Hosea 2:7 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁷ A ifongezir gumazibar gɨn ivegh mangɨ, egh me batoghan kogham. A me burisɨ mangɨva, egh men apighan kogham. Egh a kamaghɨn mɨkɨmam, ‘Kɨ faragha deraghavɨra iti, ezɨ datɨrɨghɨn puvatɨ. Kamaghɨn amizɨ, kɨ ti uamategh uan par faragha ikezim bagh mangam.’

Hosea 2:7 ပူးပေါင်းရင်းမြစ်များ

Jeremaia 2:2

“Nɨ Jerusalemia bagh mangɨ nan akamɨn gun kamagh me mɨkɨm: Ikiavɨra Itir God ghaze, ia bar faraghavɨra nan gumazamizibar otivizir dughiamɨn, ia mati amizim igiamra pamɨn ikia uan pam gifongezɨ moghɨn, ia uari isa na ganigha na gifueghavɨra iti. Egha ia na baghavɨra ikia gumazamiziba puvatɨzir danganimɨn nan gɨn zui, kar nguazir gumazitam dagheba oparizir puvatɨzim.

Hosea 5:13

“Efraimia uarir gara fo, me puv arei. Ezɨ Judaba uari uan duar ekiabar gari. Egha me dɨkavigha kantri Asirian ghua uarir akurvaghasa atrivir ekiam gakaghora an azangsɨsi. Ezɨ Asirian atrivim men arɨmariabagh amima, me ghuamazir puvatɨ. A men duabagh amima, da ua aguir puvatɨ.

Hosea 13:6

Ezɨ gɨn ia nguazir aghuimɨn otogha dagher avɨriba ikia, egha biziba bar iti. Ia bizir kaba inigha gɨvagha egha ifaghata uari fa ghaze, ia uari uan gavgavibar da ini. Egha kamaghɨn ia na gɨnamada.

Esekiel 23:4

Avenemebam, an ziam Ohola, a Samarian nguibar ekiamɨn ababanim gami. Ezɨ an afumimɨn ziam Oholiba, a Jerusalemɨn nguibar ekiamɨn ababanim gami. Kɨ uaghara aningɨn iti, ezɨ aning nan boriba bati.

Jeremaia 14:22

Kantrin igharazitamɨn aser kuratam amozim damightɨ an arigham ti? Puvatɨ. O overiam uabɨ amozim e danigham ti? Bar puvatɨ. Ikiavɨra Itir God, en God, nɨrara nɨ bizir kamagh garibagh ami da otifi. Kamaghɨn amizɨ, e nɨghnɨzir gavgavim nɨn iti.”

Hosea 14:1

O Israelia, ian arazir kuraba ia gamizɨ, ia asaghpora ire. Kamaghɨn amizɨ, ia uamategh Ikiavɨra Itir God, ian God bagh izɨ.

Hosea 5:15

“Kɨ uan gumazamiziba ategh uamategh uan nguibamɨn mangam. Eghtɨ me uarira ikɨ uan arazir kurabar ivezir kuram ini mangɨtɨ, mɨzazir kam gɨvaghamin dughiam otogham. Me uan arazir kurabar ikarvazim bagh ivezir kuram ko mɨzazim iniam, egh gɨn me uamategh na bagh izɨ na buriam. Me pazɨ uari baregh, egh gɨn me ua na baghvɨra izam.”

Daniel 5:21

Ezɨ Godɨn Ikiavɨra Itim gumazamizibar nguibamɨn a batoke, ezɨ an nɨghnɨzim, gumaziba nɨghnɨzi moghɨn nɨghnɨzir puvatɨ, an asɨzibar mɨn nɨghnɨsi. Egha a ghua donkiba ko ikia, bulmakaubar mɨn dadaba apava, puram azenan akui. Ezɨ dɨmagarimɨn ghuariar dɨpaba a giri. Ezɨ a kamaghɨn amua ghua gɨn a kamaghɨn fo, Godɨn Bar Pɨn Itim gumazamiziba bar me gativagha men gari. Egha a uabɨ uan ifongiamɨn gumaziba mɨsevima me atrivibar otifi.

Daniel 4:32

Eghtɨ kɨ nɨ batueghtɨ nɨ ua gumazamiziba ko ikian kogham. Nɨ mangɨ asɨzir atiaba ko ikiam. Egh nɨ 7plan azenibar, bulmakaubar mɨn dadabar amam. Nɨ kamaghɨra ikɨ mangɨ dughiar nɨ fogh suam, Godɨn Bar Pɨn Itim bar gumazamizibagh atifa. A uabɨ uan ifongiamɨn, gumazibagh amima me atrivibar otifi.”

