Hosea 12:6 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁶ Kamaghɨn amizɨ, ia nɨghnɨzir gavgavim uan Godɨn ikɨva uam a bagh izɨ. Egh ia apangkuvir arazim ko guizɨn arazimɨn gɨn mangɨ. Egh a ian akurvaghsɨ ia a mɨzuam.

Hosea 12:6 ပူးပေါင်းရင်းမြစ်များ

Maika 6:8

Ia nguazir kamɨn itir gumazamiziba, Ikiavɨra Itir God arazir aghuibar ia mɨkemegha gɨfa, eghtɨ ia arazir aghuir a ifongezir kabara dar amu: Ia guizɨn arazibara damuam, egh igharaz darazir apangkuvir arazim gifongegh, egh ia uari abɨn uan Godɨn apengan ikɨ, anarɨra gɨn mangam.

Maika 7:7

Ezɨ kɨ uabɨ, nɨghnɨzir gavgavim Ikiavɨra Itir Godɨn ikɨ a mɨzuamam. Eghtɨ a kɨ a ko mɨgeir azir akaba baregh, izɨ nan akuragh na inightɨ, kɨ deraghvɨra ikiam.

Hosea 14:1

O Israelia, ian arazir kuraba ia gamizɨ, ia asaghpora ire. Kamaghɨn amizɨ, ia uamategh Ikiavɨra Itir God, ian God bagh izɨ.

Sekaraia 7:9

“Bar fomɨra, kɨ Ikiavɨra Itir Godɨn Gavgaviba Bar Itim, akar kam uan gumazamizibagh anɨga ghaze, ia arazir aghuibara damu gumazamizibar araziba akɨr. Egh ia uan adarazir apangkuv men akurvagh.

Jems 2:13

E fo, gumazamiziba igharaz darazir apangkuvan koghtɨ, God kotiamɨn me tuisɨghamin dughiamɨn, God uaghan men apangkuvighan kogham. Ezɨ gumazim o amizim igharaz darazir apangkufi, God kotiamɨn a tuisɨghamin dughiamɨn a Godɨn apangkuvimɨn ganam.

Jems 1:27

Guizbangɨn nɨghnɨzir gavgavir God Afeziamɨn damazimɨn deragha osɨmtɨziba puvatɨzim, a kamakɨn: E borir ameboghfeziaba ovengezibar akurvaghɨva, amizir odiarir men paba ovengeziba sarama akurvagh, men osɨmtɨziba ateram. Ezɨ uaghan bizir mam, e uari uan daroriba deravɨra dar ganam, eghtɨ nguazir kamɨn araziba e damutɨ e Godɨn damazimɨn mɨzeghan kogham.

Aposel 26:20

Egha kɨ faragha Damaskusɨn nguibamɨn akam akuni, egha Jerusalemɨn akam akunigha, Judan nguibaba bar dar akam akurava, uaghan Kantrin Igharazibar Gumazamiziba sara akam me mɨkɨra ghaze, ‘Ia uan navibagh iragh ua God bagh izɨ. Eghtɨ ian arazir ia amiba, ian gun mɨkɨm suam, ia navibagh iragha gɨfa.’

Aposel 2:38

Ezɨ Pita kamaghɨn me mɨgei, “Ia bar navibagh iragh Krais Iesusɨn ziamɨn rueghtɨ, a ian arazir kuraba gɨn amangɨtɨ, God uan Duam ia danɨngam.

Sekaraia 8:16

Egh ia arazir kabar amu: Ia bar moghɨrama guizɨn akabar gumazamizir igharazibav kɨm. Egh ia kotiamɨn deragh guizɨn akam akɨrightɨ, mɨgɨrɨgɨaba bar gɨvagham.

Sekaraia 1:3

Kamaghɨn amizɨ, Ikiavɨra Itir Godɨn Gavgaviba Bar Itim ia mɨkɨmasa na mɨgei: Ikiavɨra Itir Godɨn Gavgaviba Bar Itim ghaze, ia na bagh ua izɨtɨ, kɨ ua ia bagh izam, kar Ikiavɨra Itir Godɨn Gavgaviba Bar Itimɨn mɨgɨrɨgɨaba.

Sefanaia 3:8

Ikiavɨra Itir God kamaghɨn an gɨn zuir gumazamizibav gei, “Kɨ men atara kamaghɨn uan nɨghnɨzim akɨrigha gɨfa, kɨ kantriba bar dar gumazamiziba inigh izɨ me akuvagh, men arazir kuraba ikarvagham. Eghtɨ nan anɨngagharim avimɨn mɨn nguazir kamɨn danganiba bar dagh asɨghasigham. Kamaghɨn amizɨ, ia nɨghnɨzir avɨribar amuan markɨ. Ia Dughiar kɨ kantriba bar dar gumazamiziba isɨ kot darɨghamim bagh pura mɨzuam ikɨ.

