, kɨ kamaghsua, nɨ amua datɨrɨghɨn navir amɨrizimɨn bizibagh foghai. Kamaghɨn amizɨ, da datɨrɨghɨn nɨn modo.

Hosea 4:2

Me akar kurabar gumazamizibav gei. Me uarigh ifarava, gumazamizibav sozi me ariaghiri, egha igharazibar biziba okɨava, egha poroghamiba uari bakeir arazim gami. Me arazir kurar avɨrim saram ami, egha gumazamizibav suagharɨgha ghuavɨra iti. Ezɨ arazir kam bar ekevegha ghuavɨra iti.

Luk Osirizir Akar Aghuim 13:34

Egha Iesus ua kamaghɨn mɨgei, “Oio, ia Jerusalemɨn adarasi, kɨ ian apangkufi! Ia Godɨn akam inigha izir gumazibav sozi me ariaghiri, egha God ia bagha amadir gumaziba, ia dagɨaba isa me ginivi me ariaghiri. Dughiar avɨribar kɨ ian boriba akuv me mughasa, mati tuarir amebam uan avɨzimingɨn nguziba avarazɨ moghɨn, kɨ ia damuasa ifonge. Ezɨ ia na bagh izan aghua.

Matyu 23:37

Egha Iesus ua kamaghɨn mɨgei, “Oio, ia Jerusalemɨn adarasi, kɨ ian apangkufi! Ia Godɨn akam inigha izir gumazibav sozi me ariaghiri, egha God ia bagha amadir gumaziba, ia dagɨaba isa, me ginivi, me ariaghiri. Dughiar avɨribar kɨ ian boriba akuv me mughasa, mati tuarir amebam uan avɨzimingɨn nguziba avarazɨ moghɨn, kɨ ia damuasa ifonge. Ezɨ ia na bagh izan aghua.

Maika 6:16

Atrivim Omri ko an otarim, Atrivim Ahap, ia aningɨn arazir kurabar gɨn ghuezir gumazamiziba, aning faragha amizir araziba, ia datɨrɨghɨn aningɨn gɨn ghua dagh ami, kamaghɨn amizɨ, kɨ ia gasɨghasightɨ, Kantrin Igharazibar Gumazamiziba, akɨrim ragh ia gasɨ dɨbovir akabar ia mɨkɨmam. Eghtɨ ia nan gumazamizir nguibar ekiar kamɨn itiba bar moghɨram aghumsigham.”

Amos 8:14

Ezɨ gumazamizir maba Samarian asebar ziabar gavgavim uan akabagh anɨga, kamaghɨn mɨgei, ‘E aser Danɨn nguibar ekiamɨn itimɨn ziamɨn, e guizbangɨra mɨgei.’ Egha ‘E aser Berseban nguibar ekiamɨn itimɨn ziamɨn, e guizbangɨra mɨgei.’ Kamaghɨn amizɨ, gumazamizir kaba guizbangɨra osɨmtɨziba ikɨ arɨghiregham, egh ua dɨkavan kogham.”

Hosea 11:12

Ikiavɨra Itir God ua kamaghɨn mɨgei: “Efraimian gumazamiziba bar dughiar avɨribar na gifari. Kɨ Godɨn Bar Zuezim, kɨ zurara uan akar dɨkɨrɨzimɨn gɨn zui. Ezɨ Judaba nan apengan ikia gavgafi.”

Hosea 10:5

Golɨn bulmakaun nedazir Betelɨn itir kam, Samarian nguibar ekiamɨn itir gumazamiziba, me a bagh akongɨva arangam. Guizbangɨra, apaniba an kurkaziba adegham. Kamaghɨn amizɨ, ofa gamir gumaziba ko an gumazamiziba bar, me an apangkuv egh aziam.

Hosea 8:9

Me donkin atiabar mɨn puvɨra akaba batosi, egha uan ifongiabar gɨn zui. Egha uarir akurvaghasa Asiriaba bagha ghua men azangsɨsi. Egha me uarir akurvaghasa kantrin igharazibar atrivibagh iveza me apezeperi.

Hosea 8:5

O Samariaba, kɨ ian golɨn bulmakaun marvir guar kam bar an aghua. Kamaghɨn, kɨ bar ian anɨngaghe. Kɨ kamaghɨn ifonge, me uan arazir kurar kam zuamɨram anetakigh. Ezɨ ti puvatɨgham.

Hosea 5:1

“O ofa gamir gumaziba, ia akar kam baragh. Ia Israelia, deravɨra kuaribar arigh nan akam baragh. Ia atrivimɨn adarasi, ia oragh. Ia kotɨn aven tughtɨ, kɨ deravɨra ian osɨmtɨziba tuisɨgham. Kɨ fo, ia ofa gamir gumaziba azuazimɨn mɨn gumazamizibagh ifarava me gekua, Mispan nguibam ko Taborɨn Mɨghsɨamɨn asebar ziaba fe. Kamaghɨn amizɨ, ia gumazamizir avɨribar nɨghnɨzibar suirazɨ, me okam nɨghnɨsi. Ia mati asɨzir atiabar suizir mozibar mɨn iti. Kamaghɨn amizɨ, kɨ ivezir kuram isɨ bar ia danɨngam.

Hosea 4:17

Efraimia bar uari isa asebagh anigha dar gɨn zui. Markɨ, ia me ateghtɨ me mar uan ifongiabar gɨn mangɨ.

