Daniel 11:36 - Godɨn Eghaghanim: Akar Gavgavir Dɨkɨrɨzir Ghurim ko Igiam

³⁶ “Eghtɨ Sirian atrivir kam uan ifongiamɨn bizibar amuam. Egh a uabɨ uan ziam fɨva kamaghɨn mɨkɨm suam, kɨ aseba bar dagh afira. Egh an akar dɨbovibav kɨmɨva, Godɨn Bar Pɨn Itimɨn ziam dɨkabɨnam. A kamaghɨra damu mangɨvɨra ikɨ mangɨtɨ Godɨn anɨngagharimɨn dughiam otogham. Guizbangɨra, God uan nɨghnɨzimɨn gɨn mangɨ, biziba bar dar amuam.

Daniel 11:36 ပူးပေါင်းရင်းမြစ်များ

2 Tesalonika 2:4

Bizir gumazamiziba ziaba feba ko dar bora ghaze men godba o men aseba, a dar apanimɨn ikiam. Egh a uabɨra uan ziam fɨva egh a bizir kaba bar da dɨkabɨragham. Egh a Godɨn Dɨpenimɨn aven daperagh ikɨva kamaghɨn mɨkɨmam, “Kɨ uabɨra God.”

Daniel 8:19

Ezɨ a mɨgei, “Kɨ Godɨn anɨngagharim gɨvaghamim dughiamɨn, nɨ mɨkɨmasa. Kar God inabazir dughiar abuananam. Bizir kaba nɨ irebamɨn ganizɨ moghɨn otivam.

Godɨn Araziba 10:17

Ikiavɨra Itir God, ian God, godɨn ifavariba ko bizir bar gavgaviba itibagh afira. Ikiavɨra Itir God, a bar ekevegha bar gavgavizɨ, biziba bar an gavgavimɨn atiatigha an apengan iti. Gumazir ziam itim, o gumazir ziam puvatɨzim, an arazir vamɨran gɨn ghua men araziba tuisɨsi. A kotɨn aven gumazamiziba ataghɨrazi, me an nɨghnɨzim gɨghasa dagɨaba a ganɨdir puvatɨ.

Daniel 11:16

Eghtɨ, Sirian atrivim uan ifongiamɨn bizibar me damuam. Eghtɨ gumazitam an anogoreghan kogham. Egh a nguazir aghuir God uan gumazamizibagh anɨngizir kam inigh, egh nguazir kam gasɨghasɨghamin gavgavim an dafarimɨn ikiam.

Daniel 2:47

Ezɨ atrivim kamaghɨn Daniel mɨgei, “Nɨ irebar modozir kamɨn gun mɨkemegha gɨfa. Kamaghɨn amizɨ, kɨ kamaghɨn fo, nɨn God a godɨn igharazibagh afira. Ana atriviba bar dar ekiam, egha bizir mogomeba azenim garɨsi.”

Aisaia 14:13

Nɨ ti kamaghɨn nɨghnɨsi, ‘Kɨ mɨkovezibagh afiragh, bar pɨn mar overiamɨn mavanabogham. Egh kɨ uan atrivir dabirabim isɨ, Godɨn mɨkovezibagh isɨn bar pɨn mar anefagham. Egh kɨ uaghan izɨ, notɨn amadaghan itir mɨghsɨar aseba iza uari akuvi naghɨn, a gisɨn bar pɨn mar daperaghɨv ikiam.

Akar Mogomem 10:7

Bizir God damuasava amim, an akam modoghav iti. Eghtɨ Enselɨn namba 7 sɨgham givitɨma, dughiar kamra bizir modoghav itim guizbangɨram otogham. Kar, Akar Aghuir a fomɨra uan ingangarir gumazamizibagh anɨngizim, me an akam inigha izir gumazamiziba.”

Aisaia 10:25

Nan navim ia bagha ikuvighavɨra iti, kamaghɨn, kɨ Asiriaba ataghizɨ me ia gasɨghasɨsi. Eghtɨ kɨ, kɨran oveghangɨn, uan adarir ian itim agɨvagh, egh raghɨrɨgh Asiriabagh asɨghasɨgham.

Onger Akaba 136:2

Ikiavɨra Itir God, godɨn ifavaribagh afiragha bar ekefe. Kamaghɨn e a mɨnamam. A zurara en apangkuvigha mamaghɨra iti.

