Daniel 7:14 - Godɨn Eghaghanim: Akar Gavgavir Dɨkɨrɨzir Ghurim ko Igiam

¹⁴ Ezɨ Fomɨra Fomɨra Itir Gumazir Kam uabɨ a gamizɨ an atrivimɨn otozɨ, a gavgavim ko ziar ekiam a ganɨngi. Eghtɨ ana atrivimɨn ikɨtɨ, an gavgavim mamaghɨra ikiam. Eghtɨ an atrivir ingangarim gɨvaghan kogham. Eghtɨ nguibaba bar dar gumazamiziba, ko kantriba bar dar gumazamiziba ko nguibabar akaba bar, me bar an apengan ikɨ a bagh ingaram.

Daniel 7:14 ပူးပေါင်းရင်းမြစ်များ

Akar Mogomem 11:15

Ezɨ enselɨn namba 7 uan sɨgham givima, Godɨn Nguibamɨn itir darazi tiariba akara ghaze: “En Ekiam ko an Gumazir a Gumazamiziba Ua Me Iniasa Mɨsevezim, aning datɨrɨghɨn nguazir kam gativagha an gari. Egh aning atrivimɨn ikɨ mamaghɨra ikiam.”

Daniel 7:27

Egh Godɨn Bar Pɨn Itim, a nguazimɨn atriviba bar dar gavgaviba isɨ uan gumazamizibar anɨngam. Eghtɨ me atrivibar ikɨ mamaghɨra ikiam. Eghtɨ kantriba bar Godɨn gumazamizibar apengan ikɨva, egh ingarɨva men akaba baragham.”

Jon Osirizir Akar Aghuim 3:35

“Afeziam uan Otarim bar a gifongegha biziba bar an agharim gatɨzɨ a bar dagh atifa.

Daniel 2:44

“Ezɨ dughiar atrivir kaba ikiavɨra itimɨn, Godɨn Uan Nguibamɨn Itim, a Dughiar a Gumazamizibagh Ativaghamin Tam a damightɨ, an otivam. Eghtɨ a ikɨ mamaghɨra ikiam. Eghtɨ atrivir maba da God Gumazamizibagh Ativaghamin Dughiar Kam dɨkabɨraghan kogham. Eghtɨ God Gumazamizibagh Ativaghamin Dughiam, an atrivir igharazibagh asɨghasigham. Eghtɨ an atrivir dughiar kam a ikɨ mamaghɨra ikɨvɨra ikiam.

Hibru 12:28

Bizibagh Ativamin Danganir e inizir kam, an akongan kogham. Kamaghɨn amizɨ, e danganir kam bagh a mɨnabagham. E fo, en God mati avir puvɨra bizibagh asɨghasɨzim. Kamaghɨn amizɨ, e an atiatingɨva an apengan ikɨ, egh a mɨnabɨva a uabɨ ifongezir arazimɨn gɨn mangɨ an ziam fam.

Akar Mogomem 17:14

Egh me Sipsipɨn Nguzim ko mɨsogham, eghtɨ Sipsipɨn Nguzim me gasɨghasɨgh me abɨragham. Gumazamizir Sipsipɨn Nguzim ko itiba, God me amɨsevegha, men diazɨma me guizɨn akamɨn gɨn ghua tuivigha gavgavigha mɨdorozir kam gami. Sipsipɨn Nguzim, a guizbangɨra Gumazamizir Ekiabar Gumazir Ekiam ko Atrivibar Atrivir Ekiam. Kamaghɨn amizɨ, a me abɨragham.”

Matyu 28:18

Ezɨ Iesus men boroghɨra iza kamaghɨn me mɨgei, “God nguazim ko overiam gativamin gavgaviba bar na ganɨngi.

Matyu 11:27

Egha Iesus ua kamaghɨn mɨgei, “Nan Afeziam biziba bar da isa nan dafarim gatɨ. Ezɨ gumazitam Otarim gɨfozir puvatɨ. Afeziam uabɨra a gɨfo. Egha tav Afeziam gɨfozir puvatɨ. Otarim uabɨra, ko gumazir Otarim ifuegha Afeziam isa men akaziba, merara Afeziam gɨfo.

