Hosea 4:9 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁹ Kɨ pazɨ gumazamizibar amightɨ, me ikuvigham. Eghtɨ ia ofa gamir gumaziba, men mɨrara ikuvigham. Kɨ ian arazir kurar ia amiziba ikarvagh pazɨ ia damuam.

Hosea 4:9 ပူးပေါင်းရင်းမြစ်များ

Jeremaia 5:31

Kɨ garima, akam inigha izir gumaziba, uari uan akaba akuri, egha gumazamizibagh ifari. Ezɨ ofa gamir gumaziba, gumazamizibagh ativagha akam inigha izir gumazibar akar ifavarir kabar gɨn zui. Ezɨ nan gumazamiziba arazir kam bar a gifonge. Kɨ mɨzazir kuram ia gaseghtɨ ian arazir kurar kam gɨvagham. Eghtɨ dughiar kamɨn men tinara ian akuragham?”

Aisaia 24:2

Gumazamizir dabirabir igharagha garibar itiba, me bar moghɨram osɨmtɨzir vamɨra bativam. Godɨn ofa gamir gumaziba ko, gumazamizir kɨniba, gumazir dapaniba ko, ingarir gumaziba, amizir dapaniba ko, amizir kɨniba, biziba amadir gumaziba ko, bizibagh ivezir gumaziba ko, gumazir munam ko, akam akɨrigh dagɨaba a danightɨ a gɨn uam ada ikarvaghamin arazim gamir gumaziba ko, gumazir munamɨn dagɨaba iniasa a ko akam akɨrir arazim gamir gumaziba, gumazir dagɨaba itiba ko, gumazir biziba puvatɨziba, me bar moghɨra dughiar kuram bativam.

Matyu 15:14

Ia gumazir kabagh nɨghnɨghan markɨ. Me damazir okavɨrɨziba, egha me tuavim isava gumazir igharazimɨn akakasi. Eghtɨ gumazir damazir okavɨrɨzim tuavim isava gumazir okavɨrɨzir mamɨn akakagh, egh aning vɨrara mangɨ mozimɨn magɨrɨgham.”

Sekaraia 1:6

Nan akam inigha izir gumaziba, kar nan ingangarir gumaziba, me nan akaba ko, arazir kɨ ifongeziba isa ian ovavibagh anɨngizɨ, me me baraghan aghuagha osɨmtɨzibar aven zui. Egha gɨn me navibagh iragha fogha ghaze, Ikiavɨra Itir Godɨn Gavgaviba Bar Itim, fomɨra mɨkemezɨ moghɨn, en arazir kurar kaba bangɨn ivezir kuram e ganɨngi.

Hosea 9:9

Ia arazir kuram gamuavɨra iti, mati ian inazir afeziaba fomɨra Gibean nguibar ekiamɨn amizɨ mokɨn. Kamaghɨn amizɨ, God ian arazir kurabagh nɨghnɨgh, ia ikarvagh ivezir kuram ia danɨngam.

Hosea 8:13

Me ofan avɨribagh amua ofa gamir asɨzibar tuziba api. Ezɨ kɨ Ikiavɨra Itir God, kɨ ofan kabagh ifongezir puvatɨ. Kamaghɨn amizɨ, kɨ datɨrɨghɨn men arazir kurabagh inɨrɨgh, ivezir kuram isɨ me danɨngam. Kɨ me amadaghtɨ, me mangɨ ua Isipɨn kantrin otogh kalabuziabar mɨn ikiam.

Hosea 1:4

Ezɨ Ikiavɨra Itir God kamaghɨn a mɨgei, “Nɨ otarim, ziar kam, ‘Jesril,’ a datɨgh. Nɨ fo, Israelian atrivibar inazir afeziam Jehu, a faragha atrivibar nguibam Jesrilɨn ikia, atrivir pumuning mɨsoghezɨ aning areme. Kamaghɨn amizɨ, kɨran oveghangɨn, kɨ an arazir kuram ikarvagh Israelian atrivir datɨrɨghɨn itim ivezir kuram a danɨngam. Egh kɨ Jehun ikɨzimɨn aven gumazitam ateghtɨ, tav uam Israelian atrivimɨn ikian kogham. Kar ziam Jesrilɨn mɨngarim. Gumazamiziba otarir kamɨn ziam baraghɨva Jehu amizir arazir kuram gɨnɨghnɨgham.

