Dɨboboniba 10:9 - Godɨn Eghaghanim: Akar Gavgavir Dɨkɨrɨzir Ghurim ko Igiam

⁹ “Apaniba izɨ ian nguazimɨn ia mɨsoghsɨ damutɨ, ia faragh sɨgham givitɨ, gumaziba zuamɨra dɨkavigh mangɨ apaniba ko mɨsogham. Ia kamaghɨn damutɨ, kɨ Ikiavɨra Itir God, ian God, kɨ ia gɨnɨghnɨgh ian akuragh ian apaniba abɨraghtɨ ia deraghvɨra ikiam.

Dɨboboniba 10:9 ပူးပေါင်းရင်းမြစ်များ

1 Samuel 10:18

Me uari akuvagha gɨvazɨ, a kamaghɨn me mɨgei, “Ikiavɨra Itir God a Israelian God, a ghaze, a Isipɨn ia inigha ian akua kagh ize. A Isipia ko gumazamizir igharazir pazavɨra ia gamibar, dafaribar ua ia ini.

Gumazir Dapaniba 2:18

Dughiar avɨriba, apaniba paza Israelia gamima, me uan osɨmtɨziba ko mɨzazir me isir kaba bagha aziava arai. Kamaghɨn amizɨ, Ikiavɨra Itir God men apangkufi. Dughiaba zurara, Ikiavɨra Itir God Israelian ganasa gumazir dapaniba mɨsefi, egha a gumazir dapaniba vaghavagha me ko ikia men akurvasi. Ezɨ gumazir dapanir kaba vaghvagha Israelian akurvagha apanibar gavgaviba da ua me isi. God zurara gumazir dapanir kamɨn akurvagh an gan mangɨ an aremeghamin dughiamɨn tugham.

Jenesis 8:1

Ezɨ dughiar kamɨn God Noa ko asɨzir a ko kurimɨn itiba gɨn amadazir puvatɨ, a me gɨnɨghnɨghavɨra ikiava amɨnim amadazɨ a dɨpam gisɨn ivaima dɨpam sɨvagha uaghiri.

Onger Akaba 106:42

Men apanir kaba me gativagha men gara me dɨkabɨragha paza me gami, ezɨ me pura uan apanibar gavgavibar apengan iti.

Onger Akaba 106:4

O Ikiavɨra Itir God, nɨ uan gumazamizibar akurvaghsɨ izɨ egh na ginɨrɨgh. Nɨ men akurvagh egh uaghan nan akuragh.

2 Eghaghaniba 13:14

Ezɨ Abiyan mɨdorozir gumaziba ragha Israelian mɨdorzir gumazibar ganigha fo, Israelia mɨdorozim foreghasa me ekɨarugha gɨfa. Ezɨ me zuamɨra uarir akurvaghasa Ikiavɨra Itir Godɨn dei. Ezɨ Godɨn ofa gamir gumaziba sɨghabagh ivi.

Gumazir Dapaniba 10:8

Dughiar kamɨn me mɨdorozimɨn Israelia abɨnigha bar pazavɨra me gami. Egha 18plan azenibar, Filistiaba ko Amonia, bar pazavɨra, Jordanɨn Fanemɨn vongɨn, Gileatɨn Distrighɨn Amorian nguazimɨn itir Israelia gami.

Josua 6:5

Egh nɨ oraghtɨ ofa gamir gumaziba sɨghabagh ivitɨ dar arareba mangɨ ruaraghtɨ, ia bar moghɨra bar pamten tiariba akar dɨmtɨ, nguibar ekiar kamɨn dɨvazim bar akarighiregham, eghtɨ mɨdorozir gumaziba bar moghɨra Jerikon nguibamɨn aven mangɨ.”

Dɨboboniba 31:6

Ezɨ Moses mɨdorozim bagha me amadazɨma, ofa gamir gumazim Eleasarɨn otarim Finias, men dapanimɨn ikiasa me ko zui. A uaghan Godɨn Purirpenimɨn itir bizir bar zuruziba ko sɨghaba inigha zui. Sɨghar kaba, a mɨdorozir gumazibar dɨmtɨ me mɨdorozim bagh mangam, o mɨdorozimɨn gɨn a ua dagh ivitɨ, me uamategh izam.

