Hibru 6:18 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁸ Egha datɨrɨghɨn akar pumuning iti, kar Godɨn akar dɨkɨrɨzim, ko Godɨn arazir uan ziam dɨborim, aning otevkɨnighan kogham. God uabɨ ifarir puvatɨ. Kamaghɨn amizɨ, e gumazamizir ara ghua Godɨn boroghɨn mongeziba, e Godɨn akar dɨkɨrɨzim gɨnɨghnɨgh egh e uan naviba gavgavim dar anɨng, egh bizir aghuir e fogha iniamiba mɨzuamvɨra ikiam.

Godɨn Akar Aghuim; Akar Dɨkɨrɨzir Gavgavir Igiam

¹⁸ Egha datɨrɨghɨn akar pumuning iti, kar Godɨn akar dɨkɨrɨzim, koma Godɨn arazir uan ziam dɨborim, aning otevkɨnighan kogham. God uabɨ ifarir puvatɨ. Kamaghɨn e gumazamizir ara ghua Godɨn boroghɨn mongeziba, e Godɨn akar dɨkɨrɨzim gɨnɨghnɨgh egh e uan naviba gavgavim dar anɨng, egh bizir aghuir e fogha iniamiba mɨzuamvɨra ikiam.

Hibru 6:18 ပူးပေါင်းရင်းမြစ်များ

Dɨboboniba 23:19

God a gumazamizibar mɨn ikia ifarir puvatɨ. Egha gumazamizibar mɨn ikia uan nɨghnɨzim gɨghavkɨrir puvatɨ. A bizir manam damuasa akar dɨkɨrɨzim gami, an a damuam. A mɨgeir biziba otivaghiri.

Taitus 1:2

Kɨ me damutɨ, me nɨghnɨzir gavgavim Godɨn ikɨva, egh God me danɨngamin zurara itir ikɨrɨmɨrir aghuarim mɨzuamam. Fomɨra fomɨra nguazir kam otozir puvatɨzir dughiamɨn, an akar dɨkɨrɨzim e ganigha gɨvagha ghaze, a ikɨrɨmɨrir kam e danɨngam. A Godɨn ifarir puvatɨzim.

1 Samuel 15:29

Bar guizbangɨra, Ikiavɨra Itir God, a Israelian God, a nguazir kamɨn gumazim puvatɨ. Kamaghɨn amizɨ, a ifarir puvatɨgha uan nɨghnɨziba otavkɨrir puvatɨ. Bar puvatɨ. Kamaghɨn, e fo, God uan akam uam a giraghan kogham. Bar puvatɨ.”

2 Timoti 2:13

Eghtɨ e an gɨn mangɨsɨ a ko akam akɨrigh, egh gɨn e uan akar kamɨn gɨn mangan koghtɨ, a uan akar an amizimɨn gɨn mangɨvɨra ikiam. A uabɨ uan akam giraghan kogham. Bar puvatɨ.”

Akɨnafarir Pol Romɨn Nguibar Ekiamɨn Itir Sios Bagha Osirizim 3:4

Bar puvatɨ! Gumazamiziba bar moghɨra ifari, ezɨ God uabɨra zurara guizbangɨra mɨgei. Godɨn Akɨnafarimɨn osizirim kamaghɨn mɨgei: “God, nɨ mɨgeima, gumazamiziba fo, nɨ guizbangɨra mɨgei. Egh me nɨn araziba tuisɨghɨva, me fogh suam, nɨ arazir kuratam itir puvatɨ.”

Onger Akaba 46:1

God en danganir mogomemɨn mɨn ikia, e akumakua deragha en gara, gavgavim zurarama e ganɨdi. Dughiar e osɨmtɨzir ekiabar aven itibar, a en akurvaghasa gara iti.

1 Jon 1:10

E suam, “E arazir kurabagh amir puvatɨ,” kamaghɨn e Godɨn mɨkɨm suam, “A ifarir God.” Ezɨ kamaghɨn e an akaba barazir puvatɨ.

Josua 20:3

Eghtɨ ian gumazitam, atamakuigh gumazitam mɨsueghtɨ an aremegham, an arɨ mangɨ nguibar ekiar kabar tamɨn modogh ikiam. Eghtɨ aremezir gumazimɨn tav uam a ikarvaghsɨ a burian kogham.

Aisaia 51:12

Ezɨ Ikiavɨra Itir God kamaghɨn uan gumazamiziba mɨgei, “Kɨ uabɨ, kɨ gavgavim ian navibagh anɨga, ian osɨmtɨzibagh ami da gefi. Kamaghɨn amizɨ, ia tizim bagha gumazamizir igharazibar atiati? Me gavgaviba puvatɨ. Gumazamiziba bar zuamɨra arɨmɨghiregh, mati ogheba zuamɨra mɨsɨngi.

