Hosea 4:12 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹² Egha me akar mogomeba azenim darɨghasa, pura ter otevibar ingarizir marvir guabar azangsɨsi. Me ghaze, ter otevir kaba, bizir me foghasa ifongezibar gun me mɨkɨmam. Me na ategha gɨfa, egha asebar gɨn zui, mati amizir mam tintinimɨn gumaziba koma akui.

Hosea 4:12 ပူးပေါင်းရင်းမြစ်များ

Hosea 5:4

Israelia uan God ategha asebar ziaba fema, men arazir kam tuavir amizimɨn arazibar mɨn iti. Arazir kam me gativagha, pamten men nɨghnɨziba ikiagharɨsi, eghtɨ me uamategh uan God bagh izeghan kogham.

Jeremaia 2:27

Ia dagɨaba ko temebar dɨkɨrɨzir marvir guabar ziaba fa ghaze, Da en ingarigha ikɨrɨmɨrim e ganɨngi. Da en afeziabara. Egha ia akɨrim ragha na gasara. Egha osɨmtɨziba isir dughiabar, ia uarir akurvaghasa nan dei.

Godɨn Araziba 31:16

Egha Ikiavɨra Itir God, kamaghɨn Moses mɨgei, “Nɨ oragh! Kɨran oveghangɨn, nɨ mangɨ uan inazir afeziaba ko dakuam. Eghtɨ gɨn gumazamizir kaba, akɨrim ragh na gasaragh tintinibar nguazir me mangamin kamɨn ikɨzir igharazibar asebar gɨn mangegham. Me mati poroghamiba uari ataghɨragha tintinibar akui mokɨn. Kamaghɨn, me Akar Dɨkɨrɨzir Gavgavir kɨ me koma amizir kam, me anebigham.

Dɨboboniba 15:39

Dughiabar zurara ia dueviar ikɨzir kabar ganɨva, Akar Gavgavir kɨ ia ganɨngizibagh nɨghnɨgh dar amu. Egh uan ifongiabar gɨn mangɨva, uan damazibar bizibar ganɨva, navir averiabar da bagh dɨkav arazir kurabar amuan markɨ.

Maika 2:11

Eghtɨ akam akurir gumazitam ti gumazir kurar kaba bagh izɨ, wainɨn dɨpar onganiba ko dɨpar onganir igharazibar akar ifavaribar mɨkɨm suam, “Kɨ guizɨn kamaghɨn mɨgei, ia wain ko dɨpar onganir avɨriba ikiam,” gumazir kurar kaba, ti gumazir akam inigha izir kam bar a gifuegham.

Hosea 9:1

O Israelia, ia God gɨfozir puvatɨzir gumazamizibar mɨn ikia, isar ekiaba ko nan ziam fer dughiabar bar akongezir arazim gami. Ia arazir kam atakigh. Ia akɨrim ragha uan God gasaragha gɨfa, egha an gɨn zuir puvatɨ. Ia danganiba bar, asem Balɨn ziam fe, mati tuavimɨn amizim tintinimɨn gumaziba koma akui. Egha ghaze, Bal ian azenibagh amima, dagher avɨriba otifi, mati tuavimɨn amizimɨn ivezim.

Esekiel 21:21

Eghtɨ Babilonɨn atrivim izɨva tuavir akamningɨn nɨ osirigha asarazir bizimɨn mɨriamɨn mɨtɨgham. Egh a tuavir manamra mangɨsɨ fofoghsɨ, faragh uan barir pibar mɨdorozir akavsiabar amu, uan afuzir mɨzebagh ivivamang dagh inobagh inobagham. Egh a uan afuzitam Raban akagh, egh tam Jerusalemɨn akakagham. Eghtɨ atrivim afuzir vamɨra iniam. A uaghan asebar azangsɨghsɨ, ofa gamizir asɨzir dɨghorimɨn ganɨva anesavsuigham.

