Daniel 9:26 - Godɨn Eghaghanim: Akar Gavgavir Dɨkɨrɨzir Ghurim ko Igiam

²⁶ Egh 434plan azeniba gɨvaghtɨ, me gumazir God en akurvaghasa mɨsevezim mɨsueghtɨ an aremegham. Eghtɨ an bizitam ikian kogham. Eghtɨ atrivir gavgavir mamɨn mɨdorozir gumazir bɨzir ekiam izɨva Jerusalem ko Godɨn Dɨpenim gasɨghasɨgham. Eghtɨ dughiar abuananamɨn, mati aperiam faner ekiamɨn otogha, biziba atera zui. Eghtɨ mɨdorozir ekiam ikɨ mangɨtɨ, God mɨkemezɨ moghɨn, dughiar abuananam otogham.

Daniel 9:26 ပူးပေါင်းရင်းမြစ်များ

Nahum 1:8

An aperiar ekiamɨn mɨn, Niniven nguibar ekiam bar a gasɨghasigham. Egha gumazir an akam batoziba, a me mɨsozi me ariaghiri.

Aisaia 53:8

Ezɨ me guizɨn arazim oteghavkɨnigha, puram a isa kalabus gatɨgha, a inigha kotɨn ghu, ezɨ kot a mɨgɨa ghaze, an aremegham. Ezɨ me a mɨsoghezɨ an areme. Egha an adarazir tav kamaghɨn nɨghnɨgha fozir puvatɨ, a men danganim inigha mɨzazir me uari iniamin an a ini, egha en arazir kuraba gɨn amangasa areme.

Mak Osirizir Akar Aghuim 13:2

Ezɨ Iesus kamaghɨn a ikaragha ghaze, “Nɨ dɨpenir dafar kabanangɨn gari? Da bar ikuvigham. Egh dagɨar kaba, gumaziba bar da pueghtɨ da bar moghɨra dagh iregham. Eghtɨ tam tam gisɨn ikeghan kogham.”

1 Pita 2:24

Ezɨ Krais en arazir kuraba isa uan mɨkarzim gatɨgha, egha ter ighuvimɨn areme. A kamaghsua, e arazir kuraba bar ada ateghɨva, angamɨra ikɨva arazir aghuibar amuam, kamaghɨn amizɨ an areme. Me a mɨsoghezɨma an mɨzazir dafar kam ia gamizɨ, ia ua dera.

Luk Osirizir Akar Aghuim 24:26

Ezɨ gua ti fozir puvatɨ? God Ua Gumazamiziba Iniasa Mɨsevezir Gumazim, faragh mɨzaziba inigh egh gɨn Godɨn damazimɨn ziar ekiam iniam.”

Mak Osirizir Akar Aghuim 9:12

Ezɨ Iesus kamaghɨn men azangsɨzim ikara, “Guizbangɨra Elaija faragh izeghɨva bizibar kɨram. Ezɨ tizim bagha fomɨra Godɨn Akɨnafarimɨn osizirim kamaghɨn iti, ‘Gumazamizibar Otarim osɨmtɨzir avɨribar aven mangɨtɨ me akɨrim a gasaragham?’

Matyu 24:2

Ezɨ an akar kamɨn me mɨgei, “Ia Dɨpenimɨn itir bizir aghuir kabar gari? Kɨ guizbangɨra ia mɨgei, dagɨar kaba, gumaziba bar da pueghtɨ da bar moghɨra dagh iregham. Eghtɨ tam tam gisɨn ikeghan kogham.”

1 Pita 3:18

E kamaghɨn fo, Krais uabɨ ia bagha areme. A Godɨn damazimɨn derazir gumazim, egha a Godɨn damazimɨn derazir puvatɨzir gumazamizibar danganim inigha areme. A bar gumazamizibar arazir kuraba batueghɨva me inigh God bagh mangasa, dughiar vamɨra aremegha gɨfa. A uam aremeghan kogham. Egha a nguazir kamɨn gumazir inivafɨzimɨn mɨn itima me a mɨsoghezɨ an areme. Ezɨ Godɨn Duam a gamizɨ a ua dɨkavigha angamɨra iti.

Galesia 3:13

Moses Osirizir Araziba kamaghɨn mɨkeme, e gumazamiziba bar Moses Osirizir Arazibar gɨn mangɨva, egh ikuvigham. Godɨn Akɨnafarim kamaghɨn mɨkeme, “Gumazir ter ighuvimɨn duiba God ghaze, me gumazir kuraba.” Ezɨ kamaghɨn Krais en akurvaghasa ziar kam ini, “gumazir kuram.” Egha ziar kam bangɨn a uam e ini.

2 Korin 5:21

Krais uabɨ arazir kuratam gamizir puvatɨ. Ezɨ God kamaghsua, e Krais ko porogh, an gavgavimɨn e Godɨn damazimɨn gumazamizir aghuibar otivam. Kamaghɨn, God en akurvaghasa en arazir kuraba bar Krais gisɨn da arɨki, ezɨ Krais mati uaghan gumazir arazir kurabagh amir mamɨn mɨn oto.

