Hosea 4:13 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹³ Me mɨghsɨabar orazibar ghuavanaga ofabagh ami. Pɨn itir temer kabar apengan dughuazir orangtɨzim iti. Kamaghɨn amizɨ, me temer ekiabar apengan ikia ofan mɨgharir mughuriar aghuim zuibagh ami. Kamaghɨn amizɨ, ian guiviba tuavimɨn amizibar mɨn tintinimɨn gumaziba koma akui. Ezɨ ian otaribar amuiba poroghamiba uari bakeir arazim gami.

Hosea 4:13 ပူးပေါင်းရင်းမြစ်များ

Aisaia 1:29

Ia faragha temer okɨn ekiabar tongɨn, asebar ziaba fava temer kaba bagha bar akonge, egh gɨn ia amizir arazir kurar kaba bagh aghumsɨgham. Ia faragha aseba fasa azenibar ingarigha, dar anogoregha ghaze, da asebar ziaba famin danganiba aghegha pura iti. Egh gɨn ia navibagh iragh, egh arazir ia faragha amizibagh nɨghnɨgh bar aghumsigham.

Esekiel 6:13

Eghtɨ apaniba, Israelian gumazamizibar marvir guabar ofa gamir dakoziba, ko mɨghsɨabar pɨn itir danganir asebar ziaba feba, ko temer ekiabar apebaba, ko me aseba bagha ofan mɨgharir mughuriar aghuim gamir danganibar Israelian tabav soghɨrarightɨ, men kuaba pura tintinibar ireghɨv ikiam. Eghtɨ dughiar kamɨn, Israelia arazir kamɨn gan fogh suam, kɨrara kɨ Ikiavɨra Itir God.

Jeremaia 3:6

Dughiar kamɨn Josaia atrivimɨn itima, Ikiavɨra Itir God, kamaghɨn na mɨgei, “Jeremaia, Israelia me nɨghnɨzir gavgavir nan itir arazim, me anetegha gɨfa. Me tuavimɨn amizim ami moghɨn, me mɨghsɨabar ghua dar ghuanaga dar itir temer ekiabar apebabar asebar ziaba fe. Nɨ bizir kamɨn ganiz, o?

Amos 7:17

Amasia, nɨ akar kam na gasi. Ezɨ datɨrɨghɨn, Ikiavɨra Itir God kamaghɨn akam nɨn iti. “ ‘Nɨn amuim, nguibar ekiar kamɨn aven tuavimɨn amizimɨn mɨn gumaziba isɨ me ko dakuam, eghtɨ apaniba izɨ mɨsogh nɨn boribav sueghtɨ me arɨmɨghiregham. Egh me nɨn nguazim inigh anebɨghɨrarigh gumazir igharazibar anɨngam. Egh apaniba nɨ inigh, gumazamizir God gɨfozir puvatɨzibar kantrin mangɨghtɨ, nɨ kantrin kamɨn aremegham. Eghtɨ apaniba Israelia inigh mangɨ kantrin saghuiamɨn itir igharazir kamɨn, me isɨ kalabuziamɨn mɨn me arɨgham.’ ”

Hosea 11:2

Ezɨ dughiar avɨribar gɨn, nan akam inigha izir gumaziba nan gɨn mangasa Israelian gumazamizir kabar dei. Ezɨ akam inigha izir gumaziba men deima, me dughiabar zurara akɨribagh igha me gasi. Nan gumazamiziba asem Bal bagha ofabagh ami. Me mughuriar aghuim zuir ofaba marvir guaba bagha dagh ami.

Hosea 2:13

A dughiar ruarimɨn na gɨnamada, egha ghua mɨgharir mughuriar aghuim zuir ofaba isa asem Bal bagha ofabagh ami. Egha kurkazir aghuaribagh amua gumazir a ifongezibar gɨn arui. Kamaghɨn amizɨ, kɨ ivezir kuram a danigham. Kɨ Ikiavɨra Itir God, kɨ kamaghɨn mɨgei.”

Esekiel 16:25

Nɨ ghaze, nɨ bar amizir ganganir bar aghuim gamim, egha gumaziba tuavibar izima, nɨ me gekua uan mɨkarzim isa pura gumazir kɨnibagh anɨdi. Egha nɨn arazir tuavimɨn amiziba amir arazir kam, ekɨva ghuavɨra iti.