1 Korin 14:8

Kamaghɨra sɨgham deraghvɨram arangan koghtɨ, tina mɨdorozim damusɨ biziba iniam?

Amos 3:6

Eghtɨ mɨdorozim nguibatamɨn aven otivsɨ, gumazamiziba fofoghsɨ me sɨgham giviam. Ezɨ ia manmaghɨn nɨghnɨsi, gumazamiziba atiatingam, o? Ezɨ kamaghɨra, nguibar ekiatam asɨghasɨzim a batogham. Ezɨ ia manmaghɨn nɨghnɨsi, Ikiavɨra Itir God ti asɨghasɨzir kam amadaz, o?

Jeremaia 6:17

Ezɨ Ikiavɨra Itir God ghaze, “Kɨ ian faragh mangɨ ikiangsɨzim ia danɨngamin gumaziba amɨsevegha gɨfa. Egha kɨ kamaghɨn ia mɨgei, ‘Osɨmtɨzim otivamin dughiamɨn me sɨgham givitɨ, ia deravɨra me baragh.’ ” Ezɨ me ghaze, “Ti puvatɨgham. E gumazir kabar akaba bareghan kogham.”

Jeremaia 4:21

Eghtɨ dughiar manatamra apaniba e ategh ua uan nguibabar mangam. Egh me manadɨzoghɨn sɨgham givia, nir avɨzim ghufer arazim ategham? Kɨ arazir kamra ikia ghua bar amɨra!”

Jeremaia 4:19

Jeremaia kamaghɨn mɨgei: “Kɨ tizim bagha mɨzazir dafar kurar kam isi? Kɨ mɨzazir kurar kam isima, nan navir averiam bar na basemezɨ, nan dɨghorim bar pamten na ginivima, kɨ bar mɨkɨrɨghasava ami. Mɨzazir kam bar na abɨrazɨ nan nɨghnɨzim uaghan bar nan ikufi. Kɨ mɨdorozir gumaziba barazi, me mɨdorozim bagha pamtemɨn sɨghabagh ivi. Kamaghɨn amizɨ, kɨ uan akam dukuagh, nɨmɨra ikian kogham.

Jeremaia 4:5

Ikiavɨra Itir God, Judaba ko Jerusalemia akam me mɨkɨnasa kamaghɨn na mɨkeme. An akam kamakɨn: “Ia kantrin danganiba bar dar mangɨ sɨgham givi. Egh gumazamizibar dɨm me mɨkɨm suam, ‘Ia izɨ bar moghɨra uari akuvagh, egh mangɨ dɨvazir gavgaviba itir nguibabar aven mangɨ uari mongegh.’

Aisaia 58:1

Ikiavɨra Itir God kamaghɨn Aisaia mɨgei, “Nɨ bar pamtemɨn dɨm! Egh aghumra dɨman markɨ! Nɨ tiarir arozim akar, mati sɨgham arang kamaghɨn nan gumazamiziba mɨkɨm, me nan Akar Gavgavibar gɨntɨzir puvatɨ. Nɨ Jekopɨn ovavir boribar arazir kurabar gun me mɨkɨm.

Aisaia 18:3

Ia gumazamizir nguazir kamɨn ruaghatevim bar an itiba, ia bar oragh. Ia gantɨ, me ababanitam mɨghsɨabar a kuazaghtɨ, ia deravɨram an gan. Egh ia oraghtɨ me sɨghatam givitɨ, ia kuariba arigh deragh a baragh.

Onger Akaba 136:23

En apaniba e abɨrima an e gɨnɨghnɨghavɨra iti. A zurara en apangkuvigha mamaghɨra iti.

Gumazir Dapaniba 6:34

Ezɨ Ikiavɨra Itir Godɨn Duam iza Gideon avaragha an itima, a dɨkavigha, Abieserɨn adarazir diaghtɨ me izɨ an gɨn mangasa, a sipsipɨn komɨn ingarizir sɨgham givi.

Gumazir Dapaniba 6:9

Kɨ Isipian agharim da ua ia inigha gɨfa. Egha uaghan nguazir kamɨn gumazir paza ia gamibar agharim da ua ia inigha gɨfa. Ia izir dughiamɨn, kɨ me batoghezɨ me bar ghue. Egha kɨ uaghan men nguaziba isa ia ganɨngi.

