Daniel 2:23 - Godɨn Eghaghanim: Akar Gavgavir Dɨkɨrɨzir Ghurim ko Igiam

²³ Nan ovavibar God, nɨ fofozim ko gavgavim na ganɨngi egha nɨ nan dɨmdiam baraki, egha bizir e nɨn azangsɨghizir kam, en aka. Egha nɨ atrivimɨn irebamɨn mɨngarim, en aka. Kɨ bizir kam bagha nɨ mɨnabagha, bar nɨn ziam fe.”

Daniel 2:23 ပူးပေါင်းရင်းမြစ်များ

Daniel 2:18

Egha apangkuvim bagha Godɨn Uan Nguibamɨn Itim ko mɨkɨmasa me mɨgei. Egh uaghan irebar mogomemɨn itim bagh azangsɨghtɨ, an an mɨngarim en akagham. Eghtɨ e Babilonɨn fofozir gumazir igharaziba ko aremeghan kogham.

Ua Me Ini 3:15

Egha God ua kamaghɨn Moses mɨgei, “Nɨ kamaghɨn Israelian gumazamizibav kɨm, ‘Ikiavɨra Itir God, a ian inazir afeziabar God, an Abraham ko Aisak ko Jekopɨn God, a na amadazɨ, kɨ ia bagha izi.’ Ziar kam, Ikiavɨra Itir God, a zurazurara nan ziam, ezɨ gɨn otivamin boriba ziar kamra na dɨpon.

Luk Osirizir Akar Aghuim 10:21

Ezɨ dughiar kamra, Godɨn Duam Iesus gamima a bar akongegha kamaghɨn mɨgei, “Afeziam, nɨ nguazim ko overiam gativazir Ekiam! Nɨ fofozim ko nɨghnɨzir aghuiba itir gumazamiziba bizir kaba men modo, egha boribar mɨn itir gumazamizibar aka. Kamaghɨn amizɨ kɨ nɨ mɨnaba. Guizbangɨra Afeziam, nɨ uan ifongiamɨn kamaghɨn ami.”

Matyu 11:25

Egha dughiar kamɨn Iesus kamaghɨn mɨgei, “Afeziam, nɨ nguazim ko overiam gativazir Ekiam! Nɨ fofozim ko nɨghnɨzir aghuiba itir gumazamiziba bizir kaba men modo, egha boribar mɨn itir gumazamizibar aka. Kamaghɨn kɨ nɨ mɨnabi.

Amos 3:7

Bar guizbangɨra, Ikiavɨra Itir Godɨn Ekiam damuasava amir biziba, a faragh uan ingangarir gumazibav kemegham, kar an akam inigha izir gumaziba, egh gɨn a mɨkemezɨ moghɨra dar amuam.

Daniel 1:17

Ezɨ 4plan gumazir igiar kaba, God biziba bar dar amuamin fofozim ko, akɨnafaribar gara dagh fozir fofozir aghuim, ko nɨghnɨzir aghuim me ganɨngi. Egha God Daniel fofozim a ganɨngizɨma, a irebaba ko irebamɨn mɨn garir bizibar mɨngaribar gun mɨkɨmamin fofozim ti.

Aisaia 12:1

Eghtɨ gɨn izamin Dughiam otoghtɨ, ia Israelia kamaghɨn igham damuam: “O Ikiavɨra Itir God, kɨ nɨn ziam fe. Nɨ nan anɨngaghe, ezɨ nɨn anɨngagharim gɨfa, ezɨ nɨ bar deraghavɨra nan asughasugha gavgavim na ganɨdi. Ezɨ datɨrɨghɨn nan navim deraghavɨra iti.

Onger Akaba 50:14

“Kamaghɨn deragham, ia bar God mɨnabagh. Kamaghɨn garir ofa ia a damu. Kɨ Godɨn Bar Pɨn Itim, bizir aghuir ia na danɨngasa mɨkemegha gɨvaziba, ia da isɨ na danɨng.

Onger Akaba 25:14

Gumazamizir Ikiavɨra Itir Godɨn atiatia an apengan itiba, a men namakam gami. Egha uan Akar Dɨkɨrɨzir Gavgavim azenara anekazɨ me a gɨfo.

Akar Mogomem 5:5

Ezɨ gumazir dapanibar mav kamaghɨn na mɨgei, “Nɨ arangan markɨ. Nɨ orakigh. Laionɨn kam Judan adarazir atrivimɨn oto, atrivir bar ekiam, an Atrivim Devitɨn ovavim, egha a mɨdorozim gamua uan apanim abɨragha gɨfa. Kamagh amizɨ, me akɨnafarimɨn 7plan kandelɨn, grisɨn mɨghɨnɨziba adegh, akɨnafarir kam onegham.”

Akar Mogomem 1:1

Akar kam faragha modogha iti, ezɨ datɨrɨghɨn Krais Iesus a isa azenim gatɨ. God uan ingangarir gumazamiziba bizir zuamɨram otivamiba men akaghasa, egha kamaghɨn akar kam Iesusɨn aka. Ezɨ Iesus uan enselɨn mam amadazɨma, kɨ Jon, an ingangarir gumazim, an akam na danɨngasa ize, eghtɨ kɨ Iesusɨn ingangarir gumazamizir igharazibav kɨmam.

Jon Osirizir Akar Aghuim 11:41

Egha me dagɨam puegha munagh amadazɨ, Iesus kogha overiamɨn gara kamaghɨn mɨgei, “Afeziam, nɨ na barasi, kamaghɨn amizɨ kɨ nɨ mɨnaba.

Fofozir Gumazim 9:18

Nɨghnɨzir aghuim, a mɨdorozimɨn bizibagh afira. Eghtɨ gumazitam arazir kurar tam damightɨ, an arazir aghuir avɨrim gasɨghasigham.