Aisaia 3:10

Gumazir Godɨn damazimɨn deraziba, ia me mɨkemegh, Me uan ingangaribar ivezir aghuim iniam, kamaghɨn, me bar akongegh.

Aghuzir Akaba 5:22

Gumazimɨn arazir kuram, ivemɨn mɨrara an suira, egha mati benimɨn mɨn a ikiagharɨki.

Aghuzir Akaba 12:14

Nɨn mɨgɨrɨgɨaba ko araziba da deraghtɨ, bizir kaba nɨn akuraghtɨ nɨ ivezir aghuim iniam.

Hosea 7:2

Kɨ men arazir kuraba gɨn amadaghan kogham. Puvatɨgham. Ezɨ me bizir kam gɨnɨghnɨzir puvatɨ. Men arazir kuram me avara, ezɨ kɨ zurara men arazir kurar kamra gari.”

Hosea 9:15

Egha Ikiavɨra Itir God ua kamaghɨn mɨgei: “Efraimia fomɨra Gilgalɨn ikia egha faraghavɨra arazir kurar kabagh ami. Ezɨ dughiar kamra, kɨ uaghan men anɨngagha men atari. Gumazamiziba arazir kurar avɨrim gamima, men gumazir dapaniba uaghan nan akaba batosi. Kamaghɨn amizɨ, kɨ uan dɨpenimɨn me batuegham. Egh ua me gifueghan kogham.

Hosea 10:10

Kamaghɨra, kɨ gumazamizir arazir kurabagh amir kabav soghasa akam mɨsuegha gɨfa. Egh kɨ pazavɨra me damigham. Me arazir kurar avɨrim gami. Kamaghɨn amizɨ, kɨ kantrin igharazibar amutɨ, me izɨ uari akuvagh me mɨsogham, egh me inigh ingangarir gumazamizir kɨnibar mɨn me ikɨrarɨgh me inigh mangam.

Hosea 12:2

Ikiavɨra Itir God Judaba tuisɨghamin mɨgɨrɨgɨam iti. Egh a Israelia amizir arazir kuram ikarvagh ivezir kuram me danɨngam.

Aghuzir Akaba 11:31

E fo, gumazir aghuiba me nguazir kamɨn ikia uan araziba bagha ivezir aghuim isi. Ezɨ e bar fo, gumazir arazir kurabagh amiba me uan ivezir kuram gitaghan kogham. Ikiavɨra Itir God guizbangɨra me danɨngam.

Esekiel 44:10

Ikiavɨra Itir God na mɨgɨa ghaze, “Israelɨn ikɨzim akɨrim na gasaragha bar nan saghon zuima, Livain anabamɨn adarazi uaghan, nan aghuagha asebar ziaba fa nan saghon ghu. Kamaghɨn amizɨ, kɨ men arazir kuraba ikarvagh pazavɨra me damigham.

Esekiel 44:12

Ezɨ puvatɨ, me ua Israelɨn ikɨzimɨn faragha ghua, asebar ziaba fe, egha me gamizɨ me asaghpora ira arazir kuramɨn aven zui. Kamaghɨn amizɨ, kɨ Ikiavɨra Itir Godɨn Ekiam, kɨ akar dɨkɨrɨzim gamua guizbangɨra kamaghɨn me mɨgei, kɨ men arazir kuraba ikarvagh pazavɨra me damigham.

Hosea 12:3

Men inazir afeziam, Jekop, a uan aveghbuam ko, aning uan amebamɨn navir averiamɨn ikia, uaning mɨsosi. Gɨn Jekop ekevegha gɨvagha God ko mɨsosi.