Esekiel 23:4

Avenemebam, an ziam Ohola, a Samarian nguibar ekiamɨn ababanim gami. Ezɨ an afumimɨn ziam Oholiba, a Jerusalemɨn nguibar ekiamɨn ababanim gami. Kɨ uaghara aningɨn iti, ezɨ aning nan boriba bati.

Esekiel 16:46

“Nguibar ekiam Samaria, a notɨn amadaghan iti, a mati nɨn avenemebam. Ezɨ nguibar ekiam Sodom, a fomɨra sautɨn amadaghan ike, a mati nɨn afumim. Ezɨ nguibar dozir an boroghɨn itiba, da mati an guiviba.

Jeremaia 51:9

Eghtɨ Israelia ko Judaba an aven ikɨ kamaghɨn mɨkɨmam, “E kalabuziar gumazamiziba pura Babilon damutɨ, a ua deraghasa, ezɨ a ua deragha otozir puvatɨ.” Egh me gɨn kamaghɨn mɨkɨmam, “Markɨ. E fo, Babilonɨn osɨmtɨzim a bar ekefe, egha overiamɨn pɨn ghuavanabo. Eghtɨ Ikiavɨra Itir God bar pazɨvɨra Babilon damuam. Kamaghɨn, e Babilon ategh uamategh vaghvagh uan nguibabar mangam.

Aisaia 59:12

“O Ikiavɨra Itir God, en arazir kuraba nɨn damazimɨn bar avɨraseme. Egha da e isa kot gatɨ. Ezɨ akaba batozir arazimɨn osɨmtɨzim, en poroghavɨra iti. Ezɨ e uari uan arazir kurar e amibagh fo.

Aisaia 28:1

O Efraimɨn anabamɨn adarasi, iavzika! Ian nguibar ekiar bar aghuim Samaria bar ikuvigham. Ian gumazir aruaba wain apava onganigha, Samarian ziam bar puvɨram a fa kamaghɨn mɨgɨa ghaze, a nguibar ekiar bar gavgavim. A mɨghsɨar bar muziarim gisɨn iti, a nguazir bar aghuir dagheba oparamimɨn tongɨn iti, egha a bar deragha gari, mati ian gumazir aruaba uan dapanibagh arɨzir akɨmaribar mɨn, bar dera. Egh ian nguibar ekiam dughiar ruarimɨn ikeghan kogh, mati akɨmarim mɨsigha ikuvizɨ moghɨn, ikuvigham.

Esekiel 24:13

O Jerusalem, mɨner kamɨn itir mɨneziba, da nɨn arazir mɨzɨrɨzibar ababanim gami. Kɨ zueghasa nɨ gamima, nɨ mɨzeghvɨra iti. Nɨ zueghan kogh ikɨ mangɨ dughiar nan anɨngagharim gɨvaghamimɨn tugham.

Hosea 11:8

“O Efraimia, kɨ ia ateghan kogham, egh ian arɨ mangɨghan kogham. Egh kɨ bar ia kuavaremeghan kogham, mati kɨ Atma ko Seboimɨn nguibar ekiamning bar moghɨra aning kuavareme. Kɨ bar ia gifonge, kamaghɨn amizɨ, kɨ bar ia gasɨghasighan kogham.

Aisaia 59:13

Ikiavɨra Itir God, en God, e arazir kuramɨn nɨ gamigha, akɨrim ragha nɨ gasaragha nɨ barazir puvatɨ. E igharaz darazi dɨkabɨragha, akaba barazir puvatɨzir arazir guar avɨribagh ami. E igharaz darazigh ifarasa tuavir bar avɨribagh nɨghnigha, dar gun mɨgei.

Aisaia 59:14

E arazir kabagh amima, en arazir kam guizɨn nɨn arazim ko arazir aghuim gamima, aning en saghon iti, kamaghɨn amizɨ, nɨ en akuragha, uam e inizir puvatɨ. E arazir zuruzim ko guizɨn mɨgeir arazim ataghizɨ, aning en itir puvatɨ. Egha e uari akuvir dughiabar, arazir kamning uaghan itir puvatɨ.

Hosea 12:1

Bizir Efraimia arueba ko dɨmagaribar amiba, da bar moghɨra ikuvigha meraram asɨghasɨsi. Ifavarir arazim ko mɨdorozir arazim men tongɨn bar ekefe. Me kantri Asiria ko ingarasa akam akɨri. Egha me olivɨn borebar dagɨar ingangarim gamua da isa Isipɨn da amadi, ezɨ Isipia dagh ivesi.

Hosea 12:2

Ikiavɨra Itir God Judaba tuisɨghamin mɨgɨrɨgɨam iti. Egh a Israelia amizir arazir kuram ikarvagh ivezir kuram me danɨngam.

Amos 3:9

Ia mangɨ, gumazir Asdotɨn nguibar ekiamɨn dɨpenir gavgavibar itiba, ko Isipɨn kantrin dɨpenir gavgavibar itiba, men diagh, akar kamɨn gun me mɨkemegh, “Ia bar mangɨ Samarian mɨghsɨabar uari akuvagh ikɨ, egh Samarian gumazamizibar gan, me bar onganigha atiatim uarira uarigh anɨdi. Egh men igharaz darazi dɨkabɨrir arazir kurar me amiba ia dar ganigh.”

Amos 3:10

Ikiavɨra Itir God kamaghɨn mɨgei, “Samarian gumazamiziba okɨmakɨar arazim ko mɨdorozir arazim gamua, pura bizir avɨriba isa ghua uan dɨpenir gavgavibagh arɨzi, da bar izefe. Me guizbangɨn arazir aghuibar amuan fofoziba bar puvatɨ.”