Hibru 3:11

Kɨ men anɨngaghegha bar guizbangɨra akar gavgavim gamua ghaze, ‘Me nan aghuvsazir danganimɨn aven mangɨghan kogham. Bar puvatɨ!’ ”

1 Timoti 1:1

Kɨ Pol, kɨ Krais Iesusɨn aposel. God, en Akurvazir Gumazim, ko Krais Iesus, gumazir e ganasa mɨzuaim, aning na mɨsevezɨma kɨ aposelɨn oto.

Akɨnafarir Pol Romɨn Nguibar Ekiamɨn Itir Sios Bagha Osirizim 3:25

God kamaghɨn ifonge, Krais aremeghɨva, tuavir kamɨn a gumazamizibar amutɨ, men arazir kuraba gɨn amadagham. Bizir kam bagha, God Krais amɨsefe. Eghtɨ tina nɨghnɨzir gavgavim Iesusɨn ikɨtɨ, God suam, nɨ nan damazimɨn dera. Kraisɨn ovevemɨn tuavimɨn, God uabɨ en akagha ghaze, a uabɨ bar dera. Fomɨra God gumazamizibar asughav ikia, zuamɨra men arazir kurabar ivezir kuram da ikarazir puvatɨ.

Sekaraia 9:12

Ia kamaghɨn fo, kɨ ian akuraghasa ifonge. Kamaghɨn amizɨ, ia uamategh uan nguibamɨn izɨ deravɨra ikiam. Ia osɨmtɨzir Bar ekiam ateri, ezɨ kɨ ia mɨgɨa ghaze, kɨ arazir aghuibar ia damuam. Eghtɨ arazir aghuir kam bar osɨmtɨzir kam gafiragham.

Aisaia 64:7

Gumazitam nɨn ziam dɨbora nɨ ko mɨgeir puvatɨgha, akurvazim bagha nɨn boroghɨn zuir puvatɨ. E ghaze, en arazir kuraba bangɨn, nɨ bar uan guam en modogha e ataghizɨ, en arazir kuraba e gasɨghasɨghizɨ, e bar ikuvigha iti.

Aisaia 56:4

Ikiavɨra Itir God kamaghɨn mɨgei, “Gumazir kamaghɨn amiziba, me Sabatɨn arazibar gɨn mangɨ, egh arazir kɨ ifongezibar gɨn mangɨ, egh kɨ uan gumazamiziba ko amizir Akar Dɨkɨrɨzir Gavgavimɨn akabar gɨn mangɨtɨ,

Aghuzir Akaba 4:13

Aghuzir akar aghuim, a nɨn ikɨrɨmɨrimɨn mɨngarim. Kamaghɨn nɨ zurara an suiragh deravɨram a geghuv, egh anetaghɨraghan markɨ.

Onger Akaba 110:4

Ikiavɨra Itir God Akar Gavgavim nɨ koma anekɨrigha gɨfa, egh uan nɨghnɨzim giraghan kogham. A ghaze, “Nɨ ofa gamir gumazimɨn ikɨ mamaghɨra ikiam. Nɨ Melkisedeghɨn mɨn ofa gamir gumazimɨn ikiam.”

1 Atriviba 2:28

Joap, fomɨra Apsalomɨn roroam gamizir puvatɨ, an Adoniyan akurvasi. A datɨrɨghɨn Adoniyan ovevemɨn mɨgɨrɨgɨam baregha, atiatigha ara ghua Ikiavɨra Itir Godɨn Purirpenimɨn aven ghua, uabɨn akurvaghasa ofa gamir dakozimɨn mɨkebabar itir bulmakaun kombar mɨn garir biziba pamtemɨn dar suiragha iti.

1 Jon 5:10

Gumazamiziba uan navir averiamɨn nɨghnɨzir gavgavim Godɨn Otarimɨn ikɨva, egh me bar fogh suam, God mɨkemezir mɨgɨrɨgɨam, a guizbangɨra mɨgɨrɨgɨam. Gumazamiziba nɨghnɨzir gavgavim Godɨn mɨgɨrɨgɨamɨn ikian kogh, egh God uan Otarimɨn gun mɨkemezir akam baraghan aghuaghɨva, me kamaghɨn mati Godɨn mɨgɨa ghaze, God ifari.

