Hosea 14:3 - Godɨn Eghaghanim: Akar Gavgavir Dɨkɨrɨzir Ghurim ko Igiam

³ Asiriaba en akuraghan kogham. Eghtɨ mɨdorozir hoziaba en akuraghan kogham. E uan dafaribar marvir guabar ingari, egh gɨn e kamaghɨn ua dav mɨkɨman kogh suam, ‘Kar en aseba.’ E fo, e mati asaghasazir borir e geghuvamin amebaba ko afeziaba puvatɨ, ezɨ nɨrara, zurara en apangkufi.”

Hosea 14:3 ပူးပေါင်းရင်းမြစ်များ

Onger Akaba 68:5

God uan Nguibamɨn ikia, borir ameboghfeziaba ariaghireziba deragha men gara, paba ariaghirezir amiziba deragha men gari.

Onger Akaba 10:14

Gumazamizir kurabar arazir kuraba, nɨ dar ganigha gɨfa. Egha mɨzaziba ko, osɨmtɨzir me gumazamizir igharazibagh anɨdiba, nɨ dagh fogha gɨfa. Nɨ osɨmtɨziba aterir gumazamizir kabar akurvaghasa mɨzua iti. Nɨ zurara, borir afeziaba ariaghireziba, ko gumazir gavgaviba puvatɨgha uari isa nɨ ganɨdiba, nɨ men akurvasi.

Hosea 14:8

“O Efraimia, ia ua marvir guabar ziaba fan kogham. Kɨ uabɨra, ian azangsɨziba baragham. Egh deraghvɨra ia geghuvam. Eghtɨ ia nan apengan ikiam, mati gumazim aruemɨn dughiamɨn, temer ekiamɨn dughuazimɨn apengan aperaghav iti. Ia isir bizir aghuiba bar, kɨrara dar mɨngarim.”

Hosea 5:13

“Efraimia uarir gara fo, me puv arei. Ezɨ Judaba uari uan duar ekiabar gari. Egha me dɨkavigha kantri Asirian ghua uarir akurvaghasa atrivir ekiam gakaghora an azangsɨsi. Ezɨ Asirian atrivim men arɨmariabagh amima, me ghuamazir puvatɨ. A men duabagh amima, da ua aguir puvatɨ.

Hosea 2:17

Kɨ ia ateghtɨ, ia amizir kamɨn mɨn uam asem Balɨn ziam dɨponan kogham. Bar puvatɨgham.

Aisaia 31:1

Ia abuir gumaziba, ia kantri Isipɨn ghuava uarir akurvaghasa, men azangsɨsi, iavzika! Ia bar ikuvigham. Ia Isipian hoziaba ko men karisɨn avɨriba ko karisɨn suizir gumazir bar gavgaviba, ia nɨghnɨzir gavgavim dar iti. Ia ti ghaze, Isipia ian akuragham. Egha ia Israelian Godɨn Bar Zuezim, nɨghnɨzir gavgavim an itir puvatɨ. Egha ia uarir akurvaghasa Ikiavɨra Itir Godɨn azangsɨzir puvatɨ. Kamaghɨn amizɨ, ia bar ikuvigham. Iavzika!

Aisaia 30:16

Egha ia ghaze, “Puvatɨ! E hoziabar apiagh puv arɨ mangam.” Ezɨ God ghaze, “Guizbangɨra, ia arɨ mangɨ!” Ia ghaze, “En hoziaba puvɨra ivemaram.” Ezɨ God ghaze, “Ian apanibar hoziaba bar puvɨra ivemar ian gɨntɨgham.”

Onger Akaba 33:17

Mɨdorozir hoziam mɨdorozir gumazimɨn akuraghtɨ, a uan apaniba abɨraghan kogham. Apaniba mɨdorozir gumaziba abɨraghtɨ, men hoziaba men akuraghan kogham.

Jon Osirizir Akar Aghuim 14:18

“Kɨ ia ateghtɨ, ia mati borir ameboghfeziaba puvatɨzibar mɨn uarira ikian kogham. Puvatɨ. Kɨ ua ia bagh izam.

