Hosea 11:6 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁶ Mɨdorozir ekiam otoghtɨ, apaniba nguibar ekiam avɨnizir dɨvazimɨn tiar akar ekiam akarigh, ivemar nguibar ekiamɨn aven mangɨ me ko mɨsogham. Nan gumazamiziba uan ifongiamɨn gɨn zui, kamaghɨn amizɨ, mɨdorozir kam me agɨvagham.

Hosea 11:6 ပူးပေါင်းရင်းမြစ်များ

Hosea 13:16

Samariaba bar nan akaba barazir puvatɨ, kamaghɨn amizɨ, me ivezir kuram iniam. Apaniba izɨ me mɨsoghtɨ me arɨmɨghiram. Egh borir doziba isɨ nguazimɨn me apɨstɨ, me uaghan arɨmɨghiram. Egh amizir navir adasebar naviba abɨgham.”

Hosea 10:14

Kamaghɨn amizɨ, ian apaniba izɨ ia mɨsogham, egh ian nguibar ekiar dɨvazir gavgaviba itibagh asɨghasɨgham. Osɨmtɨzir kam, mati Atrivim Salman fomɨram amizir arazim, a Betarbelɨn nguibar ekiam ko mɨsogha bar a gasɨghasɨki. An adarazi men boriba ko amiziba isa nguazimɨn me apɨzima, me tintinibar ariaghiri.

Hosea 10:6

Eghtɨ Asiriaba golɨn bulmakaun nedazir kam inigh mangɨ, mati me takis gavman ganɨdi moghɨn, me uan atrivir ekiam danɨngam. Israelia fofozir gumazibar akabar gɨn zui, ezɨ fofozir gumazibar akaba dagheba puvatɨ. Kamaghɨn amizɨ, apaniba Israelia abɨraghtɨ, me bar aghumsigham.

Malakai 4:1

Ikiavɨra Itir Godɨn Gavgaviba Bar Itim ghaze, “Ia deragh oragh. Dughiatam izɨtɨ, gumazamizir akaba batogha uan ziaba fava arazir kurabagh amiba, avir ekiam tuzibar isi moghɨn, otogh bar men isitɨ, me bar gevegham. Eghtɨ temer aguatam, o ter bitam ikian kogham.

Maika 5:11

Egh kɨ ian nguibar ekiaba ko dar dɨvazir gavgaviba bar ada akarightɨ, ia uam adar mongɨva avegham.

Esekiel 20:47

Nɨ Negevɨn danganim mɨkɨm suam, nɨ Ikiavɨra Itir Godɨn akam baragh! Kɨ Ikiavɨra Itir Godɨn Ekiam, kɨ kamaghɨn nɨ mɨgei, kɨ avitam atɨghtɨ, a nɨn aven itir temer angamtɨziba ko mɨsɨngiziba bar, a dar isigham. Eghtɨ bizitam avir ekiam amungeghan kogham. A sautɨn amadaghan ikegh mangɨ notɨn amadaghan otogham. Eghtɨ gumazamiziba bar, men mɨkarziba an mɨzariabar fefem bar men isigham.

Jeremaia 5:17

Ia ti ghaze, ian nguibaba dɨvazir gavgaviba dar iti, eghtɨ ia deravɨra dar aven ikiam. Bar puvatɨgham. Apanir kaba izɨ ian nguibar kabagh asɨghasigham. Egh ian azenibar itir dagheba ko dɨpenibar itiba sara, dar amɨ da agɨvagham. Egh ian otariba ko guivibav soghɨrarigh, ian sipsipba, bulmakauba, bar a dav soghɨrarightɨ da arɨghiregham. Egh me ian wainɨn ikarɨziba, ko fighɨn temebagh asɨghasigham.

Aisaia 30:1

Ikiavɨra Itir God kamaghɨn mɨgei, “Judan adarasi, me nan boriba me bar ikuvigham, me bar orazir puvatɨzir darazi. Me nan nɨghnɨzimɨn gɨntɨzir puvatɨ. Me uan nɨghnɨzibar gɨntɨgha ghua kantrin igharazim ko roroam gami. Egha tuavir kamɨn, me arazir kurar bar avɨrim, uan arazir kurar faragha amizibagh siriabagh arɨsi. Mevzika. Kamaghɨn amizɨ, me bar ikuvigham.

Aisaia 27:10

Nguibar ekiar kam fomɨra dɨvazir bar gavgavim iti, egha datɨrɨghɨn a bar ikuvigha iti. A datɨrɨghɨn pura nguibar dadar kɨnim mɨn itima, gumazitaba uam an itir puvatɨ. Egha bulmakaubar nguibamɨn mɨn otozɨ, da iza uari akuva ikia, dadaba ko tevsevibar dafariba apava, kagh avughsa iti.