Daniel 4:25

Nɨ gumazamizibar nguibam ategh, mangɨva asɨzir atiaba ko ikiam. Nɨ bulmakaubar mɨn dadabar amɨ, egh puram azenan dakuam. Eghtɨ dɨmagarimɨn ghuariar dɨpaba 7plan azenibar nɨ giram. Nɨ kamaghɨra ikɨ, mangɨ kamaghɨn fogham, Godɨn Bar Pɨn Itim bar gumazamizibagh atifa. Ezɨ a uabɨ uan ifongiamɨn, gumaziba mɨsevima me atrivibar otifi.

Daniel 4:17

Ezɨ bizibar garir enselba bizir kaba otivasa me mɨkeme, eghtɨ angamɨra itir gumazamiziba bar kamaghɨn fogham, Godɨn Bar Pɨn Itim bar gumazamizibagh ativagha men gari. Egha a uabɨ uan ifongiamɨn gɨn ghua, gumazir ziar ekiaba itiba ko gumazir kɨniba, atrivimɨn ikiasa me amɨsevima me otifi.”

Esekiel 23:22

Ezɨ Ikiavɨra Itir God ua kamaghɨn mɨgei, “O Oholiba, kɨ Ikiavɨra Itir Godɨn Ekiam, kɨ fo, nɨ ifongezir gumaziba, nɨ bar men aghuagham. Eghtɨ kɨ me damightɨ me adarim nɨn ikɨ, egh tintinibar ikegh izɨ pazɨ nɨ damu nɨ gasɨghasigham.

Esekiel 20:32

“Ia kamaghɨn nɨghnɨgha ghaze, ia Kantrin Igharazibar Gumazamizibar mɨn ikɨva men mɨn temeba ko dagɨabar ziaba fasa. Eghtɨ kɨ ti ian amamangatɨghtɨ ia kamaghɨn otogham. Bar puvatɨgham.

Esekiel 16:18

Kɨ nɨ ganɨngizir korotiar aghuir me tretɨn dɨgɨrir bar aghuibar isamiziba, nɨ da isa nedazir kabagh aghui. Egha kɨ nɨ ganɨngizir olivɨn boreba ko pauran mughuriar aghuim itiba, nɨ da isa nedazir kaba bagha mughuriar aghuim zuir ofabagh ami.

Esekiel 16:8

“Kɨ ua iza nɨn garima, nɨ gumazimɨn ikiamin dughiam otogha gɨfa. Ezɨ kɨ uan azenan azuir korotiam inigha an onegha nɨn mɨkarzim avara. Egha kɨ nɨn ikiasa nɨ ko Akar Dɨkɨrɨzir Gavgavim gami, ezɨ nɨ konanamra. Kɨ Ikiavɨra Itir Godɨn Ekiam kamaghɨn mɨkemegha gɨfa.

Jeremaia 31:32

Kɨ Ikiavɨra Itir God, kɨ ghaze, Akar Dɨkɨrɨzir Gavgavir Igiam, kɨ fomɨra men ovavir afeziaba ko amizir Akar Dɨkɨrɨzir Gavgavim, an an mɨn mangan kogham. Fomɨra itir dughiam, kɨ uan dafarimɨn men suigha me inigha Isipɨn kantri ategha azenan ize, egha kɨ men pamɨn mɨn itima me nan amuimɨn mɨn iti. Egha me Akar Dɨkɨrɨzir Gavgavir Ghurir kam abɨki.

Jeremaia 31:18

“Kɨ Efraimɨn adarazir azir akam baregha gɨfa. Me azia kamaghɨn mɨgei: ‘Ikiavɨra Itir God, nɨ e akɨrasa, mɨzazim e ganɨngi, mati gumazim bulmakaun igiar orazir puvatɨgha akaba batozim mɨsosi. Ikiavɨra Itir God, nɨrara en God, kamaghɨn nɨ ua e ateghtɨ, e uamategh nɨ bagh izam.

Jeremaia 2:36

Ezɨ ia manmaghɨn amigha tuavir mamɨn gɨn ghua anetegha zuamɨra ghua tuavir igharazimɨn gɨn zui? Isipia tong ian akuraghan kogham, eghtɨ ia bar aghumsigham, mati Asiria ian akurazir puvatɨzɨ ia aghumsɨghizɨ mokɨn.

