Daniel 2:27 - Godɨn Eghaghanim: Akar Gavgavir Dɨkɨrɨzir Ghurim ko Igiam

²⁷ Ezɨ Daniel kamaghɨn atrivim mɨgei, “Atrivim, fofozir gumazitam, ko kukunir gumazitam, ko imezibagh amir gumazitam, ko akuzibagh amir gumazitam, me bar modoghav tir bizir kamɨn mɨngarim abɨghɨva avegham.

Daniel 2:27 ပူးပေါင်းရင်းမြစ်များ

Daniel 2:2

Kamaghɨn amizɨ, irebar mɨngaribagh fogha dar gun mɨgeir gumaziba ko, kukunir gumaziba ko, imezibagh amir gumaziba ko, akavsiar ifavaribagh amir gumaziba, me bagha akam amada. Eghtɨ me izɨ an irebamɨn mɨngarimɨn gun mɨkɨmam. Egha me iza atrivimɨn guamɨn tuivizɨ,

Aisaia 44:25

Bizir gɨn otivamibar gun mɨgeir gumaziba, kɨ me gamizɨ, me okam nɨghnɨgha, men mɨgɨrɨgɨaba paza zui. Ezɨ kukunir gumaziba, kɨ men nɨghnɨzibagh amima, me okam nɨghnɨsi. Ezɨ fofozir gumaziba, kɨ me gamizɨ, me ongani.

Aisaia 19:3

Kɨ Isipia damightɨ men gavgavim gɨvaghtɨ, me okam nɨghnɨghɨva, bizir me damuasa nɨghnɨziba, me dar amuan kogham. Egh me uan asebar azangtɨ, da ti men akurvagham. Egh me mangɨ, gumazir oveaghuezibar duabar azangsɨgham, me bizir manam damuam. Me imezibagh amir gumaziba ko kukunir gumazibar nɨghnɨzibagh foghsɨ men azangsɨgham.

Jenesis 40:8

Ezɨ aning kamaghɨn Josepɨn akam ikaragha ghaze, “Ga irebamningɨn gani. Ezɨ gumazir gan irebamningɨn mɨngarim abɨghamba puvatɨ.” Ezɨ Josep kamaghɨn aning mɨgei, “God uabɨra a irebabar mɨngaribar en akakasi. Ezɨ gua uan irebamningɨn gun na mɨkɨm.”

Jenesis 41:8

Egha mɨzaraghara a nɨghnɨzir avɨribagh amua, egha Isipɨn fofozir gumaziba ko kukunir gumaziba, men diazɨ me izima, a uan irebar pumuningɨn me mɨgeima, irebar kamningɨn mɨngarimning abɨghamin gumaziba puvatɨ.

Jeremaia 10:7

Nɨ kantriba bar dar gumazamiziba bar me gativagha men gari, ezɨ me bar nɨn atiating nɨn apengan ikɨ nɨn ziamra fam. Ezɨ nguazir kamɨn fofozir aghuiba itir gumaziba ko atriviba, men tav nɨn mɨn amir puvatɨ.

Daniel 1:20

Egha atrivim bizir avɨribar men azangsɨgha, me ko mɨgɨa gari, men fofozim Babilonɨn fofozir gumazibar fofoziba, bar moghɨra me gafira. Atrivimɨn irebar mɨngaribagh fogha dar gun mɨgeir gumaziba ko, kukunir gumaziba bar, me Judan gumazir 4plan kabagh afiraghan kogham. Bar puvatɨ.

Daniel 4:7

Ezɨ irebar mɨngaribagh fogha dar gun mɨgeir gumaziba ko, kukunir gumaziba ko, imezibagh amir gumaziba ko, akavsiabagh amir gumaziba, me bar ize. Kɨ irebamɨn gun me mɨgeima, me irebamɨn mɨngarimɨn gun na mɨkɨman ibura.