Akar Mogomem 17:17

God uabɨ me ganɨngizir nɨghnɨzir kam, a me damutɨ biziba otivam. Kamaghɨn amizɨ me nɨghnɨzir vamɨra ikɨ, egh atrivimɨn ikiamin gavgaviba bar da isɨ asɨzir atiam danɨngam. Me kamaghɨn damu mangɨtɨ Godɨn akam mɨkemezir biziba, da guizɨn otivamin dughiam otogham.

Akar Mogomem 17:3

Ezɨ Godɨn Duam pamtem nan ingarima, kɨ irebamɨn mɨn bizimɨn gari, ensel na inigha gumazamiziba puvatɨzir danganimɨn ghu. Ezɨ danganir kamɨn kɨ amizir mamɨn garima an asɨzir atiar aghevir mam gisɨn aperaghav iti. Asɨzir atiar kamɨn mɨkarzim osizirir avɨriba an iti, ezɨ osizirir kabanagh Godɨn ziam gasɨghasɨsi. Asɨzir atiar kam 7plan dapaniba iti, ezɨ 10plan komba an dapanibar iti.

Akar Mogomem 12:14

God kamaghsua, amizim azenir 3pla ko akuamɨn gumazamiziba puvatɨzir danganimɨn ikɨva, egh a kagh akurvazim iniam. Kamaghɨn amizɨ, a mɨghegh danganir God a bagha dɨkɨrɨzir kamɨn mangasa, God kuarazir anebar ekiamɨn avɨzimning a ganɨngi.

Aposel 4:28

Nɨ fomɨram otivasa mɨkemezir biziba, me nɨn gavgavim ko nɨn nɨghnɨzimɨn gɨn ghua dagh ami.

Jon Osirizir Akar Aghuim 6:38

Kɨ uan ifongiamɨn gɨn mangasa Godɨn Nguibam ategha izaghirɨzir puvatɨ. Kɨ Afeziar na amadazimɨn ifongiamɨn gɨn mangasa kɨ izaghirɨ.

Jon Osirizir Akar Aghuim 5:30

Egha Iesus ua kamaghɨn mɨgei, “Kɨ uabɨ uan nɨghnɨzimɨn gɨn mangɨ bizitam damighan kogham. Kɨ akar Afeziam da inizibar gɨn ghua, egha gumazamizibar araziba tuisɨsi. Kɨ uabɨ uan ifongiamɨn gɨn zuir puvatɨ. Kɨ Afeziamɨn ifongiamɨn gɨn zuima, a na amadazɨma kɨ ize. Kamaghɨn amizɨ, kɨ gumazamizibar araziba deravɨra da tuisɨsi, ezɨ nan kotiam a bar guizbangɨra ghua egha bar dera.

Daniel 12:7

Ezɨ enselɨn korotiar ghurghurim aruzim, a uan agharimning vɨraram aning ghufegha Godɨn Nguibamɨn akui. Egha kamaghɨn mɨgei, “Kɨ Godɨn Mamaghɨra Itimɨn ziamɨn, bar guizbangɨra mɨgei. Bizir nɨ ganɨva atiatingamiba, azenir pumuning ko mɨkezim ko akuamɨn mangɨva gɨvagham. Eghtɨ me Godɨn gumazamizibar gavgavim dɨkabɨraghtɨ, eghtɨ me bar ikuvigha, dughiar kamra bizir kaba uaghan gɨvagham.”

Daniel 11:3

Eghtɨ gɨn atrivir gavgavitam otogh, egh kantrin avɨriba ko gumazamizir avɨribagh ativagham. Egh bizir manam ana damusɨ, ana damuam.

Daniel 8:4

Ezɨ kɨ sipsipɨn apurir kamɨn garima, ana aviragha ivegha ghua aruem uaghiri naghɨn, ko not ko sautɨn ghu. Eghtɨ asɨzitam an tɨvaghan kogham. Eghtɨ tav an gavgavimɨn arɨmangɨghan kogham. A biziba uan ifongiamɨn dagh amua egha bar gavgavigha uan ziam fe.

Daniel 7:8

Egha kɨ mɨghɨgha 10plan kom kabar gara, komɨn dozir mamɨn garima a mabar tongɨn oto. Ezɨ komɨn igiar kam 3plan komɨn faragha itiba asi. Ezɨ komɨn igiar kam gumazimɨn damazimning ko akam iti. Egha bar akongegha, uabɨ uan ziam fe.

