Aposel 8:27 - Godɨn Eghaghanim: Akar Gavgavir Dɨkɨrɨzir Ghurim ko Igiam

^27-28 Ezɨ Filip maghɨra dɨkavigha zui, a tuavir arɨzimɨn Itiopian gumazir mam bato. A gumazir dapanim, a Itiopian Atrivir Amizim Kandasɨn dagɨabar garir gumazim. Gumazir kam Jerusalemɨn ghugha Godɨn ziam fegha uamategha izi. Egha a karis gaperagha, Godɨn akam inigha izir gumazim, Aisaian akɨnafarimɨn gari.

Godɨn Akar Aghuim; Akar Dɨkɨrɨzir Gavgavir Igiam

^27-28 Ezɨma, a maghɨra zui, a tuavir arɨzimɨn Itiopian gumazir mam bato. Ezɨ a gumazir dapanim, a Itiopian atrivir amizim Kandasɨn dagɨabar garir gumazim. Gumazir kam Jerusalemɨn ghugha Godɨn ziam fegha uamategha izi. Egha a karis gaperagha, Godɨn akam inigha izir gumazim, Aisaian akɨnafarimɨn gari.

Aposel 8:27 ပူးပေါင်းရင်းမြစ်များ

Sefanaia 3:10

Nan gumazamizibar marazi tintinimɨn kantrin igharazibar ghue, ezɨ marazi kantri Itiopian iti, me ofaba inigh na bagh izam.

Onger Akaba 68:31

Isipɨn atrivim uan ingangarir gumaziba amadaghtɨ, me Jerusalemɨn mangɨ nɨn akam baragham. Eghtɨ Itiopiaba nɨ ko mɨkɨmsɨ uan dafariba fam.

Jeremaia 38:7

Ebetmelek a Itiopian kantrin gumazir mam, an atrivimɨn dɨpenimɨn gumazir dapanir mam, a kamaghɨn akam baraki, me Jeremaia isa mozir kam gatɨ. Ezɨ dughiar kamɨn, atrivim Benjaminɨn Tiarakamɨn boroghɨram aperaghav ikia, gumazamizibar kotiam barasi.

Onger Akaba 87:4

God ghaze, “Kɨ gumazamizir nan akam baragha an gɨn zuiba mengamin dughiamɨn, kɨ uaghan Isipɨn kantrin gumazamiziba ko, Babilonɨn kantrin gumazamiziba ko, Filistian ikɨzim ko, Tairɨn nguibamɨn gumazamiziba ko, Itiopian kantrin gumazamiziba, kɨ uaghan bar me mengam. Me uaghan Jerusalemɨn adarasi.

Jon Osirizir Akar Aghuim 12:20

Ezɨ dughiar kamɨn, gumazamiziba isar ekiamɨn Godɨn ziam fasa Jerusalemɨn ghuavanabo, ezɨ men tongɨn, Grighɨn marazi uaghan iti.

Matyu 12:42

Fomɨra Seban Atrivir Amizim nguazir kamɨn saghon ikegha Solomonɨn fofozir aghuimɨn akaba baraghasa ize. Ezɨ gumazir mam bar Solomon gafiragha ian tongɨn iti. Kamaghɨn amizɨ, Gumazamiziba Godɨn Kotiamɨn Tuivamin Dughiamɨn, Seban Atrivir Amizim tugh datɨrɨghɨn itir gumazamizibar arazir kurabar gun mɨkɨmam.”

Jeremaia 13:23

Eghtɨ Itiopian kantrin gumazamiziba, men mɨkarzir pɨziba, mɨkarzir ghurghuribar otivam, ti puvatɨ. Eghtɨ kaziar atiam, me a dɨbora ghaze, lepat, a ti uan mɨkarzir dighdiriba itiba giragham, a? Bar puvatɨ. Kamaghɨra, arazir kurar kam, nɨn arazimra, ezɨ nɨ aneteghan kogham.

Aisaia 66:19

Eghtɨ kɨ men tongɨn ababanitam asaragh men akagham. Egh kɨ gumazamizir ikiavɨra itir varazira amangɨtɨ, me saghon itir arighatɨzibar gumazamizir igharaziba bagh mangam. Egh nan ziar ekiam ko gavgavimɨn gun gumazamizir tong oraghizir puvatɨzibav kɨmam. Kɨ kantrin kaba bagh me amangɨtɨ, me mangam, Tarsisɨn kantri ko, Pulɨn kantri ko, Lidian kantri, me barir pibar asir fofozir aghuim itir gumaziba. Egh Tubalɨn kantri, ko Grikɨn kantri, ko nguibar arighatɨzir ongarir torir saghon itiba, me bagh mangam. Gumazamizir ikiavɨra itir varaziran kabanang, kantrin kaba bagh mangegh nan ziar ekiam ko gavgavimɨn gun me mɨkɨmam.