1 Timoti 6:12

Gumazir nɨghnɨzir gavgavim Kraisɨn itim, a mati gumazir deragha mɨsozimɨn mɨn, uan nɨghnɨzir gavgavimɨn aven tugha gavgafi. Kamaghɨn amizɨ kɨ nɨ mɨgei, nɨ uan nɨghnɨzir gavgavimɨn aven tugh gavgavighɨva, bar deragh mɨsogh. Fomɨra nɨ uan nɨghnɨzir gavgavir Kraisɨn itimɨn gun gumazamizir avɨribar damazimɨn mɨgeima me nɨ baraki. Dughiar kamɨn God ikɨrɨmɨrir aghuir mamaghɨra itim iniasa nɨn dia. Eghtɨ nɨ deragh mɨsoghɨva, ikɨrɨmɨrir kamɨn suigham.

Akɨnafarir Pol Romɨn Nguibar Ekiamɨn Itir Sios Bagha Osirizim 15:5

Datɨrɨghɨn kɨ ia bagha God ko mɨgɨa ghaze, God uabɨ e gamima, e nɨmɨra ikia osɨmtɨziba atera tugha gavgafi. Egh a ia damutɨ, ia Krais Iesus amizir arazibar gɨn mangɨ, egh tuavir kamɨn ia igharaz darazi ko navir vamɨra ikiam.

Hibru 11:7

Ezɨ Noa uaghan kamaghɨra nɨghnɨzir gavgavim Godɨn iti. Ezɨ God bizir gɨn otivamibar gun a mɨkeme. Kar bizir Noa tɨghar ganamiba. Egha a nɨghnɨzir gavgavim Godɨn akamɨn ikia, egha bizir kam bagha a kurir mamɨn ingari. Egha uan amuiroghboriba ko, me kurimɨn aven ghuezɨ, bizitam me gasɨghasɨzir puvatɨzɨ, me deravɨra iti. Ezɨ Noan nɨghnɨzir gavgavir kam, a nguazimɨn itir gumazamizir igharaziba bar, men arazir kuraba da aghurigha azenim gatɨ. Noa nɨghnɨzir gavgavim Godɨn itima, God bizir kamɨn a mɨgɨa ghaze, a nan damazimɨn bar gumazir aghuim. Ezɨ God bar gumazir nɨghnɨzir gavgavim an itiba, a bar kamaghɨra me gami.

1 Tesalonika 1:10

Ezɨ ia an Otarim mɨzuai, a Godɨn Nguibam ategh uamategham. Otarir kam aremezɨma God a gamizɨ, a ua dɨkafi. A Iesus, an en akurvasi, egh dughiar Godɨn anɨngagharim izamim, an en akuragham.

Kolosi 1:27

Ezɨ Godɨn nɨghnɨzim kamakɨn, a uabɨ Akar Aghuir modozir kam e an gumazamiziba, an en aka, eghtɨ e fogham, akar modozir kam a guizbangɨra bar dera, egh Kantrin Igharazibar Gumazamiziba bar men akuragham. Akar modozir kam kamakɨn, Krais ian navir averiabar aven iti, ezɨ ia fo, a ia inightɨ ia a ko mangɨva Godɨn Nguibamɨn ikɨva, egh ia an bizir aghuiba iniam, ezɨ ia bizir kam bagha mɨzuai.

Kolosi 1:23

Ezɨ dɨpenir guarim dɨpenimɨn suirazɨ moghɨn, ia nɨghnɨzir gavgavimɨn suiragh bar tuivigh gavgavigh ikɨ. Ia Akar Aghuim baregha dughiar kamɨn fo ia bizir aghuiba iniam, egha ia dav zuava nɨghnɨzir gavgavim iti. Egh ia akongɨva nɨghnɨzir gavgavim ataghɨraghan markɨ. Kɨ Pol, kɨ Akar Aghuir kamɨn ingangarir gumazim, egha e gumazamizir nguazimɨn itiba bar me bagha anekuri.

Luk Osirizir Akar Aghuim 2:25

Ezɨ Jerusalemɨn aven gumazir mam, an ziam Simeon, a Godɨn damazimɨn deragha God baghavɨra iti. A Israelɨn gumazamizibar osɨmtɨziba agɨvamin dughiam bagha mɨzuai iti. Ezɨ Godɨn Duam a ko iti.

Matyu 24:35

Overiam ko nguazim gɨvagham, eghtɨ nan mɨgɨrɨgɨaba gɨvaghan kogham.”

Aisaia 27:5

Egh apanir kaba, kɨ men gansɨ, me na bagh izɨ na ko deragh ikɨsɨ, me akar dɨkɨrɨzir tam damigham.”