Aisaia 9:7

Eghtɨ atrivir kam, Atrivim Devitɨn danganim inigh, Devitɨn atrivir dabirabim daperagh gumazamizibar ganam. Eghtɨ a gumazamizibagh ativagh men ganamin gavgavir kam, an ekɨv mangɨvɨra ikiam. Kamaghɨn mɨdoroziba ua puvatɨghtɨ, gumazamiziba navir amɨrizimɨn ikia, deraghvɨra dapiagh ikɨ mamaghɨra ikiam. Atrivir kam, guizɨn arazimɨn gɨn ghua biziba deragha da tuisɨgha, Godɨn arazir aghuibara amuasavɨra iti. A kamaghɨn damutɨ, an atrivir ingangarim datɨrɨghɨn ikegh gavgavigh mangɨvɨra ikiam. Ikiavɨra Itir Godɨn Gavgaviba Bar Itim, uan gumazamiziba guizbangɨra bar me gifonge, kamaghɨn amizɨ, a bizir kam damightɨ an otogham.

Akar Mogomem 3:21

“Gumazamizir mɨdorozim gamua apaniba abɨriba, kɨ men amamangatɨghtɨ me na ko nan atrivir dabirabim dapiam, mati kɨ fomɨra uaghan mɨdorozim gamigha uan apanim abɨragha, uan afeziam ko an atrivir dabirabim gapera.

Luk Osirizir Akar Aghuim 1:33

Eghtɨ a Jekopɨn adarazir atrivimɨn ikɨvɨra ikiam. Eghtɨ a Bizibagh Ativamin Dughiar kam gɨvaghan kogham.”

Maika 4:7

Ezɨ gumazamizir ikiavɨra itir varazira, me uan nguibamɨn saghon ikia, egha daruan iburaghburaki, me gumazamizir suer kurar pazava aruiba. Ezɨ datɨrɨghɨn itir varazira kɨ ua me damightɨ, me kantrin bar gavgavimɨn mɨn otogham. Eghtɨ datɨrɨghɨn ikegh mangɨ, kɨ Ikiavɨra Itir God, kɨ Saionɨn Mɨghsɨamɨn ikɨ, men atrivimɨn ikɨ, me gativagh mamaghɨra ikiam.”

Obadia 1:21

Eghtɨ mɨdorozim gamua apaniba abɨniziba, me Saionɨn Mɨghsɨamɨn ghuavanangam. Kamaghɨn amizɨ, me Ison ovavir boribar mɨghsɨabagh ativagh dar ganam. Eghtɨ kɨ Ikiavɨra Itir God, kɨ uabɨ atrivimɨn ikiam.”

Daniel 3:4

Egha gavmanɨn gumazir akam akurir mam pamten kamaghɨn diagha mɨgei, “Ia nguibaba bar dar gumazamiziba, kantriba bar dar gumazamiziba, nguibabar akaba bar ia bar atrivimɨn akam baragh!

Daniel 2:35

Ezɨ ainba, ko nguazim, ko bras, ko silva, ko gol, da bar bɨaghiregha mati raizɨn mɨseviba, nɨ da isa da makuri. Ezɨ amɨnim dagh ivavamadi, ezɨ mɨnezir taba ua itir puvatɨ. Ezɨ dagɨar marvir guar kam mɨsoghezim, an aghua mɨghsɨar ekiamɨn otoghava nguazir kam bar anevara.

Aisaia 60:12

Ezɨ kantrin nɨn apengan ikia nɨn ingangaribar amuan aghuaziba, me bar moghɨra ikuvigh bar gɨvagham.

Onger Akaba 146:10

Ikiavɨra Itir God, Atrivimɨn ikɨ mamaghɨra ikiam. Ia Saionɨn gumazamiziba, ian God, a Atrivimɨn ikɨ, zurara ikɨvɨra ikiam. Aleluia! E bar Ikiavɨra Itir Godɨn ziam fam!

Onger Akaba 45:6

Nɨn atrivir dabirabir God nɨ ganɨngizim, a zurara ikɨ mamaghɨra ikiam. Eghtɨ nɨ guizɨn arazimɨn uan gumazamizibagh ativagh men ganam.

Onger Akaba 8:6

Bizir nɨ ingarizir kaba bar, nɨ dagh ativagh dar ganasa e amɨsefe. Biziba bar moghɨra nɨ da isa e gumazamiziba en suemningɨn apengan da arɨki.

Jon Osirizir Akar Aghuim 12:34

Ezɨ gumazamiziba kamaghɨn an akam ikaragha ghaze, “E kamaghɨn Moses Osirizir Arazibar akam baraki, God Uam E Iniasa Mɨsevezir Gumazim otogh, egh ikɨ mamaghɨra ikiam. Egha manmaghsua nɨ ghaze, ‘Me Gumazamizibar Otarim fegh ter ighuvimɨn aneguragham?’ Gumazamizibar Otarir kam, a bar tinara?”