Jeremaia 2:28

Ezɨ marvir guar ia uari ingariziba, dar dɨbobonim Judan nguazimɨn itir nguibabar dɨbobonim gafira. Kamaghɨn amizɨ, ia osɨmtɨzim itir dughiam, ia men dɨmtɨ, da ian akurvaghamin tuavitam ikɨ, ian akurvagh. Ti puvatɨgham!”

Aisaia 30:16

Egha ia ghaze, “Puvatɨ! E hoziabar apiagh puv arɨ mangam.” Ezɨ God ghaze, “Guizbangɨra, ia arɨ mangɨ!” Ia ghaze, “En hoziaba puvɨra ivemaram.” Ezɨ God ghaze, “Ian apanibar hoziaba bar puvɨra ivemar ian gɨntɨgham.”

Onger Akaba 116:7

Kɨ fo, Ikiavɨra Itir God bar deragha na gami. Kamaghɨn, kɨ datɨrɨghɨn navir amɨrizimɨn ikɨva avughsɨ ikiam.

Jeremaia 3:1

Ikiavɨra Itir God ua Israelia mɨgɨa ghaze: “Gumazim uan amuim batueghtɨ a mangɨ gumazir igharazimɨn ikegh, egh uamategh uan par faragha ikezim bagh izeghtɨ, an par faragha ikezim uam a inian kogham. A kamaghɨn damightɨ, kantrin kamɨn nguazim nan damazimɨn bar mɨzegham. Israelia, ia tintinibar gumazir avɨriba isa me koma akuigha gɨfa. Egha datɨrɨkɨn ia uamategh na bagh izasa, a?

Hosea 2:16

Egha Ikiavɨra Itir God kamaghɨn Israelia mɨgei: “Ia dughiar kamɨn, nan amuimɨn mɨn ikɨ kamaghɨn na dɨpon suam, ‘Nɨ nan pam.’ Egh ia ua kamaghɨn na gɨnɨghnɨghan kogh suam, ‘Nɨ aser kam Bal, nɨ nan Ekiam.’ Puvatɨ.

2 Eghaghaniba 28:23

A kamaghɨn mɨgei, “Siriaba faragha mɨdorozimɨn na abɨra. Sirian atrivibar aseba ti Siriabar akura. Eghtɨ kɨ da bagh ofa damutɨ, da ti uaghan nan akuragham.” Egha Ahas Sirian asebar ofa gami. An arazir kabagh amima, bizir kam bangɨn osɨmtɨzir ekiaba, a ko Israelian gumazamiziba batifi.

Jeremaia 44:17

E bizir e damuasa akam akɨriziba, e dar amuam. E ofan mughuriar aghuim zuiba, aser amizir kam bagh dar amuam, me kamaghɨn a dɨbori Overiamɨn Kwin. Egh e wainɨn ofaba a gingam. Mati e fomɨra, en ovaviba ko atriviba, ko en gumazir dapaniba, e bar moghɨra Overiamɨn Kwin bagha ofan kabagh amizɨ moghɨn dagh ami. E ofan kaba Judan nguibaba ko Jerusalemɨn tuavibar dagh ami. E dagh amir dughiabar, e dagher avɨriba ikia deraghavɨra iti, ezɨ bizir kuratam e batozir puvatɨ.

Esekiel 23:12

A uaghan Asirian gumazir dapaniba ko, ziaba itiba ko, mɨdorozir gumazibar mɨdorozir korotiar aghuiba azuiba ko, gumazir hoziabagh isɨn apiav ikia mɨsoziba, a me baghavɨra ikia bar me gifonge. Gumazir kaba bar, me gumazir igiar bar diriba.

Hosea 1:2

Ikiavɨra Itir God Israelia mɨkɨmasa, Hosean dughiar bar faragha zuimɨn, akam isa a ganɨga kamaghɨn a mɨgei, “Nan gumazamiziba ua na gifongezir puvatɨ, egha asebar ziaba fe, mati tuavimɨn amizir tintinimɨn gumaziba koma akuim. Nɨ kamaghɨn men akakagham, nɨ mangɨ tuavir amizitam inigh an ikɨtɨ, a poroghamiba tintinibar uari bakeir arazim damuvɨra ikiam. Eghtɨ an boriba, tuavimɨn amizim oteghamin boribar mɨn ikiam.”