Daniel 11:10

“Sirian atrivimɨn otariba, mɨdorozir gumazir avɨriba inigh me akuvagh mɨdorozim bagh ikiam. Eghtɨ atrivimɨn otaritam, mɨdorozir gumazir kaba inigh zuamɨra mangɨ aperiamɨn mɨn men nguibaba avaragham. Egh me nguibar dɨvazir gavgavim itim ko mɨsogham, kar nguibar Isipɨn atrivim ativazim.

Daniel 9:27

Eghtɨ atrivir kam gumazamizir avɨrim ko akar dɨkɨrɨzir gavgavim damuam, eghtɨ me an akam baragham. Eghtɨ akar dɨkɨrɨzir gavgavir kam 7plan azenibar ikiam. Egh mangɨ azenir 3pla ko akuamɨn gɨvaghtɨ, an arazir Godɨn ofa gamim agɨvagham. Eghtɨ me bizir kurar God bar aghuazim isɨ Godɨn Dɨpenim gisɨn anetɨgham, kamaghɨn a uan Dɨpenim ategham. Eghtɨ gumazir bizibagh asɨghasɨzim dɨpenir kamɨn ikɨ mangɨ, God a gasɨghasɨghasa inabazir dughiam otogham.”

Aisaia 8:7

Kamaghɨn amizɨ, kɨ Ekiam, kɨ Yufretisɨn Fanem damightɨ, an aperiam bar ekevegh danganiba bar da avaragham. Dɨpam nguibaba bar da avaragh, Yufretisɨn Fanemɨn mɨriamɨn ikegh izɨ kantri Judan otogham, egh dɨpam bar buigh izɨv anang gumazimɨn fɨragharimɨn tugham. Yufretisɨn Fanem, an Asirian kantrin atrivir gavgavim uan mɨdorozir gumaziba ko men nedazim. Ezɨ e fo, God e ko iti! Egha deravɨra e geghuvam, mati kuarazir avɨzir bar ekiamning itim, an aning onegha mɨgha ghua en nguazim bar, deravɨra an gari.”

1 Pita 2:21

Krais mɨzazim inigha ian akura, kamaghɨn amizɨ God Kraisɨn arazir kamɨn gɨn mangasa ian dia. Egha a uan arazir amizir kam en aka, eghtɨ e an gɨn mangam.

Jon Osirizir Akar Aghuim 14:30

“Nguazir kam gativazir gumazir dapanim, a na gativamin gavgaviba puvatɨ. Egha a datɨrɨghɨn izi. Kamaghɨn amizɨ, kɨ ua mɨgɨrɨgɨar avɨriba ia mɨkɨman kogham.

Luk Osirizir Akar Aghuim 24:46

Ezɨ a kamaghɨn me mɨgei, “Afeziar Ekiamɨn Akɨnafarim kamaghɨn mɨkeme, God Ua Gumazamiziba Iniasa Mɨsevezir Gumazim, Krais, an aremegh dughiar pumuning ko mɨkezimɨn ikegh uamategh mozimɨn dɨkavigham.

Luk Osirizir Akar Aghuim 21:24

Eghtɨ mɨdorozir gumaziba mɨsozir sababar tarazigh inivtɨ me arɨghirɨtɨ, me tarazi suighɨva, me amangɨtɨma me nguibar Israelɨn azenan itibar mangam. Eghtɨ Kantrin Igharazibar Gumazamiziba bar pazɨva Jerusalem damu mangɨ dughiar me Jerusalemɨn ganamin dughiam gɨvagham.”

Mak Osirizir Akar Aghuim 13:7

“Eghtɨ ia roghɨra itir mɨdorozir ekiabar nɨgɨniba baragh, egh saghon itir mɨdorozir ekiabar akaba baragham. Egh ia dɨgavir kuram damuan markɨ. Arazir kaba otivam, eghtɨ nguazir kam gɨvamin dughiam tɨghar izam.

Matyu 22:7

“Kamaghɨn amizɨ, atrivim puv atari, egha uan mɨdorozir gumaziba amada. Ezɨ me ghua an ingangarir gumazibav soghezir gumaziba, me mɨsogha bar me agɨvaghava, men nguibar ekiam gaborozɨ a isi.

Matyu 22:2

“God Bizibagh Ativamin Dughiam mati, atrivir mamɨn otarim amuimɨn ikiasava amima, an a bagh isar ekiam gami.

Amos 9:5

Ikiavɨra Itir Godɨn Bar Gavgaviba Itim, a en Ekiam, a uan dafarimɨn nguazimɨn suirazɨ, mɨkɨmkɨzim a gɨnobaghnobasi. Eghtɨ nguazimɨn itir gumazamiziba, men naviba osemeghtɨ me arangam. Eghtɨ nguazir kamɨn danganiba bar akongam. Mati Isipɨn kantrin itir Nailɨn Fanemɨn aperiam otogha buigha ua mɨkɨrɨzɨ moghɨn, nguazir kam bar buigh ghuanabogh izighiram.