Habakuk 2:3

Bizir kam otivamim dughiam, a tɨghar maghɨn izɨ guizɨn otivam. Kamaghɨn amizɨ, bizir kɨ nɨn akaghamin kaba, nɨ da osirightɨ da ikɨ. Bizir kɨ nɨn akakaghamiba, da bar guizbangɨra kɨran oveghangɨn otivigham. Nɨ ti ghaze, da zuamɨra otoghan kogham, puvatɨ, nɨ pura mɨzuam ikɨ, bizir kam bar aghumra izɨva otogham.

Amos 5:24

Kɨ kamaghɨn ifonge, ia guizɨn arazibara damu, eghtɨ arazir aghuiba zurara ikɨ mati faner ekiar mam zurara, emɨra ivemara uaghira datir puvatɨ.

Joel 2:13

Ia pura uan korotiaba abɨghɨva azir arazim damuan markɨ. Ian navir averiaba aven bɨghiregh, ian ararem akagham. Ia fo, Ikiavɨra Itir God gumazamiziba bar me gifongegha bar men kuarkufi. Egha zuamɨrama atarir pu. Puvatɨ. An apangkuvim bar moghɨra men ekefe. Egha a zurara uan nɨghnɨzim gɨghasa ifongeghavɨra ikia, egha gumazamizibar arazir kuraba ikarvazir puvatɨ. Kamaghɨn amizɨ, ia ua Ikiavɨra Itir God, ian God bagh izɨ.

Hosea 10:12

Kɨ kamaghɨn Israelia ko Judabav gei, ‘Ia arazir kurar kam ategh, arazir aghuibar amu, egh guizbangɨra nan ziam fɨ, mati gumazim azenir igiamɨn nguazim abigha dagheba oparima, da deravɨram aghua dagher avɨriba bati. Datɨrɨghɨn ia ua Ikiavɨra Itir God bagh izɨ. Ia ua na bagh izɨtɨ, kɨ bar deravɨra ia damuam.’

Hosea 4:1

Kantrin kamɨn itir gumazamiziba, Ikiavɨra Itir God mati kotɨn aven kamaghɨn mɨgɨrɨgɨam me gasi: “O Israelia, ia Ikiavɨra Itir Godɨn akam baragh! A kamaghɨn ia mɨgei, ‘Kantrin kamɨn gumazamiziba guizɨn arazibar gɨn zuir puvatɨ. Egha gumazamizir igharazibagh ifongezir puvatɨ. Me kamaghɨn nɨghnɨzir puvatɨ, kɨ men God.

Jeremaia 22:15

“O atrivim, nɨ sidan temer ararir avɨriba iti, egha ti ghaze, da nɨ gamima nɨ atrivir aghuimɨn oto, a? Nɨn afeziam, gumazir igharazibar mɨn dagheba ko dɨpaba apava bar akonge. Egha a guizbangɨra arazir aghuibar gumazamizibagh ami. Ezɨ dabirabir aghuim iti.

Aisaia 58:6

“Ia dagheba ataghɨrazir arazir kamaghɨn garim, kɨ an aghua. Ezɨ nan ifongiam kamakɨn, ia arazir kuraba ko gumazamizir igharaziba dɨkabɨra paza me gamir araziba, bar ada atakigh. Gumazamizir kaba, mevzigh mati ia kalabuziabar mɨn beniba ko senbar me ike, Egha mati ia bulmakauba ter ararim men fɨribagh ike, egh me damutɨ me ian ingangarim damuam. Ian arazir kam bar ikufi. Kɨ ghaze, Ia arazir aghuimɨn me damuva men senba aghoregh, me ateghtɨ me mangɨ.”

Aisaia 40:31

Ezɨ gumazamizir nɨghnɨzir gavgavim Ikiavɨra Itir Godɨn ikia, an gavgavim bagha a mɨzua itiba, a gavgavir igiam me danɨngtɨ, me zurara gavgavighvɨra ikiam. Me dɨkavigh deraghvɨra mangam, mati kuarazir bagaba overiamɨn mɨghagha arui. Me ivemar mangɨ, egh avɨghaghan kogham, me daru mangɨ, egh amɨrvaghan kogham.

Aisaia 31:6

Ia Israelia, ia Ikiavɨra Itir God, deragha a barazir puvatɨgha an akaba batosi. Egh ia uan navibagh iragh uamategh a bagh izɨ.