Fofozir Gumazim 7:19

Eghtɨ gumazir dapanir ekiar 10pla, nguibar ekiar mamɨn akuragh a damutɨ, a tugh gavgavigham. Ezɨ nɨghnɨzir aghuim, a gumazitamɨn akuraghtɨ, a bar gavgavigh nguibar ekiar kamɨn gavgavim gafiragham.

Aghuzir Akaba 24:5

Gumazir nɨghnɨzir aghuim ko fofozim itim, a gumazir gavgaviba itim. Nɨghnɨzir aghuim bar deragha gumazir gavgavimɨn arazim gafira.

Aghuzir Akaba 21:22

Gumazir nɨghnɨzir aghuim itim, a nguibam inisɨ tuavir aghuim mɨdorozir gumazibar akagham. Eghtɨ gumaziba kamagh mɨkɨmam, nguibamɨn dɨvazim bar gavgavizɨ, apaniba anekaran iburagham. Eghtɨ mɨdorozir gumaziba mangɨ mɨsoghɨva, nguibamɨn mɨdorozir gumazir gavgaviba dɨkabɨraghɨva, nguibam iniva dɨvazir kam gasɨghasigham.

Aghuzir Akaba 8:14

Kɨ nɨghnɨzir aghuim gumazamizibar anɨngɨva, egh men akurvaghtɨ me ingangarir aghuibar amuam. Kɨ nɨghnɨzir aghuim ko gavgavir ekiam iti.

2 Eghaghaniba 20:6

“O Ikiavɨra Itir God, nɨ en inazir afeziabar God, nɨ uan Nguibamɨn ikiava, nguazimɨn ikɨziba bar me gativagha men gari. Nɨ gavgavir bar ekiam iti. Eghtɨ gumazitam nɨ mɨsogh nɨ abɨraghan kogham.

1 Eghaghaniba 29:13

“En God, e datɨrɨghɨn nɨ mɨnabava nɨn ziar bar ekiam fe.

1 Eghaghaniba 29:10

Egha Atrivim Devit gumazamizibar damazimɨn Ikiavɨra Itir Godɨn ziam fa kamaghɨn a mɨnabi: “O Ikiavɨra Itir God, nɨ en inazir afeziam Israelɨn God, e nɨn gumazamiziba, e zurara nɨn ziam fɨ mamaghɨra ikiam.

1 Atriviba 18:36

Egha bar guaratɨzimɨn, ofa damuamin dughiamra, akam inigha izir gumazim Elaija ofa gamir dakozim boroghɨn ghugha kamaghɨn God ko mɨgei, “O Ikiavɨra Itir God, nɨ Abraham ko Aisak ko Israelɨn God, kɨ kamaghɨn ifonge, nɨ datɨrɨghɨn gumazamiziba kamaghɨn men akagh, nɨ uabɨra Israelian God. Egh nɨ uaghan kamaghɨn men akagh suam, kɨ nɨn ingangarir gumazim, egha nɨn akamra gɨn ghua bizir kaba bar dagh ami.

1 Atriviba 8:57

Ikiavɨra Itir God, a en God, a faragha en inazir afeziaba ko ikezɨ moghɨn, datɨrɨghɨn an e ko ikiam. An e ateghtɨ, e pura uarira ikian kogham.

Jenesis 18:17

Ezɨ Ikiavɨra Itir God kamaghɨn nɨghnɨsi, “Bizir kɨ damuamin kam, kɨ Abrahamɨn ghuangsɨghan aghua.

Jon Osirizir Akar Aghuim 15:15

E fo, ingangarir gumazim bizir an gumazir ekiam amiba, an adagh fozir puvatɨ. Kamaghɨn amizɨ, kɨ ua ‘ingangarir gumaziba’ ia dɨborir puvatɨ. Akaba bar kɨ uan Afeziam da, da baregha kɨ ia mɨkemegha gɨfa. Kamaghɨn amizɨ, kɨ ‘namakar aghuiba’ ia garɨsi.

Fofozir Gumazim 9:16

Ezɨ kɨ kamaghɨn mɨkɨmasa, nɨghnɨzir aghuim, gavgavir ekiam gafira. Ezɨ gumazamiziba kamaghɨn nɨghnɨsi, gumazir biziba puvatɨzim, an nɨghnɨzir aghuim pura bizir kɨnimɨn mɨn iti. Kamaghɨn me an akaba barazir puvatɨ.

Jenesis 31:42

Eghtɨ nan inazim Abrahamɨn God, a Godɨn nan afeziam Aisak an ziam fem. A na ko ikian koghtɨ, nɨ ti pura na amadazɨ kɨ uamategha ghughai. Ezɨ puvatɨ, God nan itir osɨmtɨzim ko kɨ amir ingangaribar gani, egha kamaghɨn a dɨmangan akar gavgavim nɨ ganɨngi.”

Onger Akaba 21:2

Bizir a uan navir averiamɨn ifongeziba nɨ a ganɨgha gɨfa. Bizir a iniasa nɨn azarazir kam, nɨ an anogoroghezir puvatɨ. (Ighiam gamua an suiam atugha avughsegha ua ighiam gami.)

Onger Akaba 21:4

A ikɨrɨmɨrir aghuim bagha nɨn azarazɨma, nɨ a isa a ganɨngi. Guizbangɨra, ikɨrɨmɨrir a ikiamin dughiaba, da bar ruaragh ikɨ, mamaghɨra ikiam.

Jeremaia 33:3

Nɨ nan dɨmtɨ, kɨ nɨn dɨmdiam ikaragham. Egh bizir ekiar modogha itir nɨ fozir puvatɨziba, kɨ dar gun nɨ mɨkɨmam.