Hosea 4:16 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁶ Israelian dapaniba bar gavgafi, mati bulmakaun amebar igiar akaba batoziba. Me ghaze, Ikiavɨra Itir God me geghuvam, mati sipsipbagh eghuvir gumazim uan sipsipɨn nguzibagh eghufi. Kɨ garima, me puv akaba batosi, eghtɨ kɨ manmaghɨn me geghuvam? Ti puvatɨgham!

Hosea 4:16 ပူးပေါင်းရင်းမြစ်များ

Sekaraia 7:11

“Ezɨ gumazamiziba akaba baraghan aghuagha uan kuaribav konegha, uan nɨghnɨzibar kumi.

Hosea 11:7

Me zurara akɨrim na gasi, kamaghɨn ivezir kurar kɨ me danɨngamim, me a gitaghan kogham. Me uarir akurvaghsɨ asebar dɨmam. Eghtɨ aser kɨnir kaba men akuraghan kogham.

Jeremaia 14:7

Ezɨ nan gumazamiziba kamaghɨn na ko mɨgɨa dɨa ghaze, “Bar guizbangɨra, e akɨrim ragha nɨ gasaragha gɨvagha, arazir kurar avɨrim gami. Ezɨ en arazir kurar kaba e isa kotiam gatɨ. Ezɨ Ikiavɨra Itir God, nɨ uan ziar ekiam gɨnɨghnɨgh, en apangkufigh.

Jeremaia 8:5

Ezɨ Jerusalemɨn gumazamizir kaba na ategha, ua izir puvatɨ. Me zurara akɨribagh igha na gasi. Me ifavarir arazimɨn gɨn mangasa bar gavgavigha, ua na bagh izan aghua.

Jeremaia 7:24

Ezɨ ian inazir afeziaba nan akam baraghan aghua. Men naviba arazir kurabar amuasavɨra nɨghnɨgha, uan ifongiabar gɨn ghua akɨrim ragha na gasaragha, uamategha bar saghon ghuavɨra iti.

Jeremaia 5:6

Gumazamizir kaba arazir kurar avɨribagh amua, egha dughiar avɨribar Ikiavɨra Itir God, akɨrim ragha a gasara. Bizir kam bagh, men apaniba, laionɨn ruarir ghuribar itiba azenan izɨ me mɨsoghtɨ me arɨmɨghiram. Apanir kaba, afiar atiar danganir kɨnibar itibar mɨn izɨ me gasɨghasɨgham. Apanir kaba, kaziar atiar ekiabar mɨn izɨ, Judan nguibar ekiabar boroghɨn mongegh ikɨ ganam, eghtɨ gumazim o amizitam nguibam ategh azenan izɨtɨ, apaniba kaziar ekiar kabar mɨn uari fɨ me mɨkɨn, men mɨkarziba abɨghɨrarigham.”

Jeremaia 3:11

Ikiavɨra Itir God mɨgɨa ghuavɨra ikia ghua kamaghɨn mɨgei: “Israelia ko Judaba, aning na ataghɨragha ghua arazir kurabagh ami. Egha Judabar arazir kuraba bar Israelian arazir kurabagh afira.

Jeremaia 3:8

Juda garima, Israelia nɨghnɨzir gavgavim nan itir puvatɨgha, gumaziba isa da koma akuir arazim gami. Ezɨ kɨ par ikɨzimɨn anegɨvasa akɨnafarim osirigha a ganɨngi. Ezɨ an buaramizim Juda arazir kamɨn ganigha, atiatir puvatɨgha nɨghnɨzir gavgavir nan itir arazim ataki. A uaghan ghua asebar ziaba fe, mati tuavimɨn amizim arazir gumaziba okɨa me isava akuim gami.

Jeremaia 3:6

Dughiar kamɨn Josaia atrivimɨn itima, Ikiavɨra Itir God, kamaghɨn na mɨgei, “Jeremaia, Israelia me nɨghnɨzir gavgavir nan itir arazim, me anetegha gɨfa. Me tuavimɨn amizim ami moghɨn, me mɨghsɨabar ghua dar ghuanaga dar itir temer ekiabar apebabar asebar ziaba fe. Nɨ bizir kamɨn ganiz, o?

Aisaia 5:17

Nguibar ekiaba bar ikuvightɨ, ogheba aghung bar nguibaba avaragham. Eghtɨ sipsipɨn nguziba ko memeba izɨ danganir kamɨn oghebar amam.

1 Samuel 15:11

“Nɨ oragh, Sol nan akaba batuegha akɨrim na gasara. Ezɨ nan navim kamaghɨn mong oseme, kɨ Sol atrivimɨn ikiasa a ginaba. Bizir kam bangɨn nan navim derazir puvatɨ.” Ezɨ Samuel akar kam baregha navim osemegha atari, egha dɨmagarir kamɨn Samuel Ikiavɨra Itir God ko mɨgɨa an diavɨra itima amɨnim tira.

Ofa Gami 26:33

Kɨ apaniba amadaghtɨ, me ia mɨsogh ia batueghtɨ ia tintinibar kantrin igharazibar mangegham. Eghtɨ ian nguazim uaghan gumazamiziba puvatɨgh pura ikiam, eghtɨ nguibar ekiaba ikuvigh ikiam.

Onger Akaba 78:8

Me uan inazir afeziabar arazibar gɨn mangan markɨ. Men inazir afeziaba orazir puvatɨgha Godɨn akam batoke. Egha nɨghnɨzir gavgavim an itir puvatɨgha, an akaba zurara dar gɨn zuir puvatɨ.

Aisaia 30:23

Eghtɨ Ekiam ia oparizɨ dagher ovɨziba bagh amozim amadaghtɨ, a izighirɨ da ruam, eghtɨ da deravɨra nguazir kamɨn otivam. Eghtɨ ia dagher avɨriba ikiam. Eghtɨ ian bulmakauba uaghan damamin grazir avɨriba ikiam.

Jeremaia 31:18

“Kɨ Efraimɨn adarazir azir akam baregha gɨfa. Me azia kamaghɨn mɨgei: ‘Ikiavɨra Itir God, nɨ e akɨrasa, mɨzazim e ganɨngi, mati gumazim bulmakaun igiar orazir puvatɨgha akaba batozim mɨsosi. Ikiavɨra Itir God, nɨrara en God, kamaghɨn nɨ ua e ateghtɨ, e uamategh nɨ bagh izam.

Hosea 10:11

“Fomɨra Efraim mati bulmakaun amebar igiar mam, a rais dɨkabɨnasa deravɨra sure gami, eghtɨ gumazamiziba raizɨn daghem iniam. Egha a ingangarir kam bar a gifonge. Ingangarim faragha bar an dera, ezɨ datɨrɨghɨn kɨ a damightɨ, an ingangarim bar osemegham. Datɨrɨghɨn kɨ Israel ko Juda damightɨ, aning bulmakaun mɨn, gumazim temem an fɨrim gikeghtɨ, a nguazim abɨzir bizim gekuam. A ingangarir dafam damuva, bizir kam gekutɨ, temem an fɨrim aghoram.

Hosea 11:6

Mɨdorozir ekiam otoghtɨ, apaniba nguibar ekiam avɨnizir dɨvazimɨn tiar akar ekiam akarigh, ivemar nguibar ekiamɨn aven mangɨ me ko mɨsogham. Nan gumazamiziba uan ifongiamɨn gɨn zui, kamaghɨn amizɨ, mɨdorozir kam me agɨvagham.