Jeremaia 10:8

Gumazir kaba bar fofoziba puvatɨgha bar ongani. Marvir guar me temebar dɨkɨrigha arɨghizir kaba, pura biziba, da fofozir aghuir manatam me danɨngam? Bar puvatɨ.

Onger Akaba 73:27

Bar guizbangɨra, gumazamizir akɨrim ragha nɨ gasaraziba, me bar moghɨra gɨvagham. Gumazir faragha nɨn gɨn ghua datɨrɨghɨn nɨ ataghiziba, nɨ me gasɨghasɨgham.

2 Eghaghaniba 21:13

Nɨ Israelian atrivir arazir kurabagh amibar gɨn ghua, Judaba ko Jerusalemia getuima, me akɨrim ragha God gasara. Nɨ Atrivim Ahap uan adarazi ko Israelia gamizɨ moghɨra nɨ a gami. Egha nɨ uan dozibav soghezɨ, me ariaghire. Me gumazir aghuiba, egha men araziba bar nɨn arazibagh afira.

Ofa Gami 20:5

kamaghɨn kɨ uabɨ an apanim damuva an adarazi sara, ko gumazamizir akɨrim na gasaragha asem Molekɨn ziam feba bar, kɨ men apanim damuam. Kɨ uan gumazamizibar tongɨn me batuegham.

Ofa Gami 17:7

Ia Israelia uam aseba bagh asɨzibar ofabar amuan markɨ. Ia faragha kamaghɨn amua, na tegha asebar gɨn ghue. Eghtɨ ian gɨn otivamin adarazi zurara asɨziba inigh ofa bagh nan Purirpenimɨn izɨ.

Onger Akaba 106:39

Me arazir kam gamua uari uari gami me Godɨn damazimɨn mɨze. Arazir kam Godɨn damazimɨn mati, gumazamiziba uari isa uari ko tintinibar akuir arazim. Me arazir kam gamua egh Godɨn akam deragha an gɨn zuir puvatɨ.

Hosea 14:3

Asiriaba en akuraghan kogham. Eghtɨ mɨdorozir hoziaba en akuraghan kogham. E uan dafaribar marvir guabar ingari, egh gɨn e kamaghɨn ua dav mɨkɨman kogh suam, ‘Kar en aseba.’ E fo, e mati asaghasazir borir e geghuvamin amebaba ko afeziaba puvatɨ, ezɨ nɨrara, zurara en apangkufi.”

Gumazir Dapaniba 18:5

Ezɨ me kamaghɨn Livain gumazir kam mɨgei, “E uari, nɨ e bagh God ko mɨkɨm. Nɨ e bagh Godɨn azangsɨgh, en darorir kam deragham, o puvatɨgham?”

2 Atriviba 17:7

Osɨmtɨzir Israelia bativir kaba, dar mɨngarim kamakɨn. Me Ikiavɨra Itir God, men Godɨn damazimɨn arazir kuram gami. Ikiavɨra Itir God fomɨra men inazir afeziaba Isipɨn atrivimɨn dafarimɨn ua me ini. Ezɨ me bizir kam gɨnɨghnɨzir pu. Bar puvatɨ. Israelia asebar ziaba fe,

Jeremaia 23:13

“Kɨ fomɨra Samarian Godɨn akam inigha izir gumazibar garima, me kamaghɨra arazir kurar kɨ bar aghuazim gami. Me asem Balɨn ziamɨn, akam akuri, egha nan gumazamizibar akua tuavir kuramɨn zui.

Esekiel 20:32

“Ia kamaghɨn nɨghnɨgha ghaze, ia Kantrin Igharazibar Gumazamizibar mɨn ikɨva men mɨn temeba ko dagɨabar ziaba fasa. Eghtɨ kɨ ti ian amamangatɨghtɨ ia kamaghɨn otogham. Bar puvatɨgham.

Hosea 6:10

Kɨ arazir bar kurar mamɨn garima, a Israelɨn otifi. Nan gumazamiziba asebar ziaba fava egha nan damazimɨn bar mɨze. Efraimian arazir kam mati, gumazir ghua tuavir amiziba ko akuim.