Esekiel 16:16

Nɨ uan korotiar maba isa asebar ziaba fer danganiba asɨngi. Nɨ danganir kabar tuavimɨn amizimɨn mɨn amua pura uabɨ isava gumazibagh anɨdi. Nɨn arazir kurar kam, a bar ikufi.

Jeremaia 3:13

Kɨ Ikiavɨra Itir God, kɨ ghaze, Israelia, ia bighɨvɨra kamaghɨn mɨkɨm, ‘E osɨmtɨzim gamigha gɨvagha uan Ikiavɨra Itir God, en God, akɨrim ragha a gasaragha gɨfa. Egha uaghan, e nɨn akabar gɨn zuir puvatɨ. E temer ekiabar apebabar ghua arazir kuram gamua asebar ziaba fe.’

Jeremaia 2:20

Ikiavɨra Itir God, a ua kamaghɨn mɨgɨa ghaze: “Israelia, ia oragh. Fomɨra ia uari nan akabar gɨn mangɨ nan apengan ikian aghuagha, ingangarir kɨ ia ganɨngizim ategha ghaze, ‘Ingangarir e damuasa nɨ e ganɨngizim, e a damuan kogham.’ Egha ia mɨghsɨabar ghuanaga ruarir ghuribar temer ekiabar apengan, marvir guabar ziaba fe. Ia mati, tuavimɨn amizimɨn mɨn ghua gumazir avɨriba ko tintinibar akui moghɨn ami.

Aisaia 57:7

Ia mɨghsɨabar ghuavanaga aseba fer danganibar ofa gamua, poroghamiba uari isava akuir arazim gami.

Aisaia 57:5

“Ia asebar ziaba fasa, ian inivafɨzibar ifongiamɨn agorogem dɨkavima, ia ghua temer ekiabar apengan uan godɨn ifavaribar ziaba fer danganibar, poroghamiba uari isava akuir arazim gami. Egha ia uan boribav sozi da ariaghɨrima, ia da isa danganir zarimɨn dagɨar ekiabar tongɨn aseba bagha ofan mɨn da tue.

Jeremaia 44:8

Ia datɨrɨghɨn Isipɨn ikia, egha ia uan dafaribar asebar marvir guabar ingara, ofan mɨgharir mughuriar aghuim zuiba, aser igharagha garibagh anɨdi. Ezɨ ian arazir kam na gamima, kɨ bar puvɨram anɨngaghe. Eghtɨ kamaghɨn ia ikuvigham. Eghtɨ Kantrin Igharazibar Gumazamiziba bar ia dɨpova, akar asuir kurabar ia mɨkɨmam. Egh me uan apaniba akar kurabar me mɨkɨmsɨ, me kamaghɨn mɨkɨmam, ‘Ia Judaba ikuvizɨ moghɨn ia ikuvigham.’

Hosea 10:8

Asebar ziaba fer danganiba, da mɨghsɨabar pɨn iti, ezɨ Israelia kagh men ziaba fa arazir kurabagh ami. Eghtɨ God danganir kabagh asɨghasigham, eghtɨ ogheba ko benir dɨkoniba aghung ofa gamir danganir kaba avegham. Eghtɨ gumazamiziba apanibar mongsɨ, kamaghɨn mɨghsɨabav kɨmam, “Ia e gisɨn irɨva e mongegh.”

2 Atriviba 17:7

Osɨmtɨzir Israelia bativir kaba, dar mɨngarim kamakɨn. Me Ikiavɨra Itir God, men Godɨn damazimɨn arazir kuram gami. Ikiavɨra Itir God fomɨra men inazir afeziaba Isipɨn atrivimɨn dafarimɨn ua me ini. Ezɨ me bizir kam gɨnɨghnɨzir pu. Bar puvatɨ. Israelia asebar ziaba fe,

2 Atriviba 23:7

Ezɨ Josaia mɨgeima, me ghua gumazir poroghamiba uari bakɨa uari koma akuir arazim gamibar danganiba, da Ikiavɨra Itir Godɨn Dɨpenimɨn boroghɨn iti, egha me datɨrɨghɨn bar ada akaragharɨki. Dɨpenir kaba, da nguazir otevir amiziba aser amizim Aseran marvir guam bagha inibar ingari naghɨn iti.