Luk Osirizir Akar Aghuim 10:22

Egha Iesus ua kamaghɨn mɨgei, “Nan Afeziam biziba bar da isa nan dafarim gatɨ. Ezɨ gumazitam Otarim gɨfozir puvatɨ. Afeziam uabɨra a gɨfo. Egha tav Afeziam gɨfozir puvatɨ. Otarim uabɨra, ko gumazir Otarim ifuegha Afeziam isa men akaziba, merara Afeziam gɨfo.”

Daniel 7:18

Eghtɨ gɨn Godɨn Bar Pɨn Itimɨn gumazamiziba, me gavgavim inighɨva, biziba bar dagh ativagh, ikɨ mamaghɨra ikiam.”

Daniel 6:26

Kɨ kamaghɨn ia mɨgei, ia nan kantrin gumazamizir kɨ ativaziba, ia ziar ekiam Danielɨn God danɨng, egh Godɨn kamɨn atiating an apengan ikɨ. “Kar Godɨn Ikia Mamaghɨra Itim, egh an atrivimɨn ikɨ mamaghɨra ikiam. An Dughiar an Atrivimɨn Ikiamim ko an gavgavim gɨvaghan kogham.

Daniel 4:3

God arazarazir bar ekiabar en aka! Egha bar gavgavigha mirakel bagh ami! God ikɨ mamaghɨra ikiam; an atrivimɨn dughiaba zurara ikɨvɨra ikiam.

Onger Akaba 72:17

Gumazamiziba, atrivir kamɨn ziam gɨnamangan kogham. Dughiaba bar, aruem tɨghar maghɨn anangtɨ, gumazamiziba ziar ekiam atrivir kam danɨngam. Egh gumazamiziba an ziam fam. God deragha atrivim gamir arazir kam bagh, me uaghan kamaghɨra deragh uari damusɨ Godɨn azangsɨgham.

Onger Akaba 72:11

Atriviba bar izɨ a bagh teviba apɨram. Eghtɨ kantriba bar, dar gumazamiziba an ingangaribar amuam.

1 Pita 3:22

Ezɨ Krais Godɨn Nguibamɨn ghugha datɨrɨghɨn Godɨn agharir guvimɨn iti. Ezɨ enselba ko duar kurar gavgaviba ko aser gavgaviba itiba, da bar an apengan iti.

Akar Mogomem 1:6

An e gamizɨma, e atrivimɨn ofa gamir gumazamizibar otozɨma, God e gativazɨ e Godɨn ingangarim gami, God Iesusɨn afeziam. Zurazurara Krais ziar ekiam ikɨva egh biziba bar dar ganamin gavgavim ikɨ. Bar guizbangɨra.

Aisaia 16:5

eghtɨ danganir kamɨn, atrivir mam otogham. A Devitɨn ovavir boribar gumazir mam. Egh a uan gumazamiziba bar men apangkuvigh, egh zurara guizɨn arazimɨn gɨn mangɨ men ganam. A uan gumazamizibar osɨmtɨziba baragh, egh zuamɨra me tuisɨgh me akɨrmɨgham. Egh a zurara arazir aghuibar amusɨ gavgavigham.”

Daniel 2:37

Atrivim, nɨ faraghavɨra ikia, egha atrivir maba bar dagh afira. Ezɨ Godɨn Uan Nguibamɨn Itim, a nɨn amamangatɨzɨ nɨ atrivimɨn iti. Ezɨ a gavgavim nɨ ganɨga egha ziar ekiam nɨ ganɨngi.

Onger Akaba 103:19

Ikiavɨra Itir God, uan Nguibamɨn ikia uan atrivir dabirabim gaperaghav ikia, bizibagh ativagha bar adar gari.

Aisaia 9:6

Bar guizbangɨra, otarir mam amebam e bagha a bate, a borir God e ganɨngizir mam. Eghtɨ an e gativagh en ganamin arazir kam, mati gumazim dɨpenir akɨnir dafam uan dɨpɨzim gatɨgha aneteri. Kar an ziaba, Gumazir Nɨghnɨzir Bar Aghuiba Anɨdim, ko Godɨn Gavgaviba Bar Itim, ko Afeziar Zurara Ikiavɨra Itim, ko Atrivir Dabirabir Aghuim ko Navir Amɨrizim Anɨdim.