Aisaia 60:6

Midianɨn kantri ko Efan kantri, aningɨn gumazamiziba, uan kamelɨn avɨriba inightɨ, da bizir aghuir avɨriba ater nɨ bagh izam. Egh uaghan Seban kantri gol ko pauran me iter balsamɨn eborimɨn ingariziba inigh nɨ bagh izam. Kɨ Ikiavɨra Itir God, me tuavimɨn izɨ nan ziar ekiam fam.

Aisaia 60:3

Eghtɨ Kantrin Igharazibar Gumazamiziba nɨn angazangarir kamɨn ganigh, nɨ bagh izam. Eghtɨ atriviba uaghan nɨn angazangarir ekiar kamɨn ganigh, dɨkavigh nɨ bagh izam.

Aisaia 45:14

Ikiavɨra Itir God kamaghɨn mɨgei, “Kantri Isip ko Itiopian dagɨaba ko biziba, da Israelia ian biziba. Eghtɨ apaniba kantri Sabean itir gumazir ruariba kalabus datɨgh, ia bagh me amadaghtɨ me izɨ, pura ian ingangarir gumazir kɨnibar mɨn ikiam. Egh me ian guabar uan teviba apɨrigh kamaghɨn mɨkɨm suam, ‘Bar guizbangɨra, God ia ko iti. A uabɨra bar guizbangɨra God, ezɨ godɨn tam ua itir puvatɨ!’ ”

Aisaia 43:6

Kɨ not ko sautɨn itir gumazamizibav kemeghtɨ, me ia ateghtɨ, ia uamategh izam. Kɨ kantrin bar saghuiamɨn itiba, me mɨkɨmtɨ, me nan otariba amadaghtɨ, me uamategh uan nguibamɨn izam. Kɨ gumazamizir nguazir kamɨn oteviba bar dar itiba, me mɨkɨmtɨ, me nan guiviba amadaghtɨ, me uamategh uan nguibamɨn izam.

Onger Akaba 68:29

Atriviba bizir aghuiba inigha iza, nɨn Dɨpenir Jerusalemɨn itimɨn nɨ ganɨdi.

1 Atriviba 10:1

Kantri Seban atrivir amizim kamaghɨn oraki, Ikiavɨra Itir God deraghavɨra Solomon gamizɨma a ziar ekiam iti. Kamaghɨn amizɨ, atrivir amizim Solomonɨn fofozim gɨfofoghasa azangsɨzir gavgavibar an azangsɨghasa izi.

Hibru 11:8

Ezɨ uaghan Abraham nɨghnɨzir gavgavim Godɨn iti. Egha bizir kam bagha God an diazir dughiamɨn, Abraham Godɨn akamɨn gɨn ghua, egha uan nguibam ataki. Egha a nguibar God a danɨngasa akam akɨrizimɨn ghu, kar guizɨn an nguibamra. Ezɨ Abraham fozir puvatɨ, a managh mangam. Egha a nɨghnɨzir gavgavim ikia egha a zui.

Jeremaia 39:16

“Nɨ Itiopian gumazim Ebetmelek bagh mangɨ, kamaghɨn a mɨkɨm suam: Ikiavɨra Itir Godɨn Gavgaviba Bar Itim, a Israelian God, a kamaghɨn mɨkeme, Kɨ fomɨra nguibar ekiar kam gasɨghasɨghasa, ezɨ datɨrɨghɨn nan akamɨn daghem otogham. Kɨ nguibar ekiar kam deraghvɨra a damuan kogham. Ezɨ nɨ uabɨ bizir kɨ damuasa mɨkemezibar ganam.

Aisaia 18:7

Dughiar kamɨn, Itiopian kantrin gumazamiziba bizir bar aghuiba inigh mangɨ Ikiavɨra Itir Godɨn Gavgaviba Bar Itim danɨngam. A kantrin gavgavim. A kantrin dɨpar bar avɨriba itim. Kantrin kamɨn itir gumazamiziba bar ruarigha, mɨkarziba bar dera. Egha kantrin kam, mɨdorozimɨn ziar ekiam iti, ezɨ kantrin igharaziba bar an atiatingi. Eghtɨ me uan bizir aghuiba inigh izɨ Saionɨn Mɨghsɨamɨn izam. Ikiavɨra Itir God, ua bagha danganir kam amɨsefe, eghtɨ gumazamiziba an izɨ, an ziam fam.

Godɨn Araziba 30:13

Egha uaghan akar kam ongarimɨn vongɨn itir puvatɨ, eghtɨ ia kamaghɨn azangan markɨ, ‘Tinara vongɨn mangɨ a inigh izɨva an gun mɨkɨmtɨ, e ti a baragh an gɨn mangam?’