Amos 8:8

Kamaghɨn amizɨ, kɨ nguazim damightɨ, mɨkɨmkɨzim a gɨnobaghtɨ, nguazir kamɨn itir gumazamiziba atiatingɨva arangam. Eghtɨ nguazir kamɨn danganiba bar akongam. Mati Isipɨn kantrin itir Nailɨn Fanemɨn, aperiam otogha buigha ua mɨkɨrɨzɨ moghɨn, nguazir kam bar buigh ghuvanabogh ua izighiram.

Hosea 1:9

Ezɨ Ikiavɨra Itir God Hosea mɨgɨa ghaze, “Nɨ ziar kam a datɨgh, ‘Loami.’ Ziar kamɨn mɨngarimra kara, Ia Israelia, ia nan gumazamiziba puvatɨ. Eghtɨ kɨ ian Godɨn ikian kogham.”

Jeremaia 46:7

“Ikɨzir manaba, Isipɨn kantrin itir Nailɨn Fanemɨn mɨn ekefe? Me gavgavigha, mati faner ekiam aperiar gavgavim an otogha zui.

Onger Akaba 22:15

Nan kuarmɨzim mɨner bɨghizir mamɨn mɨn na mɨsɨngi. Ezɨ nan mɨzem iza nan akatorimɨn aven pura itoroghav iti. Nɨ na ataghizɨ, kɨ nguazir mɨnemeniamɨn mɨn irɨghav ikia bar ovengasava ami.

Luk Osirizir Akar Aghuim 21:6

Ezɨ Iesus kamaghɨn me mɨgei, “Ia datɨrɨghɨn garir bizir kabanagh, dughiam izɨtɨma dagɨar kaba, gumaziba bar da pueghtɨ da bar moghɨra dagh iregham. Eghtɨ tam tam gisɨn ikeghan kogham.”

Matyu 23:38

Ia oragh! Ian nguibam, God anetaki, ezɨ a nguibar soriam gava.

Daniel 11:17

“Egh gɨn Sirian atrivim uam uan mɨdorozir gumaziba bar me inigh, Isipɨn kantri ko mɨsoghsɨ mangɨsɨ nɨghnɨgham. Egh kantrining uaning inigh deragh ikiasa, a uan guivim amadaghtɨ a mangɨ Isipɨn atrivimɨn amuimɨn ikiam. A ghaze, tuavir kamɨn a Isipɨn nguibam dɨkabɨragham. Eghtɨ an nɨghnɨzir kam guizɨn otoghan koghtɨ, a bizitam inighan kogham.

Jeremaia 51:42

Apaniba Babilonia avaragham, mati ongarim dɨpɨraghira iza bar gigim avara.

Daniel 11:22

Eghtɨ mɨdorozir gumazir avɨrim a mɨsoghsɨ izɨtɨ, a me dɨkabɨragh bar me a gevegham. Egh uaghan, a Godɨn Ofa Gamir Gumazibar Dapanir Ekiam dɨkabɨragham.

2 Samuel 21:5

Ezɨ me kamaghɨn atrivimɨn akam ikaragha ghaze, “Sol bar e gasɨghasɨgh e agɨvasa nɨghnɨsi, eghtɨ en gumazitam Israelɨn nguazimɨn ikian kogham.

Aisaia 28:2

Bar guizbangɨra, Ekiam ia dɨkabɨnasa ikɨzir bar gavgavir mam amɨsevegha gɨfa. Eghtɨ me amɨnir gavgavimɨn mɨn izɨva, amozim ko aisɨn amozimɨn mɨn bar pamtemɨn ia girɨva, ia amɨsararɨgh, ia fɨ nguazim mɨkɨnigham.

Aisaia 28:22

Kamaghɨn amizɨ, ia Godɨn akaba batogha da dɨpovir arazir kam atakigh. Puvatɨghtɨ, ian kalabuziamɨn aven itir arazir kam, a bar ekevegh mamaghɨra ikiam. Kɨ kamaghɨn oraki, Ikiavɨra Itir Godɨn Gavgaviba Bar Itim, nan Ekiam, mɨkɨmtɨ ian kantrin kam bar moghɨra ikuvigham.

Daniel 11:36

“Eghtɨ Sirian atrivir kam uan ifongiamɨn bizibar amuam. Egh a uabɨ uan ziam fɨva kamaghɨn mɨkɨm suam, kɨ aseba bar dagh afira. Egh an akar dɨbovibav kɨmɨva, Godɨn Bar Pɨn Itimɨn ziam dɨkabɨnam. A kamaghɨra damu mangɨvɨra ikɨ mangɨtɨ Godɨn anɨngagharimɨn dughiam otogham. Guizbangɨra, God uan nɨghnɨzimɨn gɨn mangɨ, biziba bar dar amuam.