Daniel 4:35

A gari, nguazimɨn itir gumazamiziba mati pura biziba. An Nguibamɨn itir enselba ko nguazimɨn itir gumazamiziba an apengan iti, a bar me gatifa. Egh a bizitam damusɨ an a damuam, eghtɨ gumazitam an anogoreghan kogham. Guizbangɨra, gumazitam kamaghɨn an azangsɨghan kogham, Nɨ bizir tizim gami. Bar puvatɨ.

Aisaia 46:10

Bizir tam tɨghar otivamin dughiamɨn, an otogh manmaghɨn gɨvagham, kɨ bizir kamɨn gun mɨgei. Kɨ bar fomɨra bizir otivambar gun mɨkeme, ezɨ gɨn bizir kaba kɨ mɨkemezɨ moghɨram otifi. Egh kɨ bizir manatam damusɨ ifongegh, kɨ puram a damuam. Eghtɨ kɨ damuasa ifongezir bizir kam, bizitam nan tuavim apɨrighan kogham.

Aisaia 26:20

Ia nan gumazamiziba, ia uan dɨpenibar aven mangɨ uan tiaba asegh. Ia dughiar otevimra muegh ikɨtɨ, Ekiamɨn anɨngagharim gɨvaka.

Aghuzir Akaba 19:21

Gumazamiziba bizir avɨribar amuasa nɨghnɨsi. Ezɨ bizir Ikiavɨra Itir God damuasa nɨghnɨzim, bizir kamram otivam.

Onger Akaba 33:10

Kantrin Igharazibar Gumazamiziba damuasava nɨghnɨzir biziba, Ikiavɨra Itir God dagh amima da ghua puvarɨsi. Ikɨzir igharaziba damuasa akabav sozir mɨgɨrɨgɨaba, an adar tuaviba apɨri.

Josua 22:22

“Godɨn Gavgaviba Bar Itim, a guizbangɨra God. A Ikiavɨra Itir God. A fo, e bizir kam gami. Ezɨ e kamaghɨn ifonge, ia Israelia uaghan bizir kam gɨfogh. E ti uan nɨghnɨzir gavgavim ategh Ikiavɨra Itir Godɨn akam batueghtɨ, ia e mɨsueghtɨ e arɨmɨghireghtɨ, deragham.

2 Tesalonika 2:3

Ia gumazitamɨn gantɨ a uan akatam o arazir an amitamɨn ia gifaran markɨ. Ia oragh! Dughiar kam puram otoghan kogham. Puvatɨ. Faraghɨvɨra gumazir avɨrim Godɨn akaba batoghɨva akɨrim ragh God gasaragham. Eghtɨ Godɨn Araziba adoghodozir gumazir mam azenara otogham, gumazir kam God helɨn a gasɨghasɨgham.

2 Tesalonika 2:8

Egh Godɨn Araziba adoghodozir gumazir kam dughiar kamɨn azenim giram. Eghtɨ Ekiam Iesus uan akamɨn a giveragh a mɨsueghtɨma an aremegham. Ekiam uan angazangarim ko gavgavir ekiam sara izɨva, uan angazangarim ko gavgavir kamra a gumazir kam bar a gasɨghasɨgham.

Akar Mogomem 13:1

Ezɨ kɨ garima asɨzir atiar mam ongarimɨn otogha anadi. A dapanir 7pla iti, ezɨ komɨn 10pla an dapanibar iti. Ezɨ 10plan atrivimɨn dapanir asuaba vaghvagha an 10plan kombar iti. Ezɨ an dapaniba vaghvagha Godɨn ziamɨn tiraghtirazir ziaba dar iti.

Esekiel 35:13

Ia Idomia puv ifaghata uari fa akar kurabar na mɨgei. Kɨ ian mɨgɨrɨgɨar kaba baregha gɨfa.

Daniel 5:19

A gavgavir bar ekiam iti, kamaghɨn amizɨ, nguibaba bar dar gumazamiziba ko, kantriba bar dar gumazamiziba ko, nguibabar akaba bar, me an atiatigha egha nɨsi. Eghtɨ a gumazitam mɨsueghtɨ an aremeghsɨ an aremegham. Eghtɨ a gumazitam ateghtɨ a ikɨsɨ, a ikiam. Egha a kamaghɨn ami, a gumazitamɨn ziam fɨsɨ, a fam. Eghtɨ a gumazitam dɨkabɨragh a gasɨghasɨghsɨ, ana damuam.