Hosea 12:1

Bizir Efraimia arueba ko dɨmagaribar amiba, da bar moghɨra ikuvigha meraram asɨghasɨsi. Ifavarir arazim ko mɨdorozir arazim men tongɨn bar ekefe. Me kantri Asiria ko ingarasa akam akɨri. Egha me olivɨn borebar dagɨar ingangarim gamua da isa Isipɨn da amadi, ezɨ Isipia dagh ivesi.

Hosea 8:9

Me donkin atiabar mɨn puvɨra akaba batosi, egha uan ifongiabar gɨn zui. Egha uarir akurvaghasa Asiriaba bagha ghua men azangsɨsi. Egha me uarir akurvaghasa kantrin igharazibar atrivibagh iveza me apezeperi.

Hosea 8:6

Israelian ingangarir gumazir mam marvir guar kamɨn ingari. Bizir kam, a God puvatɨ, a pura nedazir kɨnim. Bar guizbangɨra, kɨ bulmakaun kam abɨghɨrarightɨ, a pura mɨnezir kɨnimɨn otogham.

Hosea 7:11

Efraimia, mati kuarazir onganir mam, egha tintinimɨn uari akuri. Faragha me akurvazim bagha Isipɨn azara, egha gɨn me akurvazim bagha uaghan ivemara Asiriaba bagha ghue.

Esekiel 37:23

Me ua aseba ko bizir kɨ aghuazibar ziaba fan kogh, nan damazimɨn mɨzeghan kogham. Egh arazir kurabar amuan kogham. Kɨ men akuragh arazir kurar me amibar me fɨrightɨ, me ua uarigh asɨghasɨghan kogham. Kɨ me damightɨ me nan damazimɨn zuegham. Dughiar kamɨn, me nan gumazamizibar ikɨtɨ, kɨ men Godɨn ikiam.

Esekiel 36:25

Egh dɨpar dɨkɨriam inigh, ian dapanibagh isɨn a kavamang ian arazir kuraba batueghtɨ, ia nan damazimɨn bar zuegham. Egh ian arazir kurar ia marvir guaba fem bagh, ia rueghtɨ ia zuegham.

Aisaia 36:8

“Hesekia, nɨ izɨ nan gumazir ekiam, Asirian atrivim ko akam akɨrigh. Nɨ ti 2,000plan mɨdorozir gumazir gavgavibar apightɨ, nan atrivim 2,000plan hoziaba nɨ danightɨ, me dar apiagh mɨsogham. Kɨ fo, nɨ uabɨ gumazir kamaghɨn garitaba itir puvatɨ.

Aisaia 31:3

Isipia, me aseba puvatɨ, me pura gumazir kɨniba. Men hoziaba uaghan en hoziabar mɨn gari, da aseba puvatɨ. Eghtɨ Ikiavɨra Itir God uan gavgavim akagh ivezir kuram me danɨngamin dughiam, kantrin gavgavir kam irɨghtɨ kantrin an akurazim uaghan irɨgham. Egh aning uaghara bar ikuvigham.

Aisaia 30:2

Me Isipia ko akam akɨrasa nan nɨghnɨzim bagha nan azarazir puvatɨ, eghtɨ Isipian atrivim men akuragh men gantɨ, apaniba me gasɨghasighan kogham.

Aisaia 27:9

Egh Israelia guizbangɨra mɨkɨm suam, Ikiavɨra Itir God men arazir kurabar osɨmtɨziba agɨvam, eghtɨ me uan asebar ofa gamir dakoziba apɨrighɨva, dar dagɨaba amsarɨraghitɨ da nguazir mɨnemniamɨn mɨn otogham. Egh me temer guarir aser amizim Aseran nedazim itiba okɨrarɨgh. Egh paura tuema a mughuriar aghuim zuir dakoziba, bar dagh asɨghasɨkigh. Tuavir kamɨn, Ikiavɨra Itir God men arazir kuraba gɨn amadagham.