Aisaia 30:18

Guizbangɨra, Ikiavɨra Itir God, a Godɨn guizɨn arazibagh amim. Kamaghɨn amizɨ, a ian apangkuvighasa ifongiar bar ekiam iti. A uan apangkuvim ian akakaghasa ia mɨzua iti. Gumazamizir nɨghnɨzir gavgavim an ikiava, uarir akurvaghasa a mɨzua itiba, me bar akuegham.

Aisaia 8:17

Egh kɨ datɨrɨghɨn, Ikiavɨra Itir God damuasa mɨkemezir biziba, kɨ puram a mɨzuam da bagh gan ikiam. Kɨ fo, an akɨrim ragha Israelian gumazamizibagh asagha gɨfa, egh a ua ragh men ganan kogham. Eghtɨ kɨ nɨghnɨzir gavgavim an ikɨvɨra ikiam.

Aisaia 1:16

Kɨ ian garima, ia amir araziba bar ikufi. Ia mangɨ ruva, uari zuegh uan arazir kurar ian pogheziba bar da adangigh. Egh uam arazir kurabar amuan markɨ.

Aghuzir Akaba 21:3

E arazir aghuiba ko, Godɨn damazim derazir arazibar gɨn mangam. Ezɨ Ikiavɨra Itir Godɨn damazimɨn, arazir kam e ofaba God ganɨdir arazim bar a gafira.

Aghuzir Akaba 1:23

Ia oragh! Kɨ akar gavgavimra ia mɨgei, ia uan arazir kuraba atakigh. Kɨ ian sure damuva egh nɨghnɨzir aghuiba ia danɨngam, eghtɨ ia nan akamɨn gɨn mangɨ.

Onger Akaba 123:2

Ingangarir gumazim, a uan gumazir dapanimɨn gantɨ, an an akurvagham. Ingangarir amizim, a uan amizir dapanimɨn gantɨ, an an akurvagham. Kamaghɨra, e Ikiavɨra Itir Godɨn ganvɨra ikɨ mangɨtɨ, a uan apangkuvim en akakagham.

Onger Akaba 37:7

Nɨ Ikiavɨra Itir Godɨn damazimɨn uabɨn asugh a mɨzuamtɨ, a nɨn akuragham. Gumazamizir taba uan nɨghnɨzibar gɨn mangɨ bizir aghuir avɨriba initɨ, nɨ men gan navim dɨkavan markɨ. Eghtɨ gumazamiziba arazir kurabar amutɨ, nɨ dagh nɨghnɨgh osɨman markɨ.

Onger Akaba 27:14

Nɨ nɨghnɨzir gavgavim Ikiavɨra Itir Godɨn ikɨ a bagh mɨzuam. Nɨn navim osɨman markɨ. Nɨ tugh gavgavigh mamaghɨra ikɨ mangɨtɨ a izɨ nɨn akuragham.

Jenesis 49:18

“O Ikiavɨra Itir God, nɨ nan akurvaghasa kɨ nɨ mɨzuai iti.

Esekiel 18:30

“Kɨ Ikiavɨra Itir Godɨn Ekiam, kɨ kamaghɨn ia mɨgɨa ghaze, O Israelɨn ikɨzimɨn gumazamiziba, kɨ vaghvagh bar ian araziba tuisɨgham. Kamaghɨn amizɨ, ia navibagh iragh, ia amir arazir kuraba ategh, akɨrim ragh dagh asaragh. Eghtɨ ian arazir kuraba ia gasɨghasɨghan kogham.

Joel 2:12

Egha Ikiavɨra Itir God kamaghɨn mɨgei, “Guizbangɨra, bizir kurar kaba bar otivam, eghtɨ ia datɨrɨghɨra uan navibagh iragh ua na bagh izɨ. Egh dagheba ategh uan navir averiaba sara azi ua na bagh izɨ.

Ua Me Ini 3:15

Egha God ua kamaghɨn Moses mɨgei, “Nɨ kamaghɨn Israelian gumazamizibav kɨm, ‘Ikiavɨra Itir God, a ian inazir afeziabar God, an Abraham ko Aisak ko Jekopɨn God, a na amadazɨ, kɨ ia bagha izi.’ Ziar kam, Ikiavɨra Itir God, a zurazurara nan ziam, ezɨ gɨn otivamin boriba ziar kamra na dɨpon.

Amos 4:13

Ia oragh! Godɨn mɨghsɨabar ingarizim, an amɨnibagh amima, da otiva ivai. Egha a uan nɨghnɨziba isa gumazamizibar akakazima, me dagh fo. Anarɨra amɨnirbɨrim damightɨ an angazangarim otoghamin gavgavim iti. A mɨghsɨabagh isɨn arua nguazir kamɨn danganiba bar dagh ativagha dar gari. An ziam, Ikiavɨra Itir God, a Godɨn Gavgaviba Bar Itim.