Aisaia 18:5

Guizbangɨra, kantrin kam bar gavgafi, mati wainɨn ikarɨzim deravɨram otogha, an akɨmariba otivigha irezɨ, wainɨn ovɨziba kɨran oveghangɨn aniam. Gumazim anɨngaghegha wainɨn ovɨzir ghuariba itir aguam atuzɨ a irɨzɨ moghɨn, God kantrin kam gasɨghasɨgham.

Aisaia 9:14

Kamaghɨn amizɨ, Ikiavɨra Itir God, kantri Israel gasɨghasɨki. Guizbangɨra, an aruer vamɨran Israelɨn dapanim ko puem atu. A dughiar vamɨra, a iruer dafarim ko ighurunim gighɨzazɨ aning irɨ.

Onger Akaba 106:43

Dughiar avɨribar God uan gumazamizibar akurvasi, ezɨ me akam batogha uari uan nɨghnɨzibar gɨn zui. Me kamagh amua arazir kuram bar an aven ghugha gɨfa.

Onger Akaba 106:39

Me arazir kam gamua uari uari gami me Godɨn damazimɨn mɨze. Arazir kam Godɨn damazimɨn mati, gumazamiziba uari isa uari ko tintinibar akuir arazim. Me arazir kam gamua egh Godɨn akam deragha an gɨn zuir puvatɨ.

Godɨn Araziba 32:25

Eghtɨ mɨdorozir ekiam me batoghtɨ, apaniba men gumazir igiaba ko, guivir igiaba, borir aghɨriba, ko gumazir ghuriba, me tuavir toribar me mɨsoghɨrarightɨ me bar arɨmɨghiregham. Eghtɨ marasi, uan dɨpenibar aven muegh bizir kam baragh, puvɨra atiatingam.

Godɨn Araziba 28:52

Egh me Ikiavɨra Itir God, ian God, ia ganɨngizir nguazir kaba bar a dagh asɨghasigham. Eghtɨ nguibaba avɨnizir dɨvazir gavgavir ia dar aven mongasava amiba, ia nɨghnɨzir gavgavim dar iti, eghtɨ me dagh asɨghasɨghtɨ da bar iregham.

Ofa Gami 26:33

Kɨ apaniba amadaghtɨ, me ia mɨsogh ia batueghtɨ ia tintinibar kantrin igharazibar mangegham. Eghtɨ ian nguazim uaghan gumazamiziba puvatɨgh pura ikiam, eghtɨ nguibar ekiaba ikuvigh ikiam.

Ofa Gami 26:31

Kɨ ian nguibar ekiaba ko dɨpenir ia asebar ziaba febagh asɨghasɨgh, ian ofabagh ifueghan kogham.

Jeremaia 50:35

Ikiavɨra Itir God kamaghɨn mɨgei: “Babilonɨn kantri ikuvigham. Eghtɨ Babilonɨn gumazamiziba ko gumazir dapaniba ko, fofozir gumaziba sara ikuvigham.

Hosea 4:16

Israelian dapaniba bar gavgafi, mati bulmakaun amebar igiar akaba batoziba. Me ghaze, Ikiavɨra Itir God me geghuvam, mati sipsipbagh eghuvir gumazim uan sipsipɨn nguzibagh eghufi. Kɨ garima, me puv akaba batosi, eghtɨ kɨ manmaghɨn me geghuvam? Ti puvatɨgham!

Hosea 4:17

Efraimia bar uari isa asebagh anigha dar gɨn zui. Markɨ, ia me ateghtɨ me mar uan ifongiabar gɨn mangɨ.

Amos 6:8

Ikiavɨra Itir Godɨn Ekiam, a Godɨn Gavgaviba Bar Itim, a uan ziamɨn Akar Gavgavim akɨra ghaze, Jekopɨn ovavir boriba uari fava amir arazir kam, kɨ bar an aghua. Egha uaghan men nguibar ekiamɨn aven itir dɨpenir gavgaviba, kɨ bar dagh ifongezir puvatɨ. Kamaghɨn amizɨ, kɨ nguibar kam ko bizir bar an aven itiba isɨ apanibar dafaribar arɨgham.

Ofa Gami 26:25

Ia nan Akar Dɨkɨrɨzir Gavgavim abightɨ, kɨ apaniba amadaghtɨ me ia mɨsogham. Eghtɨ ia ti mangɨ nguibar ekiar dɨvazir gavgaviba itibar aven mangɨtɨ, kɨ arɨmariar kurar ekiaba ia bagh da amangɨtɨ, gumazamizir avɨrim arɨmɨghiregham. Eghtɨ ia ikuvamin dughiamɨn, kɨ ia isɨ apanibar dafarim darɨgham.