Daniel 8:12 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹² Gumazamiziba arazir kurabagh ami, kamaghɨn komɨn kam gavgavim inigha Godɨn Nguibamɨn mɨdorozir gumaziba me dɨkabɨnasa, egh dughiabar zurara ofa gamir arazim agɨvasa. Ezɨ Godɨn akaba bar guizbangɨra, ezɨ komɨn kam Godɨn guizɨn akam gasɨghasɨki. Ezɨ gumazamiziba uam an gɨn zuir puvatɨ. Ezɨ biziba bar komɨn kam dar amuasa, a pura dagh ami.

Daniel 8:12 ပူးပေါင်းရင်းမြစ်များ

Jeremaia 12:1

O Ikiavɨra Itir God, nɨ kotiaba tuisɨzir arazim a bar dera, ezɨ kɨ zurara uan osɨmtɨzim akɨrsɨ akamadarim nɨ ko a damuan kogham. Ezɨ arazir kɨ fozir puvatɨzir maba iti, ezɨ guizɨn nɨn arazir kotiaba tuisɨzim, kɨ a bagh nɨn azangsɨghasa. Manmaghɨram amizɨ gumazamizir arazir kurabagh amiba me zurara deragha iti? Ezɨ manmagh amizɨ, ifavaribagh amir gumaziba deraghavɨra ikia ghuavɨra iti?

Aisaia 59:14

E arazir kabagh amima, en arazir kam guizɨn nɨn arazim ko arazir aghuim gamima, aning en saghon iti, kamaghɨn amizɨ, nɨ en akuragha, uam e inizir puvatɨ. E arazir zuruzim ko guizɨn mɨgeir arazim ataghizɨ, aning en itir puvatɨ. Egha e uari akuvir dughiabar, arazir kamning uaghan itir puvatɨ.

Akar Mogomem 13:7

Ezɨ God an amamangatɨzɨma, a Godɨn gumazamiziba ko mɨdorozim gamua, egha me abɨra. God gavgavir ekiam a ganɨngi, ezɨ an anababa bar dar gumazamiziba, ko mɨkarzir igharagha gariba bar, ko vaghvagha nguibabar akabav geir gumazamiziba, ko kantriba bar dar gumazamiziba, a me gativaghamin gavgavim iti.

Daniel 11:28

Egh Sirian atrivim, bizir a mɨdorozimɨn iniziba, bar da inigh izam, egh a ua uan nguibamɨn mangam. Egh gumazamiziba Godɨn ziam fer arazim gasɨghasɨghsɨ nɨghnɨzir tam damuam. Ezɨ bizir a damuasa ifongeziba, a pura dar amuam. Egh gɨn a uamategh uan nguibamɨn mangam.

Daniel 8:4

Ezɨ kɨ sipsipɨn apurir kamɨn garima, ana aviragha ivegha ghua aruem uaghiri naghɨn, ko not ko sautɨn ghu. Eghtɨ asɨzitam an tɨvaghan kogham. Eghtɨ tav an gavgavimɨn arɨmangɨghan kogham. A biziba uan ifongiamɨn dagh amua egha bar gavgavigha uan ziam fe.

Onger Akaba 119:142

Nɨn arazir aghuim a zurara ikiavɨra iti, ezɨ nɨn Araziba da bar guizbangɨra.

Onger Akaba 119:43

Bizir nɨ damuasa na mɨkemeziba, kɨ nɨghnɨzir gavgavim dar iti. Kamaghɨn, nɨ gavgavim na danightɨ, kɨ nɨn guizɨn akam dughiabar anekunvɨra ikiam.

Jopɨn Akɨnafarim 12:6

Ezɨ okɨmakɨar gumazamiziba ko Godɨn akaba batozir gumazamiziba, men ikɨrɨmɨrim a dera. Me uan fofozim ko gavgavimɨn garima, bizir kamning me bagha ikɨrɨmɨrir aghuim gamima, an otifi, ezɨ bizir kam mati men asemɨn mɨn oto.

1 Samuel 23:9

Ezɨ Devit kamaghɨn oraki, Sol a gasɨghasɨghasa izi. Ezɨ a kamaghɨn ofa gamir gumazim Abiatar mɨgei, “Nɨ ofa gamir gumazibar korotiar otevir azenan azuir kam, a inigh izɨ.”

Onger Akaba 28:5

Ikiavɨra Itir God me bagha amizir ingangarir ekiaba me dagh nɨghnɨzir puvatɨgha ghaze, a uan dafarimningɨn bizir ekiatam gamizir puvatɨ. Kamaghɨn, a me gasɨghasɨgh bar me kuavaremegham.

Daniel 7:21

Ezɨ irebar kam kɨ an garima, komɨn kam Godɨn gumazamiziba ko mɨsogha ikia, me dɨkabɨra ghuavti Fomɨra Fomɨra Itir Gumazim oto. Egha a komɨn kam isa kotiam gatɨgha kamaghɨn mɨgei, Godɨn Bar Pɨn Itimɨn gumazamiziba, me kotiamɨn aven komɨn kam gafira. Ezɨ dughiam otozɨma Godɨn gumazamiziba, me biziba bar dagh ativamin gavgavim ini.