Daniel 5:20

Egha a uan ziam fava, akaba batogha, arazir igharazibagh amima, Godɨn Ikiavɨra Itim, atrivimɨn ikian a batoke, ezɨ an ziar ekiam iraghuzɨ, a uan danganim ataki.

Daniel 11:37

Eghtɨ atrivir kam uan ovavibar aseba bar men aghuaghɨva, uaghan amiziba gɨn zuir asemɨn aghuagham. Egha, a uabɨ mɨgɨa ghaze, kɨ uabɨra faraghavɨra ikia dagh afira, egh kamaghɨn, a bar aseba akɨrim ragh dagh asaragham.

Aisaia 10:5

Egha Ikiavɨra Itir God kamaghɨn mɨgei: Asirian kantrin gumazamiziba, mevzika! Me bar ikuvigham. Kɨ uan gumazamiziba puvɨra men atari. Kamaghɨn kɨ datɨrɨghɨn ingangarim isɨ Asirian kantrin gumazamizibar anɨngtɨ, me nan aghorimɨn mɨn otoghtɨ, gumazamizir nan navim gamima a ikuviziba, me ivezir kuram me danɨngɨva me gasɨghasigham.

Aisaia 10:23

Ekiam, a Ikiavɨra Itir Godɨn Gavgaviba Bar Itim, a nguazir kamɨn kantriba bar, a ivezir kuram isɨ me danɨngasa mɨkemegha gɨfa, egh a bar me gasɨghasɨgham.

Aisaia 14:14

Kɨ ghuariabagh isɨn bar pɨn mar ghuanabogh, Godɨn Bar Pɨn Itimɨn mɨn ikiam.’

Aisaia 30:33

Me Asirian atrivimɨn kuam tuasa avim arɨghasa mozir mam gɨkuigha gɨfa. Egha me mozir kam gɨtuima a bar vɨn mar iraghugha bar aroke, ezɨ me dazir avɨribar kuegha dar pozim mɨkɨni. Eghtɨ Ikiavɨra Itir God, an anɨngagharim pamtem otogh, mati amɨnim pamtemɨn avim giveraghtɨ, a bar puvɨra isigham.

Aisaia 57:9

Ia paura ko sandan mughuriar bar isɨngtɨzim zuim uari gaghua, asem Melekɨn ziam fasa zui. Egha ia asebar ziaba fasa, abuir gumaziba amadima, me aseba buria nguibar bar saghon tibar zui. Egha ia uaghan me amadima, me Gumazamizir Oveaghuezibar Nguibamɨn ghua, dar duaba buri, eghtɨ ia dar ziaba fɨsɨ damuam.

Esekiel 28:2

“O nguazir kamɨn gumazim, nɨ Tairɨn atrivim mɨkɨm suam: “Kɨ Ikiavɨra Itir Godɨn Ekiam kamaghɨn a mɨgei: Nɨ puvɨra uabɨ fa, uabɨ mɨgɨa ghaze, nɨ godɨn mam. Nɨ ghaze, nɨ godɨn mamɨn mɨn atrivir dabirabim gaperaghav iti, ezɨ ongarim nɨ ekɨaru. Nɨ ghaze, nɨn nɨghnɨzim godɨn mamɨn nɨghnɨzim ko magh ghu. Ezɨ puvatɨ! Nɨ pura nguazir kamɨn gumazir kɨnim! Nɨ god puvatɨ.

Sekaraia 11:16

Guizbangɨra, kɨ uan gumazamizibar ganasa gumazir mam atɨ, me mati sipsipɨn okoruar mam. Ezɨ gumazir kam sipsipbar tongɨn dar ikuvizibar akurvazir puvatɨ, egha a uaghan sipsipɨn ovengeziba tong da buria dar deir puvatɨ. A uaghan dar duaba nozir puvatɨ, egha deravɨra itiba, a dagheba dagh anɨdir puvatɨ. Bar puvatɨ. A mɨkarziba sara itiba, a uabɨ dar tuziba apava dar duiaba ko, puziba sara bar da asigha da ame.