Jenesis 19:22

Aria, nɨ atamra mangɨ. Kɨ bizitam damuan kogh mangɨ, dughiar ia mangɨ nguibar kamɨn otoghamim.” Ezɨ Lot ghaze, nguibar kam bar sufi, ezɨ me gɨn nguibar kam, Soar a garɨsi.

Hibru 7:21

God uabɨ guizbangɨra mɨkemezɨ, tuavir kamɨn Iesus ofa gamir gumazimɨn oto. God kamaghɨn mɨkeme: “Ekiam bar guizbangɨra mɨkemegha akar dɨkɨrɨzim gamua ghaze, ‘Nɨ ofa gamir gumazimɨn ikɨ mamaghɨra ikiam,’ egh uan nɨghnɨzim giraghan kogham.”

Hibru 3:6

Ezɨ Krais a Godɨn Otarim, a Godɨn gumazamizibagh ativagh men ganam. Egha guizbangɨra Godɨn akamɨn gɨn ghua ingangarir kam deravɨra a gami. Eghtɨ e atiatingan koghɨva, nɨghnɨzir gavgavim ikɨva egh bizir aghuir e iniamiba e dav zuamam, egh kamaghɨn damuva, e uaghan Godɨn Dɨpenimɨn mɨn ikiam.

Kolosi 1:5

E fo, guizɨn akam, an Akar Aghuim, a faragha ia bagha ghuzɨma ia kamaghɨn oraki, bizir aghuir God ia danɨngamiba da An Nguibamɨn iti, egh ia da bagh mɨzuamɨva da iniam. Egha ia nɨghnɨzir gavgavim bizir kamɨn iti. Kamaghɨn, ia guizbangɨra nɨghnɨzir gavgavim Krais Iesusɨn ikiava Godɨn gumazamiziba bar, me gifonge.

Filipai 2:1

Krais ti ian naviba gavgavim dagh anɨdi? A ti bar ia gifuegha ia gamima ia navir amɨrizimɨn iti? Ia ti Godɨn Duam ko poroghav iti? Egha ia ti igharazi darazir apangkuvigha deravɨra me gami? Egh kamaghɨn, ia arazir aghuibar amutɨ, nan agorogem bar izɨvagham. Ia bar nɨghnɨzir vamɨra ikɨ, egh igharaz darazigh ifongezir arazir vamɨran gɨn mangɨ. Ia bar navir vamɨra ikɨva bizir vamɨra bagh nɨghnɨgh.

Matyu 3:7

Egha a garima, Farisiba ko Sadyusibar avɨrim, a gumazamiziba ruer danganimɨn izi. Ezɨ a kamaghɨn me mɨgei, “Ia kuruzir divir anababa, tina ia mɨkemezɨ, ia Godɨn anɨngagharir gɨn izamimɨn arɨ mangasa?

Aghuzir Akaba 3:18

Nɨghnɨzir aghuim, mati temer ikɨrɨmɨrir aghuim anɨdimɨn mɨn iti. Kamaghɨn, gumazir nɨghnɨzir aghuimɨn suiraziba, me ikɨrɨmɨrir aghuimɨn ikia egha bar akonge.

Onger Akaba 62:8

Nan adarasi, ia zurara nɨghnɨzir gavgavim Godɨn ikɨ. Egh osɨmtɨzir ia itiba ko nɨghnɨzir ia itiba, ia bar da isɨ a danɨng. E ia a bagh mangɨ an aven mongegh deraghvɨra ikiam. (Ighiam gamua an suiam atugha avughsegha ua ighiam gami.)

Akɨnafarir Pol Romɨn Nguibar Ekiamɨn Itir Sios Bagha Osirizim 5:5

God uan Duamɨn, an arazir gumazamizibagh ifongezim e gingezɨ, a bar en navibagh izɨfa. Kamaghɨn amizɨ, e Godɨn bizir aghuiba bagha mɨzua, egha bar fo, e pura mɨzuai puvatɨ, da guizbangɨra otivam.

Hibru 6:17

God fomɨra, gumazamiziba uan akar dɨkɨrɨzim me ganɨngizɨ, me fo, me gɨn an akam akɨrizir biziba iniam. Dughiar kam a deraghvɨra kamaghɨn men akaghasa ifongegha ghaze, nɨghnɨzir kam uam an otevkɨnighan kogham. Kamaghɨn amizɨ, a gavgavim uan akar dɨkɨrɨzim ganɨga uan ziam dɨbora ghaze, bar guizbangɨra.