Hosea 13:10 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁰ Ia atrivim ko gumazir dapaniba uari danɨngasa nan azara. Eghtɨ me manmaghɨn ian akurvagham? Me bar ian akuraghan kogham.

Hosea 13:10 ပူးပေါင်းရင်းမြစ်များ

Hosea 8:4

“Nan gumazamiziba gumazir dapaniba amɨsevima, kɨ men amamangarɨzir puvatɨ. Me uan silva ko golba isa uari bagha marvir guabar ingari. Kamaghɨn amizɨ, kɨ gumazamizir kabagh asɨghasigham.

Hosea 10:3

Kɨran oveghangɨn, Israelia kamaghɨn mɨkɨmam, “E Ikiavɨra Itir Godɨn akamɨn gɨn zuir puvatɨ, kamaghɨn amizɨ, Ikiavɨra Itir God en atrivim batoke. Egh e atrivim ikɨtɨ, a manmaghɨn en akurvagham? Ti puvatɨgham.

Jon Osirizir Akar Aghuim 1:49

Ezɨ Nataniel akar kam baregha kamaghɨn a ikaragha ghaze, “Tisa, nɨ Godɨn Otarim! Nɨ Israelian Atrivim!”

Sekaraia 14:9

Eghtɨ Ikiavɨra Itir God nguazir kamɨn kantriba bar dagh ativagh dar Atrivimɨn ikiam. Eghtɨ a bar uabɨra, gumazamiziba bar moghɨra ziar vamɨra a darɨgh, an ziam fam.

Hosea 13:4

Ikiavɨra Itir God ua kamaghɨn mɨgei: “Kɨ Ikiavɨra Itir God, ian God, kɨ Isipɨn ia inigha ian akua azenan ize. Kɨ uabɨra, kɨ ian God. Ua godɨn igharaziba puvatɨ. Kɨrara kɨ ian Akurvazir Gumazimra!

Jeremaia 8:19

Mevzika, nan adarazi nguazir oteviba bar adar ikia egha ara kamaghɨn dei, ‘Ikiavɨra Itir God ua Saionɨn nguibamɨn atrivimɨn itir puvatɨghama, a? Egha a manmaghsua en akurazir puvatɨ?’ ” Ezɨ Ikiavɨra Itir God kamaghɨn akam ikaragha ghaze: “Manmaghsua ia nan gumazamiziba kantrin igharazibar asebar nedazibar ingara egha dar ziaba fe? Ian arazir kam na gamima, kɨ bar ian anɨngaghe.”

Jeremaia 2:28

Ezɨ marvir guar ia uari ingariziba, dar dɨbobonim Judan nguazimɨn itir nguibabar dɨbobonim gafira. Kamaghɨn amizɨ, ia osɨmtɨzim itir dughiam, ia men dɨmtɨ, da ian akurvaghamin tuavitam ikɨ, ian akurvagh. Ti puvatɨgham!”

Aisaia 43:15

Kɨ Ikiavɨra Itir God, Israelian Godɨn Bar Zuezim. Kɨ ian ingarigha ia gamizɨ, ia gumazamizir ikɨzir vamɨran iti, ezɨ kɨ ian atrivimɨn iti.”

Aisaia 33:22

Bar guizbangɨra, Ikiavɨra Itir God uabɨ, jasɨn mɨn ikɨ, egh en atrivimɨn ikɨ, en gumazir deravɨra en ganamim mɨn ikɨ, egh en Akurvazir Gumazimɨn ikiam.

Onger Akaba 149:2

Ia Israelia, God ian ingari, ezɨ ia an bizir kam bagh bar akongegh. Ia Saionɨn nguibamɨn gumazamiziba, ia uan atrivim bagh bar akongegh.

Onger Akaba 89:18

O Ikiavɨra Itir God, nɨ uabɨ e geghuv en ganamin gumazim, oramɨn mɨn e ganɨngi. Nɨ Israelian Godɨn Bar Zuezim, nɨ arazir aghuimrama amuava, atrivim e ganɨngi.

Onger Akaba 74:12

Bar guizbangɨra, O God, nɨ fomɨrama en atrivimɨn ikia, dughiar avɨribar en akurvazi, e mɨdorozibagh amua uan apaniba abɨri.

Onger Akaba 44:4

Nɨ nan atrivim ko nan God. Nɨ Akar Gavgavim anɨngizɨma, Jekopɨn adarazi uan apanibav sogha me abɨri.

Onger Akaba 10:16

Ikiavɨra Itir God atrivimɨn ikɨ mamaghɨra ikiam. Egh a uan nguazimɨn, Kantrin Igharazibar Gumazamizir kuraba batueghtɨ, me bar moghɨra gɨvagham.

2 Atriviba 17:4

Egha azenir mamɨn, Hosia gumazir maba amangizɨ, me Isipɨn Atrivim So bagha ghuegha an azai, eghtɨ a Hosian akuragham. Egha uaghan azenir kamɨn, Hosia azenibar zurara ami moghɨn, a Salmaneser bagha takisɨn mɨn dagɨaba amadir puvatɨ. Kamaghɨn amizɨ, Salmaneser kamaghɨn fo, Hosia a gifaragha uan akar dɨkɨrɨzim abɨki. Kamaghɨn amizɨ, a uan mɨdorozir gumaziba amangizɨ me ghua, Hosian suiragha kalabus gatɨ.

1 Atriviba 12:20

Ezɨ Israelian gumazamiziba kamaghɨn oraki, Jeroboam Isip ategha ize. Egha me uari ko ivɨriamɨn ikiasa a bagh akam amada. A izezɨma, me a gamizɨma a Israelian ikɨziba bar men atrivimɨn iti. Ezɨ Judan anabamɨn adarazira, me Devitɨn ikɨzimɨn otivizir atrivibar apengan iti.

Hosea 3:4

Kamaghɨra, Israelia dughiar ruarimɨn tong pura ikegham. Egh me atriviba ko gumazir dapaniba puvatɨgham. Me aseba bagh ofabar amuan kogham. Egh dagɨar guariba, ko nedazir me dar gara bizir gɨn otivamibagh fofoziba, ko marvir guaba, me bar da ategham.

Hosea 7:7

“Me bret tuamin danganimɨn mɨn puvɨra anɨngaghegha, gumazir dapaniba ko atriviba vaghvagha me mɨsoghezɨ me ariaghire. Men arazir kurar kam men kantrin aven itima, ezɨ gumazitam nan dia na ko mɨgeir puvatɨ.”

1 Samuel 8:7

Ezɨ Ikiavɨra Itir God kamaghɨn a mɨgei, “Bizir gumazamiziba uari bagha nɨghnɨgha nɨn azangsɨzir kaba, nɨ me baragh dar amu. Nɨ kamaghɨn nɨghnɨghan markɨ, me nɨn aghuagha nɨ batosi. Puvatɨ. Kɨ men atrivimɨn ikian me aghuagha na batosi.