Aisaia 2:20

Dughiar kamɨn gumazamiziba marvir guar me gol ko silvan ingarigha dar ziaba feba, me da inigh mangɨ, kuarziba ko aghunababa itir danganibar da makunam.

Aisaia 1:29

Ia faragha temer okɨn ekiabar tongɨn, asebar ziaba fava temer kaba bagha bar akonge, egh gɨn ia amizir arazir kurar kaba bagh aghumsɨgham. Ia faragha aseba fasa azenibar ingarigha, dar anogoregha ghaze, da asebar ziaba famin danganiba aghegha pura iti. Egh gɨn ia navibagh iragh, egh arazir ia faragha amizibagh nɨghnɨgh bar aghumsigham.

Onger Akaba 146:9

Kantrin Igharazibar Gumazamizir en nguazimɨn itiba, Ikiavɨra Itir God deragha men gari. Amizir paba ariaghireziba ko, borir afeziaba ariaghireziba, a me fava men akurvasi. A gumazamizir arazir kurabagh amiba, a men tuaviba apaghapaki.

Onger Akaba 146:3

Ia uarir akurvaghsɨ nguazir kamɨn atriviba ko, gumazir dapaniba, me gɨnɨghnɨghan markɨ. Me pura gumazir kɨniba, me ian akuraghan kogham.

2 Eghaghaniba 16:7

Dughiar kamɨn, Godɨn akam inigha izir gumazim Hanani ghua Atrivim Asan gara, kamaghɨn a mɨgei, “Nɨ ti ghaze, Sirian atrivim nɨn akurvaghamin gavgaviba iti, egha nɨ nɨghnɨzir gavgavim Ikiavɨra Itir Godɨn itir puvatɨgha, uabɨn akurvaghasa an azangsɨghan aghua. Kamaghɨn amizɨ, nɨ uan apaniba ko Sirian Atrivimɨn mɨdorozir gumaziba abɨraghan iburagham.

Godɨn Araziba 17:16

Ikiavɨra Itir God, ghaze, an gumazamiziba ua Isipɨn mangan an aghua. Kamaghɨn, atrivim uan mɨdorozir gumaziba ameghtɨ, me uam hoziar avɨribagh ivesɨ Isipɨn mangan markɨ.

Sekaraia 13:2

Ikiavɨra Itir Godɨn Gavgaviba Bar Itim ua kamaghɨn mɨgei, “Kɨ dughiar kamɨn godɨn ifavarir marvir guaba nguazir kamɨn da batuegham, eghtɨ gumazitam uam a dagh nɨghnɨghan kogham. Egh uaghan akam inigha izir ifavarir gumaziba ko, duar mɨzɨrɨziba, kɨ nguazir kamɨn da batuegham.

Jeremaia 49:11

Ia Idomia, ia uan boriba bagh nɨghnɨghan markɨ. Ian afeziaba arɨghireghtɨ, kɨ uabɨ ian boribar ganam. Eghtɨ ian amuiba uari, uari isɨ nan dafarim darɨgham.”

Hosea 4:12

Egha me akar mogomeba azenim darɨghasa, pura ter otevibar ingarizir marvir guabar azangsɨsi. Me ghaze, ter otevir kaba, bizir me foghasa ifongezibar gun me mɨkɨmam. Me na ategha gɨfa, egha asebar gɨn zui, mati amizir mam tintinimɨn gumaziba koma akui.

Hosea 13:2

Egha datɨrɨghɨn me arazir kuram gamua ghuavɨra iti. Me uari bagha marvir guaba silvan dar ingara egha dar ziaba fe. Gumazir maba uari dagh nɨghnigha, egha uan dafaribar dar ingari. Egh nedazir kaba bagh ofa damuasa gumaziba amɨsefe. Me bulmakaun nedazir kabar tori. Amei! Kar gumazamizir anabar bar kuraba.

Jona 2:10

Ezɨ Ikiavɨra Itir God osirim mɨkemezɨma, a ghua dadarimɨn Jonan miki.