Gumazir Dapaniba 3:27

Egha a gɨn azenim girɨgha Seiran nguazimɨn ghua, Efraimɨn anababar mɨghsɨar dozibar otogha sɨgham givi, a men dɨmtɨ me izɨ uari akuvagh mangɨ mɨsogham. Israelia iza uari akuvazɨ, Ehut kamaghɨn me mɨgei, “Ia nan gɨn izɨ. Guizbangɨra, Ikiavɨra Itir God ian apaniba, Moapia isa ian agharim gatɨgha gɨfa. Ia me abɨragham.” Kamaghɨn amizɨ, me mɨghsɨar dozibar itir nguibaba ategha, Ehutɨn gɨn uaghira Moapia bagha Jordanɨn Fanemɨn men arafa, eghtɨ men tav fanem girɨgh vongɨn mangan kogham. Ezɨ me Moapian mɨsozima, men tav arav ghuzir puvatɨ. Bar puvatɨ.

Sefanaia 1:16

Dughiar kamɨn mɨdorozir sɨgham arangtɨ, mɨdorozir gumaziba izɨ, nguibar ekiar dɨvazir gavgaviba itiba ko dɨpenir gavgavir ganganir gumaziba itiba, me dav sogh pamten mɨkɨm, dɨmɨva arangam.

Hosea 5:8

Ia Gibean gumaziba, ko Raman gumaziba, ko Betelɨn gumaziba ko Benjaminɨn anabamɨn gumaziba, ia bar sɨghabagh ivi. Ia pamten dɨmɨva ivemar mangɨ mɨdorozim damu.

Esekiel 7:14

Nan anɨngagharim gumazamizir kaba bar men iti. Kamaghɨn amizɨ, me mɨdorozim damusɨ sɨgham givi biziba akɨrɨva, men gumazitam mɨdorozim bagh mangan kogham.

Jeremaia 6:1

Ia Benjaminɨn anabamɨn adarasi, ia Jerusalem ategh arɨ mangɨ. Puvatɨghtɨ, ia bar ikuvigham. Ia Tekoan nguibamɨn aven sɨghabagh ivi mangɨ, Bet Hakeremɨn nguibamɨn avim atɨghtɨ an mɨgharim mavanangam, eghtɨ gumazamiziba an ganigh fogh arɨ mangam. Bizir kurar ia gasɨghasɨghamim notɨn amadaghan dɨkavigha, bar roghɨra izi.

Ofa Gami 23:24

“Nɨ kamaghɨn Israelian gumazamizibav kemegh. Namba 7ɨn iakɨnim, an aruer faragha zuimɨn ia avughsɨ. Kar ian dughiar ekiar mam, egh ia sɨghabagh ivi uari akuv, egh Ikiavɨra Itir God mɨnabɨva an ziam fɨ.

2 Eghaghaniba 13:12

Ia oragh. God en faragha zuir gumazim, ezɨ an ofa gamir gumaziba e ko kagh ikiava, ia ko mɨsoghasa mɨdorozimɨn sɨghabagh iviasa gara iti. O Israelia, Ikiavɨra Itir God, a ian inazir afeziabar God, ia a ko mɨsoghan markɨ. Ia e dɨkabɨraghan kogham. Bar puvatɨgham.”

Jeremaia 49:2

Kɨ Ikiavɨra Itir God, kɨ mɨkeme: Bar guizbangɨra kɨ dughiar mam amɨsefe, egh dughiar kamɨn kɨ apaniba ameghtɨ me izɨ, Raban nguibam mɨsogham, kar Amonɨn kantrin nguibar ekiam. Me nguibar kam gasɨghasigham, eghtɨ a pura mɨnezir akuvazibar mɨn ikiam. Eghtɨ apaniba nguibar ekiamɨn boroghɨra itir nguibabar apongam. Eghtɨ, Israelia gɨn ua Amonia inizir nguazir kam iniam. Kɨ Ikiavɨra Itir God, kar nan akam.

Godɨn Araziba 20:1

Egha Moses mɨgɨa ghuavɨra ikia ghaze, “Ia uan apaniba ko mɨsogh mangɨ gantɨ men karisba ko hoziaba, ko men mɨdorozir gumaziba, ian dɨbobonim gafiraghtɨ, ia men atiatingan markɨ. Ikiavɨra Itir God, ian Godɨn Isipɨn ia inigha ian akua izezim, a ia ko iti.